ഓം അസ്യ ശ്രീ രാമരക്ഷാ സ്തോത്രമന്ത്രസ്യ ബുധകൗശിക ഋഷിഃ ശ്രീ സീതാരാമ ചന്ദ്രോദേവതാ അനുഷ്ടുപ് ഛന്ദഃ സീതാ ശക്തിഃ ശ്രീമദ് ഹനുമാൻ കീലകം ശ്രീരാമചന്ദ്ര പ്രീത്യർഥേ രാമരക്ഷാ സ്തോത്രജപേ വിനിയോഗഃ ॥ ധ്യാനം ധ്യായേദാജാനുബാഹും ധൃതശര ധനുഷം ബദ്ധ പദ്മാസനസ്ഥം പീതം വാസോവസാനം നവകമല ദലസ്പർഥി നേത്രം പ്രസന്നം । വാമാങ്കാരൂഢ സീതാമുഖ കമലമിലല്ലോചനം നീരദാഭം നാനാലങ്കാര ദീപ്തം ദധതമുരു ജടാമണ്ഡലം രാമചന്ദ്രം ॥ സ്തോത്രം ചരിതം രഘുനാഥസ്യ ശതകോടി പ്രവിസ്തരം । ഏകൈകമക്ഷരം പുംസാം മഹാപാതക നാശനം ॥ 1 ॥ ധ്യാത്വാ നീലോത്പല ശ്യാമം രാമം രാജീവലോചനം । ജാനകീ ലക്ഷ്മണോപേതം ജടാമുകുട മണ്ഡിതം ॥ 2 ॥ സാസിതൂണ ധനുർബാണ പാണിം നക്തം ചരാന്തകം । സ്വലീലയാ ജഗത്ത്രാതു മാവിർഭൂതമജം വിഭും ॥ 3 ॥ രാമരക്ഷാം പഠേത്പ്രാജ്ഞഃ പാപഘ്നീം സർവകാമദാം । ശിരോ മേ രാഘവഃ പാതു ഫാലം (ഭാലം) ദശരഥാത്മജഃ ॥ 4 ॥ കൗസല്യേയോ ദൃശൗപാതു വിശ്വാമിത്രപ്രിയഃ ശൃതീ । ഘ്രാണം പാതു മഖത്രാതാ മുഖം സൗമിത്രിവത്സലഃ ॥ 5 ॥ ജിഹ്വാം വിദ്യാനിധിഃ പാതു കണ്ഠം ഭരതവന്ദിതഃ । സ്കന്ധൗ ദിവ്യായുധഃ പാതു ഭുജൗ ഭഗ്നേശകാർമുകഃ ॥ 6 ॥ കരൗ സീതാപതിഃ പാതു ഹൃദയം ജാമദഗ്ന്യജിത് । മധ്യം പാതു ഖരധ്വംസീ നാഭിം ജാംബവദാശ്രയഃ ॥ 7 ॥ സുഗ്രീവേശഃ കടിം പാതു സക്ഥിനീ ഹനുമത്-പ്രഭുഃ । ഊരൂ രഘൂത്തമഃ പാതു രക്ഷഃകുല വിനാശകൃത് ॥ 8 ॥ ജാനുനീ സേതുകൃത്-പാതു ജംഘേ ദശമുഖാന്തകഃ । പാദൗ വിഭീഷണശ്രീദഃ പാതു രാമോഽഖിലം വപുഃ ॥ 9 ॥ ഏതാം രാമബലോപേതാം രക്ഷാം യഃ സുകൃതീ പഠേത് । സ ചിരായുഃ സുഖീ പുത്രീ വിജയീ വിനയീ ഭവേത് ॥ 10 ॥ പാതാല-ഭൂതല-വ്യോമ-ചാരിണ-ശ്ചദ്മ-ചാരിണഃ । ന ദ്രഷ്ടുമപി ശക്താസ്തേ രക്ഷിതം രാമനാമഭിഃ ॥ 11 ॥ രാമേതി രാമഭദ്രേതി രാമചന്ദ്രേതി വാ സ്മരൻ । നരോ ന ലിപ്യതേ പാപൈർഭുക്തിം മുക്തിം ച വിന്ദതി ॥ 12 ॥ ജഗജ്ജൈത്രൈക മന്ത്രേണ രാമനാമ്നാഭി രക്ഷിതം । യഃ കണ്ഠേ ധാരയേത്തസ്യ കരസ്ഥാഃ സർവസിദ്ധയഃ ॥ 13 ॥ വജ്രപഞ്ജര നാമേദം യോ രാമകവചം സ്മരേത് । അവ്യാഹതാജ്ഞഃ സർവത്ര ലഭതേ ജയമംഗലം ॥ 14 ॥ ആദിഷ്ടവാൻ-യഥാ സ്വപ്നേ രാമരക്ഷാമിമാം ഹരഃ । തഥാ ലിഖിതവാൻ-പ്രാതഃ പ്രബുദ്ധൗ ബുധകൗശികഃ ॥ 15 ॥ ആരാമഃ കല്പവൃക്ഷാണാം വിരാമഃ സകലാപദാം । അഭിരാമ-സ്ത്രിലോകാനാം രാമഃ ശ്രീമാൻ സ നഃ പ്രഭുഃ ॥ 16 ॥ തരുണൗ രൂപസമ്പന്നൗ സുകുമാരൗ മഹാബലൗ । പുണ്ഡരീക വിശാലാക്ഷൗ ചീരകൃഷ്ണാജിനാംബരൗ ॥ 17 ॥ ഫലമൂലാശിനൗ ദാന്തൗ താപസൗ ബ്രഹ്മചാരിണൗ । പുത്രൗ ദശരഥസ്യൈതൗ ഭ്രാതരൗ രാമലക്ഷ്മണൗ ॥ 18 ॥ ശരണ്യൗ സർവസത്ത്വാനാം ശ്രേഷ്ഠൗ സർവധനുഷ്മതാം । രക്ഷഃകുല നിഹന്താരൗ ത്രായേതാം നോ രഘൂത്തമൗ ॥ 19 ॥ ആത്ത സജ്യ ധനുഷാ വിഷുസ്പൃശാ വക്ഷയാശുഗ നിഷംഗ സംഗിനൗ । രക്ഷണായ മമ രാമലക്ഷണാവഗ്രതഃ പഥി സദൈവ ഗച്ഛതാം ॥ 20 ॥ സന്നദ്ധഃ കവചീ ഖഡ്ഗീ ചാപബാണധരോ യുവാ । ഗച്ഛൻ മനോരഥാന്നശ്ച (മനോരഥോഽസ്മാകം) രാമഃ പാതു സ ലക്ഷ്മണഃ ॥ 21 ॥ രാമോ ദാശരഥി ശ്ശൂരോ ലക്ഷ്മണാനുചരോ ബലീ । കാകുത്സഃ പുരുഷഃ പൂർണഃ കൗസല്യേയോ രഘൂത്തമഃ ॥ 22 ॥ വേദാന്തവേദ്യോ യജ്ഞേശഃ പുരാണ പുരുഷോത്തമഃ । ജാനകീവല്ലഭഃ ശ്രീമാനപ്രമേയ പരാക്രമഃ ॥ 23 ॥ ഇത്യേതാനി ജപേന്നിത്യം മദ്ഭക്തഃ ശ്രദ്ധയാന്വിതഃ । അശ്വമേധാധികം പുണ്യം സമ്പ്രാപ്നോതി ന സംശയഃ ॥ 24 ॥ രാമം ദൂർവാദല ശ്യാമം പദ്മാക്ഷം പീതവാസസം । സ്തുവന്തി നാമഭി-ര്ദിവ്യൈർന തേ സംസാരിണോ നരാഃ ॥ 25 ॥ രാമം ലക്ഷ്മണ പൂർവജം രഘുവരം സീതാപതിം സുന്ദരം കാകുത്സ്ഥം കരുണാർണവം ഗുണനിധിം വിപ്രപ്രിയം ധാർമികം । രാജേന്ദ്രം സത്യസന്ധം ദശരഥതനയം ശ്യാമലം ശാന്തമൂർതിം വന്ദേ ലോകാഭിരാമം രഘുകുല തിലകം രാഘവം രാവണാരിം ॥ 26 ॥ രാമായ രാമഭദ്രായ രാമചന്ദ്രായ വേധസേ । രഘുനാഥായ നാഥായ സീതായാഃ പതയേ നമഃ ॥ 27 ॥ ശ്രീരാമ രാമ രഘുനന്ദന രാമ രാമ ശ്രീരാമ രാമ ഭരതാഗ്രജ രാമ രാമ । ശ്രീരാമ രാമ രണകർകശ രാമ രാമ ശ്രീരാമ രാമ ശരണം ഭവ രാമ രാമ ॥ 28 ॥ ശ്രീരാമ ചന്ദ്ര ചരണൗ മനസാ സ്മരാമി ശ്രീരാമ ചന്ദ്ര ചരണൗ വചസാ ഗൃഹ്ണാമി । ശ്രീരാമ ചന്ദ്ര ചരണൗ ശിരസാ നമാമി ശ്രീരാമ ചന്ദ്ര ചരണൗ ശരണം പ്രപദ്യേ ॥ 29 ॥ മാതാ രാമോ മത്-പിതാ രാമചന്ദ്രഃ സ്വാമീ രാമോ മത്-സഖാ രാമചന്ദ്രഃ । സർവസ്വം മേ രാമചന്ദ്രോ ദയാലുഃ നാന്യം ജാനേ നൈവ ജാനേ ന ജാനേ ॥ 30 ॥ ദക്ഷിണേ ലക്ഷ്മണോ യസ്യ വാമേ ച (തു) ജനകാത്മജാ । പുരതോ മാരുതിര്യസ്യ തം വന്ദേ രഘുനന്ദനം ॥ 31 ॥ ലോകാഭിരാമം രണരംഗധീരം രാജീവനേത്രം രഘുവംശനാഥം । കാരുണ്യരൂപം കരുണാകരം തം ശ്രീരാമചന്ദ്രം ശരണ്യം പ്രപദ്യേ ॥ 32 ॥ മനോജവം മാരുത തുല്യ വേഗം ജിതേന്ദ്രിയം ബുദ്ധിമതാം വരിഷ്ടം । വാതാത്മജം വാനരയൂഥ മുഖ്യം ശ്രീരാമദൂതം ശരണം പ്രപദ്യേ ॥ 33 ॥ കൂജന്തം രാമരാമേതി മധുരം മധുരാക്ഷരം । ആരുഹ്യകവിതാ ശാഖാം വന്ദേ വാല്മീകി കോകിലം ॥ 34 ॥ ആപദാമപഹർതാരം ദാതാരം സർവസമ്പദാം । ലോകാഭിരാമം ശ്രീരാമം ഭൂയോഭൂയോ നമാമ്യഹം ॥ 35 ॥ ഭർജനം ഭവബീജാനാമർജനം സുഖസമ്പദാം । തർജനം യമദൂതാനാം രാമ രാമേതി ഗർജനം ॥ 36 ॥ രാമോ രാജമണിഃ സദാ വിജയതേ രാമം രമേശം ഭജേ രാമേണാഭിഹതാ നിശാചരചമൂ രാമായ തസ്മൈ നമഃ । രാമാന്നാസ്തി പരായണം പരതരം രാമസ്യ ദാസോസ്മ്യഹം രാമേ ചിത്തലയഃ സദാ ഭവതു മേ ഭോ രാമ മാമുദ്ധര ॥ 37 ॥ ശ്രീരാമ രാമ രാമേതി രമേ രാമേ മനോരമേ । സഹസ്രനാമ തത്തുല്യം രാമ നാമ വരാനനേ ॥ 38 ॥ ഇതി ശ്രീബുധകൗശികമുനി വിരചിതം ശ്രീരാമ രക്ഷാസ്തോത്രം സമ്പൂർണം । ശ്രീരാമ ജയരാമ ജയജയരാമ ।