ഭദ്രകാല്യഷ്ടകം

ഘോരേ സംസാരവഹ്നൗ പ്രലയമുപഗതേ യാ ഹി കൃത്വാ ശ്മശാനേ

നൃത്യത്യന്യൂനശക്തിർജഗദിദമഖിലം മുണ്ഡമാലാഭിരാമാ ।

ഭിദ്യദ്ബ്രഹ്മാണ്ഡഭാണ്ഡം പടുതരനിനദൈരട്ടഹാസൈരുദാരൈഃ

സാസ്മാകം വൈരിവർഗം ശമയതു തരസാ ഭദ്രദാ ഭദ്രകാലീ ॥ 1 ॥

മഗ്നേ ലോകേഽമ്ബുരാശൗ നലിനഭവനുതാ വിഷ്ണുനാ കാരയിത്വാ

ചക്രോത്കൃത്തോരുകണ്ഠം മധുമപി ഭയദം കൈടഭം ചാതിഭീമം ।

പദ്മോത്പത്തേഃ പ്രഭൂതം ഭയമുത രിപുതോയാഹരത്സാനുകമ്പാ

സാസ്മാകം വൈരിവർഗം ശമയതു തരസാ ഭദ്രദാ ഭദ്രകാലീ ॥ 2 ॥

വിശ്വത്രാണം വിധാതും മഹിഷമഥ രാണേ യാഽസുരം ഭീമരൂപം

ശൂലേനാഹത്യ വക്ഷസ്യമരപതിനുതാ പാതയന്തീ ച ഭൂമൗ ।

തസ്യാസൃഗ്വാഹിനീഭിർജലനിധിമഖിലം ശോണിതാഭം ച ചക്രേ

സാസ്മാകം വൈരിവർഗം ശമയതു തരസാ ഭദ്രദാ ഭദ്രകാലീ ॥ 3 ॥

യാ ദേവീ ചണ്ഡമുണ്ഡൗ ത്രിഭുവനനലിനീവാരണൗ ദേവശത്രൂ

ദൃഷ്ട്വാ യുദ്ധോത്സവേ തൗ ദ്രുതതരമഭിയാതാസിനാ കൃത്തകണ്ഠൗ ।

കൃത്വാ തദ്രക്തപാനോദ്ഭവമദമുദിതാ സാട്ടഹാസാതിഭീമാ

സാസ്മാകം വൈരിവർഗം ശമയതു തരസാ ഭദ്രദാ ഭദ്രകാലീ ॥ 4 ॥

സദ്യസ്തം രക്തബീജം സമരഭുവി നതാ ഘോരരൂപാനസംഖ്യാൻ

രാക്തോദ്ഭൂതൈരസംഖ്യൈർഗജതുരഗരഥൈഃ സാർഥമന്യാംശ്ച ദൈത്യാൻ ।

വക്ത്രേ നിക്ഷിപ്യ ദൃഷ്ട്വാ ഗുരുതരദശനൈരാപപൗ ശോണിതൗഘം

സാസ്മാകം വൈരിവർഗം ശമയതു തരസാ ഭദ്രദാ ഭദ്രകാലീ ॥ 5 ॥

സ്ഥാനാദ്ഭ്രഷ്ടൈശ്ച ദേവൈസ്തുഹിനഗിരിതടേ സംഗതൈഃ സംസ്തുതാ യാ

സംഖ്യാഹീനൈഃ സമേതം ത്രിദശരിപുഗണൈഃ സ്യന്ദനേഭാശ്വയുക്തൈഃ ।

യുദ്ധേ ശുംഭം നിശുംഭം ത്രിഭുവനവിപദം നാശയന്തീ ച ജഘ്നേ

സാസ്മാകം വൈരിവർഗം ശമയതു തരസാ ഭദ്രദാ ഭദ്രകാലീ ॥ 6 ॥

ശംഭോർനേത്രാനലേ യാ ജനനമപി ജഗത്ത്രാണഹേതോരയാസീത്

ഭൂയസ്തീക്ഷ്ണാതിധാരാവിദലിതദനുജാ ദാരുകം ചാപി ഹത്വാ ।

തസ്യാസൃക്പാനതുഷ്ടാ മുഹുരപി കൃതവത്യട്ടഹാസം കഠോരം

സാസ്മാകം വൈരിവർഗം ശമയതു തരസാ ഭദ്രദാ ഭദ്രകാലീ ॥ 7 ॥

യാ ദേവീ കാലരാത്രീ തുഹിനഗിരസുതാ ലോകമാതാ ധരിത്രീ

വാണീ നിദ്രാ ച മായാ മനസിജദയിതാ ഘോരരൂപാതിസൗമ്യാ ।

ചാമുണ്ഡാ ഖഡ്ഗഹസ്താ രിപുഹനനപരാ ശോണിതാസ്വാദകാമാ

സാ ഹന്യാദ്വിശ്വവന്ദ്യാ മമ രിപുനിവഹാ ഭദ്രദാ ഭദ്രകാലീ ॥ 8 ॥

ഭദ്രകാല്യഷ്ടകം ജപ്യം ശത്രുസങ്ക്ഷയകാങ്ക്ഷിണാ ।

സ്വർഗാപവർഗദം പുണ്യം ദുഷ്ടഗ്രഹനിവാരണം ॥ 9 ॥

ഇതി ശ്രീ ഭദ്രകാല്യഷ്ടകം ।

Recite with devotion and pure heart

Regular practice brings spiritual benefits