ನೀಲಾಲಕಾಂ ಶಶಿಮುಖೀಂ ನವಪಲ್ಲವೋಷ್ಠೀಂ ಚಾಂಪೇಯಪುಷ್ಪಸುಷಮೋಜ್ಜ್ವಲದಿವ್ಯನಾಸಾಂ । ಪದ್ಮೇಕ್ಷಣಾಂ ಮುಕುರಸುಂದರಗಂಡಭಾಗಾಂ ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ ॥ 1 ॥ ಶ್ರೀಕುಂದಕುಡ್ಮಲಶಿಖೋಜ್ಜ್ವಲದಂತಬೃಂದ- -ಮಂದಸ್ಮಿತದ್ಯುತಿತಿರೋಹಿತಚಾರುವಾಣೀಂ । ನಾನಾಮಣಿಸ್ಥಗಿತಹಾರಸುಚಾರುಕಂಠೀಂ ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ ॥ 2 ॥ ಪೀನಸ್ತನೀಂ ಘನಭುಜಾಂ ವಿಪುಲಾಬ್ಜಹಸ್ತಾಂ ಭೃಂಗಾವಲೀಜಿತಸುಶೋಭಿತರೋಮರಾಜಿಂ । ಮತ್ತೇಭಕುಂಭಕುಚಭಾರಸುನಮ್ರಮಧ್ಯಾಂ ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ ॥ 3 ॥ ರಂಭೋಜ್ಜ್ವಲೋರುಯುಗಲಾಂ ಮೃಗರಾಜಪತ್ರಾ- -ಮಿಂದ್ರಾದಿದೇವಮಕುಟೋಜ್ಜ್ವಲಪಾದಪದ್ಮಾಂ । ಹೇಮಾಂಬರಾಂ ಘನಘೃತಾಂಚಿತಖಡ್ಗವಲ್ಲೀಂ ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ ॥ 4 ॥ ಮತ್ತೇಭವಕ್ತ್ರಜನನೀಂ ಮೃಡದೇಹಯುಕ್ತಾಂ ಶೈಲಾಗ್ರಮಧ್ಯನಿಲಯಾಂ ವರಸುಂದರಾಂಗೀಂ । ಕೋಟೀಶ್ವರಾಖ್ಯಹೃದಿಸಂಸ್ಥಿತಪಾದಪದ್ಮಾಂ ತ್ವಾಂ ಸಾಂಪ್ರತಂ ತ್ರಿಪುರಸುಂದರಿ ದೇವಿ ವಂದೇ ॥ 5 ॥ ಬಾಲೇ ತ್ವತ್ಪಾದಯುಗಲಂ ಧ್ಯಾತ್ವಾ ಸಂಪ್ರತಿ ನಿರ್ಮಿತಂ । ನವೀನಂ ಪಂಚರತ್ನಂ ಚ ಧಾರ್ಯತಾಂ ಚರಣದ್ವಯೇ ॥ 6 ॥ ಇತಿ ಶ್ರೀ ತ್ರಿಪುರಸುಂದರೀ ಪಂಚರತ್ನ ಸ್ತೋತ್ರಂ ।