ఓం అస్య శ్రీబగలాముఖీస్తోత్రస్య-నారదఋషిః శ్రీ బగలాముఖీ దేవతా- మమ సన్నిహితానాం విరోధినాం వాఙ్ముఖ-పదబుద్ధీనాం స్తంభనార్థే స్తోత్రపాఠే వినియోగః మధ్యేసుధాబ్ధి మణిమంటప రత్నవేది సింహాసనోపరిగతాం పరిపీతవర్ణాం । పీతాంబరాభరణ మాల్యవిభూషితాంగీం దేవీం భజామి ధృతముద్గరవైరి జిహ్వాం ॥ 1 ॥ జిహ్వాగ్రమాదాయ కరేణ దేవీం వామేన శత్రూన్ పరిపీడయంతీం । గదాభిఘాతేన చ దక్షిణేన పీతాంబరాఢ్యాం ద్విభుజాం భజామి ॥ 2 ॥ చలత్కనకకుండలోల్లసితచారుగండస్థలాం లసత్కనకచంపక ద్యుతిమదిందుబింబాననాం । గదాహత విపక్షకాం కలితలోలజిహ్వాంచలాం స్మరామి బగలాముఖీం విముఖవాఙ్మనస్స్తంభినీం ॥ 3 ॥ పీయూషో దధిమధ్యచారు విలస ద్రక్తోత్పలే మంటపే సత్సింహాసన మౌలిపాతితరిపుం ప్రేతాసనాధ్యాసినీం । స్వర్ణాభాం కరపీడితారిరసనాం భ్రామ్యద్గదాం విభ్రమాం ఇత్థం ధ్యాయతి యాంతి తస్య విలయం సద్యోథ సర్వాపదః ॥ 4 ॥ దేవిత్త్వచ్చరణాంబుజార్చనకృతే యః పీత పుష్పాంజలీన్ భక్త్యా వామకరే నిధాయ చ మనుం మంత్రీ మనోజ్ఞాక్షరం । పీఠధ్యానపరోఽథ కుంభకవశాద్బీజం స్మరేత్పార్థివ- స్తస్యామిత్రముఖస్య వాచి హృదయే జాడ్యం భవేత్తత్క్షణాత్ ॥ 5 ॥ వాదీ మూకతి కంకతి క్షితిపతిర్వైశ్వానరశ్శీతితి క్రోధీశామ్యతి దుర్జనస్సుజనతి క్షిప్రానుగః ఖంజతి । గర్వీ ఖర్వతి సర్వవిచ్చ జడతి త్వద్యంత్రణా యంత్రితః శ్రీనిత్యే బగలాముఖి ప్రతిదినం కల్యాణి తుభ్యం నమః ॥ 6 ॥ మంత్రస్తావదయం విపక్షదలనే స్తోత్రం పవిత్రం చ తే యంత్రం వాదినియంత్రణం త్రిజగతాం జైత్రం చ చిత్రం చ తే । మాతః శ్రీబగలేతి నామ లలితం యస్యాస్తి జంతోర్ముఖే త్వన్నామగ్రహణేన సంసది ముఖ స్తంభో భవేద్వాదినాం ॥ 7 ॥ దుష్టస్తంభనముగ్రవిఘ్నశమనం దారిద్ర్యవిద్రావణం భూభృద్భీశమనం చలన్మృగదృశాం చేతస్సమాకర్షణం । సౌభాగ్యైకనికేతనం సమదృశః కారుణ్యపూర్ణామృతం మృత్యోర్మారణమావిరస్తు పురతో మాతస్త్వదీయం వపుః ॥ 8 ॥ మాతర్భంజయ మే విపక్షవదనాం జిహ్వాం చ సంకీలయ బ్రాహ్మీం ముద్రయ నాశయాశుధిషణాముగ్రాం గతిం స్తంభయ । శత్రూమ్శ్చూర్ణయ దేవి తీక్ష్ణగదయా గౌరాంగి పీతాంబరే విఘ్నౌఘం బగలే హర ప్రణమతాం కారుణ్యపూర్ణేక్షణే ॥ 9 ॥ మాతర్భైరవి భద్రకాలి విజయే వారాహి విశ్వాశ్రయే శ్రీవిద్యే సమయే మహేశి బగలే కామేశి రామే రమే । మాతంగి త్రిపురే పరాత్పరతరే స్వర్గాపవర్గప్రదే దాసోఽహం శరణాగతః కరుణయా విశ్వేశ్వరి త్రాహిమాం ॥ 10 ॥ సంరంభే సౌరసంఘే ప్రహరణసమయే బంధనేవారిమధ్యే విద్యావాదేవివాదే ప్రతికృతినృపతౌ దివ్యకాలే నిశాయాం । వశ్యే వా స్తంభనే వా రిపువధసమయే నిర్జనే వా వనే వా గచ్ఛంస్తిష్ఠంస్త్రికాలం యది పఠతి శివం ప్రాప్నుయాదాశు ధీరః ॥ 11 ॥ త్వం విద్యా పరమా త్రిలోకజననీ విఘ్నౌఘసంఛేదినీ యోషాకర్షణకారిణీ త్రిజగతామానందసంవర్ధినీ । దుస్ఫోటోచ్చాటనకారిణీ జనమనస్సంమోహసందాయినీ జిహ్వాకీలనభైరవీ విజయతే బ్రహ్మాస్త్రమంత్రో యథా ॥ 12 ॥ విద్యాలక్ష్మీస్సర్వసౌభాగ్యమాయుః పుత్రైః పౌత్రైః సర్వసామ్రాజ్యసిద్ధిః । మానో భోగో వశ్యమారోగ్యసౌఖ్యం ప్రాప్తం తత్తద్భూతలేఽస్మిన్నరేణ ॥ 13 ॥ యత్కృతం చ జపం హోమం గదితం పరమేశ్వరీ । దుష్టానాం నిగ్రహార్థాయ తద్గృహాణ నమోఽస్తు తే ॥ 14 ॥ పీతాంబరాం తాం ద్విభుజాం త్రినేత్రాం గాత్రగోజ్జ్వలాం । శిలాముద్గరహస్తాం చ స్మరేత్తాం బగలాముఖీం ॥ 15 ॥ బ్రహ్మాస్త్రమితి విఖ్యాతం త్రిషు లోకేషు విశ్రుతం । గురుభక్తాయ దాతవ్యం నదేయం యస్య కస్యచిత్ ॥ 16 ॥ నిత్యం స్తోత్రమిదం పవిత్రమిహ యో దేవ్యాః పఠత్యాదరాత్ ధృత్వాయంత్రమిదం తథైవ సమరే బాహౌ కరే వా గలే । రాజానోఽప్యరయో మదాంధకరిణస్సర్పా మృగేంద్రాదికాః తే వై యాంతి విమోహితా రిపుగణా లక్ష్మీః స్థిరాస్సిద్ధయః ॥ 17 ॥ ఇతి శ్రీ రుద్రయామలే తంత్రే శ్రీ బగలాముఖీ స్తోత్రం ॥