ಬಂಧೂಕದ್ಯುತಿಮಿಂದುಬಿಂಬವದನಾಂ ಬೃಂದಾರಕೈರ್ವಂದಿತಾಂ ಮಂದಾರಾದಿ ಸಮರ್ಚಿತಾಂ ಮಧುಮತೀಂ ಮಂದಸ್ಮಿತಾಂ ಸುಂದರೀಂ । ಬಂಧಚ್ಛೇದನಕಾರಿಣೀಂ ತ್ರಿನಯನಾಂ ಭೋಗಾಪವರ್ಗಪ್ರದಾಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 1 ॥ ಶ್ರೀಕಾಮೇಶ್ವರಪೀಠಮಧ್ಯನಿಲಯಾಂ ಶ್ರೀರಾಜರಾಜೇಶ್ವರೀಂ ಶ್ರೀವಾಣೀಪರಿಸೇವಿತಾಂಘ್ರಿಯುಗಲಾಂ ಶ್ರೀಮತ್ಕೃಪಾಸಾಗರಾಂ । ಶೋಕಾಪದ್ಭಯಮೋಚಿನೀಂ ಸುಕವಿತಾನಂದೈಕಸಂದಾಯಿನೀಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 2 ॥ ಮಾಯಾ ಮೋಹವಿನಾಶಿನೀಂ ಮುನಿಗಣೈರಾರಾಧಿತಾಂ ತನ್ಮಯೀಂ ಶ್ರೇಯಃಸಂಚಯದಾಯಿನೀಂ ಗುಣಮಯೀಂ ವಾಯ್ವಾದಿ ಭೂತಾಂ ಸತಾಂ । ಪ್ರಾತಃಕಾಲಸಮಾನಶೋಭಮಕುಟಾಂ ಸಾಮಾದಿ ವೇದೈಸ್ತುತಾಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 3 ॥ ಬಾಲಾಂ ಭಕ್ತಜನೌಘಚಿತ್ತನಿಲಯಾಂ ಬಾಲೇಂದುಚೂಡಾಂಬರಾಂ ಸಾಲೋಕ್ಯಾದಿ ಚತುರ್ವಿಧಾರ್ಥಫಲದಾಂ ನೀಲೋತ್ಪಲಾಕ್ಷೀಮಜಾಂ । ಕಾಲಾರಿಪ್ರಿಯನಾಯಿಕಾಂ ಕಲಿಮಲಪ್ರಧ್ವಂಸಿನೀಂ ಕೌಲಿನೀಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 4 ॥ ಆನಂದಾಮೃತಸಿಂಧುಮಧ್ಯನಿಲಯಾಮಜ್ಞಾನಮೂಲಾಪಹಾಂ ಜ್ಞಾನಾನಂದವಿವರ್ಧಿನೀಂ ವಿಜಯದಾಂ ಮೀನೇಕ್ಷಣಾಂ ಮೋಹಿನೀಂ । ಜ್ಞಾನಾನಂದಪರಾಂ ಗಣೇಶಜನನೀಂ ಗಂಧರ್ವಸಂಪೂಜಿತಾಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 5 ॥ ಷಟ್ಚಕ್ರೋಪರಿ ನಾದಬಿಂದುನಿಲಯಾಂ ಸರ್ವೇಶ್ವರೀಂ ಸರ್ವಗಾಂ ಷಟ್ಶಾಸ್ತ್ರಾಗಮವೇದವೇದಿತಗುಣಾಂ ಷಟ್ಕೋಣಸಂವಾಸಿನೀಂ । ಷಟ್ಕಾಲೇನ ಸಮರ್ಚಿತಾತ್ಮವಿಭವಾಂ ಷಡ್ವರ್ಗಸಂಛೇದಿನೀಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 6 ॥ ಯೋಗಾನಂದಕರೀಂ ಜಗತ್ಸುಖಕರೀಂ ಯೋಗೀಂದ್ರಚಿತ್ತಾಲಯಾಂ ಏಕಾಮೀಶಸುಖಪ್ರದಾಂ ದ್ವಿಜನುತಾಮೇಕಾಂತಸಂಚಾರಿಣೀಂ । ವಾಗೀಶಾಂ ವಿಧಿವಿಷ್ಣುಶಂಭುವರದಾಂ ವಿಶ್ವೇಶ್ವರೀಂ ವೈಣಿಕೀಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 7 ॥ ಬೋಧಾನಂದಮಯೀಂ ಬುಧೈರಭಿನುತಾಂ ಮೋದಪ್ರದಾಮಂಬಿಕಾಂ ಶ್ರೀಮದ್ವೇದಪುರೀಶದಾಸವಿನುತಾಂ ಹ್ರೀಂಕಾರಸಂಧಾಲಯಾಂ । ಭೇದಾಭೇದವಿವರ್ಜಿತಾಂ ಬಹುವಿಧಾಂ ವೇದಾಂತಚೂಡಾಮಣಿಂ ವಂದೇಽಹಂ ಕಮಲಾಂಬಿಕಾಮನುದಿನಂ ವಾಂಛಾನುಕೂಲಾಂ ಶಿವಾಂ ॥ 8 ॥ ಇತ್ಥಂ ಶ್ರೀಕಮಲಾಂಬಿಕಾಪ್ರಿಯಕರಂ ಸ್ತೋತ್ರಂ ಪಠೇದ್ಯಃ ಸದಾ ಪುತ್ರಶ್ರೀಪ್ರದಮಷ್ಟಸಿದ್ಧಿಫಲದಂ ಚಿಂತಾವಿನಾಶಾಸ್ಪದಂ । ಏತಿ ಬ್ರಹ್ಮಪದಂ ನಿಜಂ ನಿರುಪಮಂ ನಿಷ್ಕಲ್ಮಷಂ ನಿಷ್ಕಲಂ ಯೋಗೀಂದ್ರೈರಪಿ ದುರ್ಲಭಂ ಪುನರಯಂ ಚಿಂತಾವಿನಾಶಂ ಪರಂ ॥ 9 ॥ ಇತಿ ಶ್ರೀ ಕಮಲಾಂಬಿಕಾ ಸ್ತೋತ್ರಂ ।