నామస్మరణాదన్యోపాయం న హి పశ్యామో భవతరణే । రామ హరే కృష్ణ హరే తవ నామ వదామి సదా నృహరే ॥ వేదోద్ధారవిచారమతే సోమకదానవసంహరణే । మీనాకారశరీర నమో హరిభక్తం తే పరిపాలయ మాం ॥ 1 ॥ మంథానాచలధారణహేతో దేవాసురపరిపాలన భో । కూర్మాకారశరీర నమో హరిభక్తం తే పరిపాలయ మాం ॥ 2 ॥ భూచోరకహర పుణ్యమతే క్రీడోద్ధృతభూదేశ హరే । క్రోడాకారశరీర నమో హరిభక్తం తే పరిపాలయ మాం ॥ 3 ॥ హిరణ్యకశిపుచ్ఛేదనహేతో ప్రహ్లాదాఽభయధారణహేతో । నరసింహాచ్యుతరూప నమో హరిభక్తం తే పరిపాలయ మాం ॥ 4 ॥ బలిమదభంజన వితతమతే పాదోద్వయకృతలోకకృతే । వటుపటువేషమనోజ్ఞ నమో హరిభక్తం తే పరిపాలయ మాం ॥ 5 ॥ క్షితిపతివంశసంభవమూర్తే క్షితిపతిరక్షాక్షతమూర్తే । భృగుపతిరామవరేణ్య నమో హరిభక్తం తే పరిపాలయ మాం ॥ 6 ॥ సీతావల్లభ దాశరథే దశరథనందన లోకగురో । రావణమర్దన రామ నమో హరిభక్తం తే పరిపాలయ మాం ॥ 7 ॥ కృష్ణానంత కృపాజలధే కంసారే కమలేశ హరే । కాలియమర్దన కృష్ణ నమో హరిభక్తం తే పరిపాలయ మాం ॥ 8 ॥ త్రిపురసతీమానవిహరణా త్రిపురవిజయమార్గణరూపా । శుద్ధజ్ఞానవిబుద్ధ నమో హరిభక్తం తే పరిపాలయ మాం ॥ 9 ॥ శిష్టజనావన దుష్టహర ఖగతురగోత్తమవాహన తే । కల్కిరూపపరిపాల నమో హరిభక్తం తే పరిపాలయ మాం ॥ 10 ॥ నామస్మరణాదన్యోపాయం న హి పశ్యామో భవతరణే । రామ హరే కృష్ణ హరే తవ నామ వదామి సదా నృహరే ॥ ఇతి దశావతార స్తోత్రం ।