ఘోరరూపే మహారావే సర్వశత్రుభయంకరి । భక్తేభ్యో వరదే దేవి త్రాహి మాం శరణాగతం ॥ 1 ॥ సురాఽసురార్చితే దేవి సిద్ధగంధర్వసేవితే । జాడ్యపాపహరే దేవి త్రాహి మాం శరణాగతం ॥ 2 ॥ జటాజూటసమాయుక్తే లోలజిహ్వాంతకారిణీ । ద్రుతబుద్ధికరే దేవి త్రాహి మాం శరణాగతం ॥ 3 ॥ సౌమ్యక్రోధధరే రూపే చండరూపే నమోఽస్తు తే । సృష్టిరూపే నమస్తుభ్యం త్రాహి మాం శరణాగతం ॥ 4 ॥ జడానాం జడతాం హంతి భక్తానాం భక్తవత్సలా । మూఢతాం హర మే దేవి త్రాహి మాం శరణాగతం ॥ 5 ॥ హ్రూం హ్రూంకరమయే దేవి బలిహోమప్రియే నమః । ఉగ్రతారే నమో నిత్యం త్రాహి మాం శరణాగతం ॥ 6 ॥ బుద్ధిం దేహి యశో దేహి కవిత్వం దేహి దేవి మే । మూఢత్వం చ హరేర్దేవి త్రాహి మాం శరణాగతం ॥ 7 ॥ ఇంద్రాదివిలసద్వంద్వవందితే కరుణామయి । తారే తారధినాథాస్యే త్రాహి మాం శరణాగతం ॥ 8 ॥ అష్టమ్యాం చ చతుర్దశ్యాం నవమ్యాం యః పఠేన్నరః । షణ్మాసైః సిద్ధిమాప్నోతి నాఽత్ర కార్యా విచారణా ॥ 9 ॥ మోక్షార్థీ లభతే మోక్షం ధనార్థీ లభతే ధనం । విద్యార్థీ లభతే విద్యాం తర్కవ్యాకరణాదికం ॥ 10 ॥ ఇదం స్తోత్రం పఠేద్యస్తు సతతం శ్రద్ధయాన్వితః । తస్య శత్రుః క్షయం యాతి మహాప్రజ్ఞా ప్రజాయతే ॥ 11 ॥ పీడాయాం వాపి సంగ్రామే జాడ్యే దానే తథా భయే । య ఇదం పఠతి స్తోత్రం శుభం తస్య న సంశయః ॥ 12 ॥ ఇతి ప్రణమ్య స్తుత్వా చ యోనిముద్రాం ప్రదర్శయేత్ ॥ ఇతి శ్రీ నీలసరస్వతీ స్తోత్రం ॥