കർപൂരം മധ്യമാന്ത്യ സ്വരപരരഹിതം സേന്ദുവാമാക്ഷിയുക്തം ബീജം തേ മാതരേതത്ത്രിപുരഹരവധു ത്രിഃകൃതം യേ ജപന്തി । തേഷാം ഗദ്യാനി പദ്യാനി ച മുഖകുഹരാദുല്ലസന്ത്യേവ വാചഃ സ്വച്ഛന്ദം ധ്വാന്തധാരാധരരുചിരുചിരേ സർവസിദ്ധിം ഗതാനാം ॥ 1 ॥ ഈശാനഃ സേന്ദുവാമശ്രവണപരിഗതോ ബീജമന്യന്മഹേശി ദ്വന്ദ്വം തേ മന്ദചേതാ യദി ജപതി ജനോ വാരമേകം കദാചിത് । ജിത്വാ വാചാമധീശം ധനദമപി ചിരം മോഹയന്നംബുജാക്ഷി വൃന്ദം ചന്ദ്രാർധചൂഡേ പ്രഭവതി സ മഹാഘോരബാണാവതംസേ ॥ 2 ॥ ഈശോ വൈശ്വാനരസ്ഥഃ ശശധരവിലസദ്വാമനേത്രേണ യുക്തോ ബീജം തേ ദ്വന്ദ്വമന്യദ്വിഗലിതചികുരേ കാലികേ യേ ജപന്തി । ദ്വേഷ്ടാരം ഘ്നന്തി തേ ച ത്രിഭുവനമപി തേ വശ്യഭാവം നയന്തി സൃക്കദ്വന്ദ്വാസ്രധാരാദ്വയധരവദനേ ദക്ഷിണേ കാലികേതി ॥ 3 ॥ ഊർധ്വേ വാമേ കൃപാണം കരകമലതലേ ഛിന്നമുണ്ഡം തഥോഽധഃ സവ്യേഽഭീതിം വരം ച ത്രിജഗദഘഹരേ ദക്ഷിണേ കാലികേ ച । ജപ്ത്വൈതന്നാമ യേ വാ തവ വിമലതനും ഭാവയന്ത്യേതദംബ തേഷാമഷ്ടൗ കരസ്ഥാഃ പ്രകടിതരദനേ സിദ്ധയസ്ത്ര്യംബകസ്യ ॥ 4 ॥ വർഗാദ്യം വഹ്നിസംസ്ഥം വിധുരതിവലിതം തത്ത്രയം കൂർചയുഗ്മം ലജ്ജാദ്വന്ദ്വം ച പശ്ചാത് സ്മിതമുഖിതദധഷ്ഠദ്വയമ്യോജയിത്വാ । മാതര്യേ ത്വാം ജപന്തി സ്മരഹരമഹിലേ ഭാവയന്തഃ സ്വരൂപം തേ ലക്ഷ്മീലാസ്യലീലാകമലദലദൃശഃ കാമരൂപാ ഭവന്തി ॥ 5 ॥ പ്രത്യേകം വാ ദ്വയം വാ ത്രയമപി ച പരം ബീജമത്യന്തഗുഹ്യം ത്വന്നാമ്നാ യോജയിത്വാ സകലമപി സദാ ഭാവയന്തോ ജപന്തി । തേഷാം നേത്രാരവിന്ദേ വിഹരതി കമലാ വക്ത്രശുഭ്രാംശുബിംബേ വാഗ്ദേവീ ദേവി മുണ്ഡസ്രഗതിശയലസത്കണ്ഠ പീനസ്തനാഢ്യേ ॥ 6 ॥ ഗതാസൂനാം ബാഹുപ്രകരകൃതകാഞ്ചീപരിലസ- -ന്നിതംബാം ദിഗ്വസ്ത്രാം ത്രിഭുവനവിധാത്രീം ത്രിനയനാം । ശ്മശാനസ്ഥേ തല്പേ ശവഹൃദി മഹാകാലസുരത- -പ്രസക്താം ത്വാം ധ്യായൻ ജനനി ജഡചേതാ അപി കവിഃ ॥ 7 ॥ ശിവാഭിർഘോരാഭിഃ ശവനിവഹമുണ്ഡാഽസ്ഥി നികരൈഃ പരം സങ്കീർണായാം പ്രകടിതചിതായാം ഹരവധൂം । പ്രവിഷ്ടാം സന്തുഷ്ടാമുപരിസുരതേനാതി യുവതീ സദാ ത്വാം ധ്യായന്തി ക്വചിദപി ന തേഷാം പരിഭവഃ ॥ 8 ॥ വദാമസ്തേ കിം വാ ജനനി വയമുച്ചൈർജഡധിയോ ന ധാതാ നാപീശോ ഹരിരപി ന തേ വേത്തി പരമം । തഥാപി ത്വദ്ഭക്തിർമുഖരയതി ചാസ്മാകമസിതേ തദേതത് ക്ഷന്തവ്യം ന ഖലു പശുരോഷഃ സമുചിതഃ ॥ 9 ॥ സമന്താദാപീനസ്തനജഘനദൃഗ്യൗവനവതീ രതാസക്തോ നക്തം യദി ജപതി ഭക്തസ്തവ മനും । വിവാസാസ്ത്വാം ധ്യായൻ ഗലിതചികുരസ്തസ്യ വശഗാഃ സമസ്താഃ സിദ്ധൗഘാ ഭുവി ചിരതരം ജീവതി കവിഃ ॥ 10 ॥ സമാഃ സ്വസ്ഥീഭൂതാം ജപതി വിപരീതാം യദി സദാ വിചിന്ത്യ ത്വാം ധ്യായന്നതിശയമഹാകാലസുരതാം । തദാ തസ്യ ക്ഷോണീതലവിഹരമാണസ്യ വിദുഷഃ കരാംഭോജേ വശ്യാ ഹരവധു മഹാസിദ്ധി നിവഹാഃ ॥ 11 ॥ പ്രസൂതേ സംസാരം ജനനി ജഗതീം പാലയതി ച സമസ്തം ക്ഷിത്യാദി പ്രലയസമയേ സംഹരതി ച । അതസ്ത്വാം ധാതാഽപി ത്രിഭുവനപതിഃ ശ്രീപതിരപി മഹേശോഽപി പ്രായഃ സകലമപി കിം സ്തൗമി ഭവതീം ॥ 12 ॥ അനേകേ സേവന്തേ ഭവദധികഗീർവാണനിവഹാൻ വിമൂഢാസ്തേ മാതഃ കിമപി ന ഹി ജാനന്തി പരമം । സമാരാധ്യാമാദ്യാം ഹരിഹരവിരിഞ്ച്യാദിവിബുധൈഃ പ്രപന്നോഽസ്മി സ്വൈരം രതിരസമഹാനന്ദനിരതാം ॥ 13 ॥ ധരിത്രീ കീലാലം ശുചിരപി സമീരോഽപി ഗഗനം ത്വമേകാ കല്യാണീ ഗിരിശരമണീ കാലി സകലം । സ്തുതിഃ കാ തേ മാതസ്തവ കരുണയാ മാമഗതികം പ്രസന്നാ ത്വം ഭൂയാ ഭവമനനുഭൂയാന്മമ ജനുഃ ॥ 14 ॥ ശ്മശാനസ്ഥഃ സുസ്ഥോ ഗലിതചികുരോ ദിക്പടധരഃ സഹസ്രം ത്വർകാണാം നിജഗലിതവീര്യേണ കുസുമം । ജപംസ്ത്വത് പ്രത്യേകം മനുമപി തവ ധ്യാനനിരതോ മഹാകാലി സ്വൈരം സ ഭവതി ധരിത്രീ പരിവൃഢഃ ॥ 15 ॥ ഗൃഹേ സമ്മാർജന്യാ പരിഗലിത വീര്യം ഹി ചികുരം സമൂലം മധ്യാഹ്നേ വിതരതി ചിതായാം കുജദിനേ । സമുച്ചാര്യ പ്രേമ്ണാ മനുമപി സകൃത് കാലി സതതം ഗജാരൂഢോ യാതി ക്ഷിതിപരിവൃഢഃ സത്കവിവരഃ ॥ 16 ॥ സുപുഷ്പൈരാകീർണം കുസുമധനുഷോമന്ദിരമഹോ പുരോ ധ്യായൻ ധ്യായൻ യദി ജപതി ഭക്തസ്തവ മനും । സഗന്ധർവശ്രേണീപതിരപി കവിത്വാമൃതനദീ നദീനഃ പര്യന്തേ പരമപദലീനഃ പ്രഭവതി ॥ 17 ॥ ത്രിപഞ്ചാരേ പീഠേ ശവശിവഹൃദി സ്മേരവദനാം മഹാകാലേനോച്ചൈർമദനരസലാവണ്യനിരതാം । സമാസക്തോ നക്തം സ്വയമപി രതാനന്ദനിരതോ ജനോ യോ ധ്യായേത്ത്വാം ജനനി കില സസ്യാത് സ്മരഹരഃ ॥ 18 ॥ സലോമാസ്ഥി സ്വൈരം പലലമപി മാർജാരമസിതേ പരം ചൗഷ്ട്രം മൈഷം നരമഹിഷയോശ്ഛാഗമപി വാ । ബലിം തേ പൂജായാമപി വിതരതാം മർത്യവസതാം സതാം സിദ്ധിഃ സർവാ പ്രതിപദമപൂർവാ പ്രഭവതി ॥ 19 ॥ വശീ ലക്ഷം മന്ത്രം പ്രജപതി ഹവിഷ്യാശനരതോ ദിവാ മാതര്യുഷ്മച്ചരണയുഗല ധ്യാന നിപുണഃ । പരം നക്തം നഗ്നോ നിധുവന വിനോദേന ച മനും ജപേല്ലക്ഷം സമ്യക് സ്മരഹരസമാനഃ ക്ഷിതിതലേ ॥ 20 ॥ ഇദം സ്തോത്രം മാതസ്തവ മനുസമുദ്ധാരണ ജനുഃ സ്വരൂപാഖ്യം പാദാംബുജയുഗലപൂജാവിധിയുതം । നിശാർധേ വാ പൂജാസമയമധി വാ യസ്തു പഠതി പ്രലാപസ്തസ്യാപി പ്രസരതി കവിത്വാമൃതരസഃ ॥ 21 ॥ കുരംഗാക്ഷീബൃന്ദം തമനുസരതി പ്രേമതരലം വശസ്തസ്യ ക്ഷോണീപതിരപി കുബേരപ്രതിനിധിഃ । രിപുഃ കാരാഗാരം കലയതി ച തം കേലികലയാ ചിരം ജീവന്മുക്തഃ സ ഭവതി ച ഭക്തഃ പ്രതിജനുഃ ॥ 22 ॥ ഇതി ശ്രീ മഹാകാലവിരചിതം ശ്രീ കാലീ കർപൂര സ്തോത്രം ।