നിത്യാനന്ദകരീ വരാഭയകരീ സൗന്ദര്യ രത്നാകരീ നിർധൂതാഖില ഘോര പാവനകരീ പ്രത്യക്ഷ മാഹേശ്വരീ । പ്രാലേയാചല വംശ പാവനകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 1 ॥ നാനാ രത്ന വിചിത്ര ഭൂഷണകരി ഹേമാംബരാഡംബരീ മുക്താഹാര വിലംബമാന വിലസത്-വക്ഷോജ കുംഭാന്തരീ । കാശ്മീരാഗരു വാസിതാ രുചികരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 2 ॥ യോഗാനന്ദകരീ രിപുക്ഷയകരീ ധർമൈക്യ നിഷ്ഠാകരീ ചന്ദ്രാർകാനല ഭാസമാന ലഹരീ ത്രൈലോക്യ രക്ഷാകരീ । സർവൈശ്വര്യകരീ തപഃ ഫലകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 3 ॥ കൈലാസാചല കന്ദരാലയകരീ ഗൗരീ-ഹ്യുമാശാങ്കരീ കൗമാരീ നിഗമാർഥ-ഗോചരകരീ-ഹ്യോങ്കാര-ബീജാക്ഷരീ । മോക്ഷദ്വാര-കവാടപാടനകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 4 ॥ ദൃശ്യാദൃശ്യ-വിഭൂതി-വാഹനകരീ ബ്രഹ്മാണ്ഡ-ഭാണ്ഡോദരീ ലീലാ-നാടക-സൂത്ര-ഖേലനകരീ വിജ്ഞാന-ദീപാങ്കുരീ । ശ്രീവിശ്വേശമനഃ-പ്രസാദനകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 5 ॥ ഉർവീസർവജയേശ്വരീ ഭഗവതീ [ജയകരീ] മാതാ കൃപാസാഗരീ വേണീ-നീലസമാന-കുന്തലധരീ നിത്യാന്ന-ദാനേശ്വരീ । സാക്ഷാന്മോക്ഷകരീ സദാ ശുഭകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 6 ॥ ആദിക്ഷാന്ത-സമസ്തവർണനകരീ ശംഭോസ്ത്രിഭാവാകരീ കാശ്മീരാ ത്രിപുരേശ്വരീ ത്രിനയനി വിശ്വേശ്വരീ ശർവരീ । സ്വർഗദ്വാര-കപാട-പാടനകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 7 ॥ ദേവീ സർവവിചിത്ര-രത്നരുചിതാ ദാക്ഷായിണീ സുന്ദരീ വാമാ-സ്വാദുപയോധരാ പ്രിയകരീ സൗഭാഗ്യമാഹേശ്വരീ । ഭക്താഭീഷ്ടകരീ സദാ ശുഭകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 8 ॥ ചന്ദ്രാർകാനല-കോടികോടി-സദൃശീ ചന്ദ്രാംശു-ബിംബാധരീ ചന്ദ്രാർകാഗ്നി-സമാന-കുണ്ഡല-ധരീ ചന്ദ്രാർക-വർണേശ്വരീ മാലാ-പുസ്തക-പാശസാങ്കുശധരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 9 ॥ ക്ഷത്രത്രാണകരീ മഹാഭയകരീ മാതാ കൃപാസാഗരീ സർവാനന്ദകരീ സദാ ശിവകരീ വിശ്വേശ്വരീ ശ്രീധരീ । ദക്ഷാക്രന്ദകരീ നിരാമയകരീ കാശീപുരാധീശ്വരീ ഭിക്ഷാം ദേഹി കൃപാവലംബനകരീ മാതാന്നപൂർണേശ്വരീ ॥ 10 ॥ അന്നപൂർണേ സദാപൂർണേ ശങ്കര-പ്രാണവല്ലഭേ । ജ്ഞാന-വൈരാഗ്യ-സിദ്ധ്യർഥം ഭിക്ഷാം ദേഹി ച പാർവതീ ॥ 11 ॥ മാതാ ച പാർവതീദേവീ പിതാദേവോ മഹേശ്വരഃ । ബാന്ധവാ: ശിവഭക്താശ്ച സ്വദേശോ ഭുവനത്രയം ॥ 12 ॥ സർവ-മംഗല-മാംഗല്യേ ശിവേ സർവാർഥ-സാധികേ । ശരണ്യേ ത്ര്യംബകേ ഗൗരി നാരായണി നമോഽസ്തു തേ ॥ 13 ॥ ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിന്ദഭഗവത്പൂജ്യപാദശിഷ്യസ്യ ശ്രീമച്ഛങ്കരഭഗവതഃ കൃതൗ അന്നപൂർണാ സ്തോത്രം ।