ಕಾಳೀ ಸ್ತುತಿಃ

ನಮಾಮಿ ಕೃಷ್ಣರೂಪಿಣೀಂ ಕೃಷ್ಣಾಂಗಯಷ್ಟಿಧಾರಿಣೀಂ ।

ಸಮಗ್ರತತ್ತ್ವಸಾಗರಂ ಅಪಾರಪಾರಗಹ್ವರಾಂ ॥ 1 ॥

ಶಿವಾಪ್ರಭಾಂ ಸಮುಜ್ಜ್ವಲಾಂ ಸ್ಫುರಚ್ಛಶಾಂಕಶೇಖರಾಂ ।

ಲಲಾಟರತ್ನಭಾಸ್ಕರಾಂ ಜಗತ್ಪ್ರದೀಪ್ತಿಭಾಸ್ಕರಾಂ ॥ 2 ॥

ಮಹೇಂದ್ರಕಶ್ಯಪಾರ್ಚಿತಾಂ ಸನತ್ಕುಮಾರಸಂಸ್ತುತಾಂ ।

ಸುರಾಸುರೇಂದ್ರವಂದಿತಾಂ ಯಥಾರ್ಥನಿರ್ಮಲಾದ್ಭುತಾಂ ॥ 3 ॥

ಅತರ್ಕ್ಯರೋಚಿರೂರ್ಜಿತಾಂ ವಿಕಾರದೋಷವರ್ಜಿತಾಂ ।

ಮುಮುಕ್ಷುಭಿರ್ವಿಚಿಂತಿತಾಂ ವಿಶೇಷತತ್ತ್ವಸೂಚಿತಾಂ ॥ 4 ॥

ಮೃತಾಸ್ಥಿನಿರ್ಮಿತಸ್ರಜಾಂ ಮೃಗೇಂದ್ರವಾಹನಾಗ್ರಜಾಂ ।

ಸುಶುದ್ಧತತ್ತ್ವತೋಷಣಾಂ ತ್ರಿವೇದಪಾರಭೂಷಣಾಂ ॥ 5 ॥

ಭುಜಂಗಹಾರಹಾರಿಣೀಂ ಕಪಾಲಖಂಡಧಾರಿಣೀಂ ।

ಸುಧಾರ್ಮಿಕೌಪಕಾರಿಣೀಂ ಸುರೇಂದ್ರವೈರಿಘಾತಿನೀಂ ॥ 6 ॥

ಕುಠಾರಪಾಶಚಾಪಿನೀಂ ಕೃತಾಂತಕಾಮಭೇದಿನೀಂ ।

ಶುಭಾಂ ಕಪಾಲಮಾಲಿನೀಂ ಸುವರ್ಣಕಲ್ಪಶಾಖಿನೀಂ ॥ 7 ॥

ಶ್ಮಶಾನಭೂಮಿವಾಸಿನೀಂ ದ್ವಿಜೇಂದ್ರಮೌಲಿಭಾವಿನೀಂ ।

ತಮೋಽನ್ಧಕಾರಯಾಮಿನೀಂ ಶಿವಸ್ವಭಾವಕಾಮಿನೀಂ ॥ 8 ॥

ಸಹಸ್ರಸೂರ್ಯರಾಜಿಕಾಂ ಧನಂಜಯೋಗ್ರಕಾರಿಕಾಂ ।

ಸುಶುದ್ಧಕಾಲಕಂದಲಾಂ ಸುಭೃಂಗಬೃಂದಮಂಜುಲಾಂ ॥ 9 ॥

ಪ್ರಜಾಯಿನೀಂ ಪ್ರಜಾವತೀಂ ನಮಾಮಿ ಮಾತರಂ ಸತೀಂ ।

ಸ್ವಕರ್ಮಕಾರಣೇ ಗತಿಂ ಹರಪ್ರಿಯಾಂ ಚ ಪಾರ್ವತೀಂ ॥ 10 ॥

ಅನಂತಶಕ್ತಿಕಾಂತಿದಾಂ ಯಶೋಽರ್ಥಭುಕ್ತಿಮುಕ್ತಿದಾಂ ।

ಪುನಃ ಪುನರ್ಜಗದ್ಧಿತಾಂ ನಮಾಮ್ಯಹಂ ಸುರಾರ್ಚಿತಾಂ ॥ 11 ॥

ಜಯೇಶ್ವರಿ ತ್ರಿಲೋಚನೇ ಪ್ರಸೀದ ದೇವಿ ಪಾಹಿ ಮಾಂ ।

ಜಯಂತಿ ತೇ ಸ್ತುವಂತಿ ಯೇ ಶುಭಂ ಲಭಂತ್ಯಮೋಕ್ಷತಃ ॥ 12 ॥

ಸದೈವ ತೇ ಹತದ್ವಿಷಃ ಪರಂ ಭವಂತಿ ಸಜ್ಜುಷಃ ।

ಜರಾಃ ಪರೇ ಶಿವೇಽಧುನಾ ಪ್ರಸಾಧಿ ಮಾಂ ಕರೋಮಿ ಕಿಂ ॥ 13 ॥

ಅತೀವ ಮೋಹಿತಾತ್ಮನೋ ವೃಥಾ ವಿಚೇಷ್ಟಿತಸ್ಯ ಮೇ ।

ಕುರು ಪ್ರಸಾದಿತಂ ಮನೋ ಯಥಾಸ್ಮಿ ಜನ್ಮಭಂಜನಃ ॥ 14 ॥

ತಥಾ ಭವಂತು ತಾವಕಾ ಯಥೈವ ಘೋಷಿತಾಲಕಾಃ ।

ಇಮಾಂ ಸ್ತುತಿಂ ಮಮೇರಿತಾಂ ಪಠಂತಿ ಕಾಲಿಸಾಧಕಾಃ ।

ನ ತೇ ಪುನಃ ಸುದುಸ್ತರೇ ಪತಂತಿ ಮೋಹಗಹ್ವರೇ ॥ 15 ॥

ಇತಿ ಕಾಲೀರಹಸ್ಯೇ ಬ್ರಹ್ಮ ಕೃತ ಶ್ರೀ ಕಾಲೀ ಸ್ತುತಿಃ ॥

Recite with devotion and pure heart

Regular practice brings spiritual benefits