हैंహైHaindavamஹிહિં
📍
Font Size:
ബഗലാമുഖീ സ്തോത്രം
ഓം അസ്യ ശ്രീബഗലാമുഖീസ്തോത്രസ്യ-നാരദഋഷിഃ ശ്രീ ബഗലാമുഖീ ദേവതാ- മമ സന്നിഹിതാനാം വിരോധിനാം വാങ്മുഖ-പദബുദ്ധീനാം സ്തംഭനാർഥേ സ്തോത്രപാഠേ വിനിയോഗഃ
മധ്യേസുധാബ്ധി മണിമണ്ടപ രത്നവേദി
സിംഹാസനോപരിഗതാം പരിപീതവർണാം ।
പീതാംബരാഭരണ മാല്യവിഭൂഷിതാംഗീം
ദേവീം ഭജാമി ധൃതമുദ്ഗരവൈരി ജിഹ്വാം ॥ 1 ॥
ജിഹ്വാഗ്രമാദായ കരേണ ദേവീം
വാമേന ശത്രൂൻ പരിപീഡയന്തീം ।
ഗദാഭിഘാതേന ച ദക്ഷിണേന
പീതാംബരാഢ്യാം ദ്വിഭുജാം ഭജാമി ॥ 2 ॥
ചലത്കനകകുണ്ഡലോല്ലസിതചാരുഗണ്ഡസ്ഥലാം
ലസത്കനകചമ്പക ദ്യുതിമദിന്ദുബിംബാനനാം ।
ഗദാഹത വിപക്ഷകാം കലിതലോലജിഹ്വാഞ്ചലാം
സ്മരാമി ബഗലാമുഖീം വിമുഖവാങ്മനസ്സ്തംഭിനീം ॥ 3 ॥
പീയൂഷോ ദധിമധ്യചാരു വിലസ ദ്രക്തോത്പലേ മണ്ടപേ
സത്സിംഹാസന മൗലിപാതിതരിപും പ്രേതാസനാധ്യാസിനീം ।
സ്വർണാഭാം കരപീഡിതാരിരസനാം ഭ്രാമ്യദ്ഗദാം വിഭ്രമാം
ഇത്ഥം ധ്യായതി യാന്തി തസ്യ വിലയം സദ്യോഥ സർവാപദഃ ॥ 4 ॥
ദേവിത്ത്വച്ചരണാംബുജാർചനകൃതേ യഃ പീത പുഷ്പാഞ്ജലീൻ
ഭക്ത്യാ വാമകരേ നിധായ ച മനും മന്ത്രീ മനോജ്ഞാക്ഷരം ।
പീഠധ്യാനപരോഽഥ കുംഭകവശാദ്ബീജം സ്മരേത്പാർഥിവ-
സ്തസ്യാമിത്രമുഖസ്യ വാചി ഹൃദയേ ജാഡ്യം ഭവേത്തത്ക്ഷണാത് ॥ 5 ॥
വാദീ മൂകതി കങ്കതി ക്ഷിതിപതിർവൈശ്വാനരശ്ശീതിതി
ക്രോധീശാമ്യതി ദുർജനസ്സുജനതി ക്ഷിപ്രാനുഗഃ ഖഞ്ജതി ।
ഗർവീ ഖർവതി സർവവിച്ച ജഡതി ത്വദ്യന്ത്രണാ യന്ത്രിതഃ
ശ്രീനിത്യേ ബഗലാമുഖി പ്രതിദിനം കല്യാണി തുഭ്യം നമഃ ॥ 6 ॥
മന്ത്രസ്താവദയം വിപക്ഷദലനേ സ്തോത്രം പവിത്രം ച തേ
യന്ത്രം വാദിനിയന്ത്രണം ത്രിജഗതാം ജൈത്രം ച ചിത്രം ച തേ ।
മാതഃ ശ്രീബഗലേതി നാമ ലലിതം യസ്യാസ്തി ജന്തോർമുഖേ
ത്വന്നാമഗ്രഹണേന സംസദി മുഖ സ്തംഭോ ഭവേദ്വാദിനാം ॥ 7 ॥
ദുഷ്ടസ്തംഭനമുഗ്രവിഘ്നശമനം ദാരിദ്ര്യവിദ്രാവണം
ഭൂഭൃദ്ഭീശമനം ചലന്മൃഗദൃശാം ചേതസ്സമാകർഷണം ।
സൗഭാഗ്യൈകനികേതനം സമദൃശഃ കാരുണ്യപൂർണാമൃതം
മൃത്യോർമാരണമാവിരസ്തു പുരതോ മാതസ്ത്വദീയം വപുഃ ॥ 8 ॥
മാതർഭഞ്ജയ മേ വിപക്ഷവദനാം ജിഹ്വാം ച സങ്കീലയ
ബ്രാഹ്മീം മുദ്രയ നാശയാശുധിഷണാമുഗ്രാം ഗതിം സ്തംഭയ ।
ശത്രൂമ്ശ്ചൂർണയ ദേവി തീക്ഷ്ണഗദയാ ഗൗരാംഗി പീതാംബരേ
വിഘ്നൗഘം ബഗലേ ഹര പ്രണമതാം കാരുണ്യപൂർണേക്ഷണേ ॥ 9 ॥
മാതർഭൈരവി ഭദ്രകാലി വിജയേ വാരാഹി വിശ്വാശ്രയേ
ശ്രീവിദ്യേ സമയേ മഹേശി ബഗലേ കാമേശി രാമേ രമേ ।
മാതംഗി ത്രിപുരേ പരാത്പരതരേ സ്വർഗാപവർഗപ്രദേ
ദാസോഽഹം ശരണാഗതഃ കരുണയാ വിശ്വേശ്വരി ത്രാഹിമാം ॥ 10 ॥
സംരംഭേ സൗരസംഘേ പ്രഹരണസമയേ ബന്ധനേവാരിമധ്യേ
വിദ്യാവാദേവിവാദേ പ്രതികൃതിനൃപതൗ ദിവ്യകാലേ നിശായാം ।
വശ്യേ വാ സ്തംഭനേ വാ രിപുവധസമയേ നിർജനേ വാ വനേ വാ
ഗച്ഛംസ്തിഷ്ഠംസ്ത്രികാലം യദി പഠതി ശിവം പ്രാപ്നുയാദാശു ധീരഃ ॥ 11 ॥
ത്വം വിദ്യാ പരമാ ത്രിലോകജനനീ വിഘ്നൗഘസഞ്ഛേദിനീ
യോഷാകർഷണകാരിണീ ത്രിജഗതാമാനന്ദസംവർധിനീ ।
ദുസ്ഫോടോച്ചാടനകാരിണീ ജനമനസ്സംമോഹസന്ദായിനീ
ജിഹ്വാകീലനഭൈരവീ വിജയതേ ബ്രഹ്മാസ്ത്രമന്ത്രോ യഥാ ॥ 12 ॥
വിദ്യാലക്ഷ്മീസ്സർവസൗഭാഗ്യമായുഃ
പുത്രൈഃ പൗത്രൈഃ സർവസാമ്രാജ്യസിദ്ധിഃ ।
മാനോ ഭോഗോ വശ്യമാരോഗ്യസൗഖ്യം
പ്രാപ്തം തത്തദ്ഭൂതലേഽസ്മിന്നരേണ ॥ 13 ॥
യത്കൃതം ച ജപം ഹോമം ഗദിതം പരമേശ്വരീ ।
ദുഷ്ടാനാം നിഗ്രഹാർഥായ തദ്ഗൃഹാണ നമോഽസ്തു തേ ॥ 14 ॥
പീതാംബരാം താം ദ്വിഭുജാം ത്രിനേത്രാം ഗാത്രഗോജ്ജ്വലാം ।
ശിലാമുദ്ഗരഹസ്താം ച സ്മരേത്താം ബഗലാമുഖീം ॥ 15 ॥
ബ്രഹ്മാസ്ത്രമിതി വിഖ്യാതം ത്രിഷു ലോകേഷു വിശ്രുതം ।
ഗുരുഭക്തായ ദാതവ്യം നദേയം യസ്യ കസ്യചിത് ॥ 16 ॥
നിത്യം സ്തോത്രമിദം പവിത്രമിഹ യോ ദേവ്യാഃ പഠത്യാദരാത്
ധൃത്വായന്ത്രമിദം തഥൈവ സമരേ ബാഹൗ കരേ വാ ഗലേ ।
രാജാനോഽപ്യരയോ മദാന്ധകരിണസ്സർപാ മൃഗേന്ദ്രാദികാഃ
തേ വൈ യാന്തി വിമോഹിതാ രിപുഗണാ ലക്ഷ്മീഃ സ്ഥിരാസ്സിദ്ധയഃ ॥ 17 ॥
ഇതി ശ്രീ രുദ്രയാമലേ തന്ത്രേ ശ്രീ ബഗലാമുഖീ സ്തോത്രം ॥
Recite with devotion and pure heart
Regular practice brings spiritual benefits