īśvara uvāca । koṭitantreṣu gopyā hi vidyātibhayamocinī । divyaṃ hi kavacaṃ tasyāḥ śṛṇuṣva sarvakāmadam ॥ 1 ॥ asya śrītārākavacasya akṣobhya ṛṣiḥ triṣṭup chandaḥ bhagavatī tārā devatā sarvamantrasiddhi samṛddhaye jape viniyogaḥ । kavacam । praṇavo me śiraḥ pātu brahmarūpā maheśvarī । lalāṭe pātu hrīṅkāro bījarūpā maheśvarī ॥ 2 ॥ strīṅkāro vadane nityaṃ lajjārūpā maheśvarī । hūṅkāraḥ pātu hṛdaye bhavānīrūpaśaktidhṛk ॥ 3 ॥ phaṭkāraḥ pātu sarvāṅge sarvasiddhiphalapradā । kharvā māṃ pātu deveśī gaṇḍayugme bhayāpahā ॥ 4 ॥ nimnodarī sadā skandhayugme pātu maheśvarī । vyāghracarmāvṛtā kaṭyāṃ pātu devī śivapriyā ॥ 5 ॥ pīnonnatastanī pātu pārśvayugme maheśvarī । raktavartulanetrā ca kaṭideśe sadā'vatu ॥ 6 ॥ lalajjihvā sadā pātu nābhau māṃ bhuvaneśvarī । karālāsyā sadā pātu liṅge devī harapriyā ॥ 7 ॥ piṅgograikajaṭā pātu jaṅghāyāṃ vighnanāśinī । pretakharparabhṛddevī jānucakre maheśvarī ॥ 8 ॥ nīlavarṇā sadā pātu jānunī sarvadā mama । nāgakuṇḍaladhartrī ca pātu pādayuge tataḥ ॥ 9 ॥ nāgahāradharā devī sarvāṅgaṃ pātu sarvadā । nāgakaṅkadharā devī pātu prāntaradeśataḥ ॥ 10 ॥ caturbhujā sadā pātu gamane śatrunāśinī । khaḍgahastā mahādevī śravaṇe pātu sarvadā ॥ 11 ॥ nīlāmbaradharā devī pātu māṃ vighnanāśinī । kartrihastā sadā pātu vivāde śatrumadhyataḥ ॥ 12 ॥ brahmarūpadharā devī saṅgrāme pātu sarvadā । nāgakaṅkaṇadhartrī ca bhojane pātu sarvadā ॥ 13 ॥ śavakarṇā mahādevī śayane pātu sarvadā । vīrāsanadharā devī nidrāyāṃ pātu sarvadā ॥ 14 ॥ dhanurbāṇadharā devī pātu māṃ vighnasaṅkule । nāgāñcitakaṭī pātu devī māṃ sarvakarmasu ॥ 15 ॥ chinnamuṇḍadharā devī kānane pātu sarvadā । citāmadhyasthitā devī māraṇe pātu sarvadā ॥ 16 ॥ dvīpicarmadharā devī putradāradhanādiṣu । alaṅkārānvitā devī pātu māṃ haravallabhā ॥ 17 ॥ rakṣa rakṣa nadīkuñje hūṃ hūṃ phaṭ susamanvite । bījarūpā mahādevī parvate pātu sarvadā ॥ 18 ॥ maṇibhṛdvajriṇī devī mahāpratisare tathā । rakṣa rakṣa sadā hūṃ hūṃ oṃ hrīṃ svāhā maheśvarī ॥ 19 ॥ puṣpaketurajārheti kānane pātu sarvadā । oṃ hrīṃ vajrapuṣpaṃ huṃ phaṭ prāntare sarvakāmadā ॥ 20 ॥ oṃ puṣpe puṣpe mahāpuṣpe pātu putrānmaheśvarī । hūṃ svāhā śaktisamyuktā dārān rakṣatu sarvadā ॥ 21 ॥ oṃ āṃ hūṃ svāhā maheśānī pātu dyūte harapriyā । oṃ hrīṃ sarvavighnotsāriṇī devī vighnānmāṃ sadā'vatu ॥ 22 ॥ oṃ pavitravajrabhūme huṃ phaṭ svāhā samanvitā । pūrikā pātu māṃ devī sarvavighnavināśinī ॥ 23 ॥ oṃ āḥ surekhe vajrarekhe huṃ phaṭ svāhā samanvitā । pātāle pātu sā devī lākinī nāmasañjñikā ॥ 24 ॥ hrīṅkārī pātu māṃ pūrve śaktirūpā maheśvarī । strīṅkārī pātu deveśī vadhūrūpā maheśvarī ॥ 25 ॥ hūṃsvarūpā mahādevī pātu māṃ krodharūpiṇī । phaṭ svarūpā mahāmāyā uttare pātu sarvadā ॥ 26 ॥ paścime pātu māṃ devī phaṭ svarūpā harapriyā । madhye māṃ pātu deveśī hūṃ svarūpā nagātmajā ॥ 27 ॥ nīlavarṇā sadā pātu sarvato vāgbhavā sadā । bhavānī pātu bhavane sarvaiśvaryapradāyinī ॥ 28 ॥ vidyādānaratā devī vaktre nīlasarasvatī । śāstre vāde ca saṅgrāme jale ca viṣame girau ॥ 29 ॥ bhīmarūpā sadā pātu śmaśāne bhayanāśinī । bhūtapretālaye ghore durgamā śrīghanā'vatu ॥ 30 ॥ pātu nityaṃ maheśānī sarvatra śivadūtikā । kavacasya māhātmyaṃ nāhaṃ varṣaśatairapi ॥ 31 ॥ śaknomi gadituṃ devi bhavettasya phalaṃ ca yat । putradāreṣu bandhūnāṃ sarvadeśe ca sarvadā ॥ 32 ॥ na vidyate bhayaṃ tasya nṛpapūjyo bhavecca saḥ । śucirbhūtvā'śucirvāpi kavacaṃ sarvakāmadam ॥ 33 ॥ prapaṭhan vā smaranmartyo duḥkhaśokavivarjitaḥ । sarvaśāstre maheśāni kavirāḍbhavati dhruvam ॥ 34 ॥ sarvavāgīśvaro martyo lokavaśyo dhaneśvaraḥ । raṇe dyūte vivāde ca jayastatra bhaveddhruvam ॥ 35 ॥ putrapautrānvito martyo vilāsī sarvayoṣitām । śatravo dāsatāṃ yānti sarveṣāṃ vallabhaḥ sadā ॥ 36 ॥ garvī kharvī bhavatyeva vādī skhalati darśanāt । mṛtyuśca vaśyatāṃ yāti dāsāstasyāvanībhujaḥ ॥ 37 ॥ prasaṅgātkathitaṃ sarvaṃ kavacaṃ sarvakāmadam । prapaṭhanvā smaranmartyaḥ śāpānugrahaṇe kṣamaḥ ॥ 38 ॥ ānandavṛndasindhūnāmadhipaḥ kavirāḍbhavet । sarvavāgīśvaro martyo lokavaśyaḥ sadā sukhī ॥ 39 ॥ guroḥ prasādamāsādya vidyāṃ prāpya sugopitām । tatrāpi kavacaṃ devi durlabhaṃ bhuvanatraye ॥ 40 ॥ gururdevo haraḥ sākṣāttatpatnī tu harapriyā । abhedena bhajedyastu tasya siddhiradūrataḥ ॥ 41 ॥ mantrācārā maheśāni kathitāḥ pūrvavatpriye । nābhau jyotistathā raktaṃ hṛdayopari cintayet ॥ 42 ॥ aiśvaryaṃ sukavitvaṃ ca mahāvāgīśvaro nṛpaḥ । nityaṃ tasya maheśāni mahilāsaṅgamaṃ caret ॥ 43 ॥ pañcācārarato martyaḥ siddho bhavati nānyathā । śaktiyukto bhavenmartyaḥ siddho bhavati nānyathā ॥ 44 ॥ brahmā viṣṇuśca rudraśca ye devāsuramānuṣāḥ । taṃ dṛṣṭvā sādhakaṃ devi lajjāyuktā bhavanti te ॥ 45 ॥ svarge martye ca pātāle ye devāḥ siddhidāyakāḥ । praśaṃsanti sadā devi taṃ dṛṣṭvā sādhakottamam ॥ 46 ॥ vighnātmakāśca ye devāḥ svarge martye rasātale । praśaṃsanti sadā sarve taṃ dṛṣṭvā sādhakottamam ॥ 47 ॥ iti te kathitaṃ devi mayā samyakprakīrtitam । bhuktimuktikaraṃ sākṣātkalpavṛkṣasvarūpakam ॥ 48 ॥ āsādyādyaguruṃ prasādya ya idaṃ kalpadrumālambanaṃ mohenāpi madena cāpi rahito jāḍyena vā yujyate । siddho'sau bhuvi sarvaduḥkhavipadāṃ pāraṃ prayātyantake mitraṃ tasya nṛpāśca devi vipado naśyanti tasyāśu ca ॥ 49 ॥ tadgātraṃ prāpya śastrāṇi brahmāstrādīni vai bhuvi । tasya gehe sthirā lakṣmīrvāṇī vaktre vaseddhruvam ॥ 50 ॥ idaṃ kavacamajñātvā tārāṃ yo bhajate naraḥ । alpāyurnirdhano mūrkho bhavatyeva na saṃśayaḥ ॥ 51 ॥ likhitvā dhārayedyastu kaṇṭhe vā mastake bhuje । tasya sarvārthasiddhiḥ syādyadyanmanasi vartate ॥ 52 ॥ gorocanā kuṅkumena raktacandanakena vā । yāvakairvā maheśāni likhenmantraṃ samāhitaḥ ॥ 53 ॥ aṣṭamyāṃ maṅgaladine caturdaśyāmathāpi vā । sandhyāyāṃ devadeveśi likhedyantraṃ samāhitaḥ ॥ 54 ॥ maghāyāṃ śravaṇe vāpi revatyāṃ vā viśeṣataḥ । siṃharāśau gate candre karkaṭasthe divākare ॥ 55 ॥ mīnarāśau gurau yāte vṛścikasthe śanaiścare । likhitvā dhārayedyastu uttarābhimukho bhavet ॥ 56 ॥ śmaśāne prāntare vāpi śūnyāgāre viśeṣataḥ । niśāyāṃ vā likhenmantraṃ tasya siddhiracañcalā ॥ 57 ॥ bhūrjapatre likhenmantraṃ guruṇā ca maheśvari । dhyāna dhāraṇa yogena dhārayedyastu bhaktitaḥ । acirāttasya siddhiḥ syānnātra kāryā vicāraṇā ॥ 58 ॥ iti śrī rudrayāmale tantre ugratārākavacaṃ sampūrṇam ।