శ్రీమత్పయోనిధినికేతనచక్రపాణే భోగీంద్రభోగమణిరాజితపుణ్యమూర్తే । యోగీశ శాశ్వత శరణ్య భవాబ్ధిపోత లక్ష్మీనృసింహ మమ దేహి కరావలంబం ॥ 1 ॥ బ్రహ్మేంద్రరుద్రమరుదర్కకిరీటకోటి- -సంఘట్టితాంఘ్రికమలామలకాంతికాంత । లక్ష్మీలసత్కుచసరోరుహరాజహంస లక్ష్మీనృసింహ మమ దేహి కరావలంబం ॥ 2 ॥ సంసారదావదహనాకరభీకరోరు- -జ్వాలావలీభిరతిదగ్ధతనూరుహస్య । త్వత్పాదపద్మసరసీరుహమాగతస్య లక్ష్మీనృసింహ మమ దేహి కరావలంబం ॥ 3 ॥ సంసారజాలపతితస్య జగన్నివాస సర్వేంద్రియార్థబడిశాగ్రఝషోపమస్య । ప్రోత్కంపితప్రచురతాలుకమస్తకస్య లక్ష్మీనృసింహ మమ దేహి కరావలంబం ॥ 4 ॥ సంసారకూపమతిఘోరమగాధమూలం సంప్రాప్య దుఃఖశతసర్పసమాకులస్య । దీనస్య దేవ కృపయా పదమాగతస్య లక్ష్మీనృసింహ మమ దేహి కరావలంబం ॥ 5 ॥ సంసారభీకరకరీంద్రకరాభిఘాత- -నిష్పీడ్యమానవపుషః సకలార్తినాశ । ప్రాణప్రయాణభవభీతిసమాకులస్య లక్ష్మీనృసింహ మమ దేహి కరావలంబం ॥ 6 ॥ సంసారసర్పవిషదగ్ధమహోగ్రతీవ్ర- -దంష్ట్రాగ్రకోటిపరిదష్టవినష్టమూర్తేః । నాగారివాహన సుధాబ్ధినివాస శౌరే లక్ష్మీనృసింహ మమ దేహి కరావలంబం ॥ 7 ॥ సంసారవృక్షమఘబీజమనంతకర్మ- -శాఖాయుతం కరణపత్రమనంగపుష్పం । ఆరుహ్య దుఃఖఫలితం పతతో దయాలో [చకితం] లక్ష్మీనృసింహ మమ దేహి కరావలంబం ॥ 8 ॥ సంసారసాగరవిశాలకరాలకాల- -నక్రగ్రహగ్రసితనిగ్రహవిగ్రహస్య । వ్యగ్రస్య రాగనిచయోర్మినిపీడితస్య లక్ష్మీనృసింహ మమ దేహి కరావలంబం ॥ 9 ॥ సంసారసాగరనిమజ్జనముహ్యమానం దీనం విలోకయ విభో కరుణానిధే మాం । ప్రహ్లాదఖేదపరిహారపరావతార లక్ష్మీనృసింహ మమ దేహి కరావలంబం ॥ 10 ॥ సంసారఘోరగహనే చరతో మురారే మారోగ్రభీకరమృగప్రచురార్దితస్య । ఆర్తస్య మత్సరనిదాఘసుదుఃఖితస్య లక్ష్మీనృసింహ మమ దేహి కరావలంబం ॥ 11 ॥ బద్ధ్వా గలే యమభటా బహుతర్జయంతః కర్షంతి యత్ర భవపాశశతైర్యుతం మాం । ఏకాకినం పరవశం చకితం దయాలో లక్ష్మీనృసింహ మమ దేహి కరావలంబం ॥ 12 ॥ లక్ష్మీపతే కమలనాభ సురేశ విష్ణో యజ్ఞేశ యజ్ఞ మధుసూదన విశ్వరూప । బ్రహ్మణ్య కేశవ జనార్దన వాసుదేవ లక్ష్మీనృసింహ మమ దేహి కరావలంబం ॥ 13 ॥ ఏకేన చక్రమపరేణ కరేణ శంఖ- -మన్యేన సింధుతనయామవలంబ్య తిష్ఠన్ । వామేతరేణ వరదాభయపద్మచిహ్నం లక్ష్మీనృసింహ మమ దేహి కరావలంబం ॥ 14 ॥ అంధస్య మే హృతవివేకమహాధనస్య చోరైర్మహాబలిభిరింద్రియనామధేయైః । మోహాంధకారకుహరే వినిపాతితస్య లక్ష్మీనృసింహ మమ దేహి కరావలంబం ॥ 15 ॥ ప్రహ్లాదనారదపరాశరపుండరీక- -వ్యాసాదిభాగవతపుంగవహృన్నివాస । భక్తానురక్తపరిపాలనపారిజాత లక్ష్మీనృసింహ మమ దేహి కరావలంబం ॥ 16 ॥ లక్ష్మీనృసింహచరణాబ్జమధువ్రతేన స్తోత్రం కృతం శుభకరం భువి శంకరేణ । యే తత్పఠంతి మనుజా హరిభక్తియుక్తా- -స్తే యాంతి తత్పదసరోజమఖండరూపం ॥ 17 ॥ ఇతి శ్రీమత్పరమహంసపరివ్రాజకాచార్య శ్రీమచ్ఛంకరాచార్య విరచితం శ్రీలక్ష్మీనృసింహ కరావలంబ స్తోత్రం । — అధికశ్లోకాః — సంసారయోగ సకలేప్సితనిత్యకర్మ సంప్రాప్యదుఃఖ సకలేంద్రియమృత్యునాశ । సంకల్ప సింధుతనయాకుచ కుంకుమాంక లక్ష్మీనృసింహ మమ దేహి కరావలంబం ॥ 18 ॥ ఆద్యంతశూన్యమజమవ్యయమప్రమేయం ఆదిత్యరుద్రనిగమాదినుతప్రభావం । అంభోధిజాస్య మధులోలుప మత్తభృంగ లక్ష్మీనృసింహ మమ దేహి కరావలంబం ॥ 19 ॥ వారాహ రామ నరసింహ రమాదికాంతా క్రీడావిలోల విధిశూలి సురప్రవంద్య । హంసాత్మకం పరమహంస విహారలీలం లక్ష్మీనృసింహ మమ దేహి కరావలంబం ॥ 20 ॥ మాతా నృసింహశ్చ పితా నృసింహః భ్రాతా నృసింహశ్చ సఖా నృసింహః । విద్యా నృసింహో ద్రవిణం నృసింహః లక్ష్మీనృసింహ మమ దేహి కరావలంబం ॥ 21 ॥ ప్రహ్లాద మానస సరోజ విహారభృంగ గంగాతరంగ ధవలాంగ రమాస్థితాంక । శృంగార సుందర కిరీట లసద్వరాంగ లక్ష్మీనృసింహ మమ దేహి కరావలంబం ॥ 22 ॥ శ్రీశంకరార్య రచితం సతతం మనుష్యః స్తోత్రం పఠేదిహతు సత్వగుణప్రసన్నం । సద్యోవిముక్త కలుషో మునివర్య గణ్యో లక్ష్మీ పదముపైతి సనిర్మలాత్మా ॥ 23 ॥ యన్మాయయోర్జితః వపుః ప్రచుర ప్రవాహ మగ్నార్థ మత్రనివహోరు కరావలంబం । లక్ష్మీనృసింహ చరణాబ్జ మధువ్రతేన స్తోత్రం కృతం శుభకరం భువి శంకరేణ ॥ 24 ॥ శ్రీమన్నృసింహ విభవే గరుడధ్వజాయ తాపత్రయోపశమనాయ భవౌషధాయ । తృష్ణాది వృశ్చిక జలాగ్ని భుజంగ రోగ క్లేశాపహాయ హరయే గురవే నమస్తే ॥ 25 ॥ ఇతి శ్రీలక్ష్మీనృసింహ కరావలంబ స్తోత్రం ।