kadru̱drāya̱ prace̎tase mī̱l̤huṣṭa̍māya̱ tavya̍se । vo̱cema̱ śamta̍maṃ hṛ̱de ॥ yathā̎ no̱ adi̍ti̱ḥ kara̱tpaśve̱ nṛbhyo̱ yathā̱ gave̎ । yathā̎ to̱kāya̍ ru̱driya̎m ॥ yathā̎ no mi̱tro varu̍ṇo̱ yathā̎ ru̱draścike̎tati । yathā̱ viśve̎ sa̱joṣa̍saḥ ॥ gā̱thapa̍tiṃ me̱dhapa̍tiṃ ru̱draṃ jalā̎ṣabheṣajam । taccha̱ṃyoḥ su̱mnamī̎mahe ॥ yaḥ śu̱kra i̍va̱ sūryo̱ hira̎ṇyamiva̱ roca̍te । śreṣṭho̎ de̱vānā̱ṃ vasu̍ḥ ॥ śaṃ na̍ḥ kara̱tyarva̍te su̱gaṃ me̱ṣāya̍ me̱ṣye̎ । nṛbhyo̱ nāri̍bhyo̱ gave̎ ॥ a̱sme so̎ma̱ śriya̱madhi̱ ni dhe̎hi śa̱tasya̍ nṛ̱ṇām । mahi̱ śrava̍stuvinṛ̱mṇam ॥ mā na̍ḥ somapari̱bādho̱ mārā̎tayo juhuranta । ā na̍ indo̱ vāje̎ bhaja ॥ yāste̎ pra̱jā a̱mṛta̍sya̱ para̍smi̱ndhāma̎nnṛ̱tasya̍ । mū̱rdhā nābhā̎ soma vena ā̱bhūṣa̎ntīḥ soma vedaḥ ॥ i̱mā ru̱drāya̍ ta̱vase̎ kapa̱rdine̎ kṣa̱yadvī̎rāya̱ pra bha̍rāmahe ma̱tīḥ । yathā̱ śamasa̍ddvi̱pade̱ catu̍ṣpade̱ viśva̎ṃ pu̱ṣṭaṃ grāme̎ a̱sminna̍nātu̱ram ॥ mṛ̱l̤ā no̎ rudro̱ta no̱ maya̍skṛdhi kṣa̱yadvī̎rāya̱ nama̍sā vidhema te । yacchaṃ ca̱ yośca̱ manu̍rāye̱je pi̱tā tada̍śyāma̱ tava̍ rudra̱ praṇī̎tiṣu ॥ a̱śyāma̍ te suma̱tiṃ de̎vaya̱jyayā̎ kṣa̱yadvī̎rasya̱ tava̍ rudra mīḍhvaḥ । su̱mnā̱yannidviśo̎ a̱smāka̱mā ca̱rāri̍ṣṭavīrā juhavāma te ha̱viḥ ॥ tve̱ṣaṃ va̱yaṃ ru̱draṃ ya̍jña̱sādha̎ṃ va̱ṅkuṃ ka̱vimava̍se̱ ni hva̍yāmahe । ā̱re a̱smaddaivya̱ṃ hel̤o̎ asyatu suma̱timidva̱yama̱syā vṛ̍ṇīmahe ॥ di̱vo va̍rā̱hama̍ru̱ṣaṃ ka̍pa̱rdina̎ṃ tve̱ṣaṃ rū̱paṃ nama̍sā̱ ni hva̍yāmahe । haste̱ bibhra̍dbheṣa̱jā vāryā̎ṇi̱ śarma̱ varma̍ ccha̱rdira̱smabhya̎ṃ yaṃsat ॥ i̱daṃ pi̱tre ma̱rutā̎mucyate̱ vaca̍ḥ svā̱doḥ svādī̎yo ru̱drāya̱ vardha̍nam । rāsvā̎ ca no amṛta marta̱bhoja̍na̱ṃ tmane̎ to̱kāya̱ tana̍yāya mṛl̤a ॥ mā no̎ ma̱hānta̍mu̱ta mā no̎ arbha̱kaṃ mā na̱ ukṣa̎ntamu̱ta mā na̍ ukṣi̱tam । mā no̎ vadhīḥ pi̱tara̱ṃ mota mā̱tara̱ṃ mā na̍ḥ pri̱yāsta̱nvo̎ rudra rīriṣaḥ ॥ mā na̍sto̱ke tana̍ye̱ mā na̍ ā̱yau mā no̱ goṣu̱ mā no̱ aśve̎ṣu rīriṣaḥ । vī̱rānmā no̎ rudra bhāmi̱to va̍dhīrha̱viṣma̎nta̱ḥ sada̱mittvā̎ havāmahe ॥ upa̍ te̱ stomā̎npaśu̱pā i̱vāka̍ra̱ṃ rāsvā̎ pitarmarutāṃ su̱mnama̱sme । bha̱drā hi te̎ suma̱tirmṛ̍l̤a̱yatta̱māthā̎ va̱yamava̱ itte̎ vṛṇīmahe ॥ ā̱re te̎ go̱ghnamu̱ta pū̎ruṣa̱ghnaṃ kṣaya̍dvīra su̱mnama̱sme te̎ astu । mṛ̱l̤ā ca̍ no̱ adhi̍ ca brūhi de̱vādhā̎ ca na̱ḥ śarma̍ yaccha dvi̱barhā̎ḥ ॥ avo̎cāma̱ namo̎ asmā ava̱syava̍ḥ śṛ̱ṇotu̍ no̱ hava̎ṃ ru̱dro ma̱rutvā̎n । tanno̎ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ ॥ ā te̎ pitarmarutāṃ su̱mname̎tu̱ mā na̱ḥ sūrya̍sya sa̱ṃdṛśo̎ yuyothāḥ । a̱bhi no̎ vī̱ro arva̍ti kṣameta̱ pra jā̎yemahi rudra pra̱jābhi̍ḥ ॥ tvāda̍ttebhī rudra̱ śaṃta̍mebhiḥ śa̱taṃ himā̎ aśīya bheṣa̱jebhi̍ḥ । vya1̱̍smaddveṣo̎ vita̱raṃ vyaṃho̱ vyamī̎vāścātayasvā̱ viṣū̎cīḥ ॥ śreṣṭho̎ jā̱tasya̍ rudra śri̱yāsi̍ ta̱vasta̍masta̱vasā̎ṃ vajrabāho । parṣi̍ ṇaḥ pā̱ramaṃha̍saḥ sva̱sti viśvā̎ a̱bhī̎tī̱ rapa̍so yuyodhi ॥ mā tvā̎ rudra cukrudhāmā̱ namo̎bhi̱rmā duṣṭu̍tī vṛṣabha̱ mā sahū̎tī । unno̎ vī̱rām̐ a̍rpaya bheṣa̱jebhi̍rbhi̱ṣakta̍maṃ tvā bhi̱ṣajā̎ṃ śṛṇomi ॥ havī̎mabhi̱rhava̍te̱ yo ha̱virbhi̱rava̱ stome̎bhī ru̱draṃ di̍ṣīya । ṛ̱dū̱dara̍ḥ su̱havo̱ mā no̎ a̱syai ba̱bhruḥ su̱śipro̎ rīradhanma̱nāyai̎ ॥ unmā̎ mamanda vṛṣa̱bho ma̱rutvā̱ntvakṣī̎yasā̱ vaya̍sā̱ nādha̍mānam । ghṛṇī̎va cchā̱yāma̍ra̱pā a̍śī̱yā vi̍vāseyaṃ ru̱drasya̍ su̱mnam ॥ kva1̱̍ 'sya te̎ rudra mṛl̤a̱yāku̱rhasto̱ yo asti̍ bheṣa̱jo jalā̎ṣaḥ । a̱pa̱bha̱rtā rapa̍so̱ daivya̍syā̱bhī nu mā̎ vṛṣabha cakṣamīthāḥ ॥ pra ba̱bhrave̎ vṛṣa̱bhāya̍ śvitī̱ce ma̱ho ma̱hīṃ su̍ṣṭu̱timī̎rayāmi । na̱ma̱syā ka̍lmalī̱kina̱ṃ namo̎bhirgṛṇī̱masi̍ tve̱ṣaṃ ru̱drasya̱ nāma̍ ॥ sthi̱rebhi̱raṅgai̎ḥ puru̱rūpa̍ u̱gro ba̱bhruḥ śu̱krebhi̍ḥ pipiśe̱ hira̎ṇyaiḥ । īśā̎nāda̱sya bhuva̍nasya̱ bhūre̱rna vā u̍ yoṣadru̱drāda̍su̱rya̎m ॥ arha̎nbibharṣi̱ sāya̍kāni̱ dhanvārha̎nni̱ṣkaṃ ya̍ja̱taṃ vi̱śvarū̎pam । arha̎nni̱daṃ da̍yase̱ viśva̱mabhva̱ṃ na vā ojī̎yo rudra̱ tvada̍sti ॥ stu̱hi śru̱taṃ ga̍rta̱sada̱ṃ yuvā̎naṃ mṛ̱gaṃ na bhī̱mamu̍paha̱tnumu̱gram । mṛ̱l̤ā ja̍ri̱tre ru̍dra̱ stavā̎no̱'nyaṃ te̎ a̱smanni va̍pantu̱ senā̎ḥ ॥ ku̱mā̱raści̍tpi̱tara̱ṃ vanda̍māna̱ṃ prati̍ nānāma rudropa̱yanta̎m । bhūre̎rdā̱tāra̱ṃ satpa̍tiṃ gṛṇīṣe stu̱tastvaṃ bhe̎ṣa̱jā rā̎sya̱sme ॥ yā vo̎ bheṣa̱jā ma̍ruta̱ḥ śucī̎ni̱ yā śaṃta̍mā vṛṣaṇo̱ yā ma̍yo̱bhu । yāni̱ manu̱ravṛ̍ṇītā pi̱tā na̱stā śaṃ ca̱ yośca̍ ru̱drasya̍ vaśmi ॥ pari̍ ṇo he̱tī ru̱drasya̍ vṛjyā̱ḥ pari̍ tve̱ṣasya̍ durma̱tirma̱hī gā̎t । ava̍ sthi̱rā ma̱ghava̍dbhyastanuṣva̱ mīḍhva̍sto̱kāya̱ tana̍yāya mṛl̤a ॥ e̱vā ba̍bhro vṛṣabha cekitāna̱ yathā̎ deva̱ na hṛ̍ṇī̱ṣe na haṃsi̍ । ha̱va̱na̱śrunno̎ rudre̱ha bo̎dhi bṛ̱hadva̍dema vi̱dathe̎ su̱vīrā̎ḥ ॥ --ṣaṣṭhamaṇḍale catuḥsaptatitamaṃ sūktam-- somā̎rudrā dhā̱raye̎thāmasu̱ryaṃ1̱̍ pra vā̎mi̱ṣṭayo'ra̍maśnuvantu । dame̎dame sa̱pta ratnā̱ dadhā̎nā̱ śaṃ no̎ bhūtaṃ dvi̱pade̱ śaṃ catu̍ṣpade ॥ somā̎rudrā̱ vi vṛ̍hata̱ṃ viṣū̎cī̱mamī̎vā̱ yā no̱ gaya̍māvi̱veśa̍ । ā̱re bā̎dhethā̱ṃ nirṛ̍tiṃ parā̱caira̱sme bha̱drā sau̎śrava̱sāni̍ santu ॥ somā̎rudrā yu̱vame̱tānya̱sme viśvā̎ ta̱nūṣu̍ bheṣa̱jāni̍ dhattam । ava̍ syataṃ mu̱ñcata̱ṃ yanno̱ asti̍ ta̱nūṣu̍ ba̱ddhaṃ kṛ̱tameno̎ a̱smat ॥ ti̱gmāyu̍dhau ti̱gmahe̎tī su̱śevau̱ somā̎rudrāvi̱ha su mṛ̍l̤ataṃ naḥ । pra no̎ muñcata̱ṃ varu̍ṇasya̱ pāśā̎dgopā̱yata̎ṃ naḥ sumana̱syamā̎nā ॥ --saptamamaṇḍale ṣaṭcatvāriṃśaṃ sūktam-- i̱mā ru̱drāya̍ sthi̱radha̎nvane̱ gira̍ḥ kṣi̱preṣa̍ve de̱vāya̍ sva̱dhāvne̎ । aṣā̎l̤hāya̱ saha̍mānāya ve̱dhase̎ ti̱gmāyu̍dhāya bharatā śṛ̱ṇotu̍ naḥ ॥ sa hi kṣaye̎ṇa̱ kṣamya̍sya̱ janma̍na̱ḥ sāmrā̎jyena di̱vyasya̱ ceta̍ti । ava̱nnava̎ntī̱rupa̍ no̱ dura̍ścarānamī̱vo ru̍dra̱ jāsu̍ no bhava ॥ yā te̎ di̱dyudava̍sṛṣṭā di̱vaspari̍ kṣma̱yā cara̍ti̱ pari̱ sā vṛ̍ṇaktu naḥ । sa̱hasra̎ṃ te svapivāta bheṣa̱jā mā na̍sto̱keṣu̱ tana̍yeṣu rīriṣaḥ ॥ mā no̎ vadhī rudra̱ mā parā̎ dā̱ mā te̎ bhūma̱ prasi̍tau hīl̤i̱tasya̍ । ā no̎ bhaja ba̱rhiṣi̍ jīvaśa̱ṃse yū̱yaṃ pā̎ta sva̱stibhi̱ḥ sadā̎ naḥ ॥ tamīśā̎na̱ṃ jaga̍tasta̱sthuṣa̱spati̎ṃ dhiyaṃji̱nvamava̍se hūmahe va̱yam । pū̱ṣā no̱ yathā̱ veda̍sā̱masa̍dvṛ̱dhe ra̍kṣi̱tā pā̱yurada̍bdhaḥ sva̱staye̎ ॥ a̱sme ru̱drā me̱hanā̱ parva̍tāso vṛtra̱hatye̱ bhara̍hūtau sa̱joṣā̎ḥ । yaḥ śaṃsa̍te stuva̱te dhāyi̍ pa̱jra indra̍jyeṣṭhā a̱smām̐ a̍vantu de̱vāḥ ॥ tvama̍gne ru̱dro asu̍ro ma̱ho di̱vastvaṃ śardho̱ māru̍taṃ pṛ̱kṣa ī̍śiṣe । tvaṃ vātai̎raru̱ṇairyā̍si śaṃga̱yastvaṃ pū̱ṣā vi̍dha̱taḥ pā̎si̱ nu tmanā̎ ॥ ā vo̱ rājā̎namadhva̱rasya̍ ru̱draṃ hotā̎raṃ satya̱yaja̱ṃ roda̍syoḥ । a̱gniṃ pu̱rā ta̍nayi̱tnora̱cittā̱ddhira̎ṇyarūpa̱mava̍se kṛṇudhvam ॥ bhuva̍nasya pi̱tara̎ṃ gī̱rbhirā̱bhī ru̱draṃ divā̎ va̱rdhayā̎ ru̱drama̱ktau । bṛ̱hanta̍mṛ̱ṣvama̱jara̎ṃ suṣu̱mnamṛdha̍gghuvema ka̱vine̎ṣi̱tāsa̍ḥ ॥ tamu̍ ṣṭuhi̱ yaḥ svi̱ṣuḥ su̱dhanvā̱ yo viśva̍sya̱ kṣaya̍ti bheṣa̱jasya̍ । yakṣvā̎ ma̱he sau̎mana̱sāya̍ ru̱draṃ namo̎bhirde̱vamasu̍raṃ duvasya ॥ a̱yaṃ me̱ hasto̱ bhaga̍vāna̱yaṃ me̱ bhaga̍vattaraḥ । a̱yaṃ me̎ vi̱śvabhe̎ṣajo̱'yaṃ śi̱vābhi̍marśanaḥ ॥ trya̎mbakaṃ yajāmahe su̱gandhi̎ṃ puṣṭi̱vardha̍nam । u̱rvā̱ru̱kami̍va̱ bandha̍nānmṛ̱tyormu̍kṣīya̱ māmṛtā̎t ॥ oṃ śānti̱ḥ śānti̱ḥ śānti̍ḥ ॥