हैंహైHaindavamஹிહિં
📍
Font Size:
ഭുവനേശ്വരീ സ്തോത്രം
അഥാനന്ദമയീം സാക്ഷാച്ഛബ്ദബ്രഹ്മസ്വരൂപിണീം ।
ഈഡേ സകലസമ്പത്ത്യൈ ജഗത്കാരണമംബികാം ॥ 1 ॥
ആദ്യാമശേഷജനനീമരവിന്ദയോനേ-
-ര്വിഷ്ണോഃ ശിവസ്യ ച വപുഃ പ്രതിപാദയിത്രീം ।
സൃഷ്ടിസ്ഥിതിക്ഷയകരീം ജഗതാം ത്രയാണാം
സ്തുത്വാ ഗിരം വിമലയാപ്യഹമംബികേ ത്വാം ॥ 2 ॥
പൃഥ്വ്യാ ജലേന ശിഖിനാ മരുതാംബരേണ
ഹോത്രേന്ദുനാ ദിനകരേണ ച മൂർതിഭാജഃ ।
ദേവസ്യ മന്മഥരിപോരപി ശക്തിമത്താ-
-ഹേതുസ്ത്വമേവ ഖലു പർവതരാജപുത്രി ॥ 3 ॥
ത്രിസ്രോതസഃ സകലദേവസമർചിതായാ
വൈശിഷ്ട്യകാരണമവൈമി തദേവ മാതഃ ।
ത്വത്പാദപങ്കജപരാഗപവിത്രിതാസു
ശംഭോർജടാസു സതതം പരിവർതനം യത് ॥ 4 ॥
ആനന്ദയേത്കുമുദിനീമധിപഃ കലാനാം
നാന്യാമിനഃ കമലിനീമഥ നേതരാം വാ ।
ഏകത്ര മോദനവിധൗ പരമേ ക ഈഷ്ടേ
ത്വം തു പ്രപഞ്ചമഭിനന്ദയസി സ്വദൃഷ്ട്യാ ॥ 5 ॥
ആദ്യാപ്യശേഷജഗതാം നവയൗവനാസി
ശൈലാധിരാജതനയാപ്യതികോമലാസി ।
ത്രയ്യാഃ പ്രസൂരപി തഥാ ന സമീക്ഷിതാസി
ധ്യേയാസി ഗൗരി മനസോ ന പഥി സ്ഥിതാസി ॥ 6 ॥
ആസാദ്യ ജന്മ മനുജേഷു ചിരാദ്ദുരാപം
തത്രാപി പാടവമവാപ്യ നിജേന്ദ്രിയാണാം ।
നാഭ്യർചയന്തി ജഗതാം ജനയിത്രി യേ ത്വാം
നിഃശ്രേണികാഗ്രമധിരുഹ്യ പുനഃ പതന്തി ॥ 7 ॥
കർപൂരചൂർണഹിമവാരിവിലോഡിതേന
യേ ചന്ദനേന കുസുമൈശ്ച സുജാതഗന്ധൈഃ ।
ആരാധയന്തി ഹി ഭവാനി സമുത്സുകാസ്ത്വാം
തേ ഖല്വഖണ്ഡഭുവനാധിഭുവഃ പ്രഥന്തേ ॥ 8 ॥
ആവിശ്യ മധ്യപദവീം പ്രഥമേ സരോജേ
സുപ്താ ഹി രാജസദൃശീ വിരചയ്യവിശ്വം ।
വിദ്യുല്ലതാവലയവിഭ്രമമുദ്വഹന്തീ
പദ്മാനി പഞ്ച വിദലയ്യ സമശ്നുവാനാ ॥ 9 ॥
തന്നിർഗതാമൃതരസൈഃ പരിഷിക്തഗാത്ര-
-മാർഗേണ തേന വിലയം പുനരപ്യവാപ്താ ।
യേഷാം ഹൃദി സ്ഫുരസി ജാതു ന തേ ഭവേയു-
-ര്മാതർമഹേശ്വരകുടുംബിനി ഗർഭഭാജഃ ॥ 10 ॥
ആലംബികുണ്ഡലഭരാമഭിരാമവക്ത്രാ-
-മാപീവരസ്തനതടീം തനുവൃത്തമധ്യാം ।
ചിന്താക്ഷസൂത്രകലശാലിഖിതാഢ്യഹസ്താ-
-മാവർതയാമി മനസാ തവ ഗൗരി മൂർതിം ॥ 11 ॥
ആസ്ഥായ യോഗമവിജിത്യ ച വൈരിഷട്ക-
-മാബദ്ധ്യചേന്ദ്രിയഗണം മനസി പ്രസന്നേ ।
പാശാങ്കുശാഭയവരാഢ്യകരാം സുവക്ത്രാ-
-മാലോകയന്തി ഭുവനേശ്വരി യോഗിനസ്ത്വാം ॥ 12 ॥
ഉത്തപ്തഹാടകനിഭാ കരിഭിശ്ചതുർഭി-
-രാവർതിതാമൃതഘടൈരഭിഷിച്യമാനാ ।
ഹസ്തദ്വയേന നലിനേ രുചിരേ വഹന്തീ
പദ്മാപി സാഭയവരാ ഭവസി ത്വമേവ ॥ 13 ॥
അഷ്ടാഭിരുഗ്രവിവിധായുധവാഹിനീഭി-
-ര്ദോർവല്ലരീഭിരധിരുഹ്യ മൃഗാധിരാജം ।
ദൂർവാദലദ്യുതിരമാർത്യവിപക്ഷപക്ഷാൻ
ന്യക്കുർവതീ ത്വമസി ദേവി ഭവാനി ദുർഗാ ॥ 14 ॥
ആവിർനിദാഘജലശീകരശോഭിവക്ത്രാം
ഗുഞ്ജാഫലേന പരികല്പിതഹാരയഷ്ടിം ।
പീതാംശുകാമസിതകാന്തിമനംഗതന്ദ്രാ-
-മാദ്യാം പുലിന്ദതരുണീമസകൃത്സ്മരാമി ॥ 15 ॥
ഹംസൈർഗതിക്വണിതനൂപുരദൂരദൃഷ്ടേ
മൂർതൈരിവാർഥവചനൈരനുഗമ്യമാനൗ ।
പദ്മാവിവോർധ്വമുഖരൂഢസുജാതനാലൗ
ശ്രീകണ്ഠപത്നി ശിരസാ വിദധേ തവാംഘ്രീ ॥ 16 ॥
ദ്വാഭ്യാം സമീക്ഷിതുമതൃപ്തിമതേവ ദൃഗ്ഭ്യാ-
-മുത്പാട്യ ഭാലനയനം വൃഷകേതനേന ।
സാന്ദ്രാനുരാഗതരലേന നിരീക്ഷ്യമാണേ
ജംഘേ ശുഭേ അപി ഭവാനി തവാനതോഽസ്മി ॥ 17 ॥
ഊരൂ സ്മരാമി ജിതഹസ്തികരാവലേപൗ
സ്ഥൗല്യേന മാർദവതയാ പരിഭൂതരംഭൗ ।
ശ്രേണീഭരസ്യ സഹനൗ പരികല്പ്യ ദത്തൗ
സ്തംഭാവിവാംഗവയസാ തവ മധ്യമേന ॥ 18 ॥
ശ്രോണ്യൗ സ്തനൗ ച യുഗപത്പ്രഥയിഷ്യതോച്ചൈ-
-ര്ബാല്യാത്പരേണ വയസാ പരിഹൃഷ്ടസാരൗ ।
രോമാവലീവിലസിതേന വിഭാവ്യ മൂർതിം
മധ്യം തവ സ്ഫുരതു മേ ഹൃദയസ്യ മധ്യേ ॥ 19 ॥
സഖ്യഃ സ്മരസ്യ ഹരനേത്രഹുതാശശാന്ത്യൈ
ലാവണ്യവാരിഭരിതം നവയൗവനേന ।
ആപാദ്യ ദത്തമിവ പല്ലവമപ്രവിഷ്ടം
നാഭിം കദാപി തവ ദേവി ന വിസ്മരേയം ॥ 20 ॥
ഈശേഽപി ഗേഹപിശുനം ഭസിതം ദധാനേ
കാശ്മീരകർദമമനുസ്തനപങ്കജേ തേ ।
സ്നാതോത്ഥിതസ്യ കരിണഃ ക്ഷണലക്ഷ്യഫേനൗ
സിന്ദൂരിതൗ സ്മരയതഃ സമദസ്യ കുംഭൗ ॥ 21 ॥
കണ്ഠാതിരിക്തഗലദുജ്ജ്വലകാന്തിധാരാ-
-ശോഭൗ ഭുജൗ നിജരിപോർമകരധ്വജേന ।
കണ്ഠഗ്രഹായ രചിതൗ കില ദീർഘപാശൗ
മാതർമമ സ്മൃതിപഥം ന വിലംഘയേതാം ॥ 22 ॥
നാത്യായതം രചിതകംബുവിലാസചൗര്യം
ഭൂഷാഭരേണ വിവിധേന വിരാജമാനം ।
കണ്ഠം മനോഹരഗുണം ഗിരിരാജകന്യേ
സഞ്ചിന്ത്യ തൃപ്തിമുപയാമി കദാപി നാഹം ॥ 23 ॥
അത്യായതാക്ഷമഭിജാതലലാടപട്ടം
മന്ദസ്മിതേന ദരഫുല്ലകപോലരേഖം ।
ബിംബാധരം വദനമുന്നതദീർഘനാസം
യസ്തേ സ്മരത്യസകൃദംബ സ ഏവ ജാതഃ ॥ 24 ॥
ആവിസ്തുഷാരകരലേഖമനല്പഗന്ധ-
-പുഷ്പോപരിഭ്രമദലിവ്രജനിർവിശേഷം ।
യശ്ചേതസാ കലയതേ തവ കേശപാശം
തസ്യ സ്വയം ഗലതി ദേവി പുരാണപാശഃ ॥ 25 ॥
ശ്രുതിസുചരിതപാകം ശ്രീമതാ സ്തോത്രമേത-
-ത്പഠതി യ ഇഹ മർത്യോ നിത്യമാർദ്രാന്തരാത്മാ ।
സ ഭവതി പദമുച്ചൈഃ സമ്പദാം പാദനമ്ര-
-ക്ഷിതിപമുകുടലക്ഷ്മീലക്ഷണാനാം ചിരായ ॥ 26 ॥
ഇതി ശ്രീ രുദ്രയാമലേ തന്ത്രേ ശ്രീഭുവനേശ്വരീ സ്തോത്രം ॥
Recite with devotion and pure heart
Regular practice brings spiritual benefits