यो देवः सर्वभूतानामात्मा ह्याराध्य एव च । गुणातीतो गुणात्मा च स मे नागः प्रसीदतु ॥ 1 ॥ हृदयस्थोऽपि दूरस्थः मायावी सर्वदेहिनाम् । योगिनां चित्तगम्यस्तु स मे नागः प्रसीदतु ॥ 2 ॥ सहस्रशीर्षः सर्वात्मा सर्वाधारः परः शिवः । महाविषस्यजनकः स मे नागः प्रसीदतु ॥ 3 ॥ काद्रवेयोमहासत्त्वः कालकूटमुखाम्बुजः । सर्वाभीष्टप्रदो देवः स मे नागः प्रसीदतु ॥ 4 ॥ पातालनिलयो देवः पद्मनाभसुखप्रदः । सर्वाभीष्टप्रदो यस्तु स मे नागः प्रसीदतु ॥ 5 ॥ नागनारीरतो दक्षो नारदादि सुपूजितः । सर्वारिष्टहरो यस्तु स मे नागः प्रसीदतु ॥ 6 ॥ पृदाकुदेवः सर्वात्मा सर्वशास्त्रार्थपारगः । प्रारब्धपापहन्ता च स मे नागः प्रसीदतु ॥ 7 ॥ लक्ष्मीपतेः सपर्यङ्कः शम्भोः सर्वाङ्गभूषणः । यो देवः पुत्रदो नित्यं स मे नागः प्रसीदतु ॥ 8 ॥ फणीशः परमोदारः शापपापनिवारकः । सर्वपापहरो यस्तु स मे नागः प्रसीदतु ॥ 9 ॥ सर्वमङ्गलदो नित्यं सुखदो भुजगेश्वरः । यशः कीर्तिं च विपुलां श्रियमायुः प्रयच्छतु ॥ 10 ॥ मनोवाक्कायजनितं जन्मजन्मान्तरार्जितम् । यत्पापं नागदेवेश विलयं यातु सम्प्रति ॥ 11 ॥ नीरोगं देहपुष्टिं च सर्ववश्यं धनागमम् । पशुधान्याभिवृद्धिं च यशोवृद्धिं च शाश्वतम् ॥ 12 ॥ परवाक् स्तम्भिनीं विद्यां वाग्मित्वं सूक्ष्मबुद्धिताम् । पुत्रं वंशकरं श्रेष्ठं देहि मे भक्तवत्सल ॥ 13 ॥ इति श्री नागेश्वर स्तुतिः ॥