ನಾಗೇಶ್ವರ ಸ್ತುತಿಃ

ಯೋ ದೇವಃ ಸರ್ವಭೂತಾನಾಮಾತ್ಮಾ ಹ್ಯಾರಾಧ್ಯ ಏವ ಚ ।

ಗುಣಾತೀತೋ ಗುಣಾತ್ಮಾ ಚ ಸ ಮೇ ನಾಗಃ ಪ್ರಸೀದತು ॥ 1 ॥

ಹೃದಯಸ್ಥೋಽಪಿ ದೂರಸ್ಥಃ ಮಾಯಾವೀ ಸರ್ವದೇಹಿನಾಂ ।

ಯೋಗಿನಾಂ ಚಿತ್ತಗಮ್ಯಸ್ತು ಸ ಮೇ ನಾಗಃ ಪ್ರಸೀದತು ॥ 2 ॥

ಸಹಸ್ರಶೀರ್ಷಃ ಸರ್ವಾತ್ಮಾ ಸರ್ವಾಧಾರಃ ಪರಃ ಶಿವಃ ।

ಮಹಾವಿಷಸ್ಯಜನಕಃ ಸ ಮೇ ನಾಗಃ ಪ್ರಸೀದತು ॥ 3 ॥

ಕಾದ್ರವೇಯೋಮಹಾಸತ್ತ್ವಃ ಕಾಲಕೂಟಮುಖಾಂಬುಜಃ ।

ಸರ್ವಾಭೀಷ್ಟಪ್ರದೋ ದೇವಃ ಸ ಮೇ ನಾಗಃ ಪ್ರಸೀದತು ॥ 4 ॥

ಪಾತಾಲನಿಲಯೋ ದೇವಃ ಪದ್ಮನಾಭಸುಖಪ್ರದಃ ।

ಸರ್ವಾಭೀಷ್ಟಪ್ರದೋ ಯಸ್ತು ಸ ಮೇ ನಾಗಃ ಪ್ರಸೀದತು ॥ 5 ॥

ನಾಗನಾರೀರತೋ ದಕ್ಷೋ ನಾರದಾದಿ ಸುಪೂಜಿತಃ ।

ಸರ್ವಾರಿಷ್ಟಹರೋ ಯಸ್ತು ಸ ಮೇ ನಾಗಃ ಪ್ರಸೀದತು ॥ 6 ॥

ಪೃದಾಕುದೇವಃ ಸರ್ವಾತ್ಮಾ ಸರ್ವಶಾಸ್ತ್ರಾರ್ಥಪಾರಗಃ ।

ಪ್ರಾರಬ್ಧಪಾಪಹಂತಾ ಚ ಸ ಮೇ ನಾಗಃ ಪ್ರಸೀದತು ॥ 7 ॥

ಲಕ್ಷ್ಮೀಪತೇಃ ಸಪರ್ಯಂಕಃ ಶಂಭೋಃ ಸರ್ವಾಂಗಭೂಷಣಃ ।

ಯೋ ದೇವಃ ಪುತ್ರದೋ ನಿತ್ಯಂ ಸ ಮೇ ನಾಗಃ ಪ್ರಸೀದತು ॥ 8 ॥

ಫಣೀಶಃ ಪರಮೋದಾರಃ ಶಾಪಪಾಪನಿವಾರಕಃ ।

ಸರ್ವಪಾಪಹರೋ ಯಸ್ತು ಸ ಮೇ ನಾಗಃ ಪ್ರಸೀದತು ॥ 9 ॥

ಸರ್ವಮಂಗಲದೋ ನಿತ್ಯಂ ಸುಖದೋ ಭುಜಗೇಶ್ವರಃ ।

ಯಶಃ ಕೀರ್ತಿಂ ಚ ವಿಪುಲಾಂ ಶ್ರಿಯಮಾಯುಃ ಪ್ರಯಚ್ಛತು ॥ 10 ॥

ಮನೋವಾಕ್ಕಾಯಜನಿತಂ ಜನ್ಮಜನ್ಮಾಂತರಾರ್ಜಿತಂ ।

ಯತ್ಪಾಪಂ ನಾಗದೇವೇಶ ವಿಲಯಂ ಯಾತು ಸಂಪ್ರತಿ ॥ 11 ॥

ನೀರೋಗಂ ದೇಹಪುಷ್ಟಿಂ ಚ ಸರ್ವವಶ್ಯಂ ಧನಾಗಮಂ ।

ಪಶುಧಾನ್ಯಾಭಿವೃದ್ಧಿಂ ಚ ಯಶೋವೃದ್ಧಿಂ ಚ ಶಾಶ್ವತಂ ॥ 12 ॥

ಪರವಾಕ್ ಸ್ತಂಭಿನೀಂ ವಿದ್ಯಾಂ ವಾಗ್ಮಿತ್ವಂ ಸೂಕ್ಷ್ಮಬುದ್ಧಿತಾಂ ।

ಪುತ್ರಂ ವಂಶಕರಂ ಶ್ರೇಷ್ಠಂ ದೇಹಿ ಮೇ ಭಕ್ತವತ್ಸಲ ॥ 13 ॥

ಇತಿ ಶ್ರೀ ನಾಗೇಶ್ವರ ಸ್ತುತಿಃ ॥

Recite with devotion and pure heart

Regular practice brings spiritual benefits