ಶ್ರೀ ಗಾಯತ್ರ್ಯಷ್ಟೋತ್ತರಶತನಾಮ ಸ್ತೋತ್ರಂ

ಶ್ರೀಗಾಯತ್ರೀ ಜಗನ್ಮಾತಾ ಪರಬ್ರಹ್ಮಸ್ವರೂಪಿಣೀ ।

ಪರಮಾರ್ಥಪ್ರದಾ ಜಪ್ಯಾ ಬ್ರಹ್ಮತೇಜೋವಿವರ್ಧಿನೀ ॥ 1 ॥

ಬ್ರಹ್ಮಾಸ್ತ್ರರೂಪಿಣೀ ಭವ್ಯಾ ತ್ರಿಕಾಲಧ್ಯೇಯರೂಪಿಣೀ ।

ತ್ರಿಮೂರ್ತಿರೂಪಾ ಸರ್ವಜ್ಞಾ ವೇದಮಾತಾ ಮನೋನ್ಮನೀ ॥ 2 ॥

ಬಾಲಿಕಾ ತರುಣೀ ವೃದ್ಧಾ ಸೂರ್ಯಮಂಡಲವಾಸಿನೀ ।

ಮಂದೇಹದಾನವಧ್ವಂಸಕಾರಿಣೀ ಸರ್ವಕಾರಣಾ ॥ 3 ॥

ಹಂಸಾರೂಢಾ ವೃಷಾರೂಢಾ ಗರುಡಾರೋಹಿಣೀ ಶುಭಾ ।

ಷಟ್ಕುಕ್ಷಿಸ್ತ್ರಿಪದಾ ಶುದ್ಧಾ ಪಂಚಶೀರ್ಷಾ ತ್ರಿಲೋಚನಾ ॥ 4 ॥

ತ್ರಿವೇದರೂಪಾ ತ್ರಿವಿಧಾ ತ್ರಿವರ್ಗಫಲದಾಯಿನೀ ।

ದಶಹಸ್ತಾ ಚಂದ್ರವರ್ಣಾ ವಿಶ್ವಾಮಿತ್ರವರಪ್ರದಾ ॥ 5 ॥

ದಶಾಯುಧಧರಾ ನಿತ್ಯಾ ಸಂತುಷ್ಟಾ ಬ್ರಹ್ಮಪೂಜಿತಾ ।

ಆದಿಶಕ್ತಿರ್ಮಹಾವಿದ್ಯಾ ಸುಷುಮ್ನಾಖ್ಯಾ ಸರಸ್ವತೀ ॥ 6 ॥

ಚತುರ್ವಿಂಶತ್ಯಕ್ಷರಾಢ್ಯಾ ಸಾವಿತ್ರೀ ಸತ್ಯವತ್ಸಲಾ ।

ಸಂಧ್ಯಾ ರಾತ್ರಿಃ ಪ್ರಭಾತಾಖ್ಯಾ ಸಾಂಖ್ಯಾಯನಕುಲೋದ್ಭವಾ ॥ 7 ॥

ಸರ್ವೇಶ್ವರೀ ಸರ್ವವಿದ್ಯಾ ಸರ್ವಮಂತ್ರಾದಿರವ್ಯಯಾ ।

ಶುದ್ಧವಸ್ತ್ರಾ ಶುದ್ಧವಿದ್ಯಾ ಶುಕ್ಲಮಾಲ್ಯಾನುಲೇಪನಾ ॥ 8 ॥

ಸುರಸಿಂಧುಸಮಾ ಸೌಮ್ಯಾ ಬ್ರಹ್ಮಲೋಕನಿವಾಸಿನೀ ।

ಪ್ರಣವಪ್ರತಿಪಾದ್ಯಾರ್ಥಾ ಪ್ರಣತೋದ್ಧರಣಕ್ಷಮಾ ॥ 9 ॥

ಜಲಾಂಜಲಿಸುಸಂತುಷ್ಟಾ ಜಲಗರ್ಭಾ ಜಲಪ್ರಿಯಾ ।

ಸ್ವಾಹಾ ಸ್ವಧಾ ಸುಧಾಸಂಸ್ಥಾ ಶ್ರೌಷಡ್ವೌಷಡ್ವಷಟ್ಕ್ರಿಯಾ ॥ 10 ॥

ಸುರಭಿಃ ಷೋಡಶಕಲಾ ಮುನಿಬೃಂದನಿಷೇವಿತಾ ।

ಯಜ್ಞಪ್ರಿಯಾ ಯಜ್ಞಮೂರ್ತಿಃ ಸ್ರುಕ್ಸ್ರುವಾಜ್ಯಸ್ವರೂಪಿಣೀ ॥ 11 ॥

ಅಕ್ಷಮಾಲಾಧರಾ ಚಾಽಕ್ಷಮಾಲಾಸಂಸ್ಥಾಽಕ್ಷರಾಕೃತಿಃ ।

ಮಧುಚ್ಛಂದಋಷಿಪ್ರೀತಾ ಸ್ವಚ್ಛಂದಾ ಛಂದಸಾಂ ನಿಧಿಃ ॥ 12 ॥

ಅಂಗುಲೀಪರ್ವಸಂಸ್ಥಾನಾ ಚತುರ್ವಿಂಶತಿಮುದ್ರಿಕಾ ।

ಬ್ರಹ್ಮಮೂರ್ತೀ ರುದ್ರಶಿಖಾ ಸಹಸ್ರಪರಮಾಽಮ್ಬಿಕಾ ॥ 13 ॥

ವಿಷ್ಣುಹೃದ್ಗಾ ಚಾಗ್ನಿಮುಖೀ ಶತಮಧ್ಯಾ ದಶಾವರಾ ।

ಸಹಸ್ರದಲಪದ್ಮಸ್ಥಾ ಹಂಸರೂಪಾ ನಿರಂಜನಾ ॥ 14 ॥

ಚರಾಚರಸ್ಥಾ ಚತುರಾ ಸೂರ್ಯಕೋಟಿಸಮಪ್ರಭಾ ।

ಪಂಚವರ್ಣಮುಖೀ ಧಾತ್ರೀ ಚಂದ್ರಕೋಟಿಶುಚಿಸ್ಮಿತಾ ॥ 15 ॥

ಮಹಾಮಾಯಾ ವಿಚಿತ್ರಾಂಗೀ ಮಾಯಾಬೀಜನಿವಾಸಿನೀ ।

ಸರ್ವಯಂತ್ರಾತ್ಮಿಕಾ ಸರ್ವತಂತ್ರರೂಪಾ ಜಗದ್ಧಿತಾ ॥ 16 ॥

ಮರ್ಯಾದಾಪಾಲಿಕಾ ಮಾನ್ಯಾ ಮಹಾಮಂತ್ರಫಲಪ್ರದಾ ।

ಇತ್ಯಷ್ಟೋತ್ತರನಾಮಾನಿ ಗಾಯತ್ರ್ಯಾಃ ಪ್ರೋಕ್ತವಾನ್ಮುನಿಃ ॥ 17 ॥

ಏತದಷ್ಟೋತ್ತರಶತಂ ನಿತ್ಯಂ ಭಕ್ತಿಯುತಃ ಶುಚಿಃ ।

ತ್ರಿಸಂಧ್ಯಂ ಯಃ ಪಠೇತ್ಸರ್ವಮಂತ್ರಸಿದ್ಧಿಮವಾಪ್ನುಯಾತ್ ॥ 18 ॥

ಇತಿ ಶ್ರೀವಸಿಷ್ಠ ಪ್ರೋಕ್ತ ಶ್ರೀ ಗಾಯತ್ರ್ಯಷ್ಟೋತ್ತರಶತನಾಮ ಸ್ತೋತ್ರಂ ।

Recite with devotion and pure heart

Regular practice brings spiritual benefits