നവരത്ന മാലികാ സ്തോത്രം

ഹാരനൂപുരകിരീടകുണ്ഡലവിഭൂഷിതാവയവശോഭിനീം

കാരണേശവരമൗലികോടിപരികല്പ്യമാനപദപീഠികാം ।

കാലകാലഫണിപാശബാണധനുരങ്കുശാമരുണമേഖലാം

ഫാലഭൂതിലകലോചനാം മനസി ഭാവയാമി പരദേവതാം ॥ 1 ॥

ഗന്ധസാരഘനസാരചാരുനവനാഗവല്ലിരസവാസിനീം

സാന്ധ്യരാഗമധുരാധരാഭരണസുന്ദരാനനശുചിസ്മിതാം ।

മന്ധരായതവിലോചനാമമലബാലചന്ദ്രകൃതശേഖരീം

ഇന്ദിരാരമണസോദരീം മനസി ഭാവയാമി പരദേവതാം ॥ 2 ॥

സ്മേരചാരുമുഖമണ്ഡലാം വിമലഗണ്ഡലംബിമണിമണ്ഡലാം

ഹാരദാമപരിശോഭമാനകുചഭാരഭീരുതനുമധ്യമാം ।

വീരഗർവഹരനൂപുരാം വിവിധകാരണേശവരപീഠികാം

മാരവൈരിസഹചാരിണീം മനസി ഭാവയാമി പരദേവതാം ॥ 3 ॥

ഭൂരിഭാരധരകുണ്ഡലീന്ദ്രമണിബദ്ധഭൂവലയപീഠികാം

വാരിരാശിമണിമേഖലാവലയവഹ്നിമണ്ഡലശരീരിണീം ।

വാരിസാരവഹകുണ്ഡലാം ഗഗനശേഖരീം ച പരമാത്മികാം

ചാരുചന്ദ്രവിലോചനാം മനസി ഭാവയാമി പരദേവതാം ॥ 4 ॥

കുണ്ഡലത്രിവിധകോണമണ്ഡലവിഹാരഷഡ്ദലസമുല്ലസ-

ത്പുണ്ഡരീകമുഖഭേദിനീം ച പ്രചണ്ഡഭാനുഭാസമുജ്ജ്വലാം ।

മണ്ഡലേന്ദുപരിവാഹിതാമൃതതരംഗിണീമരുണരൂപിണീം

മണ്ഡലാന്തമണിദീപികാം മനസി ഭാവയാമി പരദേവതാം ॥ 5 ॥

വാരണാനനമയൂരവാഹമുഖദാഹവാരണപയോധരാം

ചാരണാദിസുരസുന്ദരീചികുരശേകരീകൃതപദാംബുജാം ।

കാരണാധിപതിപഞ്ചകപ്രകൃതികാരണപ്രഥമമാതൃകാം

വാരണാന്തമുഖപാരണാം മനസി ഭാവയാമി പരദേവതാം ॥ 6 ॥

പദ്മകാന്തിപദപാണിപല്ലവപയോധരാനനസരോരുഹാം

പദ്മരാഗമണിമേഖലാവലയനീവിശോഭിതനിതംബിനീം ।

പദ്മസംഭവസദാശിവാന്തമയപഞ്ചരത്നപദപീഠികാം

പദ്മിനീം പ്രണവരൂപിണീം മനസി ഭാവയാമി പരദേവതാം ॥ 7 ॥

ആഗമപ്രണവപീഠികാമമലവർണമംഗലശരീരിണീം

ആഗമാവയവശോഭിനീമഖിലവേദസാരകൃതശേഖരീം ।

മൂലമന്ത്രമുഖമണ്ഡലാം മുദിതനാദബിന്ദുനവയൗവനാം

മാതൃകാം ത്രിപുരസുന്ദരീം മനസി ഭാവയാമി പരദേവതാം ॥ 8 ॥

കാലികാതിമിരകുന്തലാന്തഘനഭൃംഗമംഗലവിരാജിനീം

ചൂലികാശിഖരമാലികാവലയമല്ലികാസുരഭിസൗരഭാം ।

വാലികാമധുരഗണ്ഡമണ്ഡലമനോഹരാനനസരോരുഹാം

കാലികാമഖിലനായികാം മനസി ഭാവയാമി പരദേവതാം ॥ 9 ॥

നിത്യമേവ നിയമേന ജല്പതാം – ഭുക്തിമുക്തിഫലദാമഭീഷ്ടദാം ।

ശങ്കരേണ രചിതാം സദാ ജപേന്നാമരത്നനവരത്നമാലികാം ॥ 10 ॥

Recite with devotion and pure heart

Regular practice brings spiritual benefits