ശ്രീപാർവത്യുവാച – ദേവദേവ മഹാദേവ സർവശാസ്ത്രവിശാരദ । കൃപാം കുരു ജഗന്നാഥ ധർമജ്ഞോസി മഹാമതേ ॥ 1 ॥ ഭൈരവീ യാ പുരാ പ്രോക്താ വിദ്യാ ത്രിപുരപൂർവികാ । തസ്യാസ്തു കവചം ദിവ്യം മഹ്യം കഥയ തത്ത്വതഃ ॥ 2 ॥ തസ്യാസ്തു വചനം ശ്രുത്വാ ജഗാദ ജഗദീശ്വരഃ । അദ്ഭുതം കവചം ദേവ്യാ ഭൈരവ്യാ ദിവ്യരൂപി വൈ ॥ 3 ॥ ഈശ്വര ഉവാച – കഥയാമി മഹാവിദ്യാകവചം സർവദുർലഭം । ശൃണുഷ്വ ത്വം ച വിധിനാ ശ്രുത്വാ ഗോപ്യം തവാപി തത് ॥ 4 ॥ യസ്യാഃ പ്രസാദാത്സകലം ബിഭർമി ഭുവനത്രയം । യസ്യാഃ സർവം സമുത്പന്നം യസ്യാമദ്യാപി തിഷ്ഠതി ॥ 5 ॥ മാതാ പിതാ ജഗദ്ധന്യാ ജഗദ്ബ്രഹ്മസ്വരൂപിണീ । സിദ്ധിദാത്രീ ച സിദ്ധാസ്സ്യാദസിദ്ധാ ദുഷ്ടജന്തുഷു ॥ 6 ॥ സർവഭൂതപ്രിയങ്കരീ സർവഭൂതസ്വരൂപിണീ । കകാരീ പാതു മാം ദേവീ കാമിനീ കാമദായിനീ ॥ 7 ॥ ഏകാരീ പാതു മാം ദേവീ മൂലാധാരസ്വരൂപിണീ । ഈകാരീ പാതു മാം ദേവീ ഭൂരിസർവസുഖപ്രദാ ॥ 8 ॥ ലകാരീ പാതു മാം ദേവീ ഇന്ദ്രാണീവരവല്ലഭാ । ഹ്രീങ്കാരീ പാതു മാം ദേവീ സർവദാ ശംഭുസുന്ദരീ ॥ 9 ॥ ഏതൈർവർണൈർമഹാമായാ ശാംഭവീ പാതു മസ്തകം । കകാരീ പാതു മാം ദേവീ ശർവാണീ ഹരഗേഹിനീ ॥ 10 ॥ മകാരീ പാതു മാം ദേവീ സർവപാപപ്രണാശിനീ । കകാരീ പാതു മാം ദേവീ കാമരൂപധരാ സദാ ॥ 11 ॥ കാകാരീ പാതു മാം ദേവീ ശംബരാരിപ്രിയാ സദാ । പകാരീ പാതു മാം ദേവീ ധരാധരണിരൂപധൃക് ॥ 12 ॥ ഹ്രീങ്കാരീ പാതു മാം ദേവീ ആകാരാർധശരീരിണീ । ഏതൈർവർണൈർമഹാമായാ കാമരാഹുപ്രിയാഽവതു ॥ 13 ॥ മകാരഃ പാതു മാം ദേവീ സാവിത്രീ സർവദായിനീ । കകാരഃ പാതു സർവത്ര കലാംബാ സർവരൂപിണീ ॥ 14 ॥ ലകാരഃ പാതു മാം ദേവീ ലക്ഷ്മീഃ സർവസുലക്ഷണാ । ഓം ഹ്രീം മാം പാതു സർവത്ര ദേവീ ത്രിഭുവനേശ്വരീ ॥ 15 ॥ ഏതൈർവർണൈർമഹാമായാ പാതു ശക്തിസ്വരൂപിണീ । വാഗ്ഭവാ മസ്തകം പാതു വദനം കാമരാജിതാ ॥ 16 ॥ ശക്തിസ്വരൂപിണീ പാതു ഹൃദയം യന്ത്രസിദ്ധിദാ । സുന്ദരീ സർവദാ പാതു സുന്ദരീ പരിരക്ഷതു ॥ 17 ॥ രക്തവർണാ സദാ പാതു സുന്ദരീ സർവദായിനീ । നാനാലങ്കാരസമ്യുക്താ സുന്ദരീ പാതു സർവദാ ॥ 18 ॥ സർവാംഗസുന്ദരീ പാതു സർവത്ര ശിവദായിനീ । ജഗദാഹ്ലാദജനനീ ശംഭുരൂപാ ച മാം സദാ ॥ 19 ॥ സർവമന്ത്രമയീ പാതു സർവസൗഭാഗ്യദായിനീ । സർവലക്ഷ്മീമയീ ദേവീ പരമാനന്ദദായിനീ ॥ 20 ॥ പാതു മാം സർവദാ ദേവീ നാനാശംഖനിധിഃ ശിവാ । പാതു പദ്മനിധിർദേവീ സർവദാ ശിവദായിനീ ॥ 21 ॥ പാതു മാം ദക്ഷിണാമൂർതി ഋഷിഃ സർവത്ര മസ്തകേ । പങ്ക്തിശ്ഛന്ദഃ സ്വരൂപാ തു മുഖേ പാതു സുരേശ്വരീ ॥ 22 ॥ ഗന്ധാഷ്ടകാത്മികാ പാതു ഹൃദയം ശങ്കരീ സദാ । സർവസംമോഹിനീ പാതു പാതു സങ്ക്ഷോഭിണീ സദാ ॥ 23 ॥ സർവസിദ്ധിപ്രദാ പാതു സർവാകർഷണകാരിണീ । ക്ഷോഭിണീ സർവദാ പാതു വശിനീ സർവദാവതു ॥ 24 ॥ ആകർഷിണീ സദാ പാതു സദാ സംമോഹിനീ തഥാ । രതിദേവീ സദാ പാതു ഭഗാംഗാ സർവദാവതു ॥ 25 ॥ മാഹേശ്വരീ സദാ പാതു കൗമാരീ സർവദാവതു । സർവാഹ്ലാദനകാരീ മാം പാതു സർവവശങ്കരീ ॥ 26 ॥ ക്ഷേമങ്കരീ സദാ പാതു സർവാംഗം സുന്ദരീ തഥാ । സർവാംഗം യുവതീ സർവം സർവസൗഭാഗ്യദായിനീ ॥ 27 ॥ വാഗ്ദേവീ സർവദാ പാതു വാണീ മാം സർവദാവതു । വശിനീ സർവദാ പാതു മഹാസിദ്ധിപ്രദാവതു ॥ 28 ॥ സർവവിദ്രാവിണീ പാതു ഗണനാഥാ സദാവതു । ദുർഗാദേവീ സദാ പാതു വടുകഃ സർവദാവതു ॥ 29 ॥ ക്ഷേത്രപാലഃ സദാ പാതു പാതു ചാശാന്തിദാ । അനന്തഃ സർവദാ പാതു വരാഹഃ സർവദാവതു ॥ 30 ॥ പൃഥിവീ സർവദാ പാതു സ്വർണസിംഹാസനസ്തഥാ । രക്താമൃതശ്ച സതതം പാതു മാം സർവകാലതഃ ॥ 31 ॥ സുധാർണവഃ സദാ പാതു കല്പവൃക്ഷഃ സദാവതു । ശ്വേതച്ഛത്രം സദാ പാതു രത്നദീപഃ സദാവതു ॥ 32 ॥ സതതം നന്ദനോദ്യാനം പാതു മാം സർവസിദ്ധയേ । ദിക്പാലാഃ സർവദാ പാന്തു ദ്വന്ദ്വൗഘാഃ സകലാസ്തഥാ ॥ 33 ॥ വാഹനാനി സദാ പാന്തു സർവദാഽസ്ത്രാണി പാന്തു മാം । ശസ്ത്രാണി സർവദാ പാന്തു യോഗിന്യഃ പാന്തു സർവദാ ॥ 34 ॥ സിദ്ധാഃ പാന്തു സദാ ദേവീ സർവസിദ്ധിപ്രദാവതു । സർവാംഗസുന്ദരീ ദേവീ സർവദാവതു മാം തഥാ ॥ 35 ॥ ആനന്ദരൂപിണീ ദേവീ ചിത്സ്വരൂപാ ചിദാത്മികാ । സർവദാ സുന്ദരീ പാതു സുന്ദരീ ഭവസുന്ദരീ ॥ 36 ॥ പൃഥഗ്ദേവാലയേ ഘോരേ സങ്കടേ ദുർഗമേ ഗിരൗ । അരണ്യേ പ്രാന്തരേ വാഽപി പാതു മാം സുന്ദരീ സദാ ॥ 37 ॥ ഇദം കവചമിത്യുക്തം മന്ത്രോദ്ധാരശ്ച പാർവതി । യഃ പഠേത്പ്രയതോ ഭൂത്വാ ത്രിസന്ധ്യം നിയതഃ ശുചിഃ ॥ 38 ॥ തസ്യ സർവാർഥസിദ്ധിഃ സ്യാദ്യദ്യന്മനസി വർതതേ । ഗോരോചനാകുങ്കുമേന രക്തചന്ദനകേന വാ ॥ 39 ॥ സ്വയംഭൂകുസുമൈശ്ശുക്ലൈഃ ഭൂമിപുത്രേ ശനൗ സുരേ । ശ്മശാനേ പ്രാന്തരേ വാപി ശൂന്യാഗാരേ ശിവാലയേ ॥ 40 ॥ സ്വശക്ത്യാ ഗുരുണാ യന്ത്രം പൂജയിത്വാ കുമാരികാം । തന്മനും പൂജയിത്വാ ച ഗുരുപങ്ക്തിം തഥൈവ ച ॥ 41 ॥ ദേവ്യൈ ബലിം നിവേദ്യാഥ നരമാർജാരസൂകരൈഃ । നകുലൈർമഹിഷൈർമേഷൈഃ പൂജയിത്വാ വിധാനതഃ ॥ 42 ॥ ധൃത്വാ സുവർണമധ്യസ്ഥം കണ്ഠേ വാ ദക്ഷിണേ ഭുജേ । സുതിഥൗ ശുഭനക്ഷത്രേ സൂര്യസ്യോദയനേ തഥാ ॥ 43 ॥ ധാരയിത്വാ ച കവചം സർവസിദ്ധിം ലഭേന്നരഃ । കവചസ്യ ച മാഹാത്മ്യം നാഹം വർഷശതൈരപി ॥ 44 ॥ ശക്നോമി തു മഹേശാനി വക്തും തസ്യ ഫലം തു യത് । ന ദുർഭിക്ഷഫലം തത്ര ന ശത്രോഃ പീഡനം തഥാ ॥ 45 ॥ സർവവിഘ്നപ്രശമനം സർവവ്യാധിവിനാശനം । സർവരക്ഷാകരം ജന്തോശ്ചതുർവർഗഫലപ്രദം ॥ 46 ॥ യത്ര കുത്ര ന വക്തവ്യം ന ദാതവ്യം കദാചന । മന്ത്രപ്രാപ്യ വിധാനേന പൂജയേത്സതതം സുധീഃ ॥ 47 ॥ തത്രാപി ദുർലഭം മന്യേ കവചം ദേവരൂപിണം । ഗുരോഃ പ്രസാദമാസാദ്യ വിദ്യാം പ്രാപ്യ സുഗോപിതാം ॥ 48 ॥ തത്രാപി കവചം ദിവ്യം ദുർലഭം ഭുവനത്രയേ । ശ്ലോകം വാ സ്തവമേകം വാ യഃ പഠേത്പ്രയതഃ ശുചിഃ ॥ 49 ॥ തസ്യ സർവാർഥസിദ്ധിഃ സ്യാച്ഛങ്കരേണ പ്രഭാഷിതം । ഗുരുർദേവോ ഹരഃ സാക്ഷാത്പത്നീ തസ്യ ച പാർവതീ ॥ 50 ॥ അഭേദേന യജേദ്യസ്തു തസ്യ സിദ്ധിരദൂരതഃ ॥ 51 ॥ ഇതി ശ്രീ രുദ്രയാമലേ ഭൈരവഭൈരവീസംവാദേ ശ്രീ ത്രിപുരഭൈരവീ കവചം ॥