മണികർണികാഷ്ടകം

ത്വത്തീരേ മണികർണികേ ഹരിഹരൗ സായുജ്യമുക്തിപ്രദൗ

വാദന്തൗ കുരുതഃ പരസ്പരമുഭൗ ജന്തോഃ പ്രയാണോത്സവേ ।

മദ്രൂപോ മനുജോഽയമസ്തു ഹരിണാ പ്രോക്തഃ ശിവസ്തത്ക്ഷണാ-

ത്തന്മധ്യാദ്ഭൃഗുലാഞ്ഛനോ ഗരുഡഗഃ പീതാംബരോ നിർഗതഃ ॥ 1 ॥

ഇന്ദ്രാദ്യാസ്ത്രിദശാഃ പതന്തി നിയതം ഭോഗക്ഷയേ യേ പുന-

ര്ജായന്തേ മനുജാസ്തതോപി പശവഃ കീടാഃ പതംഗാദയഃ ।

യേ മാതർമണികർണികേ തവ ജലേ മജ്ജന്തി നിഷ്കല്മഷാഃ

സായുജ്യേഽപി കിരീടകൗസ്തുഭധരാ നാരായണാഃ സ്യുർനരാഃ ॥ 2 ॥

കാശീ ധന്യതമാ വിമുക്തനഗരീ സാലങ്കൃതാ ഗംഗയാ

തത്രേയം മണികർണികാ സുഖകരീ മുക്തിർഹി തത്കിങ്കരീ ।

സ്വർലോകസ്തുലിതഃ സഹൈവ വിബുധൈഃ കാശ്യാ സമം ബ്രഹ്മണാ

കാശീ ക്ഷോണിതലേ സ്ഥിതാ ഗുരുതരാ സ്വർഗോ ലഘുത്വം ഗതഃ ॥ 3 ॥

ഗംഗാതീരമനുത്തമം ഹി സകലം തത്രാപി കാശ്യുത്തമാ

തസ്യാം സാ മണികർണികോത്തമതമാ യേത്രേശ്വരോ മുക്തിദഃ ।

ദേവാനാമപി ദുർലഭം സ്ഥലമിദം പാപൗഘനാശക്ഷമം

പൂർവോപാർജിതപുണ്യപുഞ്ജഗമകം പുണ്യൈർജനൈഃ പ്രാപ്യതേ ॥ 4 ॥

ദുഃഖാംഭോധിഗതോ ഹി ജന്തുനിവഹസ്തേഷാം കഥം നിഷ്കൃതിഃ

ജ്ഞാത്വാ തദ്ധി വിരിഞ്ചിനാ വിരചിതാ വാരാണസീ ശർമദാ ।

ലോകാഃസ്വർഗസുഖാസ്തതോഽപി ലഘവോ ഭോഗാന്തപാതപ്രദാഃ

കാശീ മുക്തിപുരീ സദാ ശിവകരീ ധർമാർഥമോക്ഷപ്രദാ ॥ 5 ॥

ഏകോ വേണുധരോ ധരാധരധരഃ ശ്രീവത്സഭൂഷാധരഃ

യോഽപ്യേകഃ കില ശങ്കരോ വിഷധരോ ഗംഗാധരോ മാധവഃ ।

യേ മാതർമണികർണികേ തവ ജലേ മജ്ജന്തി തേ മാനവാഃ

രുദ്രാ വാ ഹരയോ ഭവന്തി ബഹവസ്തേഷാം ബഹുത്വം കഥം ॥ 6 ॥

ത്വത്തീരേ മരണം തു മംഗലകരം ദേവൈരപി ശ്ലാഘ്യതേ

ശക്രസ്തം മനുജം സഹസ്രനയനൈർദ്രഷ്ടും സദാ തത്പരഃ ।

ആയാന്തം സവിതാ സഹസ്രകിരണൈഃ പ്രത്യുദ്ഗതോഽഭൂത്സദാ

പുണ്യോഽസൗ വൃഷഗോഽഥവാ ഗരുഡഗഃ കിം മന്ദിരം യാസ്യതി ॥ 7 ॥

മധ്യാഹ്നേ മണികർണികാസ്നപനജം പുണ്യം ന വക്തും ക്ഷമഃ

സ്വീയൈരബ്ധശതൈശ്ചതുർമുഖധരോ വേദാർഥദീക്ഷാഗുരുഃ ।

യോഗാഭ്യാസബലേന ചന്ദ്രശിഖരസ്തത്പുണ്യപാരംഗത-

സ്ത്വത്തീരേ പ്രകരോതി സുപ്തപുരുഷം നാരായണം വാ ശിവം ॥ 8 ॥

കൃച്ഛ്രൈ കോടിശതൈഃ സ്വപാപനിധനം യച്ചാശ്വമേധൈഃ ഫലം

തത്സർവേ മണികർണികാസ്നപനജേ പുണ്യേ പ്രവിഷ്ടം ഭവേത് ।

സ്നാത്വാ സ്തോത്രമിദം നരഃ പഠതി ചേത്സംസാരപാഥോനിധിം

തീർത്വാ പല്വലവത്പ്രയാതി സദനം തേജോമയം ബ്രഹ്മണഃ ॥ 9 ॥

Recite with devotion and pure heart

Regular practice brings spiritual benefits