കദ്രു॒ദ്രായ॒ പ്രചേ᳚തസേ മീ॒ൾഹുഷ്ട॑മായ॒ തവ്യ॑സേ । വോ॒ചേമ॒ ശമ്ത॑മം ഹൃ॒ദേ ॥ യഥാ᳚ നോ॒ അദി॑തിഃ॒ കര॒ത്പശ്വേ॒ നൃഭ്യോ॒ യഥാ॒ ഗവേ᳚ । യഥാ᳚ തോ॒കായ॑ രു॒ദ്രിയം᳚ ॥ യഥാ᳚ നോ മി॒ത്രോ വരു॑ണോ॒ യഥാ᳚ രു॒ദ്രശ്ചികേ᳚തതി । യഥാ॒ വിശ്വേ᳚ സ॒ജോഷ॑സഃ ॥ ഗാ॒ഥപ॑തിം മേ॒ധപ॑തിം രു॒ദ്രം ജലാ᳚ഷഭേഷജം । തച്ഛം॒യോഃ സു॒മ്നമീ᳚മഹേ ॥ യഃ ശു॒ക്ര ഇ॑വ॒ സൂര്യോ॒ ഹിര᳚ണ്യമിവ॒ രോച॑തേ । ശ്രേഷ്ഠോ᳚ ദേ॒വാനാം॒ വസുഃ॑ ॥ ശം നഃ॑ കര॒ത്യർവ॑തേ സു॒ഗം മേ॒ഷായ॑ മേ॒ഷ്യേ᳚ । നൃഭ്യോ॒ നാരി॑ഭ്യോ॒ ഗവേ᳚ ॥ അ॒സ്മേ സോ᳚മ॒ ശ്രിയ॒മധി॒ നി ധേ᳚ഹി ശ॒തസ്യ॑ നൃ॒ണാം । മഹി॒ ശ്രവ॑സ്തുവിനൃ॒മ്ണം ॥ മാ നഃ॑ സോമപരി॒ബാധോ॒ മാരാ᳚തയോ ജുഹുരന്ത । ആ ന॑ ഇന്ദോ॒ വാജേ᳚ ഭജ ॥ യാസ്തേ᳚ പ്ര॒ജാ അ॒മൃത॑സ്യ॒ പര॑സ്മി॒ന്ധാമ᳚ന്നൃ॒തസ്യ॑ । മൂ॒ർധാ നാഭാ᳚ സോമ വേന ആ॒ഭൂഷ᳚ന്തീഃ സോമ വേദഃ ॥ ഇ॒മാ രു॒ദ്രായ॑ ത॒വസേ᳚ കപ॒ർദിനേ᳚ ക്ഷ॒യദ്വീ᳚രായ॒ പ്ര ഭ॑രാമഹേ മ॒തീഃ । യഥാ॒ ശമസ॑ദ്ദ്വി॒പദേ॒ ചതു॑ഷ്പദേ॒ വിശ്വം᳚ പു॒ഷ്ടം ഗ്രാമേ᳚ അ॒സ്മിന്ന॑നാതു॒രം ॥ മൃ॒ളാ നോ᳚ രുദ്രോ॒ത നോ॒ മയ॑സ്കൃധി ക്ഷ॒യദ്വീ᳚രായ॒ നമ॑സാ വിധേമ തേ । യച്ഛം ച॒ യോശ്ച॒ മനു॑രായേ॒ജേ പി॒താ തദ॑ശ്യാമ॒ തവ॑ രുദ്ര॒ പ്രണീ᳚തിഷു ॥ അ॒ശ്യാമ॑ തേ സുമ॒തിം ദേ᳚വയ॒ജ്യയാ᳚ ക്ഷ॒യദ്വീ᳚രസ്യ॒ തവ॑ രുദ്ര മീഢ്വഃ । സു॒മ്നാ॒യന്നിദ്വിശോ᳚ അ॒സ്മാക॒മാ ച॒രാരി॑ഷ്ടവീരാ ജുഹവാമ തേ ഹ॒വിഃ ॥ ത്വേ॒ഷം വ॒യം രു॒ദ്രം യ॑ജ്ഞ॒സാധം᳚ വ॒ങ്കും ക॒വിമവ॑സേ॒ നി ഹ്വ॑യാമഹേ । ആ॒രേ അ॒സ്മദ്ദൈവ്യം॒ ഹേളോ᳚ അസ്യതു സുമ॒തിമിദ്വ॒യമ॒സ്യാ വൃ॑ണീമഹേ ॥ ദി॒വോ വ॑രാ॒ഹമ॑രു॒ഷം ക॑പ॒ർദിനം᳚ ത്വേ॒ഷം രൂ॒പം നമ॑സാ॒ നി ഹ്വ॑യാമഹേ । ഹസ്തേ॒ ബിഭ്ര॑ദ്ഭേഷ॒ജാ വാര്യാ᳚ണി॒ ശർമ॒ വർമ॑ ച്ഛ॒ർദിര॒സ്മഭ്യം᳚ യംസത് ॥ ഇ॒ദം പി॒ത്രേ മ॒രുതാ᳚മുച്യതേ॒ വചഃ॑ സ്വാ॒ദോഃ സ്വാദീ᳚യോ രു॒ദ്രായ॒ വർധ॑നം । രാസ്വാ᳚ ച നോ അമൃത മർത॒ഭോജ॑നം॒ ത്മനേ᳚ തോ॒കായ॒ തന॑യായ മൃള ॥ മാ നോ᳚ മ॒ഹാന്ത॑മു॒ത മാ നോ᳚ അർഭ॒കം മാ ന॒ ഉക്ഷ᳚ന്തമു॒ത മാ ന॑ ഉക്ഷി॒തം । മാ നോ᳚ വധീഃ പി॒തരം॒ മോത മാ॒തരം॒ മാ നഃ॑ പ്രി॒യാസ്ത॒ന്വോ᳚ രുദ്ര രീരിഷഃ ॥ മാ ന॑സ്തോ॒കേ തന॑യേ॒ മാ ന॑ ആ॒യൗ മാ നോ॒ ഗോഷു॒ മാ നോ॒ അശ്വേ᳚ഷു രീരിഷഃ । വീ॒രാന്മാ നോ᳚ രുദ്ര ഭാമി॒തോ വ॑ധീർഹ॒വിഷ്മ᳚ന്തഃ॒ സദ॒മിത്ത്വാ᳚ ഹവാമഹേ ॥ ഉപ॑ തേ॒ സ്തോമാ᳚ൻപശു॒പാ ഇ॒വാക॑രം॒ രാസ്വാ᳚ പിതർമരുതാം സു॒മ്നമ॒സ്മേ । ഭ॒ദ്രാ ഹി തേ᳚ സുമ॒തിർമൃ॑ള॒യത്ത॒മാഥാ᳚ വ॒യമവ॒ ഇത്തേ᳚ വൃണീമഹേ ॥ ആ॒രേ തേ᳚ ഗോ॒ഘ്നമു॒ത പൂ᳚രുഷ॒ഘ്നം ക്ഷയ॑ദ്വീര സു॒മ്നമ॒സ്മേ തേ᳚ അസ്തു । മൃ॒ളാ ച॑ നോ॒ അധി॑ ച ബ്രൂഹി ദേ॒വാധാ᳚ ച നഃ॒ ശർമ॑ യച്ഛ ദ്വി॒ബർഹാഃ᳚ ॥ അവോ᳚ചാമ॒ നമോ᳚ അസ്മാ അവ॒സ്യവഃ॑ ശൃ॒ണോതു॑ നോ॒ ഹവം᳚ രു॒ദ്രോ മ॒രുത്വാ᳚ൻ । തന്നോ᳚ മി॒ത്രോ വരു॑ണോ മാമഹന്താ॒മദി॑തിഃ॒ സിന്ധുഃ॑ പൃഥി॒വീ ഉ॒ത ദ്യൗഃ ॥ ആ തേ᳚ പിതർമരുതാം സു॒മ്നമേ᳚തു॒ മാ നഃ॒ സൂര്യ॑സ്യ സം॒ദൃശോ᳚ യുയോഥാഃ । അ॒ഭി നോ᳚ വീ॒രോ അർവ॑തി ക്ഷമേത॒ പ്ര ജാ᳚യേമഹി രുദ്ര പ്ര॒ജാഭിഃ॑ ॥ ത്വാദ॑ത്തേഭീ രുദ്ര॒ ശന്ത॑മേഭിഃ ശ॒തം ഹിമാ᳚ അശീയ ഭേഷ॒ജേഭിഃ॑ । വ്യ1॒॑സ്മദ്ദ്വേഷോ᳚ വിത॒രം വ്യംഹോ॒ വ്യമീ᳚വാശ്ചാതയസ്വാ॒ വിഷൂ᳚ചീഃ ॥ ശ്രേഷ്ഠോ᳚ ജാ॒തസ്യ॑ രുദ്ര ശ്രി॒യാസി॑ ത॒വസ്ത॑മസ്ത॒വസാം᳚ വജ്രബാഹോ । പർഷി॑ ണഃ പാ॒രമംഹ॑സഃ സ്വ॒സ്തി വിശ്വാ᳚ അ॒ഭീ᳚തീ॒ രപ॑സോ യുയോധി ॥ മാ ത്വാ᳚ രുദ്ര ചുക്രുധാമാ॒ നമോ᳚ഭി॒ർമാ ദുഷ്ടു॑തീ വൃഷഭ॒ മാ സഹൂ᳚തീ । ഉന്നോ᳚ വീ॒രാഁ അ॑ർപയ ഭേഷ॒ജേഭി॑ർഭി॒ഷക്ത॑മം ത്വാ ഭി॒ഷജാം᳚ ശൃണോമി ॥ ഹവീ᳚മഭി॒ർഹവ॑തേ॒ യോ ഹ॒വിർഭി॒രവ॒ സ്തോമേ᳚ഭീ രു॒ദ്രം ദി॑ഷീയ । ഋ॒ദൂ॒ദരഃ॑ സു॒ഹവോ॒ മാ നോ᳚ അ॒സ്യൈ ബ॒ഭ്രുഃ സു॒ശിപ്രോ᳚ രീരധന്മ॒നായൈ᳚ ॥ ഉന്മാ᳚ മമന്ദ വൃഷ॒ഭോ മ॒രുത്വാ॒ന്ത്വക്ഷീ᳚യസാ॒ വയ॑സാ॒ നാധ॑മാനം । ഘൃണീ᳚വ ച്ഛാ॒യാമ॑ര॒പാ അ॑ശീ॒യാ വി॑വാസേയം രു॒ദ്രസ്യ॑ സു॒മ്നം ॥ ക്വ1॒॑ ഽസ്യ തേ᳚ രുദ്ര മൃള॒യാകു॒ർഹസ്തോ॒ യോ അസ്തി॑ ഭേഷ॒ജോ ജലാ᳚ഷഃ । അ॒പ॒ഭ॒ർതാ രപ॑സോ॒ ദൈവ്യ॑സ്യാ॒ഭീ നു മാ᳚ വൃഷഭ ചക്ഷമീഥാഃ ॥ പ്ര ബ॒ഭ്രവേ᳚ വൃഷ॒ഭായ॑ ശ്വിതീ॒ചേ മ॒ഹോ മ॒ഹീം സു॑ഷ്ടു॒തിമീ᳚രയാമി । ന॒മ॒സ്യാ ക॑ല്മലീ॒കിനം॒ നമോ᳚ഭിർഗൃണീ॒മസി॑ ത്വേ॒ഷം രു॒ദ്രസ്യ॒ നാമ॑ ॥ സ്ഥി॒രേഭി॒രംഗൈഃ᳚ പുരു॒രൂപ॑ ഉ॒ഗ്രോ ബ॒ഭ്രുഃ ശു॒ക്രേഭിഃ॑ പിപിശേ॒ ഹിര᳚ണ്യൈഃ । ഈശാ᳚നാദ॒സ്യ ഭുവ॑നസ്യ॒ ഭൂരേ॒ർന വാ ഉ॑ യോഷദ്രു॒ദ്രാദ॑സു॒ര്യം᳚ ॥ അർഹ᳚ൻബിഭർഷി॒ സായ॑കാനി॒ ധന്വാർഹ᳚ന്നി॒ഷ്കം യ॑ജ॒തം വി॒ശ്വരൂ᳚പം । അർഹ᳚ന്നി॒ദം ദ॑യസേ॒ വിശ്വ॒മഭ്വം॒ ന വാ ഓജീ᳚യോ രുദ്ര॒ ത്വദ॑സ്തി ॥ സ്തു॒ഹി ശ്രു॒തം ഗ॑ർത॒സദം॒ യുവാ᳚നം മൃ॒ഗം ന ഭീ॒മമു॑പഹ॒ത്നുമു॒ഗ്രം । മൃ॒ളാ ജ॑രി॒ത്രേ രു॑ദ്ര॒ സ്തവാ᳚നോ॒ഽന്യം തേ᳚ അ॒സ്മന്നി വ॑പന്തു॒ സേനാഃ᳚ ॥ കു॒മാ॒രശ്ചി॑ത്പി॒തരം॒ വന്ദ॑മാനം॒ പ്രതി॑ നാനാമ രുദ്രോപ॒യന്തം᳚ । ഭൂരേ᳚ർദാ॒താരം॒ സത്പ॑തിം ഗൃണീഷേ സ്തു॒തസ്ത്വം ഭേ᳚ഷ॒ജാ രാ᳚സ്യ॒സ്മേ ॥ യാ വോ᳚ ഭേഷ॒ജാ മ॑രുതഃ॒ ശുചീ᳚നി॒ യാ ശന്ത॑മാ വൃഷണോ॒ യാ മ॑യോ॒ഭു । യാനി॒ മനു॒രവൃ॑ണീതാ പി॒താ ന॒സ്താ ശം ച॒ യോശ്ച॑ രു॒ദ്രസ്യ॑ വശ്മി ॥ പരി॑ ണോ ഹേ॒തീ രു॒ദ്രസ്യ॑ വൃജ്യാഃ॒ പരി॑ ത്വേ॒ഷസ്യ॑ ദുർമ॒തിർമ॒ഹീ ഗാ᳚ത് । അവ॑ സ്ഥി॒രാ മ॒ഘവ॑ദ്ഭ്യസ്തനുഷ്വ॒ മീഢ്വ॑സ്തോ॒കായ॒ തന॑യായ മൃള ॥ ഏ॒വാ ബ॑ഭ്രോ വൃഷഭ ചേകിതാന॒ യഥാ᳚ ദേവ॒ ന ഹൃ॑ണീ॒ഷേ ന ഹംസി॑ । ഹ॒വ॒ന॒ശ്രുന്നോ᳚ രുദ്രേ॒ഹ ബോ᳚ധി ബൃ॒ഹദ്വ॑ദേമ വി॒ദഥേ᳚ സു॒വീരാഃ᳚ ॥ --ഷഷ്ഠമണ്ഡലേ ചതുഃസപ്തതിതമം സൂക്തം-- സോമാ᳚രുദ്രാ ധാ॒രയേ᳚ഥാമസു॒ര്യം1॒॑ പ്ര വാ᳚മി॒ഷ്ടയോഽര॑മശ്നുവന്തു । ദമേ᳚ദമേ സ॒പ്ത രത്നാ॒ ദധാ᳚നാ॒ ശം നോ᳚ ഭൂതം ദ്വി॒പദേ॒ ശം ചതു॑ഷ്പദേ ॥ സോമാ᳚രുദ്രാ॒ വി വൃ॑ഹതം॒ വിഷൂ᳚ചീ॒മമീ᳚വാ॒ യാ നോ॒ ഗയ॑മാവി॒വേശ॑ । ആ॒രേ ബാ᳚ധേഥാം॒ നിരൃ॑തിം പരാ॒ചൈര॒സ്മേ ഭ॒ദ്രാ സൗ᳚ശ്രവ॒സാനി॑ സന്തു ॥ സോമാ᳚രുദ്രാ യു॒വമേ॒താന്യ॒സ്മേ വിശ്വാ᳚ ത॒നൂഷു॑ ഭേഷ॒ജാനി॑ ധത്തം । അവ॑ സ്യതം മു॒ഞ്ചതം॒ യന്നോ॒ അസ്തി॑ ത॒നൂഷു॑ ബ॒ദ്ധം കൃ॒തമേനോ᳚ അ॒സ്മത് ॥ തി॒ഗ്മായു॑ധൗ തി॒ഗ്മഹേ᳚തീ സു॒ശേവൗ॒ സോമാ᳚രുദ്രാവി॒ഹ സു മൃ॑ളതം നഃ । പ്ര നോ᳚ മുഞ്ചതം॒ വരു॑ണസ്യ॒ പാശാ᳚ദ്ഗോപാ॒യതം᳚ നഃ സുമന॒സ്യമാ᳚നാ ॥ --സപ്തമമണ്ഡലേ ഷട്ചത്വാരിംശം സൂക്തം-- ഇ॒മാ രു॒ദ്രായ॑ സ്ഥി॒രധ᳚ന്വനേ॒ ഗിരഃ॑ ക്ഷി॒പ്രേഷ॑വേ ദേ॒വായ॑ സ്വ॒ധാവ്നേ᳚ । അഷാ᳚ൾഹായ॒ സഹ॑മാനായ വേ॒ധസേ᳚ തി॒ഗ്മായു॑ധായ ഭരതാ ശൃ॒ണോതു॑ നഃ ॥ സ ഹി ക്ഷയേ᳚ണ॒ ക്ഷമ്യ॑സ്യ॒ ജന്മ॑നഃ॒ സാമ്രാ᳚ജ്യേന ദി॒വ്യസ്യ॒ ചേത॑തി । അവ॒ന്നവ᳚ന്തീ॒രുപ॑ നോ॒ ദുര॑ശ്ചരാനമീ॒വോ രു॑ദ്ര॒ ജാസു॑ നോ ഭവ ॥ യാ തേ᳚ ദി॒ദ്യുദവ॑സൃഷ്ടാ ദി॒വസ്പരി॑ ക്ഷ്മ॒യാ ചര॑തി॒ പരി॒ സാ വൃ॑ണക്തു നഃ । സ॒ഹസ്രം᳚ തേ സ്വപിവാത ഭേഷ॒ജാ മാ ന॑സ്തോ॒കേഷു॒ തന॑യേഷു രീരിഷഃ ॥ മാ നോ᳚ വധീ രുദ്ര॒ മാ പരാ᳚ ദാ॒ മാ തേ᳚ ഭൂമ॒ പ്രസി॑തൗ ഹീളി॒തസ്യ॑ । ആ നോ᳚ ഭജ ബ॒ർഹിഷി॑ ജീവശം॒സേ യൂ॒യം പാ᳚ത സ്വ॒സ്തിഭിഃ॒ സദാ᳚ നഃ ॥ തമീശാ᳚നം॒ ജഗ॑തസ്ത॒സ്ഥുഷ॒സ്പതിം᳚ ധിയഞ്ജി॒ന്വമവ॑സേ ഹൂമഹേ വ॒യം । പൂ॒ഷാ നോ॒ യഥാ॒ വേദ॑സാ॒മസ॑ദ്വൃ॒ധേ ര॑ക്ഷി॒താ പാ॒യുരദ॑ബ്ധഃ സ്വ॒സ്തയേ᳚ ॥ അ॒സ്മേ രു॒ദ്രാ മേ॒ഹനാ॒ പർവ॑താസോ വൃത്ര॒ഹത്യേ॒ ഭര॑ഹൂതൗ സ॒ജോഷാഃ᳚ । യഃ ശംസ॑തേ സ്തുവ॒തേ ധായി॑ പ॒ജ്ര ഇന്ദ്ര॑ജ്യേഷ്ഠാ അ॒സ്മാഁ അ॑വന്തു ദേ॒വാഃ ॥ ത്വമ॑ഗ്നേ രു॒ദ്രോ അസു॑രോ മ॒ഹോ ദി॒വസ്ത്വം ശർധോ॒ മാരു॑തം പൃ॒ക്ഷ ഈ॑ശിഷേ । ത്വം വാതൈ᳚രരു॒ണൈര്യാ॑സി ശംഗ॒യസ്ത്വം പൂ॒ഷാ വി॑ധ॒തഃ പാ᳚സി॒ നു ത്മനാ᳚ ॥ ആ വോ॒ രാജാ᳚നമധ്വ॒രസ്യ॑ രു॒ദ്രം ഹോതാ᳚രം സത്യ॒യജം॒ രോദ॑സ്യോഃ । അ॒ഗ്നിം പു॒രാ ത॑നയി॒ത്നോര॒ചിത്താ॒ദ്ധിര᳚ണ്യരൂപ॒മവ॑സേ കൃണുധ്വം ॥ ഭുവ॑നസ്യ പി॒തരം᳚ ഗീ॒ർഭിരാ॒ഭീ രു॒ദ്രം ദിവാ᳚ വ॒ർധയാ᳚ രു॒ദ്രമ॒ക്തൗ । ബൃ॒ഹന്ത॑മൃ॒ഷ്വമ॒ജരം᳚ സുഷു॒മ്നമൃധ॑ഗ്ഘുവേമ ക॒വിനേ᳚ഷി॒താസഃ॑ ॥ തമു॑ ഷ്ടുഹി॒ യഃ സ്വി॒ഷുഃ സു॒ധന്വാ॒ യോ വിശ്വ॑സ്യ॒ ക്ഷയ॑തി ഭേഷ॒ജസ്യ॑ । യക്ഷ്വാ᳚ മ॒ഹേ സൗ᳚മന॒സായ॑ രു॒ദ്രം നമോ᳚ഭിർദേ॒വമസു॑രം ദുവസ്യ ॥ അ॒യം മേ॒ ഹസ്തോ॒ ഭഗ॑വാന॒യം മേ॒ ഭഗ॑വത്തരഃ । അ॒യം മേ᳚ വി॒ശ്വഭേ᳚ഷജോ॒ഽയം ശി॒വാഭി॑മർശനഃ ॥ ത്ര്യം᳚ബകം യജാമഹേ സു॒ഗന്ധിം᳚ പുഷ്ടി॒വർധ॑നം । ഉ॒ർവാ॒രു॒കമി॑വ॒ ബന്ധ॑നാന്മൃ॒ത്യോർമു॑ക്ഷീയ॒ മാമൃതാ᳚ത് ॥ ഓം ശാന്തിഃ॒ ശാന്തിഃ॒ ശാന്തിഃ॑ ॥