(ತೈ.ಆ.9-1-1) ಓಂ ಸ॒ಹ ನಾ॑ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ । ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ । ಓಂ ಶಾಂತಿ॒-ಶ್ಶಾಂತಿ॒-ಶ್ಶಾಂತಿಃ॑ ॥ ಭೃಗು॒ರ್ವೈ ವಾ॑ರು॒ಣಿಃ । ವರು॑ಣ॒-ಮ್ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಸ್ಮಾ॑ ಏ॒ತತ್ಪ್ರೋ॑ವಾಚ । ಅನ್ನ॑-ಮ್ಪ್ರಾ॒ಣ-ಞ್ಚಕ್ಷು॒ಶ್ಶ್ರೋತ್ರ॒-ಮ್ಮನೋ॒ ವಾಚ॒ಮಿತಿ॑ । ತಗ್ಂ ಹೋ॑ವಾಚ । ಯತೋ॒ ವಾ ಇ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಯೇನ॒ ಜಾತಾ॑ನಿ॒ ಜೀವಂ॑ತಿ । ಯತ್ಪ್ರಯಂ॑ತ್ಯ॒ಭಿಸಂ​ವಿಁ॑ಶಂತಿ । ತದ್ವಿಜಿ॑ಜ್ಞಾಸಸ್ವ । ತದ್ಬ್ರಹ್ಮೇತಿ॑ । ಸ ತಪೋ॑-ಽತಪ್ಯತ । ಸ ತಪ॑ಸ್ತ॒ಪ್ತ್ವಾ ॥ 1 ॥ ಇತಿ ಪ್ರಥಮೋ-ಽನುವಾಕಃ ॥ ಅನ್ನ॒-ಮ್ಬ್ರಹ್ಮೇತಿ॒ ವ್ಯ॑ಜಾನಾತ್ । ಅ॒ನ್ನಾದ್ಧ್ಯೇ॑ವ ಖಲ್ವಿ॒ಮಾನಿ॒ ಭುತಾ॑ನಿ॒ ಜಾಯಂ॑ತೇ । ಅನ್ನೇ॑ನ॒ ಜಾತಾ॑ನಿ॒ ಜೀವಂ॑ತಿ । ಅನ್ನ॒-ಮ್ಪ್ರಯಂ॑ತ್ಯ॒ಭಿಸಂ​ವಿಁ॑ಶಂ॒ತೀತಿ॑ । ತದ್ವಿ॒ಜ್ಞಾಯ॑ । ಪುನ॑ರೇ॒ವ ವರು॑ಣ॒-ಮ್ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑-ಽತಪ್ಯತ । ಸ ತಪ॑ಸ್ತ॒ಪ್ತ್ವಾ ॥ 1 ॥ ಇತಿ ದ್ವಿತೀಯೋ-ಽನುವಾಕಃ ॥ ಪ್ರಾ॒ಣೋ ಬ್ರ॒ಹ್ಮೇತಿ॒ ವ್ಯ॑ಜಾನಾತ್ । ಪ್ರಾ॒ಣಾದ್ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಪ್ರಾ॒ಣೇನ॒ ಜಾತಾ॑ನಿ॒ ಜೀವಂ॑ತಿ । ಪ್ರಾ॒ಣ-ಮ್ಪ್ರಯಂ॑ತ್ಯ॒ಭಿಸಂ​ವಿಁ॑ಶಂ॒ತೀತಿ॑ । ತದ್ವಿ॒ಜ್ಞಾಯ॑ । ಪುನ॑ರೇ॒ವ ವರು॑ಣ॒-ಮ್ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑-ಽತಪ್ಯತ । ಸ ತಪ॑ಸ್ತ॒ಪ್ತ್ವಾ ॥ 1 ॥ ಇತಿ ತೃತೀಯೋ-ಽನುವಾಕಃ ॥ ಮನೋ॒ ಬ್ರಹ್ಮೇತಿ॒ ವ್ಯ॑ಜಾನಾತ್ । ಮನ॑ಸೋ॒ ಹ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಮನ॑ಸಾ॒ ಜಾತಾ॑ನಿ॒ ಜೀವಂ॑ತಿ । ಮನಃ॒ ಪ್ರಯಂ॑ತ್ಯ॒ಭಿಸಂ​ವಿಁ॑ಶಂ॒ತೀತಿ॑ । ತದ್ವಿ॒ಜ್ಞಾಯ॑ । ಪುನ॑ರೇ॒ವ ವರು॑ಣ॒-ಮ್ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑-ಽತಪ್ಯತ । ಸ ತಪ॑ಸ್ತ॒ಪ್ತ್ವಾ ॥ 1 ॥ ಇತಿ ಚತುರ್ಥೋ-ಽನುವಾಕಃ ॥ ವಿ॒ಜ್ಞಾನ॒-ಮ್ಬ್ರಹ್ಮೇತಿ॒ ವ್ಯ॑ಜಾನಾತ್ । ವಿ॒ಜ್ಞಾನಾ॒ದ್ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ವಿ॒ಜ್ಞಾನೇ॑ನ॒ ಜಾತಾ॑ನಿ॒ ಜೀವಂ॑ತಿ । ವಿ॒ಜ್ಞಾನ॒-ಮ್ಪ್ರಯಂ॑ತ್ಯ॒ಭಿಸಂ​ವಿಁ॑ಶಂ॒ತೀತಿ॑ । ತದ್ವಿ॒ಜ್ಞಾಯ॑ । ಪುನ॑ರೇ॒ವ ವರು॑ಣ॒-ಮ್ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑-ಽತಪ್ಯತ । ಸ ತಪ॑ಸ್ತ॒ಪ್ತ್ವಾ ॥ 1 ॥ ಇತಿ ಪಂಚಮೋ-ಽನುವಾಕಃ ॥ ಆ॒ನಂ॒ದೋ ಬ್ರ॒ಹ್ಮೇತಿ॒ ವ್ಯ॑ಜಾನಾತ್ । ಆ॒ನಂದಾ॒ದ್ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಆ॒ನಂ॒ದೇನ॒ ಜಾತಾ॑ನಿ॒ ಜೀವಂ॑ತಿ । ಆ॒ನಂ॒ದ-ಮ್ಪ್ರಯಂ॑ತ್ಯ॒ಭಿಸಂ​ವಿಁ॑ಶಂ॒ತೀತಿ॑ । ಸೈಷಾ ಭಾ᳚ರ್ಗ॒ವೀ ವಾ॑ರು॒ಣೀ ವಿ॒ದ್ಯಾ । ಪ॒ರ॒ಮೇ ವ್ಯೋ॑ಮ॒ನ್ಪ್ರತಿ॑ಷ್ಠಿತಾ । ಸ ಯ ಏ॒ವಂ-ವೇಁದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ಕೀ॒ರ್ತ್ಯಾ ॥ 1 ॥ ಇತಿ ಷಷ್ಠೋ-ಽನುವಾಕಃ ॥ ಅನ್ನ॒-ನ್ನ ನಿಂ॑ದ್ಯಾತ್ । ತದ್ವ್ರ॒ತಂ । ಪ್ರಾ॒ಣೋ ವಾ ಅನ್ನಂ᳚ । ಶರೀ॑ರಮನ್ನಾ॒ದಂ । ಪ್ರಾ॒ಣೇ ಶರೀ॑ರ॒-ಮ್ಪ್ರತಿ॑ಷ್ಠಿತಂ । ಶರೀ॑ರೇ ಪ್ರಾ॒ಣಃ ಪ್ರತಿ॑ಷ್ಠಿತಃ । ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ । ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒-ವೇಁದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ಕೀ॒ರ್ತ್ಯಾ ॥ 1 ॥ ಇತಿ ಸಪ್ತಮೋ-ಽನುವಾಕಃ ॥ ಅನ್ನ॒-ನ್ನ ಪರಿ॑ಚಕ್ಷೀತ । ತದ್ವ್ರ॒ತಂ । ಆಪೋ॒ ವಾ ಅನ್ನಂ᳚ । ಜ್ಯೋತಿ॑ರನ್ನಾ॒ದಂ । ಅ॒ಪ್ಸು ಜ್ಯೋತಿಃ॒ ಪ್ರತಿ॑ಷ್ಠಿತಂ । ಜ್ಯೋತಿ॒ಷ್ಯಾಪಃ॒ ಪ್ರತಿ॑ಷ್ಠಿತಾಃ । ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ । ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒-ವೇಁದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮಹಾ॒ನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ಕೀ॒ರ್ತ್ಯಾ ॥ 1 ॥ ಇತ್ಯಷ್ಟಮೋ-ಽನುವಾಕಃ ॥ ಅನ್ನ॑-ಮ್ಬ॒ಹು ಕು॑ರ್ವೀತ । ತದ್ವ್ರ॒ತಂ । ಪೃ॒ಥಿ॒ವೀ ವಾ ಅನ್ನಂ᳚ । ಆ॒ಕಾ॒ಶೋ᳚-ಽನ್ನಾ॒ದಃ । ಪೃ॒ಥಿ॒ವ್ಯಾಮಾ॑ಕಾ॒ಶಃ ಪ್ರತಿ॑ಷ್ಠಿತಃ । ಆ॒ಕಾ॒ಶೇ ಪೃ॑ಥಿ॒ವೀ ಪ್ರತಿ॑ಷ್ಠಿತಾ । ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ । ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒-ವೇಁದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ಕೀ॒ರ್ತ್ಯಾ ॥ 1 ॥ ಇತಿ ನವಮೋ-ಽನುವಾಕಃ ॥ ನ ಕಂಚನ ವಸತೌ ಪ್ರತ್ಯಾ॑ಚಕ್ಷೀ॒ತ । ತದ್ವ್ರ॒ತಂ । ತಸ್ಮಾದ್ಯಯಾ ಕಯಾ ಚ ವಿಧಯಾ ಬಹ್ವ॑ನ್ನ-ಮ್ಪ್ರಾ॒ಪ್ನುಯಾತ್ । ಅರಾಧ್ಯಸ್ಮಾ ಅನ್ನಮಿ॑ತ್ಯಾಚ॒ಕ್ಷತೇ । ಏತದ್ವೈ ಮುಖತೋ᳚-ಽನ್ನಗ್ಂ ರಾ॒ದ್ಧಂ । ಮುಖತೋ-ಽಸ್ಮಾ ಅ॑ನ್ನಗ್ಂ ರಾ॒ಧ್ಯತೇ । ಏತದ್ವೈ ಮಧ್ಯತೋ᳚-ಽನ್ನಗ್ಂ ರಾ॒ದ್ಧಂ । ಮಧ್ಯತೋ-ಽಸ್ಮಾ ಅ॑ನ್ನಗ್ಂ ರಾ॒ಧ್ಯತೇ । ಏತದ್ವಾ ಅಂತತೋ᳚-ಽನ್ನಗ್ಂ ರಾ॒ದ್ಧಂ । ಅಂತತೋ-ಽಸ್ಮಾ ಅ॑ನ್ನಗ್ಂ ರಾ॒ಧ್ಯತೇ ॥ 1 ॥ ಯ ಏ॑ವಂ-ವೇಁ॒ದ । ಕ್ಷೇಮ ಇ॑ತಿ ವಾ॒ಚಿ । ಯೋಗಕ್ಷೇಮ ಇತಿ ಪ್ರಾ॑ಣಾಪಾ॒ನಯೋಃ । ಕರ್ಮೇ॑ತಿ ಹ॒ಸ್ತಯೋಃ । ಗತಿರಿ॑ತಿ ಪಾ॒ದಯೋಃ । ವಿಮುಕ್ತಿರಿ॑ತಿ ಪಾ॒ಯೌ । ಇತಿ ಮಾನುಷೀ᳚ಸ್ಸಮಾ॒ಜ್ಞಾಃ । ಅಥ ದೈ॒ವೀಃ । ತೃಪ್ತಿರಿ॑ತಿ ವೃ॒ಷ್ಟೌ । ಬಲಮಿ॑ತಿ ವಿ॒ದ್ಯುತಿ ॥ 2 ॥ ಯಶ ಇ॑ತಿ ಪ॒ಶುಷು । ಜ್ಯೋತಿರಿತಿ ನ॑ಕ್ಷತ್ರೇ॒ಷು । ಪ್ರಜಾತಿರಮೃತಮಾನಂದ ಇ॑ತ್ಯುಪ॒ಸ್ಥೇ । ಸರ್ವಮಿ॑ತ್ಯಾಕಾ॒ಶೇ । ತತ್ಪ್ರತಿಷ್ಠೇತ್ಯು॑ಪಾಸೀ॒ತ । ಪ್ರತಿಷ್ಠಾ॑ವಾನ್ಭ॒ವತಿ । ತನ್ಮಹ ಇತ್ಯು॑ಪಾಸೀ॒ತ । ಮ॑ಹಾನ್ಭ॒ವತಿ । ತನ್ಮನ ಇತ್ಯು॑ಪಾಸೀ॒ತ । ಮಾನ॑ವಾನ್ಭ॒ವತಿ ॥ 3 ॥ ತನ್ನಮ ಇತ್ಯು॑ಪಾಸೀ॒ತ । ನಮ್ಯಂತೇ᳚-ಽಸ್ಮೈ ಕಾ॒ಮಾಃ । ತದ್ಬ್ರಹ್ಮೇತ್ಯು॑ಪಾಸೀ॒ತ । ಬ್ರಹ್ಮ॑ವಾನ್ಭ॒ವತಿ । ತದ್ಬ್ರಹ್ಮಣಃ ಪರಿಮರ ಇತ್ಯು॑ಪಾಸೀ॒ತ । ಪರ್ಯೇಣ-ಮ್ಮ್ರಿಯಂತೇ ದ್ವಿಷಂತ॑ಸ್ಸಪ॒ತ್ನಾಃ । ಪರಿ ಯೇ᳚-ಽಪ್ರಿಯಾ᳚ ಭ್ರಾತೃ॒ವ್ಯಾಃ । ಸ ಯಶ್ಚಾ॑ಯ-ಮ್ಪು॒ರುಷೇ । ಯಶ್ಚಾಸಾ॑ವಾದಿ॒ತ್ಯೇ । ಸ ಏಕಃ॑ ॥ 4 ॥ ಸ ಯ॑ ಏವಂ॒-ವಿಁತ್ । ಅಸ್ಮಾಂ​ಲ್ಲೋಁ॑ಕಾತ್ಪ್ರೇ॒ತ್ಯ । ಏತಮನ್ನಮಯ-ಮಾತ್ಮಾನಮುಪ॑ಸಂಕ್ರ॒ಮ್ಯ । ಏತ-ಮ್ಪ್ರಾಣಮಯ-ಮಾತ್ಮಾನಮುಪ॑ಸಂಕ್ರ॒ಮ್ಯ । ಏತ-ಮ್ಮನೋಮಯ-ಮಾತ್ಮಾನಮುಪ॑ಸಂಕ್ರ॒ಮ್ಯ । ಏತಂ-ವಿಁಜ್ಞಾನಮಯ-ಮಾತ್ಮಾನಮುಪ॑ಸಂಕ್ರ॒ಮ್ಯ । ಏತಮಾನಂದಮಯ-ಮಾತ್ಮಾನಮುಪ॑ಸಂಕ್ರ॒ಮ್ಯ । ಇಮಾಂ​ಲ್ಲೋಁಕಾನ್ಕಾಮಾನ್ನೀ -ಕಾಮರೂಪ್ಯ॑ನು-ಸಂ॒ಚರನ್ನ್ । ಏತಥ್ಸಾಮ ಗಾ॑ಯನ್ನಾ॒ಸ್ತೇ । ಹಾ(3) ವು॒ ಹಾ(3) ವು॒ ಹಾ(3) ವು॑ ॥ 5 ॥ ಅ॒ಹಮನ್ನ-ಮ॒ಹಮನ್ನ-ಮ॒ಹಮನ್ನಂ । ಅ॒ಹಮನ್ನಾ॒ದೋ(3)-ಽ॒ಹಮನ್ನಾ॒ದೋ(3)-ಽ॒ಹಮನ್ನಾ॒ದಃ । ಅ॒ಹಗ್ಗ್ ಶ್ಲೋಕ॒ಕೃದ॒ಹಗ್ಗ್ ಶ್ಲೋಕ॒ಕೃದ॒ಹಗ್ಗ್ ಶ್ಲೋಕ॒ಕೃತ್ । ಅ॒ಹಮಸ್ಮಿ ಪ್ರಥಮಜಾ ಋತಾ(3) ಸ್ಯ॒ । ಪೂರ್ವ-ನ್ದೇವೇಭ್ಯೋ ಅಮೃತಸ್ಯ ನಾ(3) ಭಾ॒ಯಿ॒ । ಯೋ ಮಾ ದದಾತಿ ಸ ಇದೇವ ಮಾ(3) ವಾಃ॒ । ಅ॒ಹಮನ್ನ॒-ಮನ್ನ॑-ಮ॒ದಂತ॒ಮಾ(3) ದ್ಮಿ॒ । ಅಹಂ॒-ವಿಁಶ್ವ॒-ಮ್ಭುವ॑ನ॒-ಮಭ್ಯ॑ಭ॒ವಾಂ । ಸುವ॒ರ್ನ ಜ್ಯೋತೀಃ᳚ । ಯ ಏ॒ವಂ-ವೇಁದ॑ । ಇತ್ಯು॑ಪ॒ನಿಷ॑ತ್ ॥ 6 ॥ ಇತಿ ದಶಮೋ-ಽನುವಾಕಃ ॥ ಓಂ ಸ॒ಹ ನಾ॑ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ । ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ । ಓಂ ಶಾಂತಿ॒-ಶ್ಶಾಂತಿ॒-ಶ್ಶಾಂತಿಃ॑ ॥ ॥ ಹರಿಃ॑ ಓಂ ॥ ॥ ಶ್ರೀ ಕೃಷ್ಣಾರ್ಪಣಮಸ್ತು ॥