ഗംഗാഷ്ടകം

ഭഗവതി തവ തീരേ നീരമാത്രാശനോഽഹം

വിഗതവിഷയതൃഷ്ണഃ കൃഷ്ണമാരാധയാമി ।

സകല കലുഷഭംഗേ സ്വർഗസോപാനസംഗേ

തരലതരതരംഗേ ദേവി ഗംഗേ പ്രസീദ ॥ 1 ॥

ഭഗവതി ഭവലീലാ മൗലിമാലേ തവാംഭഃ

കണമണുപരിമാണം പ്രാണിനോ യേ സ്പൃശന്തി ।

അമരനഗരനാരീ ചാമര ഗ്രാഹിണീനാം

വിഗത കലികലങ്കാതങ്കമങ്കേ ലുഠന്തി ॥ 2 ॥

ബ്രഹ്മാണ്ഡം ഖണ്ഡയന്തീ ഹരശിരസി ജടാവല്ലിമുല്ലാസയന്തീ

സ്വർലോകാദാപതന്തീ കനകഗിരിഗുഹാഗണ്ഡശൈലാത് സ്ഖലന്തീ ।

ക്ഷോണീപൃഷ്ഠേ ലുഠന്തീ ദുരിതചയചമൂർനിർഭരം ഭർത്സയന്തീ

പാഥോധിം പൂരയന്തീ സുരനഗരസരിത്പാവനീ നഃ പുനാതു ॥ 3 ॥

മജ്ജന്മാതംഗ കുംഭച്യുത മദമദിരാമോദമത്താലിജാലം

സ്നാനൈഃ സിദ്ധാംഗനാനാം കുചയുഗ വിലസത്കുങ്കുമാസംഗപിംഗം ।

സായം പ്രാതർമുനീനാം കുശകുസുമചയൈശ്ഛിന്നതീരസ്ഥനീരം

പായാന്നോ ഗാംഗമംഭഃ കരികലഭ കരാക്രാന്ത രംഗസ്തരംഗം ॥ 4 ॥

ആദാവാദി പിതാമഹസ്യ നിയമ വ്യാപാര പാത്രേ ജലം

പശ്ചാത്പന്നഗശായിനോ ഭഗവതഃ പാദോദകം പാവനം ।

ഭൂയഃ ശംഭുജടാവിഭൂഷണ മണിർജഹ്നോർമഹർഷേരിയം

കന്യാ കല്മഷനാശിനീ ഭഗവതീ ഭാഗീരഥീ ദൃശ്യതേ ॥ 5 ॥

ശൈലേന്ദ്രാദവതാരിണീ നിജജലേ മജ്ജജ്ജനോത്താരിണീ

പാരാവാരവിഹാരിണീ ഭവഭയശ്രേണീ സമുത്സാരിണീ ।

ശേഷാംഗൈരനുകാരിണീ ഹരശിരോവല്ലീദലാകാരിണീ

കാശീപ്രാന്തവിഹാരിണീ വിജയതേ ഗംഗാ മനോഹാരിണീ ॥ 6 ॥

കുതോ വീചിർവീചിസ്തവ യദി ഗതാ ലോചനപഥം

ത്വമാപീതാ പീതാംബരപുരവാസം വിതരസി ।

ത്വദുത്സംഗേ ഗംഗേ പതതി യദി കായസ്തനുഭൃതാം

തദാ മാതഃ ശാന്തക്രതവപദലാഭോഽപ്യതിലഘുഃ ॥ 7 ॥

ഗംഗേ ത്രൈലോക്യസാരേ സകലസുരവധൂധൗതവിസ്തീർണതോയേ

പൂർണബ്രഹ്മസ്വരൂപേ ഹരിചരണരജോഹാരിണി സ്വർഗമാർഗേ ।

പ്രായശ്ചിതം യദി സ്യാത്തവ ജലകണികാ ബ്രഹ്മഹത്യാദി പാപേ

കസ്ത്വാം സ്തോതും സമർഥഃ ത്രിജഗദഘഹരേ ദേവി ഗംഗേ പ്രസീദ ॥ 8 ॥

മാതർജാഹ്നവീ ശംഭുസംഗമിലിതേ മൗലൗ നിധായാഞ്ജലിം

ത്വത്തീരേ വപുഷോഽവസാനസമയേ നാരായണാംഘ്രിദ്വയം ।

സാനന്ദം സ്മരതോ ഭവിഷ്യതി മമ പ്രാണപ്രയാണോത്സവേ

ഭൂയാദ്ഭക്തിരവിച്യുതാ ഹരിഹരാദ്വൈതാത്മികാ ശാശ്വതീ ॥ 9 ॥

ഗംഗാഷ്ടകമിദം പുണ്യം യഃ പഠേത്പ്രയതോ നരഃ ।

സർവപാപവിനിർമുക്തോ വിഷ്ണുലോകം സ ഗച്ഛതി ॥ 10 ॥

Recite with devotion and pure heart

Regular practice brings spiritual benefits