asya śrībālādevyā hṛdayamahāmantrasya, sadāśivaḥ ṛṣiḥ, anuṣṭupchandaḥ, bālātripurasundarī devatā, mama bālātripurasundarī devatā prītyarthe jape viniyogaḥ । dhyānam – vande devīṃ śivāṃ bālāṃ bhāsvanmaṇḍalamadhyagām । cañcaccandrānanāṃ taptacāmīkarasamaprabhām ॥ 1 ॥ nṛtyatkhañjananetrasya locanātyantavallabhām । madhyabhāge lasatkāñcī maṇimuktāvinirmitām ॥ 2 ॥ padavinyastahaṃsālīṃ śukanāsāvirājitām । kariśuṇḍoruyugalāṃ mattakokilaniḥsvanām ॥ 3 ॥ pustakaṃ japamālāṃ ca varadā'bhayapāṇinīm । kumārīveśaśobhāḍhyāṃ kumārīvṛndamaṇḍitām ॥ 4 ॥ vidrumādharaśobhāḍhyāṃ vidrumālinakhālikām । kvaṇatkāñcīṃ kalānāthasamānarucirānanām ॥ 5 ॥ mṛṇālabāhulatikāṃ nānāratnavirājitām । karapadmasamānābhāṃ pādapadmavirājitām ॥ 6 ॥ cārucāmpeyavasanāṃ devadevanamaskṛtām । candanenduviliptāṅgīṃ romarājīvicitritām ॥ 7 ॥ tilapuṣpasamānābhāṃ nāsāratnasamanvitām । gajagaṇḍanitambābhāṃ rambhājaṅghāvirājitām ॥ 8 ॥ haraviṣṇumahendrādyaiḥ pūjyaśrīpādapaṅkajām । kalyāṇīṃ kamalāṃ kālīṃ kuñcikāṃ kamaleśvarīm ॥ 9 ॥ pāvanīṃ paramāṃ śaktiṃ pavitrāṃ pāvanīṃ śivām । bhavānīṃ bhavapāśaghnīṃ bhītihāṃ bhuvaneśvarīm ॥ 10 ॥ bhavānīṃ bhavaśaktiṃ ca bheruṇḍāṃ muṇḍamālinīm । jalandharagiryutsaṅgāṃ pūrṇagiryanurāgiṇīm ॥ 11 ॥ kāmarūpāṃ ca kāmākhyāṃ devīkoṭakṛtālayām । oṅkārapīṭhanilayāṃ mahāmāyāṃ maheśvarīm ॥ 12 ॥ viśveśvarīṃ ca madhurāṃ nānārūpākṛtāpurīm । aiṃ klīṃ sauḥ tryakṣarāṃ bālāṃ tadvilomāṃ kumārikām ॥ 13 ॥ hauḥ aiṃ haṃsaḥ namo devi tripurāṃ jīvabhairavīm । nārado yasya devarṣiḥ mahāśāntiphalapradām ॥ 14 ॥ oṃ namo śrīmahālakṣmyai lakṣmīṃ tripurabhairavīm । oṃ hrīṃ jūṃ saḥ prāṇagranthiḥ dvidhārgakavacadvayam ॥ 15 ॥ iyaṃ sañjīvinī devī mṛtān jīvatvadāyinī । phreḥ phraṃ na pha la va ra yūṃ śroṃ śroṃ amṛtamāvadet ॥ 16 ॥ srāvaya srāvaya tathā vrīṃ vrīṃ mṛtyuñjayābhidhā । oṃ namo prathamābhāṣya kālībījaṃ dvidhā paṭhet ॥ 17 ॥ kūrcadvayaṃ tathā māyā āgāmipadamāvadet । mṛtyuṃ chindi tathā bhindi mahāmṛtyuñjayo bhavet ॥ 18 ॥ tava śabdaṃ mamābhāṣya khaḍgena ca vidāraya । dvidhā bhāṣya maheśāni tadante vahnisundarī ॥ 19 ॥ iyaṃ devī mahāvidyā āgāmi kālavañcinī । prātardīpadalākāraṃ vāgbhavaṃ rasanātale ॥ 20 ॥ vicintya prajapettacca mahākavirbhaveddhruvam । madhyāhne kāmarājākhyaṃ japākusumasannibham ॥ 21 ॥ vicintya hṛdi madhye tu tacca mantraṃ japetpriye । dharmārthakāmamokṣāṇāṃ bhājano jāyate dhruvam ॥ 22 ॥ tārtīyaṃ candrasaṅkāśaṃ sāyaṅkāle vicintya ca । prajapettatra deveśi jāyate madanopamaḥ ॥ 23 ॥ vāgbhavaṃ kāmarājaṃ tu tārtīyaṃ vahnivallabhām । ayutaṃ prajapennityaṃ āgāmī kālo vañcyate ॥ 24 ॥ trikoṇaṃ cakramālikhya māyāyuktaṃ maheśvari । tasyopari likhetpadmaṃ mātṛkā mantragarbhitam ॥ 25 ॥ tasyopari samāstīrya cāsanaṃ raktavarṇakam । tasyopari viśeddevi sādhakaḥ prāṅmukho niśi ॥ 26 ॥ krameṇa prajapedvarṇān vāgādi niyataḥ śuciḥ । maṇḍalatritaye devi prāpyate siddhiruttamā ॥ 27 ॥ navayonyātmakaṃ cakraṃ pūjayecchāstravartmanā । prajapeddvyakṣarīṃ bālāṃ sarvasiddhīśvaro bhavet ॥ 28 ॥ yaṃ yaṃ cintayate kāmaṃ taṃ taṃ prāpnoti sarvaśaḥ । idaṃ tu hṛdayaṃ devi tavāgre kathitaṃ mayā ॥ 29 ॥ mama bhāgyaṃ ca sarvasvaṃ brahmādīnāṃ ca durlabham । gopanīyaṃ tvayā bhadre svayoniriva pārvati ॥ 30 ॥ śatāvartena deveśi mānuṣī vaśamāpnuyāt । sahasrāvartanāddevi devā vai vaśamāpnuyuḥ ॥ 31 ॥ lakṣamāvartanāddevi śunāsīraḥ svakāsanāt । kṣaṇāccyavati tatra vai kiṃ punaḥ kṣudrajantavaḥ ॥ 32 ॥ tasmātsarvaprayatnena jñātvā devi japenmanum । sarvasiddhimavāpnoti sarvadā sukhavānbhavet ॥ 33 ॥ iti jālaśambaramahātantre śrī bālā tripura sundarī hṛdayam ।