karpūraṃ madhyamāntya svarapararahitaṃ senduvāmākṣiyuktaṃ bījaṃ te mātaretattripuraharavadhu triḥkṛtaṃ ye japanti । teṣāṃ gadyāni padyāni ca mukhakuharādullasantyeva vācaḥ svacchandaṃ dhvāntadhārādhararucirucire sarvasiddhiṃ gatānām ॥ 1 ॥ īśānaḥ senduvāmaśravaṇaparigato bījamanyanmaheśi dvandvaṃ te mandacetā yadi japati jano vāramekaṃ kadācit । jitvā vācāmadhīśaṃ dhanadamapi ciraṃ mohayannambujākṣi vṛndaṃ candrārdhacūḍe prabhavati sa mahāghorabāṇāvataṃse ॥ 2 ॥ īśo vaiśvānarasthaḥ śaśadharavilasadvāmanetreṇa yukto bījaṃ te dvandvamanyadvigalitacikure kālike ye japanti । dveṣṭāraṃ ghnanti te ca tribhuvanamapi te vaśyabhāvaṃ nayanti sṛkkadvandvāsradhārādvayadharavadane dakṣiṇe kāliketi ॥ 3 ॥ ūrdhve vāme kṛpāṇaṃ karakamalatale chinnamuṇḍaṃ tatho'dhaḥ savye'bhītiṃ varaṃ ca trijagadaghahare dakṣiṇe kālike ca । japtvaitannāma ye vā tava vimalatanuṃ bhāvayantyetadamba teṣāmaṣṭau karasthāḥ prakaṭitaradane siddhayastryambakasya ॥ 4 ॥ vargādyaṃ vahnisaṃsthaṃ vidhurativalitaṃ tattrayaṃ kūrcayugmaṃ lajjādvandvaṃ ca paścāt smitamukhitadadhaṣṭhadvayamyojayitvā । mātarye tvāṃ japanti smaraharamahile bhāvayantaḥ svarūpaṃ te lakṣmīlāsyalīlākamaladaladṛśaḥ kāmarūpā bhavanti ॥ 5 ॥ pratyekaṃ vā dvayaṃ vā trayamapi ca paraṃ bījamatyantaguhyaṃ tvannāmnā yojayitvā sakalamapi sadā bhāvayanto japanti । teṣāṃ netrāravinde viharati kamalā vaktraśubhrāṃśubimbe vāgdevī devi muṇḍasragatiśayalasatkaṇṭha pīnastanāḍhye ॥ 6 ॥ gatāsūnāṃ bāhuprakarakṛtakāñcīparilasa- -nnitambāṃ digvastrāṃ tribhuvanavidhātrīṃ trinayanām । śmaśānasthe talpe śavahṛdi mahākālasurata- -prasaktāṃ tvāṃ dhyāyan janani jaḍacetā api kaviḥ ॥ 7 ॥ śivābhirghorābhiḥ śavanivahamuṇḍā'sthi nikaraiḥ paraṃ saṅkīrṇāyāṃ prakaṭitacitāyāṃ haravadhūm । praviṣṭāṃ santuṣṭāmuparisuratenāti yuvatī sadā tvāṃ dhyāyanti kvacidapi na teṣāṃ paribhavaḥ ॥ 8 ॥ vadāmaste kiṃ vā janani vayamuccairjaḍadhiyo na dhātā nāpīśo harirapi na te vetti paramam । tathāpi tvadbhaktirmukharayati cāsmākamasite tadetat kṣantavyaṃ na khalu paśuroṣaḥ samucitaḥ ॥ 9 ॥ samantādāpīnastanajaghanadṛgyauvanavatī ratāsakto naktaṃ yadi japati bhaktastava manum । vivāsāstvāṃ dhyāyan galitacikurastasya vaśagāḥ samastāḥ siddhaughā bhuvi cirataraṃ jīvati kaviḥ ॥ 10 ॥ samāḥ svasthībhūtāṃ japati viparītāṃ yadi sadā vicintya tvāṃ dhyāyannatiśayamahākālasuratām । tadā tasya kṣoṇītalaviharamāṇasya viduṣaḥ karāmbhoje vaśyā haravadhu mahāsiddhi nivahāḥ ॥ 11 ॥ prasūte saṃsāraṃ janani jagatīṃ pālayati ca samastaṃ kṣityādi pralayasamaye saṃharati ca । atastvāṃ dhātā'pi tribhuvanapatiḥ śrīpatirapi maheśo'pi prāyaḥ sakalamapi kiṃ staumi bhavatīm ॥ 12 ॥ aneke sevante bhavadadhikagīrvāṇanivahān vimūḍhāste mātaḥ kimapi na hi jānanti paramam । samārādhyāmādyāṃ hariharaviriñcyādivibudhaiḥ prapanno'smi svairaṃ ratirasamahānandaniratām ॥ 13 ॥ dharitrī kīlālaṃ śucirapi samīro'pi gaganaṃ tvamekā kalyāṇī giriśaramaṇī kāli sakalam । stutiḥ kā te mātastava karuṇayā māmagatikaṃ prasannā tvaṃ bhūyā bhavamananubhūyānmama januḥ ॥ 14 ॥ śmaśānasthaḥ sustho galitacikuro dikpaṭadharaḥ sahasraṃ tvarkāṇāṃ nijagalitavīryeṇa kusumam । japaṃstvat pratyekaṃ manumapi tava dhyānanirato mahākāli svairaṃ sa bhavati dharitrī parivṛḍhaḥ ॥ 15 ॥ gṛhe sammārjanyā parigalita vīryaṃ hi cikuraṃ samūlaṃ madhyāhne vitarati citāyāṃ kujadine । samuccārya premṇā manumapi sakṛt kāli satataṃ gajārūḍho yāti kṣitiparivṛḍhaḥ satkavivaraḥ ॥ 16 ॥ supuṣpairākīrṇaṃ kusumadhanuṣomandiramaho puro dhyāyan dhyāyan yadi japati bhaktastava manum । sagandharvaśreṇīpatirapi kavitvāmṛtanadī nadīnaḥ paryante paramapadalīnaḥ prabhavati ॥ 17 ॥ tripañcāre pīṭhe śavaśivahṛdi smeravadanāṃ mahākālenoccairmadanarasalāvaṇyaniratām । samāsakto naktaṃ svayamapi ratānandanirato jano yo dhyāyettvāṃ janani kila sasyāt smaraharaḥ ॥ 18 ॥ salomāsthi svairaṃ palalamapi mārjāramasite paraṃ cauṣṭraṃ maiṣaṃ naramahiṣayośchāgamapi vā । baliṃ te pūjāyāmapi vitaratāṃ martyavasatāṃ satāṃ siddhiḥ sarvā pratipadamapūrvā prabhavati ॥ 19 ॥ vaśī lakṣaṃ mantraṃ prajapati haviṣyāśanarato divā mātaryuṣmaccaraṇayugala dhyāna nipuṇaḥ । paraṃ naktaṃ nagno nidhuvana vinodena ca manuṃ japellakṣaṃ samyak smaraharasamānaḥ kṣititale ॥ 20 ॥ idaṃ stotraṃ mātastava manusamuddhāraṇa januḥ svarūpākhyaṃ pādāmbujayugalapūjāvidhiyutam । niśārdhe vā pūjāsamayamadhi vā yastu paṭhati pralāpastasyāpi prasarati kavitvāmṛtarasaḥ ॥ 21 ॥ kuraṅgākṣībṛndaṃ tamanusarati premataralaṃ vaśastasya kṣoṇīpatirapi kuberapratinidhiḥ । ripuḥ kārāgāraṃ kalayati ca taṃ kelikalayā ciraṃ jīvanmuktaḥ sa bhavati ca bhaktaḥ pratijanuḥ ॥ 22 ॥ iti śrī mahākālaviracitaṃ śrī kālī karpūra stotram ।