हैंహైHaindavamஹிહિં
📍
Font Size:
വാരാഹീ സഹസ്രനാമ സ്തോത്രം
ദേവ്യുവാച –
ശ്രീകണ്ഠ കരുണാസിന്ധോ ദീനബന്ധോ ജഗത്പതേ ।
ഭൂതിഭൂഷിതസർവാംഗ പരാത്പരതര പ്രഭോ ॥ 1 ॥
കൃതാഞ്ജലിപുടാ ഭൂത്വാ പൃച്ഛാമ്യേകം ദയാനിധേ ।
ആദ്യാ യാ ചിത്സ്വരൂപാ യാ നിർവികാരാ നിരഞ്ജനാ ॥ 2 ॥
ബോധാതീതാ ജ്ഞാനഗമ്യാ കൂടസ്ഥാനന്ദവിഗ്രഹാ ।
അഗ്രാഹ്യാതീന്ദ്രിയാ ശുദ്ധാ നിരീഹാ സ്വാവഭാസികാ ॥ 3 ॥
ഗുണാതീതാ നിഷ്പ്രപഞ്ചാ ഹ്യവാങ്മനസഗോചരാ ।
പ്രകൃതിർജഗദുത്പത്തിസ്ഥിതിസംഹാരകാരിണീ ॥ 4 ॥
രക്ഷാർഥം ജഗതോ ദേവകാര്യാർഥം വാ സുരദ്വിഷാം ।
നാശായ ധത്തേ സാ ദേഹം തത്തത്കാര്യൈകസാധകം ॥ 5 ॥
തത്ര ഭൂധരണാർഥായ യജ്ഞവിസ്താരഹേതവേ ।
വിദ്യുത്കേശഹിരണ്യാക്ഷബാലാകാദിവധായ ച ॥ 6 ॥
ആവിർബഭൂവ യാ ശക്തിർഘോരാ ഭൂദാരരൂപിണീ ।
വാരാഹീ വികടാകാരാ ദാനവാസുരനാശിനീ ॥ 7 ॥
സദ്യഃ സിദ്ധികരീ ദേവീ ഘോരാദ്ഘോരതരാ ശിവാ ।
തസ്യാഃ സഹസ്രനാമാഖ്യം സ്തോത്രം മേ സമുദീരയ ॥ 8 ॥
കൃപാലേശോഽസ്തി മയി ചേദ്ഭാഗ്യം മേ യദി വാ ഭവേത് ।
അനുഗ്രാഹ്യാ യദ്യഹം സ്യാം തദാ വദ ദയാനിധേ ॥ 9 ॥
ഈശ്വര ഉവാച –
സാധു സാധു വരാരോഹേ ധന്യാ ബഹുമതാസി മേ ।
ശുശ്രൂഷയാ സമുത്പന്നാ ഭക്തിഃ ശ്രദ്ധാന്വിതാ തവ ॥ 10 ॥
സഹസ്രനാമ വാരാഹ്യാഃ സർവസിദ്ധിവിധായി ച ।
തവ ചേന്ന പ്രവക്ഷ്യാമി പ്രിയേ കസ്യ വദാമ്യഹം ॥ 11 ॥
കിന്തു ഗോപ്യം പ്രയത്നേന സംരക്ഷ്യം പ്രാണതോഽപി ച ।
വിശേഷതഃ കലിയുഗേ ന ദേയം യസ്യ കസ്യചിത് ।
സർവേഽന്യഥാ സിദ്ധിഭാജോ ഭവിഷ്യന്തി വരാനനേ ॥ 12 ॥
ഓം അസ്യ ശ്രീവാരാഹീസഹസ്രനാമസ്തോത്രസ്യ മഹാദേവ ഋഷിഃ । അനുഷ്ടുപ് ഛന്ദഃ । വാരാഹീ ദേവതാ । ഐം ബീജം । ക്രോം ശക്തിഃ । ഹും കീലകം । മമ സർവാർഥസിദ്ധ്യർഥേ ജപേ വിനിയോഗഃ ।
ഓം വാരാഹീ വാമനീ വാമാ ബഗലാ വാസവീ വസുഃ ।
വൈദേഹീ വീരസൂർബാലാ വരദാ വിഷ്ണുവല്ലഭാ ॥ 13 ॥
വന്ദിതാ വസുദാ വശ്യാ വ്യാത്താസ്യാ വഞ്ചിനീ ബലാ ।
വസുന്ധരാ വീതിഹോത്രാ വീതരാഗാ വിഹായസീ ॥ 14 ॥
സർവാ ഖനിപ്രിയാ കാമ്യാ കമലാ കാഞ്ചനീ രമാ ।
ധൂമ്രാ കപാലിനീ വാമാ കുരുകുല്ലാ കലാവതീ ॥ 15 ॥
യാമ്യാഽഽഗ്നേയീ ധരാ ധന്യാ ധർമിണീ ധ്യാനിനീ ധ്രുവാ ।
ധൃതിർലക്ഷ്മീർജയാ തുഷ്ടിഃ ശക്തിർമേധാ തപസ്വിനീ ॥ 16 ॥
വേധാ ജയാ കൃതിഃ കാന്തിഃ സ്വാഹാ ശാന്തിർദമാ രതിഃ ।
ലജ്ജാ മതിഃ സ്മൃതിർനിദ്രാ തന്ത്രാ ഗൗരീ ശിവാ സ്വധാ ॥ 17 ॥
ചണ്ഡീ ദുർഗാഽഭയാ ഭീമാ ഭാഷാ ഭാമാ ഭയാനകാ ।
ഭൂദാരാ ഭയഹാ ഭീരുർഭൈരവീ ഭംഗരാ ഭടീ ॥ 18 ॥
ഘുർഘുരാ ഘോഷണാ ഘോരാ ഘോഷിണീ ഘോണസംയുതാ ।
ഘനാഘനാ ഘർഘരാ ച ഘോണയുക്താഽഘനാശിനീ ॥ 19 ॥
പൂർവാഗ്നേയീ യാതു യാമ്യാ വായവ്യുത്തരവാരുണീ ।
ഐശാന്യൂർധ്വാധഃസ്ഥിതാ ച പൃഷ്ഠദക്ഷാഗ്രവാമഗാ ॥ 20 ॥
ഹൃന്നാഭിബ്രഹ്മരന്ധ്രാർകസ്വർഗപാതാലഭൂമിഗാ ।
ഐം ശ്രീഃ ഹ്രീഃ ക്ലീം തീർഥഗതിഃ പ്രീതിർധീർഗീഃ കലാഽവ്യയാ ॥ 21 ॥
ഋഗ്യജുഃ സാമരൂപാ ച പരാ പോത്രിണ്യുദുംബരാ ।
ഗദാസിശക്തിചാപേഷുശൂലചക്രർഷ്ടിധാരിണീ ॥ 22 ॥
ജരതീ യുവതീ ബാലാ ചതുരംഗബലോത്കടാ ।
സത്യാക്ഷരാ നിധിർനേത്രീ ധാത്രീ പോത്രീ പരാ പടുഃ ॥ 23 ॥
ക്ഷേത്രജ്ഞാ കമ്പിനീ ജ്യേഷ്ഠാ ദുരാധർഷാ ധുരന്ധരാ ।
മാലിനീ മാനിനീ മാതാ മാനനീയാ മനസ്വിനീ ॥ 24 ॥
മദോത്കടാ മന്യുകരീ മനുരൂപാ മനോജവാ ।
മേദസ്വിനീ മദ്യരതാ മധുപാ മംഗലാഽമരാ ॥ 25 ॥
മായാ മാതാഽഽമയഹരീ മൃഡാനീ മഹിലാ മൃതിഃ ।
മഹാദേവീ മോഹഹരീ മഞ്ജുർമൃത്യുഞ്ജയാഽമലാ ॥ 26 ॥
മാംസലാ മാനവാ മൂലാ മഹാരാത്രിർമദാലസാ ।
മൃഗാങ്കാ മേനകാ മാന്യാ മഹിഷഘ്നീ മദന്തികാ ॥ 27 ॥
മൂർഛാമോഹമൃഷാമോഘാമദമൃത്യുമലാപഹാ ।
സിംഹർക്ഷമഹിഷവ്യാഘ്രമൃഗക്രോഡാനനാ ധുനീ ॥ 28 ॥
ധരിണീ ധാരിണീ ധേനുർധരിത്രീ ധാവനീ ധവാ ।
ധർമധ്വനാ ധ്യാനപരാ ധനധാന്യധരാപ്രദാ ॥ 29 ॥
പാപദോഷരിപുവ്യാധിനാശിനീ സിദ്ധിദായിനീ ।
കലാകാഷ്ഠാക്ഷമാപക്ഷാഹസ്ത്രുടിശ്വാസരൂപിണീ ॥ 30 ॥
സമൃദ്ധാ സുഭുജാ രൗദ്രീ രാധാ രാഗാ രമാരണിഃ ।
രാമാ രതിപ്രിയാ രുഷ്ടാ രക്ഷിണീ രവിമധ്യഗാ ॥ 31 ॥
രജനീ രമണീ രേവാ രങ്കിനീ രഞ്ജിനീ രമാ ।
രോഷാ രോഷവതീ രൂക്ഷാ കരിരാജ്യപ്രദാ രതാ ॥ 32 ॥
രൂക്ഷാ രൂപവതീ രാസ്യാ രുദ്രാണീ രണപണ്ഡിതാ ।
ഗംഗാ ച യമുനാ ചൈവ സരസ്വതിസ്വസൂർമധുഃ ॥ 33 ॥
ഗണ്ഡകീ തുംഗഭദ്രാ ച കാവേരീ കൗശികീ പടുഃ ।
കട്വോരഗവതീ ചാരാ സഹസ്രാക്ഷാ പ്രതർദനാ ॥ 34 ॥
സർവജ്ഞാ ശാങ്കരീ ശാസ്ത്രീ ജടാധാരിണ്യയോരദാ ।
യാവനീ സൗരഭീ കുബ്ജാ വക്രതുണ്ഡാ വധോദ്യതാ ॥ 35 ॥
ചന്ദ്രാപീഡാ വേദവേദ്യാ ശംഖിനീ നീലലോഹിതാ ।
ധ്യാനാതീതാഽപരിച്ഛേദ്യാ മൃത്യുരൂപാ ത്രിവർഗദാ ॥ 36 ॥
അരൂപാ ബഹുരൂപാ ച നാനാരൂപാ നതാനനാ ।
വൃഷാകപിർവൃഷാരൂഢാ വൃഷേശീ വൃഷവാഹനാ ॥ 37 ॥
വൃഷപ്രിയാ വൃഷാവർതാ വൃഷപർവാ വൃഷാകൃതിഃ ।
കോദണ്ഡിനീ നാഗചൂഡാ ചക്ഷുഷ്യാ പരമാർഥികാ ॥ 38 ॥
ദുർവാസാ ദുർഗഹാ ദേവീ ദുരാവാസാ ദുരാരിഹാ ।
ദുർഗാ രാധാ ദുഃഖഹന്ത്രീ ദുരാരാധ്യാ ദവീയസീ ॥ 39 ॥
ദുരാവാസാ ദുഷ്പ്രഹസ്താ ദുഷ്പ്രകമ്പാ ദുരൂഹിണീ ।
സുവേണീ രമണീ ശ്യാമാ മൃഗവ്യാധാർഘതാപിനീ ॥ 40 ॥
ഉഗ്രാ താർക്ഷീ പാശുപതീ കൗണപീ കുണപാശനാ ।
കപർദിനീ കാമകാമാ കമനീയാ കലോജ്ജ്വലാ ॥ 41 ॥
കാസാവഹൃത്കാരകാനീ കംബുകണ്ഠീ കൃതാഗമാ ।
കർകശാ കാരണാ കാന്താ കല്പാഽകല്പാ കടങ്കടാ ॥ 42 ॥
ശ്മശാനനിലയാ ഭിന്നാ ഗജാരുഢാ ഗജാപഹാ ।
തത്പ്രിയാ തത്പരാ രായാ സ്വർഭാനുഃ കാലവഞ്ചിനീ ॥ 43 ॥
ശാഖാ വിശാഖാ ഗോശാഖാ സുശാഖാ ശേഷശാഖിനീ ।
വ്യംഗാ ശുഭാംഗാ വാമാംഗാ നീലാംഗാഽനംഗരൂപിണീ ॥ 44 ॥
സാംഗോപാംഗാ ച സാരംഗാ സുഭാംഗാ രംഗരൂപിണീ ।
ഭദ്രാ സുഭദ്രാ ഭദ്രാക്ഷീ സിംഹികാ വിനതാഽദിതിഃ ॥ 45 ॥
ഹൃദ്യാഽവദ്യാ സുപദ്യാ ച ഗദ്യപദ്യപ്രിയാ പ്രസൂഃ ।
ചർചികാ ഭോഗവത്യംബാ സാരസീ ശബരീ നടീ ॥ 46 ॥
യോഗിനീ പുഷ്കലാഽനന്താ പരാ സാംഖ്യാ ശചീ സതീ ।
നിമ്നഗാ നിമ്നനാഭിശ്ച സഹിഷ്ണുർജാഗൃതീ ലിപിഃ ॥ 47 ॥
ദമയന്തീ ദമീ ദണ്ഡോദ്ദണ്ഡിനീ ദാരദായികാ ।
ദീപിനീ ദാവിനീ ധാത്രീ ദക്ഷകന്യാ ദമ്യാ ദരത് ॥ 48 ॥
ദാഹിനീ ദ്രവിണീ ദർവീ ദണ്ഡിനീ ദണ്ഡനായികാ ।
ദാനപ്രിയാ ദോഷഹന്ത്രീ ദുഃഖദാരിദ്ര്യനാശിനീ ॥ 49 ॥
ദോഷദാ ദോഷകൃദ്ദോഗ്ധ്രീ ദോഹതീ ദേവികാഽധനാ ।
ദർവീകരീ ദുർവലിതാ ദുര്യുഗാഽദ്വയവാദിനീ ॥ 50 ॥
ചരാചരാഽനന്തവൃഷ്ടിരുന്മത്താ കമലാഽലസാ ।
താരിണീ താരകാന്താരാ പരമാത്മാബ്ജലോചനാ ॥ 51 ॥
ഇന്ദുർഹിരണ്യകവചാ വ്യവസ്ഥാ വ്യവസായികാ ।
ഈശനന്ദാ നദീ നാഗീ യക്ഷിണീ സർപിണീ വരീ ॥ 52 ॥
സുധാ സുരാ വിശ്വസഹാ സുവർണാംഗദധാരിണീ ।
ജനനീ പ്രീതിഭാഗേശീ സാമ്രാജ്ഞീ സംവിദുത്തമാ ॥ 53 ॥
അമേയാഽരിഷ്ടദമനീ പിംഗലാ ലിംഗധാരിണീ ।
ചാമുണ്ഡാ പ്ലാവിനീ ഹാലാ ബൃഹജ്ജ്യോതിരുരുക്രമാ ॥ 54 ॥
സുപ്രതീകാ ച സുഗ്രീവാ ഹവ്യവാഹാ പ്രലാപിനീ ।
നഭസ്യാ മാധവീ ജ്യേഷ്ഠാ ശിശിരാ ജ്വാലിനീ രുചിഃ ॥ 55 ॥
ശുക്ലാ ശുക്രാ ശുചാ ശോകാ ശുകീ ഭേകീ പികീ ബകീ ।
പൃഷദശ്വാ നഭോയോനിഃ സുപ്രതീകാ വിഭാവരീ ॥ 56 ॥
ഗർവിതാ ഗുർവിണീ ഗണ്യാ ഗുരുർഗുരുധരീ ഗയാ ।
ഗന്ധർവീ ഗണികാ ഗുന്ദ്രാ ഗാരുഡീ ഗോപികാഽഗ്രഗാ ॥ 57 ॥
ഗണേശീ ഗാമിനീ ഗന്താ ഗോപതിർഗന്ധിനീ ഗവീ ।
ഗർജിതാ ഗാനനീ ഗോനാ ഗോരക്ഷാ ഗോവിദാം ഗതിഃ ॥ 58 ॥
ഗ്രാഥികീ ഗ്രഥികൃദ്ഗോഷ്ഠീ ഗർഭരൂപാ ഗുണൈഷിണീ ।
പാരസ്കരീ പാഞ്ചനദാ ബഹുരൂപാ വിരൂപികാ ॥ 59 ॥
ഊഹാ വ്യൂഹാ ദുരൂഹാ ച സമ്മോഹാ മോഹഹാരിണീ ।
യജ്ഞവിഗ്രഹിണീ യജ്ഞാ യായജൂകാ യശസ്വിനീ ॥ 60 ॥
അഗ്നിഷ്ടോമാഽത്യഗ്നിഷ്ടോമാ വാജപേയശ്ച ഷോഡശീ ।
പുണ്ഡരീകാഽശ്വമേധശ്ച രാജസൂയശ്ച നാഭസഃ ॥ 61 ॥
സ്വിഷ്ടകൃദ്ബഹുസൗവർണോ ഗോസവശ്ച മഹാവ്രതഃ ।
വിശ്വജിദ്ബ്രഹ്മയജ്ഞശ്ച പ്രാജാപത്യഃ ശിലായവഃ ॥ 62 ॥
അശ്വക്രാന്താ രഥക്രാന്താ വിഷ്ണുക്രാന്താ വിഭാവസുഃ ।
സൂര്യക്രാന്താ ഗജക്രാന്താ ബലിഭിന്നാഗയജ്ഞകഃ ॥ 63 ॥
സാവിത്രീ ചാർധസാവിത്രീ സർവതോഭദ്രവാരുണാ ।
ആദിത്യാമയ ഗോദോഹ ഗവാമയ മൃഗാമയാ ॥ 64 ॥
സർപമയഃ കാലപിഞ്ജഃ കൗണ്ഡിന്യോപനാഗാഹലഃ ।
അഗ്നിവിദ്ദ്വാദശാഹസ്വോപാംശുഃ സോമ വിധോ ഹനഃ ॥ 65 ॥
അശ്വപ്രതിഗ്രഹോ ബർഹിരഥോഽഭ്യുദയ ഋദ്ധിരാട് ।
സർവസ്വദക്ഷിണോ ദീക്ഷാ സോമാഖ്യാ സമിദാഹ്വയഃ ॥ 66 ॥
കഠായനശ്ച ഗോദോഹഃ സ്വാഹാകാരസ്തനൂനപാത് ।
ദണ്ഡാ പുരുഷ മേധശ്ച ശ്യേനോ വജ്ര ഇഷുര്യമഃ ॥ 67 ॥
അംഗിരാഃ കങ്കഭേരുണ്ഡാ ചാന്ദ്രായണപരായണാ ।
ജ്യോതിഷ്ടോമഃ ഗുദോ ദർശോ നന്ദ്യാഖ്യഃ പൗർണമാസികഃ ॥ 68 ॥
ഗജപ്രതിഗ്രഹോ രാത്രിഃ സൗരഭഃ ശാങ്കലായനഃ ।
സൗഭാഗ്യകൃച്ച കാരീഷോ ബൈദലായനരാമഠൗ ॥ 69 ॥
ശോചിഷ്കാരീ നാചികേതഃ ശാന്തികൃത്പുഷ്ടികൃത്തഥാ ।
വൈനതേയോച്ചാടനൗ ച വശീകരണ മാരണേ ॥ 70 ॥
ത്രൈലോക്യമോഹനോ വീരഃ കന്ദർപബലശാതനഃ ।
ശംഖചൂഡോ ഗജച്ഛായോ രൗദ്രാഖ്യോ വിഷ്ണുവിക്രമഃ ॥ 71 ॥
ഭൈരവഃ കവഹാഖ്യശ്ചാവഭൃഥോഽഷ്ടകപാലകഃ ।
ശ്രൗഷട് വൗഷട് വഷട്കാരഃ പാകസംസ്ഥാ പരിശ്രുതീ ॥ 72 ॥
ചയനോ നരമേധശ്ച കാരീരീ രത്നദാനികാ ।
സൗത്രാമണീ ച ഭാരുന്ദാ ബാർഹസ്പത്യോ ബലംഗമഃ ॥ 73 ॥
പ്രചേതാഃ സർവസത്രശ്ച ഗജമേധഃ കരംഭകഃ ।
ഹവിഃസംസ്ഥാ സോമസംസ്ഥാ പാകസംസ്ഥാ ഗരുത്മതീ ॥ 74 ॥
സത്യസൂര്യശ്ചമസഃ സ്രുക് സ്രുവോലൂഖല മേക്ഷണീ ।
ചപലോ മന്ഥനീ മേഢീ യൂപഃ പ്രാഗ്വംശകുഞ്ചികാ ॥ 75 ॥
രശ്മിരംശുശ്ച ദോഭ്യശ്ച വാരുണോദഃ പവിഃ കുഥാ ।
ആപ്തോര്യാമോ ദ്രോണകലശോ മൈത്രാവരുണ ആശ്വിനഃ ॥ 76 ॥
പാത്നീവതശ്ച മന്ഥീ ച ഹാരിയോജന ഏവ ച ।
പ്രതിപ്രസ്ഥാനശുക്രൗ ച സാമിധേനീ സമിത്സമാ ॥ 77 ॥
ഹോതാഽധ്വര്യുസ്തഥോദ്ഗാതാ നേതാ ത്വഷ്ടാ ച യോത്രികാ ।
ആഗ്നീധ്രോഽച്ഛാവകാഷ്ടാവഗ്ഗ്രാവസ്തുത്പ്രതർദകഃ ॥ 78 ॥
സുബ്രഹ്മണ്യോ ബ്രാഹ്മണശ്ച മൈത്രാവരുണവാരുണൗ ।
പ്രസ്തോതാ പ്രതിപ്രസ്ഥാതാ യജമാനോ ധ്രുവന്ത്രികാ ॥ 79 ॥
ആമിക്ഷാ പൃഷദാജ്യം ച ഹവ്യം കവ്യം ചരുഃ പയഃ ।
ജുഹുദ്ഘ്രാവോപഭൃദ്ബ്രഹ്മാ ത്രയീ ത്രേതാ തരസ്വിനീ ॥ 80 ॥
പുരോഡാശഃ പശൂകർഷഃ പ്രോക്ഷണീ ബ്രഹ്മയജ്ഞിനീ ।
അഗ്നിജിഹ്വാ ദർഭരോമാ ബ്രഹ്മശീർഷാ മഹോദരീ ॥ 81 ॥
അമൃതപ്രാശികാ നാരായണീ നഗ്നാ ദിഗംബരാ ।
ഓങ്കാരിണീ ചതുർവേദരൂപാ ശ്രുതിരനുൽബണാ ॥ 82 ॥
അഷ്ടാദശഭുജാ രംഭാ സത്യാ ഗഗനചാരിണീ ।
ഭീമവക്ത്രാ മഹാവക്ത്രാ കീർതിരാകൃഷ്ണപിംഗലാ ॥ 83 ॥
കൃഷ്ണമൂർധാ മഹാമൂർധാ ഘോരമൂർധാ ഭയാനനാ ।
ഘോരാനനാ ഘോരജിഹ്വാ ഘോരരാവാ മഹാവ്രതാ ॥ 84 ॥
ദീപ്താസ്യാ ദീപ്തനേത്രാ ച ചണ്ഡപ്രഹരണാ ജടീ ।
സുരഭീ സൗലഭീ വീചീ ഛായാ സന്ധ്യാ ച മാംസലാ ॥ 85 ॥
കൃഷ്ണാ കൃഷ്ണാംബരാ കൃഷ്ണശാർങ്ഗിണീ കൃഷ്ണവല്ലഭാ ।
ത്രാസിനീ മോഹിനീ ദ്വേഷ്യാ മൃത്യുരൂപാ ഭയാപഹാ ॥ 86 ॥
ഭീഷണാ ദാനവേന്ദ്രഘ്നീ കല്പകർതാ ക്ഷയങ്കരീ ।
അഭയാ പൃഥിവീ സാധ്വീ കേശിനീ വ്യാധിജന്മഹാ ॥ 87 ॥
അക്ഷോഭ്യാഽഽഹ്ലാദിനീ കന്യാ പവിത്രാ രോപിണീ ശുഭാ ।
കന്യാദേവീ സുരാദേവീ ഭീമാദേവീ മദന്തികാ ॥ 88 ॥
ശാകംഭരീ മഹാശ്വേതാ ധൂമ്രാ ധൂമ്രേശ്വരീശ്വരീ ।
വീരഭദ്രാ മഹാഭദ്രാ മഹാദേവീ മഹാസുരീ ॥ 89 ॥
ശ്മശാനവാസിനീ ദീപ്താ ചിതിസംസ്ഥാ ചിതിപ്രിയാ ।
കപാലഹസ്താ ഖട്വാംഗീ ഖഡ്ഗിനീ ശൂലിനീ ഹലീ ॥ 90 ॥
കാന്താരിണീ മഹായോഗീ യോഗമാർഗാ യുഗഗ്രഹാ ।
ധൂമ്രകേതുർമഹാസ്യായുര്യുഗാനാം പരിവർതിനീ ॥ 91 ॥
അംഗാരിണ്യങ്കുശകരാ ഘണ്ടാവർണാ ച ചക്രിണീ ।
വേതാലീ ബ്രഹ്മവേതാലീ മഹാവേതാലികാ തഥാ ॥ 92 ॥
വിദ്യാരാജ്ഞീ മോഹരാജ്ഞീ മഹാരാജ്ഞീ മഹോദരീ ।
ഭൂതം ഭവ്യം ഭവിഷ്യം ച സാംഖ്യം യോഗസ്തപോ ദമഃ ॥ 93 ॥
അധ്യാത്മം ചാധിദൈവം ചാധിഭൂതാംശ ഏവ ച ।
ഘണ്ടാരവാ വിരൂപാക്ഷീ ശിഖിവിച്ഛ്രീചയപ്രിയാ ॥ 94 ॥
ഖഡ്ഗശൂലഗദാഹസ്താ മഹിഷാസുരമർദിനീ ।
മാതംഗീ മത്തമാതംഗീ കൗശികീ ബ്രഹ്മവാദിനീ ॥ 95 ॥
ഉഗ്രതേജാ സിദ്ധസേനാ ജൃംഭിണീ മോഹിനീ തഥാ ।
ജയാ ച വിജയാ ചൈവ വിനതാ കദ്രുരേവ ച ॥ 96 ॥
ധാത്രീ വിധാത്രീ വിക്രാന്താ ധ്വസ്താ മൂർഛാ ച മൂർഛനീ ।
ദമനീ ധർമിണീ ദമ്യാ ഛേദിനീ താപിനീ തപീ ॥ 97 ॥
ബന്ധിനീ ബാധിനീ ബന്ധാ ബോധാതീതാ ബുധപ്രിയാ ।
ഹരിണീ ഹാരിണീ ഹന്ത്രീ ധരിണീ ധാരിണീ ധരാ ॥ 98 ॥
വിസാധിനീ സാധിനീ ച സന്ധ്യാ സംഗോപനീ പ്രിയാ ।
രേവതീ കാലകർണീ ച സിദ്ധിർലക്ഷ്മീരരുന്ധതീ ॥ 99 ॥
ധർമപ്രിയാ ധർമരതിഃ ധർമിഷ്ഠാ ധർമചാരിണീ ।
വ്യുഷ്ടിഃ ഖ്യാതിഃ സിനീവാലീ കുഹൂഃ ഋതുമതീ മൃതിഃ ॥ 100 ॥
ത്വാഷ്ട്രീ വൈരോചനീ മൈത്രീ നീരജാ കൈടഭേശ്വരീ ।
ഭ്രമണീ ഭ്രാമണീ ഭ്രാമാ ഭ്രമരീ ഭ്രാമരീ ഭ്രമാ ॥ 101 ॥
നിഷ്കലാ കലഹാ നീതാ കൗലാകാരാ കലേബരാ ।
വിദ്യുജ്ജിഹ്വാ വർഷിണീ ച ഹിരണ്യാക്ഷനിപാതിനീ ॥ 102 ॥
ജിതകാമാ കാമൃഗയാ കോലാ കല്പാംഗിനീ കലാ ।
പ്രധാനാ താരകാ താരാ ഹിതാത്മാ ഹിതഭേദിനീ ॥ 103 ॥
ദുരക്ഷരാ പരബ്രഹ്മ മഹാദാനാ മഹാഹവാ ।
വാരുണീ വ്യരുണീ വാണീ വീണാ വേണീ വിഹംഗമാ ॥ 104 ॥
മോദപ്രിയാ മോദകിനീ പ്ലവനീ പ്ലാവിനീ പ്ലുതിഃ ।
അജരാ ലോഹിതാ ലാക്ഷാ പ്രതപ്താ വിശ്വഭോജിനീ ॥ 105 ॥
മനോ ബുദ്ധിരഹങ്കാരഃ ക്ഷേത്രജ്ഞാ ക്ഷേത്രപാലികാ ।
ചതുർവേദാ ചതുർഭാരാ ചതുരന്താ ചരുപ്രിയാ ॥ 106 ॥
ചർവിണീ ചോരിണീ ചാരീ ശാങ്കരീ ചർമഭൈരവീ ।
നിർലേപാ നിഷ്പ്രപഞ്ചാ ച പ്രശാന്താ നിത്യവിഗ്രഹാ ॥ 107 ॥
സ്തവ്യാ സ്തവപ്രിയാ വ്യാലാ ഗുരുരാശ്രിതവത്സലാ ।
നിഷ്കലങ്കാ നിരാലംബാ നിർദ്വന്ദ്വാ നിഷ്പരിഗ്രഹാ ॥ 108 ॥
നിർഗുണാ നിർമലാ നിത്യാ നിരീഹാ നിരഘാ നവാ ।
നിരിന്ദ്രിയാ നിരാഭാസാ നിർമോഹാ നീതിനായികാ ॥ 109 ॥
നിരിന്ധനാ നിഷ്കലാ ച ലീലാകാരാ നിരാമയാ ।
മുണ്ഡാ വിരൂപാ വികൃതാ പിംഗലാക്ഷീ ഗുണോത്തരാ ॥ 110 ॥
പദ്മഗർഭാ മഹാഗർഭാ വിശ്വഗർഭാ വിലക്ഷണാ ।
പരമാത്മാ പരേശാനീ പരാ പാരാ പരന്തപാ ॥ 111 ॥
സംസാരസേതുഃ ക്രൂരാക്ഷീ മൂർഛാമുക്താ മനുപ്രിയാ ।
വിസ്മയാ ദുർജയാ ദക്ഷാ ദനുഹന്ത്രീ ദയാലയാ ॥ 112 ॥
പരബ്രഹ്മാഽഽനന്ദരൂപാ സർവസിദ്ധിവിധായിനീ । ഓം ।
ഏവമുഡ്ഡാമരാതന്ത്രാന്മയോദ്ധൃത്യ പ്രകാശിതം ॥ 113 ॥
ഗോപനീയം പ്രയത്നേന നാഖ്യേയം യസ്യ കസ്യചിത് ।
യദീച്ഛസി ദ്രുതം സിദ്ധിമൈശ്വര്യം ചിരജീവിതാം ॥ 114 ॥
ആരോഗ്യം നൃപസമ്മാനം ദാനാന്യസ്യ തു കീർതയേത് ।
നാമ്നാം സഹസ്രം വാരാഹ്യാഃ മയാ തേ സമുദീരിതം ॥ 115 ॥
യഃ പഠേച്ഛൃണുയാദ്വാപി സർവപാപൈഃ പ്രമുച്യതേ ।
അശ്വമേധസഹസ്രസ്യ വാജപേയശതസ്യ ച ॥ 116 ॥
പുണ്ഡരീകായുതസ്യാപി ഫലം പാഠാത് പ്രജായതേ ।
പഠതഃ സർവഭാവേന സർവാ സ്യുഃ സിദ്ധയഃ കരേ ॥ 117 ॥
ജായതേ മഹദൈശ്വര്യം സർവേഷാം ദയിതോ ഭവേത് ।
ഘനസാരായതേ വഹ്നിരഗാധോബ്ധിഃ കണായതേ ॥ 118 ॥
സിദ്ധയശ്ച തൃണായന്തേ വിഷമപ്യമൃതായതേ ।
ഹാരായന്തേ മഹാസർപാഃ സിംഹഃ ക്രീഡാമൃഗായതേ ॥ 119 ॥
ദാസായന്തേ മഹീപാലാ ജഗന്മിത്രായതേഽഖിലം ।
തസ്മാന്നാമ്നാം സഹസ്രേണ സ്തുതാ സാ ജഗദംബികാ ।
പ്രയച്ഛത്യഖിലാൻ കാമാൻ ദേഹാന്തേ പരമാം ഗതിം ॥ 120 ॥
ഇതി ഉഡ്ഡാമരതന്ത്രേ ശ്രീ ആദിവാരാഹീ സഹസ്രനാമ സ്തോത്രം ॥
Recite with devotion and pure heart
Regular practice brings spiritual benefits