हैंహైHaindavamஹிહિં
📍
Font Size:
വാമന സ്തോത്രം – വാമന പുരാണേ
ലോമഹർഷണ ഉവാച ।
ദേവദേവോ ജഗദ്യോനിരയോനിർജഗദാദിജഃ ।
അനാദിരാദിർവിശ്വസ്യ വരേണ്യോ വരദോ ഹരിഃ ॥ 1 ॥
പരാവരാണാം പരമഃ പരാപരസതാം ഗതിഃ ।
പ്രഭുഃ പ്രമാണം മാനാനാം സപ്തലോകഗുരോർഗുരുഃ ।
സ്ഥിതിം കർതും ജഗന്നാഥം സോഽചിന്ത്യോ ഗർഭതാം ഗതഃ ॥ 2 ॥
പ്രഭുഃ പ്രഭൂണാം പരമഃ പരാണാ-
-മനാദിമധ്യോ ഭഗവാനനന്തഃ ।
ത്രൈലോക്യമംശേന സനാഥമേകഃ
കർതും മഹാത്മാഽദിതിജോഽവതീർണഃ ॥ 3 ॥
ന യസ്യ രുദ്രാ ന ച പദ്മയോനി-
-ര്നേന്ദ്രോ ന സൂര്യേന്ദുമരീചിമിശ്രാഃ ।
ജാനന്തി ദൈത്യാധിപ യത്സ്വരൂപം
സ വാസുദേവഃ കലയാവതീർണഃ ॥ 4 ॥
യമക്ഷരം വേദവിദോ വദന്തി
വിശന്തി യം ജ്ഞാനവിധൂതപാപാഃ ।
യസ്മിൻ പ്രവിഷ്ടാ ന പുനർഭവന്തി
തം വാസുദേവം പ്രണമാമി ദേവം ॥ 5 ॥
ഭൂതാന്യശേഷാണി യതോ ഭവന്തി
യഥോർമയസ്തോയനിധേരജസ്രം ।
ലയം ച യസ്മിൻ പ്രലയേ പ്രയാന്തി
തം വാസുദേവം പ്രണതോഽസ്മ്യചിന്ത്യം ॥ 6 ॥
ന യസ്യ രൂപം ന ബലം പ്രഭാവോ
ന ച പ്രതാപഃ പരമസ്യ പുംസഃ ।
വിജ്ഞായതേ സർവപിതാമഹാദ്യൈ-
-സ്തം വാസുദേവം പ്രണമാമി നിത്യം ॥ 7 ॥
രൂപസ്യ ചക്ഷുർഗ്രഹണേ ത്വഗേഷാ
സ്പർശഗ്രഹിത്രീ രസനാ രസസ്യ ।
ഘ്രാണം ച ഗന്ധഗ്രഹണേ നിയുക്തം
ന ഘ്രാണചക്ഷുഃ ശ്രവണാദി തസ്യ ॥ 8 ॥
സ്വയമ്പ്രകാശഃ പരമാർഥതോ യഃ
സർവേശ്വരോ വേദിതവ്യഃ സ യുക്ത്യാ ।
ശക്യം തമീഡ്യമനഘം ച ദേവം
ഗ്രാഹ്യം നതോഽഹം ഹരിമീശിതാരം ॥ 9 ॥
യേനൈകദംഷ്ട്രേണ സമുദ്ധൃതേയം
ധരാ ചലാ ധാരയതീഹ സർവം ।
ശേതേ ഗ്രസിത്വാ സകലം ജഗദ്യ-
-സ്തമീഡ്യമീശം പ്രണതോഽസ്മി വിഷ്ണും ॥ 10 ॥
അംശാവതീർണേന ച യേന ഗർഭേ
ഹൃതാനി തേജാംസി മഹാസുരാണാം ।
നമാമി തം ദേവമനന്തമീശ-
-മശേഷസംസാരതരോഃ കുഠാരം ॥ 11 ॥
ദേവോ ജഗദ്യോനിരയം മഹാത്മാ
സ ഷോഡശാംശേന മഹാഽസുരേന്ദ്രാഃ ।
സുരേന്ദ്രമാതുർജഠരം പ്രവിഷ്ടോ
ഹൃതാനി വസ്തേന ബലം വപൂംഷി ॥ 12 ॥
ഇതി ശ്രീവാമനപുരാണേ നവവിംശതിതമോഽധ്യായേ ശ്രീ വാമന സ്തോത്രം ।
Recite with devotion and pure heart
Regular practice brings spiritual benefits