ಧೂಮಾವತೀ ಕವಚಂ

ಶ್ರೀಪಾರ್ವತ್ಯುವಾಚ ।

ಧೂಮಾವತ್ಯರ್ಚನಂ ಶಂಭೋ ಶ್ರುತಂ ವಿಸ್ತರತೋ ಮಯಾ ।

ಕವಚಂ ಶ್ರೋತುಮಿಚ್ಛಾಮಿ ತಸ್ಯಾ ದೇವ ವದಸ್ವ ಮೇ ॥ 1 ॥

ಶ್ರೀಭೈರವ ಉವಾಚ ।

ಶೃಣು ದೇವಿ ಪರಂ ಗುಹ್ಯಂ ನ ಪ್ರಕಾಶ್ಯಂ ಕಲೌ ಯುಗೇ ।

ಕವಚಂ ಶ್ರೀಧೂಮಾವತ್ಯಾಃ ಶತ್ರುನಿಗ್ರಹಕಾರಕಂ ॥ 2 ॥

ಬ್ರಹ್ಮಾದ್ಯಾ ದೇವಿ ಸತತಂ ಯದ್ವಶಾದರಿಘಾತಿನಃ ।

ಯೋಗಿನೋ ಭವಚ್ಛತ್ರುಘ್ನಾ ಯಸ್ಯಾ ಧ್ಯಾನಪ್ರಭಾವತಃ ॥ 3 ॥

ಓಂ ಅಸ್ಯ ಶ್ರೀಧೂಮಾವತೀಕವಚಸ್ಯ ಪಿಪ್ಪಲಾದ ಋಷಿಃ ಅನುಷ್ಟುಪ್ ಛಂದಃ ಶ್ರೀಧೂಮಾವತೀ ದೇವತಾ ಧೂಂ ಬೀಜಂ ಸ್ವಾಹಾ ಶಕ್ತಿಃ ಧೂಮಾವತೀ ಕೀಲಕಂ ಶತ್ರುಹನನೇ ಪಾಠೇ ವಿನಿಯೋಗಃ ।

ಕವಚಂ ।

ಓಂ ಧೂಂ ಬೀಜಂ ಮೇ ಶಿರಃ ಪಾತು ಧೂಂ ಲಲಾಟಂ ಸದಾಽವತು ।

ಧೂಮಾ ನೇತ್ರಯುಗಂ ಪಾತು ವತೀ ಕರ್ಣೌ ಸದಾಽವತು ॥ 4 ॥

ದೀರ್ಘಾ ತೂದರಮಧ್ಯೇ ತು ನಾಭಿಂ ಮೇ ಮಲಿನಾಂಬರಾ ।

ಶೂರ್ಪಹಸ್ತಾ ಪಾತು ಗುಹ್ಯಂ ರೂಕ್ಷಾ ರಕ್ಷತು ಜಾನುನೀ ॥ 5 ॥

ಮುಖಂ ಮೇ ಪಾತು ಭೀಮಾಖ್ಯಾ ಸ್ವಾಹಾ ರಕ್ಷತು ನಾಸಿಕಾಂ ।

ಸರ್ವವಿದ್ಯಾಽವತು ಕಂಠಂ ವಿವರ್ಣಾ ಬಾಹುಯುಗ್ಮಕಂ ॥ 6 ॥

ಚಂಚಲಾ ಹೃದಯಂ ಪಾತು ಧೃಷ್ಟಾ ಪಾರ್ಶ್ವೇ ಸದಾಽವತು ।

ಧೂಮಹಸ್ತಾ ಸದಾ ಪಾತು ಪಾದೌ ಪಾತು ಭಯಾವಹಾ ॥ 7 ॥

ಪ್ರವೃದ್ಧರೋಮಾ ತು ಭೃಶಂ ಕುಟಿಲಾ ಕುಟಿಲೇಕ್ಷಣಾ ।

ಕ್ಷೃತ್ಪಿಪಾಸಾರ್ದಿತಾ ದೇವೀ ಭಯದಾ ಕಲಹಪ್ರಿಯಾ ॥ 8 ॥

ಸರ್ವಾಂಗಂ ಪಾತು ಮೇ ದೇವೀ ಸರ್ವಶತ್ರುವಿನಾಶಿನೀ ।

ಇತಿ ತೇ ಕಥಿತಂ ಪುಣ್ಯಂ ಕವಚಂ ಭುವಿ ದುರ್ಲಭಂ ॥ 9 ॥

ನ ಪ್ರಕಾಶ್ಯಂ ನ ಪ್ರಕಾಶ್ಯಂ ನ ಪ್ರಕಾಶ್ಯಂ ಕಲೌ ಯುಗೇ ।

ಪಠನೀಯಂ ಮಹಾದೇವಿ ತ್ರಿಸಂಧ್ಯಂ ಧ್ಯಾನತತ್ಪರೈಃ ।

ದುಷ್ಟಾಭಿಚಾರೋ ದೇವೇಶಿ ತದ್ಗಾತ್ರಂ ನೈವ ಸಂಸ್ಪೃಶೇತ್ ॥ 10 ॥

ಇತಿ ಭೈರವೀಭೈರವಸಂವಾದೇ ಧೂಮಾವತೀ ಕವಚಂ ಸಂಪೂರ್ಣಂ ।

Recite with devotion and pure heart

Regular practice brings spiritual benefits