नामस्मरणादन्योपायं न हि पश्यामो भवतरणे । राम हरे कृष्ण हरे तव नाम वदामि सदा नृहरे ॥ वेदोद्धारविचारमते सोमकदानवसंहरणे । मीनाकारशरीर नमो हरिभक्तं ते परिपालय माम् ॥ 1 ॥ मन्थानाचलधारणहेतो देवासुरपरिपालन भो । कूर्माकारशरीर नमो हरिभक्तं ते परिपालय माम् ॥ 2 ॥ भूचोरकहर पुण्यमते क्रीडोद्धृतभूदेश हरे । क्रोडाकारशरीर नमो हरिभक्तं ते परिपालय माम् ॥ 3 ॥ हिरण्यकशिपुच्छेदनहेतो प्रह्लादाऽभयधारणहेतो । नरसिंहाच्युतरूप नमो हरिभक्तं ते परिपालय माम् ॥ 4 ॥ बलिमदभञ्जन विततमते पादोद्वयकृतलोककृते । वटुपटुवेषमनोज्ञ नमो हरिभक्तं ते परिपालय माम् ॥ 5 ॥ क्षितिपतिवंशसम्भवमूर्ते क्षितिपतिरक्षाक्षतमूर्ते । भृगुपतिरामवरेण्य नमो हरिभक्तं ते परिपालय माम् ॥ 6 ॥ सीतावल्लभ दाशरथे दशरथनन्दन लोकगुरो । रावणमर्दन राम नमो हरिभक्तं ते परिपालय माम् ॥ 7 ॥ कृष्णानन्त कृपाजलधे कंसारे कमलेश हरे । कालियमर्दन कृष्ण नमो हरिभक्तं ते परिपालय माम् ॥ 8 ॥ त्रिपुरसतीमानविहरणा त्रिपुरविजयमार्गणरूपा । शुद्धज्ञानविबुद्ध नमो हरिभक्तं ते परिपालय माम् ॥ 9 ॥ शिष्टजनावन दुष्टहर खगतुरगोत्तमवाहन ते । कल्किरूपपरिपाल नमो हरिभक्तं ते परिपालय माम् ॥ 10 ॥ नामस्मरणादन्योपायं न हि पश्यामो भवतरणे । राम हरे कृष्ण हरे तव नाम वदामि सदा नृहरे ॥ इति दशावतार स्तोत्रम् ।