ലോകാനാഹൂയ സർവാൻ ഡമരുകനിനദൈർഘോരസംസാരമഗ്നാൻ ദത്വാഭീതിം ദയാലുഃ പ്രണതഭയഹരം കുഞ്ചിതം വാമപാദം । ഉദ്ധൃത്യേദം വിമുക്തേരയനമിതി കരാദ്ദർശയൻ പ്രത്യയാർഥം ബിഭ്രദ്വഹ്നിം സഭായാം കലയതി നടനം യഃ സ പായാന്നടേശഃ ॥ 1 ॥ ദിഗീശാദി വന്ദ്യം ഗിരീശാനചാപം മുരാരാതി ബാണം പുരത്രാസഹാസം । കരീന്ദ്രാദി ചർമാംബരം വേദവേദ്യം മഹേശം സഭേശം ഭജേഽഹം നടേശം ॥ 2 ॥ സമസ്തൈശ്ച ഭൂതൈഃ സദാ നമ്യമാദ്യം സമസ്തൈകബന്ധും മനോദൂരമേകം । അപസ്മാരനിഘ്നം പരം നിർവികാരം മഹേശം സഭേശം ഭജേഽഹം നടേശം ॥ 3 ॥ ദയാലും വരേണ്യം രമാനാഥവന്ദ്യം മഹാനന്ദഭൂതം സദാനന്ദനൃത്തം । സഭാമധ്യവാസം ചിദാകാശരൂപം മഹേശം സഭേശം ഭജേഽഹം നടേശം ॥ 4 ॥ സഭാനാഥമാദ്യം നിശാനാഥഭൂഷം ശിവാവാമഭാഗം പദാംഭോജ ലാസ്യം । കൃപാപാംഗവീക്ഷം ഹ്യുമാപാംഗദൃശ്യം മഹേശം സഭേശം ഭജേഽഹം നടേശം ॥ 5 ॥ ദിവാനാഥരാത്രീശവൈശ്വാനരാക്ഷം പ്രജാനാഥപൂജ്യം സദാനന്ദനൃത്തം । ചിദാനന്ദഗാത്രം പരാനന്ദസൗധം മഹേശം സഭേശം ഭജേഽഹം നടേശം ॥ 6 ॥ കരേകാഹലീകം പദേമൗക്തികാലിം ഗലേകാലകൂടം തലേസർവമന്ത്രം । മുഖേ മന്ദഹാസം ഭുജേ നാഗരാജം മഹേശം സഭേശം ഭജേഽഹം നടേശം ॥ 7 ॥ ത്വദന്യം ശരണ്യം ന പശ്യാമി ശംഭോ മദന്യഃ പ്രപന്നോസ്തി കിന്തേതിദീനഃ । മദർഥേഹ്യുപേക്ഷാ തവാസീത്കിമർഥം മഹേശം സഭേശം ഭജേഽഹം നടേശം ॥ 8 ॥ ഭവത്പാദയുഗ്മം കരേണാവലംബേ സദാ നൃത്തകാരിൻ സഭാമധ്യദേശേ । സദാ ഭാവയേ ത്വാം തദാ ദാസ്യസീഷ്ടം മഹേശം സഭേശം ഭജേഽഹം നടേശം ॥ 9 ॥ ഭൂയഃ സ്വാമിൻ ജനിർമേ മരണമപി തഥാ മാസ്തു ഭൂയഃ സുരാണാം സാമ്രാജ്യം തച്ഛ താവത്സുഖലവരഹിതം ദുഃഖദം നാർഥയേ ത്വാം । സന്താപഘ്നം പുരാരേ ധുരി ച തവസഭാ മന്ദിരേ സർവദാ ത്വ- -ന്നൃത്തം പശ്യന്വസേയം പ്രമഥഗണവരൈഃ സാകമേതദ്വിധേഹി ॥ 10 ॥ ഇതി ശ്രീ ജ്ഞാനസംബന്ധ കൃത ശ്രീ നടേശ്വര ഭുജംഗ സ്തുതിഃ ।