നൃസിംഹകവചം വക്ഷ്യേ പ്രഹ്ലാദേനോദിതം പുരാ । സർവരക്ഷാകരം പുണ്യം സർവോപദ്രവനാശനം ॥ 1 ॥ സർവസമ്പത്കരം ചൈവ സ്വർഗമോക്ഷപ്രദായകം । ധ്യാത്വാ നൃസിംഹം ദേവേശം ഹേമസിംഹാസനസ്ഥിതം ॥ 2 ॥ വിവൃതാസ്യം ത്രിനയനം ശരദിന്ദുസമപ്രഭം । ലക്ഷ്മ്യാലിംഗിതവാമാംഗം വിഭൂതിഭിരുപാശ്രിതം ॥ 3 ॥ ചതുർഭുജം കോമലാംഗം സ്വർണകുണ്ഡലശോഭിതം । സരോജശോഭിതോരസ്കം രത്നകേയൂരമുദ്രിതം ॥ 4 ॥ തപ്തകാഞ്ചനസങ്കാശം പീതനിർമലവാസസം । ഇന്ദ്രാദിസുരമൗലിസ്ഥസ്ഫുരന്മാണിക്യദീപ്തിഭിഃ ॥ 5 ॥ വിരാജിതപദദ്വന്ദ്വം ശംഖചക്രാദിഹേതിഭിഃ । ഗരുത്മതാ സവിനയം സ്തൂയമാനം മുദാന്വിതം ॥ 6 ॥ സ്വഹൃത്കമലസംവാസം കൃത്വാ തു കവചം പഠേത് । നൃസിംഹോ മേ ശിരഃ പാതു ലോകരക്ഷാത്മസംഭവഃ ॥ 7 ॥ സർവഗോഽപി സ്തംഭവാസഃ ഫാലം മേ രക്ഷതു ധ്വനിം । നൃസിംഹോ മേ ദൃശൗ പാതു സോമസൂര്യാഗ്നിലോചനഃ ॥ 8 ॥ സ്മൃതിം മേ പാതു നൃഹരിർമുനിവര്യസ്തുതിപ്രിയഃ । നാസാം മേ സിംഹനാസസ്തു മുഖം ലക്ഷ്മീമുഖപ്രിയഃ ॥ 9 ॥ സർവവിദ്യാധിപഃ പാതു നൃസിംഹോ രസനാം മമ । വക്ത്രം പാത്വിന്ദുവദനഃ സദാ പ്രഹ്ലാദവന്ദിതഃ ॥ 10 ॥ നൃസിംഹഃ പാതു മേ കണ്ഠം സ്കന്ധൗ ഭൂഭരണാന്തകൃത് । ദിവ്യാസ്ത്രശോഭിതഭുജോ നൃസിംഹഃ പാതു മേ ഭുജൗ ॥ 11 ॥ കരൗ മേ ദേവവരദോ നൃസിംഹഃ പാതു സർവതഃ । ഹൃദയം യോഗിസാധ്യശ്ച നിവാസം പാതു മേ ഹരിഃ ॥ 12 ॥ മധ്യം പാതു ഹിരണ്യാക്ഷവക്ഷഃകുക്ഷിവിദാരണഃ । നാഭിം മേ പാതു നൃഹരിഃ സ്വനാഭിബ്രഹ്മസംസ്തുതഃ ॥ 13 ॥ ബ്രഹ്മാണ്ഡകോടയഃ കട്യാം യസ്യാസൗ പാതു മേ കടിം । ഗുഹ്യം മേ പാതു ഗുഹ്യാനാം മന്ത്രാണാം ഗുഹ്യരൂപധൃക് ॥ 14 ॥ ഊരൂ മനോഭവഃ പാതു ജാനുനീ നരരൂപധൃക് । ജംഘേ പാതു ധരാഭാരഹർതാ യോഽസൗ നൃകേസരീ ॥ 15 ॥ സുരരാജ്യപ്രദഃ പാതു പാദൗ മേ നൃഹരീശ്വരഃ । സഹസ്രശീർഷാ പുരുഷഃ പാതു മേ സർവശസ്തനും ॥ 16 ॥ മഹോഗ്രഃ പൂർവതഃ പാതു മഹാവീരാഗ്രജോഽഗ്നിതഃ । മഹാവിഷ്ണുർദക്ഷിണേ തു മഹാജ്വാലസ്തു നൈരൃതൗ ॥ 17 ॥ പശ്ചിമേ പാതു സർവേശോ ദിശി മേ സർവതോമുഖഃ । നൃസിംഹഃ പാതു വായവ്യാം സൗമ്യാം ഭൂഷണവിഗ്രഹഃ ॥ 18 ॥ ഈശാന്യാം പാതു ഭദ്രോ മേ സർവമംഗലദായകഃ । സംസാരഭയദഃ പാതു മൃത്യോർമൃത്യുർനൃകേസരീ ॥ 19 ॥ ഇദം നൃസിംഹകവചം പ്രഹ്ലാദമുഖമണ്ഡിതം । ഭക്തിമാന്യഃ പഠേന്നിത്യം സർവപാപൈഃ പ്രമുച്യതേ ॥ 20 ॥ പുത്രവാൻ ധനവാൻ ലോകേ ദീർഘായുരുപജായതേ । യം യം കാമയതേ കാമം തം തം പ്രാപ്നോത്യസംശയം ॥ 21 ॥ സർവത്ര ജയമാപ്നോതി സർവത്ര വിജയീ ഭവേത് । ഭൂമ്യന്തരിക്ഷദിവ്യാനാം ഗ്രഹാണാം വിനിവാരണം ॥ 22 ॥ വൃശ്ചികോരഗസംഭൂതവിഷാപഹരണം പരം । ബ്രഹ്മരാക്ഷസയക്ഷാണാം ദൂരോത്സാരണകാരണം ॥ 23 ॥ ഭൂർജേ വാ താലപത്രേ വാ കവചം ലിഖിതം ശുഭം । കരമൂലേ ധൃതം യേന സിധ്യേയുഃ കർമസിദ്ധയഃ ॥ 24 ॥ ദേവാസുരമനുഷ്യേഷു സ്വം സ്വമേവ ജയം ലഭേത് । ഏകസന്ധ്യം ത്രിസന്ധ്യം വാ യഃ പഠേന്നിയതോ നരഃ ॥ 25 ॥ സർവമംഗലമാംഗല്യം ഭുക്തിം മുക്തിം ച വിന്ദതി । ദ്വാത്രിംശച്ച സഹസ്രാണി പഠേച്ഛുദ്ധാത്മനാം നൃണാം ॥ 26 ॥ കവചസ്യാസ്യ മന്ത്രസ്യ മന്ത്രസിദ്ധിഃ പ്രജായതേ । അനേന മന്ത്രരാജേന കൃത്വാ ഭസ്മാഭിമന്ത്രണം ॥ 27 ॥ തിലകം വിന്യസേദ്യസ്തു തസ്യ ഗ്രഹഭയം ഹരേത് । ത്രിവാരം ജപമാനസ്തു ദത്തം വാര്യഭിമന്ത്ര്യ ച ॥ 28 ॥ പ്രാശയേദ്യോ നരോ മന്ത്രം നൃസിംഹധ്യാനമാചരേത് । തസ്യ രോഗാഃ പ്രണശ്യന്തി യേ ച സ്യുഃ കുക്ഷിസംഭവാഃ ॥ 29 ॥ കിമത്ര ബഹുനോക്തേന നൃസിംഹസദൃശോ ഭവേത് । മനസാ ചിന്തിതം യത്തു സ തച്ചാപ്നോത്യസംശയം ॥ 30 ॥ ഗർജന്തം ഗർജയന്തം നിജഭുജപടലം സ്ഫോടയന്തം ഹടന്തം രൂപ്യന്തം താപയന്തം ദിവി ഭുവി ദിതിജം ക്ഷേപയന്തം ക്ഷിപന്തം । ക്രന്ദന്തം രോഷയന്തം ദിശി ദിശി സതതം സംഹരന്തം ഭരന്തം വീക്ഷന്തം ഘൂർണയന്തം ശരനികരശതൈർദിവ്യസിംഹം നമാമി ॥ 31 ॥ ഇതി ശ്രീബ്രഹ്മാണ്ഡപുരാണേ പ്രഹ്ലാദോക്തം ശ്രീ നൃസിംഹ കവചം ।