sugrīvamitraṃ paramaṃ pavitraṃ sītākalatraṃ navameghagātram । kāruṇyapātraṃ śatapatranetraṃ śrīrāmacandraṃ satataṃ namāmi ॥ 1 ॥ saṃsārasāraṃ nigamapracāraṃ dharmāvatāraṃ hṛtabhūmibhāram । sadā'vikāraṃ sukhasindhusāraṃ śrīrāmacandraṃ satataṃ namāmi ॥ 2 ॥ lakṣmīvilāsaṃ jagatāṃ nivāsaṃ laṅkāvināśaṃ bhuvanaprakāśam । bhūdevavāsaṃ śaradinduhāsaṃ śrīrāmacandraṃ satataṃ namāmi ॥ 3 ॥ mandāramālaṃ vacane rasālaṃ guṇairviśālaṃ hatasaptatālam । kravyādakālaṃ suralokapālaṃ śrīrāmacandraṃ satataṃ namāmi ॥ 4 ॥ vedāntagānaṃ sakalaissamānaṃ hṛtārimānaṃ tridaśapradhānam । gajendrayānaṃ vigatāvasānaṃ śrīrāmacandraṃ satataṃ namāmi ॥ 5 ॥ śyāmābhirāmaṃ nayanābhirāmaṃ guṇābhirāmaṃ vacanābhirāmam । viśvapraṇāmaṃ kṛtabhaktakāmaṃ śrīrāmacandraṃ satataṃ namāmi ॥ 6 ॥ līlāśarīraṃ raṇaraṅgadhīraṃ viśvaikasāraṃ raghuvaṃśahāram । gambhīravādaṃ jitasarvavādaṃ śrīrāmacandraṃ satataṃ namāmi ॥ 7 ॥ khale kṛtāntaṃ svajane vinītaṃ sāmopagītaṃ manasā pratītam । rāgeṇa gītaṃ vacanādatītaṃ śrīrāmacandraṃ satataṃ namāmi ॥ 8 ॥ śrīrāmacandrasya varāṣṭakaṃ tvāṃ mayeritaṃ devi manoharaṃ ye । paṭhanti śṛṇvanti gṛṇanti bhaktyā te svīyakāmān pralabhanti nityam ॥ 9 ॥ iti śrīrāmacandrāṣṭakam ।