śrīpārvatyuvāca – devadeva mahādeva sarvaśāstraviśārada । kṛpāṃ kuru jagannātha dharmajñosi mahāmate ॥ 1 ॥ bhairavī yā purā proktā vidyā tripurapūrvikā । tasyāstu kavacaṃ divyaṃ mahyaṃ kathaya tattvataḥ ॥ 2 ॥ tasyāstu vacanaṃ śrutvā jagāda jagadīśvaraḥ । adbhutaṃ kavacaṃ devyā bhairavyā divyarūpi vai ॥ 3 ॥ īśvara uvāca – kathayāmi mahāvidyākavacaṃ sarvadurlabham । śṛṇuṣva tvaṃ ca vidhinā śrutvā gopyaṃ tavāpi tat ॥ 4 ॥ yasyāḥ prasādātsakalaṃ bibharmi bhuvanatrayam । yasyāḥ sarvaṃ samutpannaṃ yasyāmadyāpi tiṣṭhati ॥ 5 ॥ mātā pitā jagaddhanyā jagadbrahmasvarūpiṇī । siddhidātrī ca siddhāssyādasiddhā duṣṭajantuṣu ॥ 6 ॥ sarvabhūtapriyaṅkarī sarvabhūtasvarūpiṇī । kakārī pātu māṃ devī kāminī kāmadāyinī ॥ 7 ॥ ekārī pātu māṃ devī mūlādhārasvarūpiṇī । īkārī pātu māṃ devī bhūrisarvasukhapradā ॥ 8 ॥ lakārī pātu māṃ devī indrāṇīvaravallabhā । hrīṅkārī pātu māṃ devī sarvadā śambhusundarī ॥ 9 ॥ etairvarṇairmahāmāyā śāmbhavī pātu mastakam । kakārī pātu māṃ devī śarvāṇī haragehinī ॥ 10 ॥ makārī pātu māṃ devī sarvapāpapraṇāśinī । kakārī pātu māṃ devī kāmarūpadharā sadā ॥ 11 ॥ kākārī pātu māṃ devī śambarāripriyā sadā । pakārī pātu māṃ devī dharādharaṇirūpadhṛk ॥ 12 ॥ hrīṅkārī pātu māṃ devī ākārārdhaśarīriṇī । etairvarṇairmahāmāyā kāmarāhupriyā'vatu ॥ 13 ॥ makāraḥ pātu māṃ devī sāvitrī sarvadāyinī । kakāraḥ pātu sarvatra kalāmbā sarvarūpiṇī ॥ 14 ॥ lakāraḥ pātu māṃ devī lakṣmīḥ sarvasulakṣaṇā । oṃ hrīṃ māṃ pātu sarvatra devī tribhuvaneśvarī ॥ 15 ॥ etairvarṇairmahāmāyā pātu śaktisvarūpiṇī । vāgbhavā mastakaṃ pātu vadanaṃ kāmarājitā ॥ 16 ॥ śaktisvarūpiṇī pātu hṛdayaṃ yantrasiddhidā । sundarī sarvadā pātu sundarī parirakṣatu ॥ 17 ॥ raktavarṇā sadā pātu sundarī sarvadāyinī । nānālaṅkārasamyuktā sundarī pātu sarvadā ॥ 18 ॥ sarvāṅgasundarī pātu sarvatra śivadāyinī । jagadāhlādajananī śambhurūpā ca māṃ sadā ॥ 19 ॥ sarvamantramayī pātu sarvasaubhāgyadāyinī । sarvalakṣmīmayī devī paramānandadāyinī ॥ 20 ॥ pātu māṃ sarvadā devī nānāśaṅkhanidhiḥ śivā । pātu padmanidhirdevī sarvadā śivadāyinī ॥ 21 ॥ pātu māṃ dakṣiṇāmūrti ṛṣiḥ sarvatra mastake । paṅktiśchandaḥ svarūpā tu mukhe pātu sureśvarī ॥ 22 ॥ gandhāṣṭakātmikā pātu hṛdayaṃ śaṅkarī sadā । sarvasaṃmohinī pātu pātu saṅkṣobhiṇī sadā ॥ 23 ॥ sarvasiddhipradā pātu sarvākarṣaṇakāriṇī । kṣobhiṇī sarvadā pātu vaśinī sarvadāvatu ॥ 24 ॥ ākarṣiṇī sadā pātu sadā saṃmohinī tathā । ratidevī sadā pātu bhagāṅgā sarvadāvatu ॥ 25 ॥ māheśvarī sadā pātu kaumārī sarvadāvatu । sarvāhlādanakārī māṃ pātu sarvavaśaṅkarī ॥ 26 ॥ kṣemaṅkarī sadā pātu sarvāṅgaṃ sundarī tathā । sarvāṅgaṃ yuvatī sarvaṃ sarvasaubhāgyadāyinī ॥ 27 ॥ vāgdevī sarvadā pātu vāṇī māṃ sarvadāvatu । vaśinī sarvadā pātu mahāsiddhipradāvatu ॥ 28 ॥ sarvavidrāviṇī pātu gaṇanāthā sadāvatu । durgādevī sadā pātu vaṭukaḥ sarvadāvatu ॥ 29 ॥ kṣetrapālaḥ sadā pātu pātu cāśāntidā । anantaḥ sarvadā pātu varāhaḥ sarvadāvatu ॥ 30 ॥ pṛthivī sarvadā pātu svarṇasiṃhāsanastathā । raktāmṛtaśca satataṃ pātu māṃ sarvakālataḥ ॥ 31 ॥ sudhārṇavaḥ sadā pātu kalpavṛkṣaḥ sadāvatu । śvetacchatraṃ sadā pātu ratnadīpaḥ sadāvatu ॥ 32 ॥ satataṃ nandanodyānaṃ pātu māṃ sarvasiddhaye । dikpālāḥ sarvadā pāntu dvandvaughāḥ sakalāstathā ॥ 33 ॥ vāhanāni sadā pāntu sarvadā'strāṇi pāntu māṃ । śastrāṇi sarvadā pāntu yoginyaḥ pāntu sarvadā ॥ 34 ॥ siddhāḥ pāntu sadā devī sarvasiddhipradāvatu । sarvāṅgasundarī devī sarvadāvatu māṃ tathā ॥ 35 ॥ ānandarūpiṇī devī citsvarūpā cidātmikā । sarvadā sundarī pātu sundarī bhavasundarī ॥ 36 ॥ pṛthagdevālaye ghore saṅkaṭe durgame girau । araṇye prāntare vā'pi pātu māṃ sundarī sadā ॥ 37 ॥ idaṃ kavacamityuktaṃ mantroddhāraśca pārvati । yaḥ paṭhetprayato bhūtvā trisandhyaṃ niyataḥ śuciḥ ॥ 38 ॥ tasya sarvārthasiddhiḥ syādyadyanmanasi vartate । gorocanākuṅkumena raktacandanakena vā ॥ 39 ॥ svayambhūkusumaiśśuklaiḥ bhūmiputre śanau sure । śmaśāne prāntare vāpi śūnyāgāre śivālaye ॥ 40 ॥ svaśaktyā guruṇā yantraṃ pūjayitvā kumārikāṃ । tanmanuṃ pūjayitvā ca gurupaṅktiṃ tathaiva ca ॥ 41 ॥ devyai baliṃ nivedyātha naramārjārasūkaraiḥ । nakulairmahiṣairmeṣaiḥ pūjayitvā vidhānataḥ ॥ 42 ॥ dhṛtvā suvarṇamadhyasthaṃ kaṇṭhe vā dakṣiṇe bhuje । sutithau śubhanakṣatre sūryasyodayane tathā ॥ 43 ॥ dhārayitvā ca kavacaṃ sarvasiddhiṃ labhennaraḥ । kavacasya ca māhātmyaṃ nāhaṃ varṣaśatairapi ॥ 44 ॥ śaknomi tu maheśāni vaktuṃ tasya phalaṃ tu yat । na durbhikṣaphalaṃ tatra na śatroḥ pīḍanaṃ tathā ॥ 45 ॥ sarvavighnapraśamanaṃ sarvavyādhivināśanam । sarvarakṣākaraṃ jantoścaturvargaphalapradam ॥ 46 ॥ yatra kutra na vaktavyaṃ na dātavyaṃ kadācana । mantraprāpya vidhānena pūjayetsatataṃ sudhīḥ ॥ 47 ॥ tatrāpi durlabhaṃ manye kavacaṃ devarūpiṇam । guroḥ prasādamāsādya vidyāṃ prāpya sugopitām ॥ 48 ॥ tatrāpi kavacaṃ divyaṃ durlabhaṃ bhuvanatraye । ślokaṃ vā stavamekaṃ vā yaḥ paṭhetprayataḥ śuciḥ ॥ 49 ॥ tasya sarvārthasiddhiḥ syācchaṅkareṇa prabhāṣitam । gururdevo haraḥ sākṣātpatnī tasya ca pārvatī ॥ 50 ॥ abhedena yajedyastu tasya siddhiradūrataḥ ॥ 51 ॥ iti śrī rudrayāmale bhairavabhairavīsaṃvāde śrī tripurabhairavī kavacam ॥