asya śrīrāmacandra stavarājastotramantrasya sanatkumāraṛṣiḥ । śrīrāmo devatā । anuṣṭup chandaḥ । sītā bījam । hanumān śaktiḥ । śrīrāmaprītyarthe jape viniyogaḥ ॥ sūta uvāca । sarvaśāstrārthatattvajñaṃ vyāsaṃ satyavatīsutam । dharmaputraḥ prahṛṣṭātmā pratyuvāca munīśvaram ॥ 1 ॥ yudhiṣṭhira uvāca । bhagavanyogināṃ śreṣṭha sarvaśāstraviśārada । kiṃ tattvaṃ kiṃ paraṃ jāpyaṃ kiṃ dhyānam muktisādhanam ॥ 2 ॥ śrotumicchāmi tatsarvaṃ brūhi me munisattama ॥ 3 ॥ vedavyāsa uvāca । dharmarāja mahābhāga śṛṇu vakṣyāmi tattvataḥ ॥ 4 ॥ yatparaṃ yadguṇātītaṃ yajjyotiramalaṃ śivam । tadeva paramaṃ tattvaṃ kaivalyapadakāraṇam ॥ 5 ॥ śrīrāmeti paraṃ jāpyaṃ tārakaṃ brahmasañjñakam । brahmahatyādipāpaghnamiti vedavido viduḥ ॥ 6 ॥ śrīrāma rāmeti janā ye japanti ca sarvadā । teṣāṃ bhuktiśca muktiśca bhaviṣyati na saṃśayaḥ ॥ 7 ॥ stavarājaṃ purā proktaṃ nāradena ca dhīmatā । tatsarvaṃ sampravakṣyāmi haridhyānapuraḥsaram ॥ 8 ॥ tāpatrayāgniśamanaṃ sarvāghaughanikṛntanam । dāridryaduḥkhaśamanaṃ sarvasampatkaraṃ śivam ॥ 9 ॥ vijñānaphaladaṃ divyaṃ mokṣaikaphalasādhanam । namaskṛtya pravakṣyāmi rāmaṃ kṛṣṇaṃ jaganmayam ॥ 10 ॥ ayodhyānagare ramye ratnamaṇḍapamadhyage । smaretkalpatarormūle ratnasiṃhāsanaṃ śubham ॥ 11 ॥ tanmadhye'ṣṭadalaṃ padmaṃ nānāratnaiśca veṣṭitam । smarenmadhye dāśarathiṃ sahasrādityatejasam ॥ 12 ॥ pituraṅkagataṃ rāmamindranīlamaṇiprabham । komalāṅgaṃ viśālākṣaṃ vidyudvarṇāmbarāvṛtam ॥ 13 ॥ bhānukoṭipratīkāśa kirīṭena virājitam । ratnagraiveyakeyūraratnakuṇḍalamaṇḍitam ॥ 14 ॥ ratnakaṅkaṇamañjīrakaṭisūtrairalaṅkṛtam । śrīvatsakaustubhoraskaṃ muktāhāropaśobhitam ॥ 15 ॥ divyaratnasamāyuktamudrikābhiralaṅkṛtam । rāghavaṃ dvibhujaṃ bālaṃ rāmamīṣatsmitānanam ॥ 16 ॥ tulasīkundamandārapuṣpamālyairalaṅkṛtam । karpūrāgurukastūrīdivyagandhānulepanam ॥ 17 ॥ yogaśāstreṣvabhirataṃ yogeśaṃ yogadāyakam । sadā bharatasaumitriśatrughnairupaśobhitam ॥ 18 ॥ vidyādharasurādhīśasiddhagandharvakinnaraiḥ । yogīndrairnāradādyaiśca stūyamānamaharniśam ॥ 19 ॥ viśvāmitravasiṣṭhādimunibhiḥ parisevitam । sanakādimuniśreṣṭhairyogivṛndaiśca sevitam ॥ 20 ॥ rāmaṃ raghuvaraṃ vīraṃ dhanurvedaviśāradam । maṅgalāyatanaṃ devaṃ rāmaṃ rājīvalocanam ॥ 21 ॥ sarvaśāstrārthatattvajñamānandakarasundaram । kausalyānandanaṃ rāmaṃ dhanurbāṇadharaṃ harim ॥ 22 ॥ evaṃ sañcintayanviṣṇuṃ yajjyotiramalaṃ vibhum । prahṛṣṭamānaso bhūtvā munivaryaḥ sa nāradaḥ ॥ 23 ॥ sarvalokahitārthāya tuṣṭāva raghunandanam । kṛtāñjalipuṭo bhūtvā cintayannadbhutaṃ harim ॥ 24 ॥ yadekaṃ yatparaṃ nityaṃ yadanantaṃ cidātmakam । yadekaṃ vyāpakaṃ loke tadrūpaṃ cintayāmyaham ॥ 25 ॥ vijñānahetuṃ vimalāyatākṣaṃ prajñānarūpaṃ svasukhaikahetum । śrīrāmacandraṃ harimādidevaṃ parātparaṃ rāmamahaṃ bhajāmi ॥ 26 ॥ kaviṃ purāṇaṃ puruṣaṃ purastā- -tsanātanaṃ yoginamīśitāram । aṇoraṇīyāṃsamanantavīryaṃ prāṇeśvaraṃ rāmamasau dadarśa ॥ 27 ॥ nārada uvāca । nārāyaṇaṃ jagannāthamabhirāmaṃ jagatpatim । kaviṃ purāṇaṃ vāgīśaṃ rāmaṃ daśarathātmajam ॥ 28 ॥ rājarājaṃ raghuvaraṃ kausalyānandavardhanam । bhargaṃ vareṇyaṃ viśveśaṃ raghunāthaṃ jagadgurum ॥ 29 ॥ satyaṃ satyapriyaṃ śreṣṭhaṃ jānakīvallabhaṃ vibhum । saumitripūrvajaṃ śāntaṃ kāmadaṃ kamalekṣaṇam ॥ 30 ॥ ādityaṃ ravimīśānaṃ ghṛṇiṃ sūryamanāmayam । ānandarūpiṇaṃ saumyaṃ rāghavaṃ karuṇāmayam ॥ 31 ॥ jāmadagniṃ tapomūrtiṃ rāmaṃ paraśudhāriṇam । vākpatiṃ varadaṃ vācyaṃ śrīpatiṃ pakṣivāhanam ॥ 32 ॥ śrīśārṅgadhāriṇaṃ rāmaṃ cinmayānandavigraham । haladhṛgviṣṇumīśānaṃ balarāmaṃ kṛpānidhim ॥ 33 ॥ śrīvallabhaṃ kṛpānāthaṃ jaganmohanamacyutam । matsyakūrmavarāhādirūpadhāriṇamavyayam ॥ 34 ॥ vāsudevaṃ jagadyonimanādinidhanaṃ harim । govindaṃ gopatiṃ viṣṇuṃ gopījanamanoharam ॥ 35 ॥ gogopālaparīvāraṃ gopakanyāsamāvṛtam । vidyutpuñjapratīkāśaṃ rāmaṃ kṛṣṇaṃ jaganmayam ॥ 36 ॥ gogopikāsamākīrṇaṃ veṇuvādanatatparam । kāmarūpaṃ kalāvantaṃ kāminīkāmadaṃ vibhum ॥ 37 ॥ manmathaṃ mathurānāthaṃ mādhavaṃ makaradhvajam । śrīdharaṃ śrīkaraṃ śrīśaṃ śrīnivāsaṃ parātparam ॥ 38 ॥ bhūteśaṃ bhūpatiṃ bhadraṃ vibhūtiṃ bhūmibhūṣaṇam । sarvaduḥkhaharaṃ vīraṃ duṣṭadānavavairiṇam ॥ 39 ॥ śrīnṛsiṃhaṃ mahābāhuṃ mahāntaṃ dīptatejasam । cidānandamayaṃ nityaṃ praṇavaṃ jyotirūpiṇam ॥ 40 ॥ ādityamaṇḍalagataṃ niścitārthasvarūpiṇam । bhaktipriyaṃ padmanetraṃ bhaktānāmīpsitapradam ॥ 41 ॥ kausalyeyaṃ kalāmūrtiṃ kākutsthaṃ kamalāpriyam । siṃhāsane samāsīnaṃ nityavratamakalmaṣam ॥ 42 ॥ viśvāmitrapriyaṃ dāntaṃ svadāraniyatavratam । yajñeśaṃ yajñapuruṣaṃ yajñapālanatatparam ॥ 43 ॥ satyasandhaṃ jitakrodhaṃ śaraṇāgatavatsalam । sarvakleśāpaharaṇaṃ vibhīṣaṇavarapradam ॥ 44 ॥ daśagrīvaharaṃ raudraṃ keśavaṃ keśimardanam । vālipramathanaṃ vīraṃ sugrīvepsitarājyadam ॥ 45 ॥ naravānaradevaiścasevitaṃ hanumatpriyam । śuddhaṃ sūkṣmaṃ paraṃ śāntaṃ tārakaṃ brahmarūpiṇam ॥ 46 ॥ sarvabhūtātmabhūtasthaṃ sarvādhāraṃ sanātanam । sarvakāraṇakartāraṃ nidānaṃ prakṛteḥ param ॥ 47 ॥ nirāmayaṃ nirābhāsaṃ niravadyaṃ nirañjanam । nityānandaṃ nirākāramadvaitaṃ tamasaḥ param ॥ 48 ॥ parātparataraṃ tattvaṃ satyānandaṃ cidātmakam । manasā śirasā nityaṃ praṇamāmi raghūttamam ॥ 49 ॥ sūryamaṇḍalamadhyasthaṃ rāmaṃ sītāsamanvitam । namāmi puṇḍarīkākṣamameyaṃ gurutatparam ॥ 50 ॥ namo'stu vāsudevāya jyotiṣāṃ pataye namaḥ । namo'stu rāmadevāya jagadānandarūpiṇe ॥ 51 ॥ namo vedāntaniṣṭhāya yogine brahmavādine । māyāmayanirāsāya prapannajanasevine ॥ 52 ॥ vandāmahe maheśānacaṇḍakodaṇḍakhaṇḍanam । jānakīhṛdayānandavardhanaṃ raghunandanam ॥ 53 ॥ utphullāmalakomalotpaladalaśyāmāya rāmāya te- -'kāmāya pramadāmanoharaguṇagrāmāya rāmātmane । yogārūḍhamunīndramānasasarohaṃsāya saṃsāravi- -dhvaṃsāya sphuradojase raghukulottaṃsāya puṃse namaḥ ॥ 54 ॥ bhavodbhavaṃ vedavidāṃ variṣṭha- -mādityacandrānalasuprabhāvam । sarvātmakaṃ sarvagatasvarūpaṃ namāmi rāmaṃ tamasaḥ parastāt ॥ 55 ॥ nirañjanaṃ niṣpratimaṃ nirīhaṃ nirāśrayaṃ niṣkalamaprapañcam । nityaṃ dhruvaṃ nirviṣayasvarūpaṃ nirantaraṃ rāmamahaṃ bhajāmi ॥ 56 ॥ bhavābdhipotaṃ bharatāgrajaṃ taṃ bhaktipriyaṃ bhānukulapradīpam । bhūtatrināthaṃ bhuvanādhipaṃ taṃ bhajāmi rāmaṃ bhavarogavaidyam ॥ 57 ॥ sarvādhipatyaṃ samarāṅgadhīraṃ satyaṃ cidānandamayasvarūpam । satyaṃ śivaṃ śāntimayaṃ śaraṇyaṃ sanātanaṃ rāmamahaṃ bhajāmi ॥ 58 ॥ kāryakriyākāraṇamaprameyaṃ kaviṃ purāṇaṃ kamalāyatākṣam । kumāravedyaṃ karuṇāmayaṃ taṃ kalpadrumaṃ rāmamahaṃ bhajāmi ॥ 59 ॥ trailokyanāthaṃ sarasīruhākṣaṃ dayānidhiṃ dvandvavināśahetum । mahābalaṃ vedanidhiṃ sureśaṃ sanātanaṃ rāmamahaṃ bhajāmi ॥ 60 ॥ vedāntavedyaṃ kavimīśitāra- -manādimadhyāntamacintyamādyam । agocaraṃ nirmalamekarūpaṃ namāmi rāmaṃ tamasaḥ parastāt ॥ 61 ॥ aśeṣavedātmakamādisañjña- -majaṃ hariṃ viṣṇumanantamādyam । apārasaṃvitsukhamekarūpaṃ parātparaṃ rāmamahaṃ bhajāmi ॥ 62 ॥ tattvasvarūpaṃ puruṣaṃ purāṇaṃ svatejasā pūritaviśvamekam । rājādhirājaṃ ravimaṇḍalasthaṃ viśveśvaraṃ rāmamahaṃ bhajāmi ॥ 63 ॥ lokābhirāmaṃ raghuvaṃśanāthaṃ hariṃ cidānandamayaṃ mukundam । aśeṣavidyādhipatiṃ kavīndraṃ namāmi rāmaṃ tamasaḥ parastāt ॥ 64 ॥ yogīndrasaṅghaiśca susevyamānaṃ nārāyaṇaṃ nirmalamādidevam । nato'smi nityaṃ jagadekanātha- -mādityavarṇaṃ tamasaḥ parastāt ॥ 65 ॥ vibhūtidaṃ viśvasṛjaṃ virāmaṃ rājendramīśaṃ raghuvaṃśanātham । acintyamavyaktamanantamūrtiṃ jyotirmayaṃ rāmamahaṃ bhajāmi ॥ 66 ॥ aśeṣasaṃsāravihārahīna- -mādityagaṃ pūrṇasukhābhirāmam । samastasākṣiṃ tamasaḥ parastā- -nnārāyaṇaṃ viṣṇumahaṃ bhajāmi ॥ 67 ॥ munīndraguhyaṃ paripūrṇakāmaṃ kalānidhiṃ kalmaṣanāśahetum । parātparaṃ yatparamaṃ pavitraṃ namāmi rāmaṃ mahato mahāntam ॥ 68 ॥ brahmā viṣṇuśca rudraśca devendro devatāstathā । ādityādigrahāścaiva tvameva raghunandana ॥ 69 ॥ tāpasā ṛṣayaḥ siddhāḥ sādhyāśca marutastathā । viprā vedāstathā yajñāḥ purāṇaṃ dharmasaṃhitāḥ ॥ 70 ॥ varṇāśramāstathā dharmā varṇadharmāstathaiva ca । yakṣarākṣasagandharvādikpālā diggajādayaḥ ॥ 71 ॥ sanakādimuniśreṣṭhāstvameva raghupuṅgava । vasavo'ṣṭau trayaḥ kālā rudrā ekādaśa smṛtāḥ ॥ 72 ॥ tārakāḥ daśa dik caiva tvameva raghunandana । saptadvīpāḥ samudrāśca nagāḥ nadyastathā drumāḥ ॥ 73 ॥ sthāvarāḥ jaṅgamāścaiva tvameva raghunāyaka । devatiryaṅmanuṣyāṇāṃ dānavānāṃ tathaiva ca ॥ 74 ॥ mātā pitā tathā bhrātā tvameva raghuvallabha । sarveṣāṃ tvaṃ paraṃ brahma tvanmayaṃ sarvameva hi ॥ 75 ॥ tvamakṣaraṃ paraṃ jyotistvameva puruṣottama । tvameva tārakaṃ brahma tvatto'nyannaiva kiñcana ॥ 76 ॥ śāntaṃ sarvagataṃ sūkṣmaṃ paraṃ brahma sanātanam । rājīvalocanaṃ rāmaṃ praṇamāmi jagatpatim ॥ 77 ॥ vyāsa uvāca । tataḥ prasannaḥ śrīrāmaḥ provāca munipuṅgavam । tuṣṭo'smi muniśārdūla vṛṇīṣva varamuttamam ॥ 78 ॥ nārada uvāca । yadi tuṣṭo'si sarvajña śrīrāma karuṇānidhe । tvanmūrtidarśanenaiva kṛtārtho'haṃ ca sarvadā ॥ 79 ॥ dhanyo'haṃ kṛtakṛtyo'haṃ puṇyo'haṃ puruṣottama । adya me saphalaṃ janma jīvitaṃ saphalaṃ ca me ॥ 80 ॥ adya me saphalaṃ jñānamadya me saphalaṃ tapaḥ । adya me saphalaṃ karma tvatpādāmbhojadarśanāt ॥ 81 ॥ adya me saphalaṃ sarvaṃ tvannāmasmaraṇaṃ tathā । tvatpādāmbhoruhadvandvasadbhaktiṃ dehi rāghava ॥ 82 tataḥ paramasamprītaḥ sa rāmaḥ prāha nāradam । meghagambhīrayā vācā dhanvī vījitamanmathaḥ ॥ 83 ॥ śrīrāma uvāca । munivarya mahābhāga mune tviṣṭaṃ dadāmi te । yattvayā cepsitaṃ sarvaṃ manasā tadbhaviṣyati ॥ 84 ॥ nārada uvāca । varaṃ na yāce raghunātha yuṣma- -tpadābjabhaktiḥ satataṃ mamāstu । idaṃ priyaṃ nātha varaṃ prayāccha punaḥ punastvāmidameva yāce ॥ 85 ॥ vyāsa uvāca । ityevamīḍito rāmaḥ prādāttasmai varāntaram । vīro rāmo mahātejāḥ saccidānandavigrahaḥ ॥ 86 ॥ advaitamamalaṃ jñānaṃ svanāmasmaraṇaṃ tathā । antardadhau jagannāthaḥ puratastasya rāghavaḥ ॥ 87 ॥ iti śrīraghunāthasya stavarājamanuttamam । sarvasaubhāgyasampattidāyakaṃ muktidaṃ śubham ॥ 88 ॥ kathitaṃ brahmaputreṇa vedānāṃ sāramuttamam । guhyādguhyatamaṃ divyaṃ tava snehātprakīrtitam ॥ 89 ॥ yaḥ paṭhecchṛṇuyādvāpi trisandhyaṃ śraddhayānvitaḥ । brahmahatyādipāpāni tatsamāni bahūni ca ॥ 90 ॥ svarṇasteyaṃ surāpānaṃ gurutalpagatistathā । govadhādyupapāpāni anṛtātsambhavāni ca ॥ 91 ॥ sarvaiḥ pramucyate pāpaiḥ kalpāyutaśatodbhavaiḥ । mānasaṃ vācikaṃ pāpaṃ karmaṇā samupārjitam ॥ 92 ॥ śrīrāmasmaraṇenaiva tatkṣaṇānnaśyati dhruvam । idaṃ satyamidaṃ satyaṃ satyametadihocyate ॥ 93 ॥ rāmaṃ satyaṃ paraṃ brahma rāmātkiñcinna vidyate । tasmādrāmasvarūpaṃ hi satyaṃ satyamidaṃ jagat ॥ 94 ॥ śrīrāmacandra raghupuṅgava rājavarya rajendra rāma raghunāyaka rāghaveśa । rājādhirāja raghunandana rāmacandra dāso'hamadya bhavataḥ śaraṇāgato'smi ॥ 95 ॥ vaidehīsahitaṃ suradrumatale haime mahāmaṇḍape madhye puṣpakamāsane maṇimaye vīrāsane saṃsthitam । agre vācayati prabhañjanasute tattvaṃ munibhyaḥ paraṃ vyākhyātaṃ bharatādibhiḥ parivṛtaṃ rāmaṃ bhaje śyāmalam ॥ 96 ॥ rāmaṃ ratnakirīṭakuṇḍalayutaṃ keyūrahārānvitaṃ sītālaṅkṛtavāmabhāgamamalaṃ siṃhāsanasthaṃ vibhum । sugrīvādiharīśvaraiḥ suragaṇaiḥ saṃsevyamānaṃ sadā viśvāmitraparāśarādimunibhiḥ saṃstūyamānaṃ prabhum ॥ 97 ॥ sakalaguṇanidhānaṃ yogibhiḥ stūyamānaṃ bhujavijitasamānaṃ rākṣasendrādimānam । mahitanṛpabhayānaṃ sītayā śobhamānaṃ smara hṛdaya vimānaṃ brahma rāmābhidhānam ॥ 98 ॥ raghuvara tava mūrtirmāmake mānasābje narakagatiharaṃ te nāmadheyaṃ mukhe me । aniśamatulabhaktyā mastakaṃ tvatpadābje bhavajalanidhimagnaṃ rakṣa māmārtabandho ॥ 99 ॥ rāmaratnamahaṃ vande citrakūṭapatiṃ harim । kausalyābhaktisambhūtaṃ jānakīkaṇṭhabhūṣaṇam ॥ 100 ॥ iti śrīsanatkumārasaṃhitāyāṃ nāradoktaṃ śrīrāmastavarājastotraṃ sampūrṇam ।