हैंహైHaindavamஹிહિં
📍
Font Size:
പഞ്ച രുദ്രം
ഹരി॒ः ഓം
കദ്രു॒ദ്രായ॒ പ്രചേ᳚തസേ മീ॒ള്ഹുഷ്ട॑മായ॒ തവ്യ॑സേ । വോ॒ചേമ॒ ശംത॑മം ഹൃ॒ദേ ॥ 1.043.01॥
യഥാ᳚ നോ അദി॑തിഃ॒ കര॒ത്പശ്വേ॒ നൃഭ്യോ॒ യഥാ॒ ഗവേ᳚ । യഥാ᳚ തോ॒കായ॑ രു॒ദ്രിയ᳚മ് ॥ 1.043.02॥
യഥാ᳚ നോ മി॒ത്രോ വരു॑ണോ॒ യഥാ᳚ രു॒ദ്രശ്ചികേ᳚തതി । യഥാ॒ വിശ്വേ᳚ സ॒ജോഷ॑സഃ ॥ 1.043.03॥
ഗാ॒ഥപ॑തിം മേ॒ധപ॑തിം രു॒ദ്രം ജലാ᳚ഷഭേഷജമ് । തച്ഛം॒യോഃ സു॒മ്നമീ᳚മഹേ ॥ 1.043.04॥
യഃ ശു॒ക്ര ഇ॑വ॒ സൂര്യോ॒ ഹിര᳚ണ്യമിവ॒ രോച॑തേ । ശ്രേഷ്ഠോ᳚ ദേ॒വാനാം॒ വസുഃ॑ ॥ 1.043.05॥
ശം നഃ॑ കര॒ത്യര്വ॑തേ സു॒ഗം മേ॒ഷായ॑ മേ॒ഷ്യേ᳚ । നൃഭ്യോ॒ നാരി॑ഭ്യോ॒ ഗവേ᳚ ॥ 1.043.06॥
അ॒സ്മേ സോ᳚മ॒ ശ്രിയ॒മധി॒ നി ധേ᳚ഹി ശ॒തസ്യ॑ നൃ॒ണാമ് । മഹി॒ ശ്രവ॑സ്തുവിനൃ॒മ്ണമ് ॥ 1.043.07॥
മാ നഃ॑ സോമപരി॒ബാധോ॒ മാരാ᳚തയോ ജുഹുരന്ത । ആ ന॑ ഇന്ദോ॒ വാജേ᳚ ഭജ ॥ 1.043.08॥
യാസ്തേ᳚ പ്ര॒ജാ അ॒മൃത॑സ്യ॒ പര॑സ്മി॒ന്ധാമ᳚ന്നൃ॒തസ്യ॑ ।
മൂ॒ര്ധാ നാഭാ᳚ സോമ വേന ആ॒ഭൂഷ᳚ന്തീഃ സോമ വേദഃ ॥ 1.043.09॥
ഇ॒മാ രു॒ദ്രായ॑ ത॒വസേ᳚ കപ॒ര്ദിനേ᳚ ക്ഷ॒യദ്വീ᳚രായ॒ പ്ര ഭ॑രാമഹേ മ॒തീഃ ।
യഥാ॒ ശമസ॑ദ്ദ്വി॒പദേ॒ ചതു॑ഷ്പദേ॒ വിശ്വം᳚ പു॒ഷ്ടം ഗ്രാമേ᳚ അ॒സ്മിന്ന॑നാതു॒രമ് ॥ 1.114.01॥
മൃ॒ളാ നോ᳚ രുദ്രോ॒ത നോ॒ മയ॑സ്കൃധി ക്ഷ॒യദ്വീ᳚രായ॒ നമ॑സാ വിധേമ തേ ।
യച്ഛം ച॒ യോശ്ച॒ മനു॑രായേ॒ജേ പി॒താ തദ॑ശ്യാമ॒ തവ॑ രുദ്ര॒ പ്രണീ᳚തിഷു ॥ 1.114.02॥
അ॒ശ്യാമ॑ തേ സുമ॒തിം ദേ᳚വയ॒ജ്യയാ᳚ ക്ഷ॒യദ്വീ᳚രസ്യ॒ തവ॑ രുദ്ര മീഢ്വഃ ।
സു॒മ്നാ॒യന്നിദ്വിശോ᳚ അ॒സ്മാക॒മാ ച॒രാരി॑ഷ്ടവീരാ ജുഹവാമ തേ ഹ॒വിഃ ॥ 1.114.03॥
ത്വേ॒ഷം വ॒യം രു॒ദ്രം യ॑ജ്ഞ॒സാധം᳚ വ॒ങ്കും ക॒വിമവ॑സേ॒ നി ഹ്വ॑യാമഹേ ।
ആ॒രേ അ॒സ്മദ്ദൈവ്യം॒ ഹേളോ᳚ അസ്യതു സുമ॒തിമിദ്വ॒യമ॒സ്യാ വൃ॑ണീമഹേ ॥ 1.114.04॥
ദി॒വോ വ॑രാ॒ഹമ॑രു॒ഷം ക॑പ॒ര്ദിനം᳚ ത്വേ॒ഷം രൂ॒പം നമ॑സാ॒ നി ഹ്വ॑യാമഹേ ।
ഹസ്തേ॒ ബിഭ്ര॑ദ്ഭേഷ॒ജാ വാര്യാ᳚ണി॒ ശര്മ॒ വര്മ॑ ച്ഛ॒ര്ദിര॒സ്മഭ്യം᳚ യംസത് ॥ 1.114.05॥
ഇ॒ദം പി॒ത്രേ മ॒രുതാ᳚മുച്യതേ॒ വചഃ॑ സ്വാ॒ദോഃ സ്വാദീ᳚യോ രു॒ദ്രായ॒ വര്ധ॑നമ് ।
രാസ്വാ᳚ ച നോ അമൃത മര്ത॒ഭോജ॑നം॒ ത്മനേ᳚ തോ॒കായ॒ തന॑യായ മൃള ॥ 1.114.06॥
മാനോ᳚ മ॒ഹാന്ത॑മു॒ത മാനോ᳚ അര്ഭ॒കം മാ ന॒ ഉക്ഷ᳚ന്തമു॒ത മാ ന॑ ഉക്ഷി॒തമ് ।
മാനോ᳚ വധീഃ പി॒തരം॒ മോത മാ॒തരം॒ മാ നഃ॑ പ്രി॒യാസ്ത॒ന്വോ᳚ രുദ്ര രീരിഷഃ ॥ 1.114.07॥
മാ ന॑സ്തോ॒കേ തന॑യേ॒ മാ ന॑ ആ॒യൗ മാ നോ॒ ഗോഷു॒ മാ നോ॒ അശ്വേ᳚ഷു രീരിഷഃ ।
വീ॒രാന്മാ നോ᳚ രുദ്ര ഭാമി॒തോ വ॑ധീര്ഹ॒വിഷ്മ᳚ന്തഃ॒ സദ॒മിത്ത്വാ᳚ ഹവാമഹേ ॥ 1.114.08॥
ഉപ॑തേ॒ സ്തോമാ᳚ന്പശു॒പാ ഇ॒വാക॑രം॒ രാസ്വാ᳚ പിതര്മരുതാം സു॒മ്നമ॒സ്മേ ।
ഭ॒ദ്രാ ഹിതേ᳚ സുമ॒തിര്മൃ॑ള॒യത്ത॒മാഥാ᳚ വ॒യമവ॒ ഇത്തേ᳚ വൃണീമഹേ ॥ 1.114.09॥
ആ॒രേ തേ᳚ ഗോ॒ഘ്നമു॒ത പൂ᳚രുഷ॒ഘ്നം ക്ഷയ॑ദ്വീര സു॒മ്നമ॒സ്മേ തേ᳚ അസ്തു ।
മൃ॒ളാ ച॑ നോ॒ അധി॑ ച ബ്രൂഹി ദേ॒വാധാ᳚ ച നഃ॒ ശര്മ॑ യച്ഛ ദ്വി॒ബര്ഹാഃ᳚ ॥ 1.114.10॥
അവോ᳚ചാമ॒ നമോ᳚ അസ്മാ അവ॒സ്യവഃ॑ ശഋ॒ണോതു॑ നോ॒ ഹവം᳚ രു॒ദ്രോ മ॒രുത്വാ᳚ന് ।
തന്നോ᳚ മി॒ത്രോ വരു॑ണോ മാമഹന്താ॒മദി॑തിഃ॒ സിന്ധുഃ॑ പൃഥി॒വീ ഉ॒ത ദ്യൗഃ ॥ 1.114.11॥
ആതേ᳚ പിതര്മരുതാം സു॒മ്നമേ᳚തു॒ മാ നഃ॒ സൂര്യ॑സ്യ സം॒ദൃശോ᳚ യുയോഥാഃ ।
അ॒ഭി നോ᳚ വീ॒രോ അര്വ॑തി ക്ഷമേത॒ പ്ര ജാ᳚യേമഹി രുദ്ര പ്ര॒ജാഭിഃ॑ ॥ 2.033.01॥
ത്വാദ॑ത്തേഭീ രുദ്ര॒ ശംത॑മേഭിഃ ശ॒തം ഹിമാ᳚ അശീയ ഭേഷ॒ജേഭിഃ॑ ।
വ്യ സ്മദ്ദ്വേഷോ᳚ വിത॒രം വ്യംഹോ॒ വ്യമീ᳚വാശ്ചാതയസ്വാ॒ വിഷൂ᳚ചീഃ ॥ 2.033.02॥
ശ്രേഷ്ഠോ᳚ ജാ॒തസ്യ॑ രുദ്ര ശ്രി॒യാസി॑ ത॒വസ്ത॑മസ്ത॒വസാം᳚ വജ്രബാഹോ ।
പര്ഷി॑ ണഃ പാ॒രമംഹ॑സഃ സ്വ॒സ്തി വിശ്വാ᳚ അ॒ഭീ᳚തീ॒ രപ॑സോ യുയോധി ॥ 2.033.03॥
മാത്വാ᳚ രുദ്ര ചുക്രുധാമാ॒ നമോ᳚ഭി॒ര്മാ ദുഷ്ടു॑തീ വൃഷഭ॒ മാ സഹൂ᳚തീ ।
ഉന്നോ᳚ വീ॒രാഁ അ॑ര്പയ ഭേഷ॒ജേഭി॑ര്ഭി॒ഷക്ത॑മം ത്വാ ഭി॒ഷജാം᳚ ശഋണോമി ॥ 2.033.04॥
ഹവീ᳚മഭി॒ര്ഹവ॑തേ॒ യോ ഹ॒വിര്ഭി॒രവ॒ സ്തോമേ᳚ഭീ രു॒ദ്രം ദി॑ഷീയ ।
ഋ॒ദൂ॒ദരഃ॑ സു॒ഹവോ॒ മാ നോ᳚ അ॒സ്യൈ ബ॒ഭ്രുഃ സു॒ശിപ്രോ᳚ രീരധന്മ॒നായൈ᳚ ॥ 2.033.05॥
ഉന്മാ᳚ മമന്ദ വൃഷ॒ഭോ മ॒രുത്വാ॒ന്ത്വക്ഷീ᳚യസാ॒ വയ॑സാ॒ നാധ॑മാനമ് ।
ഘൃണീ᳚വ ച്ഛാ॒യാമ॑ര॒പാ അ॑ശീ॒യാ വി॑വാസേയം രു॒ദ്രസ്യ॑ സു॒മ്നമ് ॥ 2.033.06॥
ക്വ സ്യ തേ᳚ രുദ്ര മൃള॒യാകു॒ര്ഹസ്തോ॒ യോ അസ്തി॑ ഭേഷ॒ജോ ജലാ᳚ഷഃ ।
അ॒പ॒ഭ॒ര്താ രപ॑സോ॒ ദൈവ്യ॑സ്യാ॒ഭീ നു മാ᳚ വൃഷഭ ചക്ഷമീഥാഃ ॥ 2.033.07॥
പ്ര ബ॒ഭ്രവേ᳚ വൃഷ॒ഭായ॑ ശ്വിതീ॒ചേ മ॒ഹോ മ॒ഹീം സു॑ഷ്ടു॒തിമീ᳚രയാമി ।
ന॒മ॒സ്യാ ക॑ല്മലീ॒കിനം॒ നമോ᳚ഭിര്ഗൃണീ॒മസി॑ ത്വേ॒ഷം രു॒ദ്രസ്യ॒ നാമ॑ ॥ 2.033.08॥
സ്ഥി॒രേഭി॒രങ്ഗൈഃ᳚ പുരു॒രൂപ॑ ഉ॒ഗ്രോ ബ॒ഭ്രുഃ ശു॒ക്രേഭിഃ॑ പിപിശേ॒ ഹിര᳚ണ്യൈഃ ।
ഈശാ᳚നാദ॒സ്യ ഭുവ॑നസ്യ॒ ഭൂരേ॒ര്ന വാ ഉ॑ യോഷദ്രു॒ദ്രാദ॑സു॒ര്യ᳚മ് ॥ 2.033.09॥
അര്ഹ᳚ന്ബിഭര്ഷി॒ സായ॑കാനി॒ ധന്വാര്ഹ᳚ന്നി॒ഷ്കം യ॑ജ॒തം വി॒ശ്വരൂ᳚പമ് ।
അര്ഹ᳚ന്നി॒ദം ദ॑യസേ॒ വിശ്വ॒മഭ്വം॒ ന വാ ഓജീ᳚യോ രുദ്ര॒ ത്വദ॑സ്തി ॥ 2.033.10॥
സ്തു॒ഹി ശ്രു॒തം ഗ॑ര്ത॒സദം॒ യുവാ᳚നം മൃ॒ഗം ന ഭീ॒മമു॑പഹ॒ത്നുമു॒ഗ്രമ് ।
മൃ॒ളാ ജ॑രി॒ത്രേ രു॑ദ്ര॒ സ്തവാ᳚നോ॒ऽന്യം തേ᳚ അ॒സ്മന്നി വ॑പന്തു॒ സേനാഃ᳚ ॥ 2.033.11॥
കു॒മാ॒രശ്ചി॑ത്പി॒തരം॒ വന്ദ॑മാനം॒ പ്രതി॑ നാനാമ രുദ്രോപ॒യന്ത᳚മ് ।
ഭൂരേ᳚ര്ദാ॒താരം॒ സത്പ॑തിം ഗൃണീഷേ സ്തു॒തസ്ത്വം ഭേ᳚ഷ॒ജാ രാ᳚സ്യ॒സ്മേ ॥ 2.033.12॥
യാവോ᳚ ഭേഷ॒ജാ മ॑രുതഃ॒ ശുചീ᳚നി॒ യാ ശംത॑മാ വൃഷണോ॒ യാ മ॑യോ॒ഭു ।
യാനി॒ മനു॒രവൃ॑ണീതാ പി॒താ ന॒സ്താ ശം ച॒ യോശ്ച॑ രു॒ദ്രസ്യ॑ വശ്മി ॥ 2.033.13॥
പരി॑ ണോ ഹേ॒തീ രു॒ദ്രസ്യ॑ വൃജ്യാഃ॒ പരി॑ ത്വേ॒ഷസ്യ॑ ദുര്മ॒തിര്മ॒ഹീ ഗാ᳚ത് ।
അവ॑ സ്ഥി॒രാ മ॒ഘവ॑ദ്ഭ്യസ്തനുഷ്വ॒ മീഢ്വ॑സ്തോ॒കായ॒ തന॑യായ മൃള ॥ 2.033.14॥
ഏ॒വാ ബ॑ഭ്രോ വൃഷഭ ചേകിതാന॒ യഥാ᳚ ദേവ॒ ന ഹൃ॑ണീ॒ഷേ ന ഹംസി॑ ।
ഹ॒വ॒ന॒ശ്രുന്നോ᳚ രുദ്രേ॒ഹ ബോ᳚ധി ബൃ॒ഹദ്വ॑ദേമ വി॒ദഥേ᳚ സു॒വീരാഃ᳚ ॥ 2.033.15॥
സോമാ᳚രുദ്രാ ധാ॒രയേ᳚ഥാമസു॒ര്യം പ്ര വാ᳚മി॒ഷ്ടയോऽര॑മശ്നുവന്തു ।
ദമേ᳚ദമേ സ॒പ്ത രത്നാ॒ ദധാ᳚നാ॒ ശം നോ᳚ ഭൂതം ദ്വി॒പദേ॒ ശം ചതു॑ഷ്പദേ ॥ 6.074.01॥
സോമാ᳚രുദ്രാ॒ വി വൃ॑ഹതം॒ വിഷൂ᳚ചീ॒മമീ᳚വാ॒ യാ നോ॒ ഗയ॑മാവി॒വേശ॑ ।
ആ॒രേ ബാ᳚ധേഥാം॒ നിരൃ॑തിം പരാ॒ചൈര॒സ്മേ ഭ॒ദ്രാ സൗ᳚ശ്രവ॒സാനി॑ സന്തു ॥ 6.074.02॥
സോമാ᳚രുദ്രാ യു॒വമേ॒താന്യ॒സ്മേ വിശ്വാ᳚ ത॒നൂഷു॑ ഭേഷ॒ജാനി॑ ധത്തമ് ।
അവ॑ സ്യതം മു॒ഞ്ചതം॒ യന്നോ॒ അസ്തി॑ ത॒നൂഷു॑ ബ॒ദ്ധം കൃ॒തമേനോ᳚ അ॒സ്മത് ॥ 6.074.03॥
തി॒ഗ്മായു॑ധൗ തി॒ഗ്മഹേ᳚തീ സു॒ശേവൗ॒ സോമാ᳚രുദ്രാവി॒ഹ സു മൃ॑ളതം നഃ ।
പ്രനോ᳚ മുഞ്ചതം॒ വരു॑ണസ്യ॒ പാശാ᳚ദ്ഗോപാ॒യതം᳚ നഃ സുമന॒സ്യമാ᳚നാ ॥ 6.074.04॥
ഇ॒മാ രു॒ദ്രായ॑ സ്ഥി॒രധ᳚ന്വനേ॒ ഗിരഃ॑ ക്ഷി॒പ്രേഷ॑വേ ദേ॒വായ॑ സ്വ॒ധാവ്നേ᳚ ।
അഷാ᳚ള്ഹായ॒ സഹ॑മാനായ വേ॒ധസേ᳚ തി॒ഗ്മായു॑ധായ ഭരതാ ശഋ॒ണോതു॑ നഃ ॥ 7.046.01॥
സ ഹി ക്ഷയേ᳚ണ॒ ക്ഷമ്യ॑സ്യ॒ ജന്മ॑നഃ॒ സാമ്രാ᳚ജ്യേന ദി॒വ്യസ്യ॒ ചേത॑തി ।
അവ॒ന്നവ᳚ന്തീ॒രുപ॑ നോ॒ ദുര॑ശ്ചരാനമീ॒വോ രു॑ദ്ര॒ ജാസു॑ നോ ഭവ ॥ 7.046.02॥
യാതേ᳚ ദി॒ദ്യുദവ॑സൃഷ്ടാ ദി॒വസ്പരി॑ ക്ഷ്മ॒യാ ചര॑തി॒ പരി॒ സാ വൃ॑ണക്തു നഃ ।
സ॒ഹസ്രം᳚ തേ സ്വപിവാത ഭേഷ॒ജാ മാ ന॑സ്തോ॒കേഷു॒ തന॑യേഷു രീരിഷഃ ॥ 7.046.03॥
മാനോ᳚ വധീ രുദ്ര॒ മാ പരാ᳚ ദാ॒ മാ തേ᳚ ഭൂമ॒ പ്രസി॑തൗ ഹീളി॒തസ്യ॑ ।
ആനോ᳚ ഭജ ബ॒ര്ഹിഷി॑ ജീവശം॒സേ യൂ॒യം പാ᳚ത സ്വ॒സ്തിഭിഃ॒ സദാ᳚ നഃ ॥ 7.046.04॥
അ॒സ്മേ രു॒ദ്രാ മേ॒ഹനാ॒ പര്വ॑താസോ വൃത്ര॒ഹത്യേ॒ ഭര॑ഹൂതൗ സ॒ജോഷാഃ᳚ ।
യഃ ശംസ॑തേ സ്തുവ॒തേ ധായി॑ പ॒ജ്ര ഇന്ദ്ര॑ജ്യേഷ്ഠാ അ॒സ്മാഁ അ॑വന്തു ദേ॒വാഃ ॥ 8.063.12॥
ത്വമ॑ഗ്നേ രു॒ദ്രോ അസു॑രോ മ॒ഹോ ദി॒വസ്ത്വം ശര്ധോ॒ മാരു॑തം പൃ॒ക്ഷ ഈ᳚ശിഷേ ।
ത്വം വാതൈ᳚രരു॒ണൈര്യാ᳚സി ശംഗ॒യസ്ത്വം പൂ॒ഷാ വി॑ധ॒തഃ പാ᳚സി॒ നു ത്മനാ᳚ ॥ 2.001.06॥
ആവോ॒ രാജാ᳚നമധ്വ॒രസ്യ॑ രു॒ദ്രം ഹോതാ᳚രം സത്യ॒യജം॒ രോദ॑സ്യോഃ ।
അ॒ഗ്നിം പു॒രാ ത॑നയി॒ത്നോര॒ചിത്താ॒ദ്ധിര᳚ണ്യരൂപ॒മവ॑സേ കൃണുധ്വമ് ॥ 4.003.01॥
തവ॑ ശ്രി॒യേ മ॒രുതോ᳚ മര്ജയന്ത॒ രുദ്ര॒ യത്തേ॒ ജനി॑മ॒ ചാരു॑ ചി॒ത്രമ് ।
പ॒ദം യദ്വിഷ്ണോ᳚രുപ॒മം നി॒ധായി॒ തേന॑ പാസി॒ ഗുഹ്യം॒ നാമ॒ ഗോനാ᳚മ് ॥ 5.003.03॥
ഭുവ॑നസ്യ പി॒തരം᳚ ഗീ॒ര്ഭിരാ॒ഭീ രു॒ദ്രം ദിവാ᳚ വ॒ര്ധയാ᳚ രു॒ദ്രമ॒ക്തൗ ।
ബൃ॒ഹന്ത॑മൃ॒ഷ്വമ॒ജരം᳚ സുഷു॒മ്നമൃധ॑ഗ്ഘുവേമ ക॒വിനേ᳚ഷി॒താസഃ॑ ॥ 6.049.10॥
തമു॑ ഷ്ടുഹി॒ യഃ സ്വി॒ഷുഃ സു॒ധന്വാ॒ യോ വിശ്വ॑സ്യ॒ ക്ഷയ॑തി ഭേഷ॒ജസ്യ॑ ।
യക്ഷ്വാ᳚ മ॒ഹേ സൗ᳚മന॒സായ॑ രു॒ദ്രം നമോ᳚ഭിര്ദേ॒വമസു॑രം ദുവസ്യ ॥ 5.042.11॥
അ॒യം മേ॒ ഹസ്തോ॒ ഭഗ॑വാന॒യം മേ॒ ഭഗ॑വത്തരഃ ।
അ॒യം മേ᳚ വി॒ശ്വഭേ᳚ഷജോ॒ऽയം ശി॒വാഭി॑മര്ശനഃ ॥ 10.060.12॥
ഓം ശാന്തിഃ॒ ശാന്തിഃ॒ ശാന്തിഃ॑ ॥
Recite with devotion and pure heart
Regular practice brings spiritual benefits