മഹാകാല ഉവാച । അഥ വക്ഷ്യേ മഹേശാനി ദേവ്യാഃ സ്തോത്രമനുത്തമം । യസ്യ സ്മരണമാത്രേണ വിഘ്നാ യാന്തി പരാങ്മുഖാഃ ॥ 1 ॥ വിജേതും പ്രതസ്ഥേ യദാ കാലകസ്യാ- -സുരാൻ രാവണോ മുഞ്ജമാലിപ്രവർഹാൻ । തദാ കാമകാലീം സ തുഷ്ടാവ വാഗ്ഭി- -ര്ജിഗീഷുർമൃധേ ബാഹുവീര്യേണ സർവാൻ ॥ 2 ॥ മഹാവർതഭീമാസൃഗബ്ധ്യുത്ഥവീചീ- -പരിക്ഷാലിതാ ശ്രാന്തകന്ഥശ്മശാനേ । ചിതിപ്രജ്വലദ്വഹ്നികീലാജടാലേ- -ശിവാകാരശാവാസനേ സന്നിഷണ്ണാം ॥ 3 ॥ മഹാഭൈരവീയോഗിനീഡാകിനീഭിഃ കരാലാഭിരാപാദലംബത്കചാഭിഃ । ഭ്രമന്തീഭിരാപീയ മദ്യാമിഷാസ്രാ- -ന്യജസ്രം സമം സഞ്ചരന്തീം ഹസന്തീം ॥ 4 ॥ മഹാകല്പകാലാന്തകാദംബിനീത്വിട്- പരിസ്പർധിദേഹദ്യുതിം ഘോരനാദാം । സ്ഫുരദ്ദ്വാദശാദിത്യകാലാഗ്നിരുദ്ര- -ജ്വലദ്വിദ്യുദോഘപ്രഭാദുർനിരീക്ഷ്യാം ॥ 5 ॥ ലസന്നീലപാഷാണനിർമാണവേദി- -പ്രഭശ്രോണിവിംബാം ചലത്പീവരോരും । സമുത്തുംഗപീനായതോരോജകുംഭാം കടിഗ്രന്ഥിതദ്വീപികൃത്യുത്തരീയാം ॥ 6 ॥ സ്രവദ്രക്തവൽഗന്നൃമുണ്ഡാവനദ്ധാ- -സൃഗാവദ്ധനക്ഷത്രമാലൈകഹാരാം । മൃതബ്രഹ്മകുല്യോപക്ലുപ്താംഗഭൂഷാം മഹാട്ടാട്ടഹാസൈർജഗത്ത്രാസയന്തീം ॥ 7 ॥ നിപീതാനനാന്താമിതോദ്വൃത്തരക്തോ- -ച്ഛലദ്ധാരയാ സ്നാപിതോരോജയുഗ്മാം । മഹാദീർഘദംഷ്ട്രായുഗന്യഞ്ചദഞ്ച- -ല്ലലല്ലേലിഹാനോഗ്രജിഹ്വാഗ്രഭാഗാം ॥ 8 ॥ ചലത്പാദപദ്മദ്വയാലംബിമുക്ത- -പ്രകമ്പാലിസുസ്നിഗ്ധസംഭുഗ്നകേശാം । പദന്യാസസംഭാരഭീതാഹിരാജാ- -നനോദ്ഗച്ഛദാത്മസ്തുതിവ്യസ്തകർണാം ॥ 9 ॥ മഹാഭീഷണാം ഘോരവിംശാർധവക്ത്രൈ- -സ്തഥാസപ്തവിംശാന്വിതൈർലോചനൈശ്ച । പുരോദക്ഷവാമേ ദ്വിനേത്രോജ്ജ്വലാഭ്യാം തഥാന്യാനനേ ത്രിത്രിനേത്രാഭിരാമാം ॥ 10 ॥ ലസദ്ദ്വീപിഹര്യക്ഷഫേരുപ്ലവംഗ- -ക്രമേലർക്ഷതാർക്ഷദ്വിപഗ്രാഹവാഹൈഃ । മുഖൈരീദൃശാകാരിതൈർഭ്രാജമാനാം മഹാപിംഗലോദ്യജ്ജടാജൂടഭാരാം ॥ 11 ॥ ഭുജൈഃ സപ്തവിംശാങ്കിതൈർവാമഭാഗേ യുതാം ദക്ഷിണേ ചാപി താവദ്ഭിരേവ । ക്രമാദ്രത്നമാലാം കപാലം ച ശുഷ്കം തതശ്ചർമപാശം സുദീർഘം ദധാനാം ॥ 12 ॥ തതഃ ശക്തിഖട്വാംഗമുണ്ഡം ഭുശുണ്ഡീം ധനുശ്ചക്രഘണ്ടാശിശുപ്രേതശൈലാൻ । തതോ നാരകങ്കാലബഭ്രൂരഗോന്മാ- -ദവംശീം തഥാ മുദ്ഗരം വഹ്നികുണ്ഡം ॥ 13 ॥ അധോ ഡമ്മരും പാരിഘം ഭിന്ദിപാലം തഥാ മൗശലം പട്ടിശം പ്രാശമേവം । ശതഘ്നീം ശിവാപോതകം ചാഥ ദക്ഷേ മഹാരത്നമാലാം തഥാ കർതൃഖഡ്ഗൗ ॥ 14 ॥ ചലത്തർജനീമങ്കുശം ദണ്ഡമുഗ്രം ലസദ്രത്നകുംഭം ത്രിശൂലം തഥൈവ । ശരാൻ പാശുപത്യാംസ്തഥാ പഞ്ച കുന്തം പുനഃ പാരിജാതം ഛുരീം തോമരം ച ॥ 15 ॥ പ്രസൂനസ്രജം ഡിണ്ഡിമം ഗൃധ്രരാജം തതഃ കോരകം മാംസഖണ്ഡം ശ്രുവം ച । ഫലം ബീജപൂരാഹ്വയം ചൈവ സൂചീം തഥാ പർശുമേവം ഗദാം യഷ്ടിമുഗ്രാം ॥ 16 ॥ തതോ വജ്രമുഷ്ടിം കുണപ്പം സുഘോരം തഥാ ലാലനം ധാരയന്തീം ഭുജൈസ്തൈഃ । ജവാപുഷ്പരോചിഷ്ഫണീന്ദ്രോപക്ലുപ്ത- -ക്വണന്നൂപുരദ്വന്ദ്വസക്താംഘ്രിപദ്മാം ॥ 17 ॥ മഹാപീതകുംഭീനസാവദ്ധനദ്ധ സ്ഫുരത്സർവഹസ്തോജ്ജ്വലത്കങ്കണാം ച । മഹാപാടലദ്യോതിദർവീകരേന്ദ്രാ- -വസക്താംഗദവ്യൂഹസംശോഭമാനാം ॥ 18 ॥ മഹാധൂസരത്ത്വിഡ്ഭുജംഗേന്ദ്രക്ലുപ്ത- -സ്ഫുരച്ചാരുകാടേയസൂത്രാഭിരാമാം । ചലത്പാണ്ഡുരാഹീന്ദ്രയജ്ഞോപവീത- -ത്വിഡുദ്ഭാസിവക്ഷഃസ്ഥലോദ്യത്കപാടാം ॥ 19 ॥ പിഷംഗോരഗേന്ദ്രാവനദ്ധാവശോഭാ- -മഹാമോഹബീജാംഗസംശോഭിദേഹാം । മഹാചിത്രിതാശീവിഷേന്ദ്രോപക്ലുപ്ത- -സ്ഫുരച്ചാരുതാടങ്കവിദ്യോതികർണാം ॥ 20 ॥ വലക്ഷാഹിരാജാവനദ്ധോർധ്വഭാസി- -സ്ഫുരത്പിംഗലോദ്യജ്ജടാജൂടഭാരാം । മഹാശോണഭോഗീന്ദ്രനിസ്യൂതമൂണ്ഡോ- -ല്ലസത്കിങ്കണീജാലസംശോഭിമധ്യാം ॥ 21 ॥ സദാ സംസ്മരാമീദൃശോം കാമകാലീം ജയേയം സുരാണാം ഹിരണ്യോദ്ഭവാനാം । സ്മരേയുർഹി യേഽന്യേഽപി തേ വൈ ജയേയു- -ര്വിപക്ഷാന്മൃധേ നാത്ര സന്ദേഹലേശഃ ॥ 22 ॥ പഠിഷ്യന്തി യേ മത്കൃതം സ്തോത്രരാജം മുദാ പൂജയിത്വാ സദാ കാമകാലീം । ന ശോകോ ന പാപം ന വാ ദുഃഖദൈന്യം ന മൃത്യുർന രോഗോ ന ഭീതിർന ചാപത് ॥ 23 ॥ ധനം ദീർഘമായുഃ സുഖം ബുദ്ധിരോജോ യശഃ ശർമഭോഗാഃ സ്ത്രിയഃ സൂനവശ്ച । ശ്രിയോ മംഗലം ബുദ്ധിരുത്സാഹ ആജ്ഞാ ലയഃ സർവ വിദ്യാ ഭവേന്മുക്തിരന്തേ ॥ 24 ॥ ഇതി ശ്രീ മഹാകാലസംഹിതായാം ദശമ പടലേ രാവണ കൃത ശ്രീ കാമകലാ കാലീ ഭുജംഗ പ്രയാത സ്തോത്രം ॥