(ತೈ. ಆ. 8-1-1) ಓಂ ಸ॒ಹ ನಾ॑ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ । ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ । ಓಂ ಶಾಂತಿ॒-ಶ್ಶಾಂತಿ॒-ಶ್ಶಾಂತಿಃ॑ ॥ ಬ್ರ॒ಹ್ಮ॒ವಿದಾ᳚ಪ್ನೋತಿ॒ ಪರಂ᳚ । ತದೇ॒ಷಾ-ಽಭ್ಯು॑ಕ್ತಾ । ಸ॒ತ್ಯ-ಞ್ಜ್ಞಾ॒ನಮ॑ನಂ॒ತ-ಮ್ಬ್ರಹ್ಮ॑ । ಯೋ ವೇದ॒ ನಿಹಿ॑ತ॒-ಙ್ಗುಹಾ॑ಯಾ-ಮ್ಪರ॒ಮೇ ವ್ಯೋ॑ಮನ್ನ್ । ಸೋ᳚-ಽಶ್ನು॒ತೇ ಸರ್ವಾ॒ನ್ಕಾಮಾ᳚ನ್​ಥ್ಸ॒ಹ । ಬ್ರಹ್ಮ॑ಣಾ ವಿಪ॒ಶ್ಚಿತೇತಿ॑ ॥ ತಸ್ಮಾ॒ದ್ವಾ ಏ॒ತಸ್ಮಾ॑ದಾ॒ತ್ಮನ॑ ಆಕಾ॒ಶಸ್ಸಂಭೂ॑ತಃ । ಆ॒ಕಾ॒ಶಾದ್ವಾ॒ಯುಃ । ವಾ॒ಯೋರ॒ಗ್ನಿಃ । ಅ॒ಗ್ನೇರಾಪಃ॑ । ಅ॒ದ್ಭ್ಯಃ ಪೃ॑ಥಿ॒ವೀ । ಪೃ॒ಥಿ॒ವ್ಯಾ ಓಷ॑ಧಯಃ । ಓಷ॑ಧೀ॒ಭ್ಯೋ-ಽನ್ನಂ᳚ । ಅನ್ನಾ॒ತ್ಪುರು॑ಷಃ । ಸ ವಾ ಏಷ ಪುರುಷೋ-ಽನ್ನ॑ರಸ॒ಮಯಃ । ತಸ್ಯೇದ॑ಮೇವ॒ ಶಿರಃ । ಅಯ-ನ್ದಕ್ಷಿ॑ಣಃ ಪ॒ಕ್ಷಃ । ಅಯಮುತ್ತ॑ರಃ ಪ॒ಕ್ಷಃ । ಅಯಮಾತ್ಮಾ᳚ । ಇದ-ಮ್ಪುಚ್ಛ॑-ಮ್ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥ ಇತಿ ಪ್ರಥಮೋ-ಽನುವಾಕಃ ॥ ಅನ್ನಾ॒ದ್ವೈ ಪ್ರ॒ಜಾಃ ಪ್ರ॒ಜಾಯಂ॑ತೇ । ಯಾಃ ಕಾಶ್ಚ॑ ಪೃಥಿ॒ವೀಗ್ ಶ್ರಿ॒ತಾಃ । ಅಥೋ॒ ಅನ್ನೇ॑ನೈ॒ವ ಜೀ॑ವಂತಿ । ಅಥೈ॑ನ॒ದಪಿ॑ ಯಂತ್ಯಂತ॒ತಃ । ಅನ್ನ॒ಗ್ಂ॒ ಹಿ ಭೂ॒ತಾನಾ॒-ಞ್ಜ್ಯೇಷ್ಠಂ᳚ । ತಸ್ಮಾ᳚ಥ್ಸರ್ವೌಷ॒ಧಮು॑ಚ್ಯತೇ । ಸರ್ವಂ॒-ವೈಁ ತೇ-ಽನ್ನ॑ಮಾಪ್ನುವಂತಿ । ಯೇ-ಽನ್ನ॒-ಮ್ಬ್ರಹ್ಮೋ॒ಪಾಸ॑ತೇ । ಅನ್ನ॒ಗ್ಂ॒ ಹಿ ಭೂ॒ತಾನಾ॒-ಞ್ಜ್ಯೇಷ್ಠಂ᳚ । ತಸ್ಮಾ᳚ಥ್ಸರ್ವೌಷ॒ಧಮು॑ಚ್ಯತೇ । ಅನ್ನಾ᳚ದ್ಭೂ॒ತಾನಿ॒ ಜಾಯಂ॑ತೇ । ಜಾತಾ॒ನ್ಯನ್ನೇ॑ನ ವರ್ಧಂತೇ । ಅದ್ಯತೇ-ಽತ್ತಿ ಚ॑ ಭೂತಾ॒ನಿ । ತಸ್ಮಾದನ್ನ-ನ್ತದುಚ್ಯ॑ತ ಇ॒ತಿ । ತಸ್ಮಾದ್ವಾ ಏತಸ್ಮಾದನ್ನ॑ರಸ॒ಮಯಾತ್ । ಅನ್ಯೋ-ಽನ್ತರ ಆತ್ಮಾ᳚ ಪ್ರಾಣ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಂ । ಅನ್ವಯ॑-ಮ್ಪುರುಷ॒ವಿಧಃ । ತಸ್ಯ ಪ್ರಾಣ॑ ಏವ॒ ಶಿರಃ । ವ್ಯಾನೋ ದಕ್ಷಿ॑ಣಃ ಪ॒ಕ್ಷಃ । ಅಪಾನ ಉತ್ತ॑ರಃ ಪ॒ಕ್ಷಃ । ಆಕಾ॑ಶ ಆ॒ತ್ಮಾ । ಪೃಥಿವೀ ಪುಚ್ಛ॑-ಮ್ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥ ಇತಿ ದ್ವಿತೀಯೋ-ಽನುವಾಕಃ ॥ ಪ್ರಾ॒ಣ-ನ್ದೇ॒ವಾ ಅನು॒ಪ್ರಾಣಂ॑ತಿ । ಮ॒ನು॒ಷ್ಯಾಃ᳚ ಪ॒ಶವ॑ಶ್ಚ॒ ಯೇ । ಪ್ರಾ॒ಣೋ ಹಿ ಭೂ॒ತಾನಾ॒ಮಾಯುಃ॑ । ತಸ್ಮಾ᳚ಥ್ಸರ್ವಾಯು॒ಷಮು॑ಚ್ಯತೇ । ಸರ್ವ॑ಮೇ॒ವ ತ॒ ಆಯು॑ರ್ಯಂತಿ । ಯೇ ಪ್ರಾ॒ಣ-ಮ್ಬ್ರಹ್ಮೋ॒ಪಾಸ॑ತೇ । ಪ್ರಾಣೋ ಹಿ ಭೂತಾ॑ನಾಮಾ॒ಯುಃ । ತಸ್ಮಾಥ್ಸರ್ವಾಯುಷಮುಚ್ಯ॑ತ ಇ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ತಸ್ಮಾದ್ವಾ ಏತಸ್ಮಾ᳚ತ್ಪ್ರಾಣ॒ಮಯಾತ್ । ಅನ್ಯೋ-ಽನ್ತರ ಆತ್ಮಾ॑ ಮನೋ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಂ । ಅನ್ವಯ॑-ಮ್ಪುರುಷ॒ವಿಧಃ । ತಸ್ಯ ಯಜು॑ರೇವ॒ ಶಿರಃ । ಋಗ್ದಕ್ಷಿ॑ಣಃ ಪ॒ಕ್ಷಃ । ಸಾಮೋತ್ತ॑ರಃ ಪ॒ಕ್ಷಃ । ಆದೇ॑ಶ ಆ॒ತ್ಮಾ । ಅಥರ್ವಾಂಗಿರಸಃ ಪುಚ್ಛ॑-ಮ್ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥ ಇತಿ ತೃತೀಯೋ-ಽನುವಾಕಃ ॥ ಯತೋ॒ ವಾಚೋ॒ ನಿವ॑ರ್ತಂತೇ । ಅಪ್ರಾ᳚ಪ್ಯ॒ ಮನ॑ಸಾ ಸ॒ಹ । ಆನಂದ-ಮ್ಬ್ರಹ್ಮ॑ಣೋ ವಿ॒ದ್ವಾನ್ । ನ ಬಿಭೇತಿ ಕದಾ॑ಚನೇ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ತಸ್ಮಾದ್ವಾ ಏತಸ್ಮಾ᳚ನ್ಮನೋ॒ಮಯಾತ್ । ಅನ್ಯೋ-ಽನ್ತರ ಆತ್ಮಾ ವಿ॑ಜ್ಞಾನ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಂ । ಅನ್ವಯ॑-ಮ್ಪುರುಷ॒ವಿಧಃ । ತಸ್ಯ ಶ್ರ॑ದ್ಧೈವ॒ ಶಿರಃ । ಋತ-ನ್ದಕ್ಷಿ॑ಣಃ ಪ॒ಕ್ಷಃ । ಸತ್ಯಮುತ್ತ॑ರಃ ಪ॒ಕ್ಷಃ । ಯೋ॑ಗ ಆ॒ತ್ಮಾ । ಮಹಃ ಪುಚ್ಛ॑-ಮ್ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥ ಇತಿ ಚತುರ್ಥೋ-ಽನುವಾಕಃ ॥ ವಿ॒ಜ್ಞಾನಂ॑-ಯಁ॒ಜ್ಞ-ನ್ತ॑ನುತೇ । ಕರ್ಮಾ॑ಣಿ ತನು॒ತೇ-ಽಪಿ॑ ಚ । ವಿ॒ಜ್ಞಾನ॑-ನ್ದೇ॒ವಾಸ್ಸರ್ವೇ᳚ । ಬ್ರಹ್ಮ॒ ಜ್ಯೇಷ್ಠ॒ಮುಪಾ॑ಸತೇ । ವಿ॒ಜ್ಞಾನ॒-ಮ್ಬ್ರಹ್ಮ॒ ಚೇದ್ವೇದ॑ । ತಸ್ಮಾ॒ಚ್ಚೇನ್ನ ಪ್ರ॒ಮಾದ್ಯ॑ತಿ । ಶ॒ರೀರೇ॑ ಪಾಪ್ಮ॑ನೋ ಹಿ॒ತ್ವಾ । ಸರ್ವಾನ್ಕಾಮಾನ್​ಥ್ಸಮಶ್ನು॑ತ ಇ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ತಸ್ಮಾದ್ವಾ ಏತಸ್ಮಾದ್ವಿ॑ಜ್ಞಾನ॒ಮಯಾತ್ । ಅನ್ಯೋ-ಽನ್ತರ ಆತ್ಮಾ॑-ಽಽನಂದ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಂ । ಅನ್ವಯ॑-ಮ್ಪುರುಷ॒ವಿಧಃ । ತಸ್ಯ ಪ್ರಿಯ॑ಮೇವ॒ ಶಿರಃ । ಮೋದೋ ದಕ್ಷಿ॑ಣಃ ಪ॒ಕ್ಷಃ । ಪ್ರಮೋದ ಉತ್ತ॑ರಃ ಪ॒ಕ್ಷಃ । ಆನಂ॑ದ ಆ॒ತ್ಮಾ । ಬ್ರಹ್ಮ ಪುಚ್ಛ॑-ಮ್ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥ ಇತಿ ಪಂಚಮೋ-ಽನುವಾಕಃ ॥ ಅಸ॑ನ್ನೇ॒ವ ಸ॑ ಭವತಿ । ಅಸ॒ದ್ಬ್ರಹ್ಮೇತಿ॒ ವೇದ॒ ಚೇತ್ । ಅಸ್ತಿ ಬ್ರಹ್ಮೇತಿ॑ ಚೇದ್ವೇ॒ದ । ಸಂತಮೇನ-ನ್ತತೋ ವಿ॑ದುರಿ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ಅಥಾತೋ॑-ಽನುಪ್ರ॒ಶ್ನಾಃ । ಉ॒ತಾವಿ॒ದ್ವಾನ॒ಮುಂ-ಲೋಁ॒ಕ-ಮ್ಪ್ರೇತ್ಯ॑ । ಕಶ್ಚ॒ನ ಗ॑ಚ್ಛ॒ತೀ(3) । ಆಹೋ॑ ವಿ॒ದ್ವಾನ॒ಮುಂ-ಲೋಁ॒ಕ-ಮ್ಪ್ರೇತ್ಯ॑ । ಕಶ್ಚಿ॒ಥ್ಸಮ॑ಶ್ನು॒ತಾ(3) ಉ॒ । ಸೋ॑-ಽಕಾಮಯತ । ಬ॒ಹುಸ್ಯಾ॒-ಮ್ಪ್ರಜಾ॑ಯೇ॒ಯೇತಿ॑ । ಸ ತಪೋ॑-ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ಇ॒ದಗ್ಂ ಸರ್ವ॑ಮಸೃಜತ । ಯದಿ॒ದ-ಙ್ಕಿಂಚ॑ । ತಥ್ಸೃ॒ಷ್ಟ್ವಾ । ತದೇ॒ವಾನು॒ಪ್ರಾವಿ॑ಶತ್ । ತದ॑ನು ಪ್ರ॒ವಿಶ್ಯ॑ । ಸಚ್ಚ॒ ತ್ಯಚ್ಚಾ॑ಭವತ್ । ನಿ॒ರುಕ್ತ॒-ಞ್ಚಾನಿ॑ರುಕ್ತ-ಞ್ಚ । ನಿ॒ಲಯ॑ನ॒-ಞ್ಚಾನಿ॑ಲಯನ-ಞ್ಚ । ವಿ॒ಜ್ಞಾನ॒-ಞ್ಚಾವಿ॑ಜ್ಞಾನ-ಞ್ಚ । ಸತ್ಯ-ಞ್ಚಾನೃತ-ಞ್ಚ ಸ॑ತ್ಯಮ॒ಭವತ್ । ಯದಿ॑ದ-ಙ್ಕಿಂ॒ಚ । ತತ್ಸತ್ಯಮಿ॑ತ್ಯಾಚ॒ಕ್ಷತೇ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥ ಇತಿ ಷಷ್ಠೋ-ಽನುವಾಕಃ ॥ ಅಸ॒ದ್ವಾ ಇ॒ದಮಗ್ರ॑ ಆಸೀತ್ । ತತೋ॒ ವೈ ಸದ॑ಜಾಯತ । ತದಾತ್ಮಾನಗ್ಗ್ ಸ್ವಯ॑ಮಕು॒ರುತ । ತಸ್ಮಾತ್ತಥ್ಸುಕೃತಮುಚ್ಯ॑ತ ಇ॒ತಿ । ಯದ್ವೈ॑ ತಥ್ಸು॒ಕೃತಂ । ರ॑ಸೋ ವೈ॒ ಸಃ । ರಸಗ್ಗ್ ಹ್ಯೇವಾಯಂ-ಲಁಬ್ಧ್ವಾ-ಽಽನಂ॑ದೀ ಭ॒ವತಿ । ಕೋ ಹ್ಯೇವಾನ್ಯಾ᳚ತ್ಕಃ ಪ್ರಾ॒ಣ್ಯಾತ್ । ಯದೇಷ ಆಕಾಶ ಆನಂ॑ದೋ ನ॒ ಸ್ಯಾತ್ । ಏಷ ಹ್ಯೇವಾ-ಽಽನಂ॑ದಯಾ॒ತಿ । ಯ॒ದಾ ಹ್ಯೇ॑ವೈಷ॒ ಏತಸ್ಮಿನ್ನದೃಶ್ಯೇ-ಽನಾತ್ಮ್ಯೇ-ಽನಿರುಕ್ತೇ-ಽನಿಲಯನೇ-ಽಭಯಂ ಪ್ರತಿ॑ಷ್ಠಾಂ-ವಿಁಂ॒ದತೇ । ಅಥ ಸೋ-ಽಭಯ-ಙ್ಗ॑ತೋ ಭ॒ವತಿ । ಯ॒ದಾ ಹ್ಯೇ॑ವೈಷ॒ ಏತಸ್ಮಿನ್ನುದರಮಂತ॑ರ-ಙ್ಕು॒ರುತೇ । ಅಥ ತಸ್ಯ ಭ॑ಯ-ಮ್ಭ॒ವತಿ । ತತ್ತ್ವೇವ ಭಯಂ-ವಿಁದುಷೋ-ಽಮ॑ನ್ವಾನ॒ಸ್ಯ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥ ಇತಿ ಸಪ್ತಮೋ-ಽನುವಾಕಃ ॥ ಭೀ॒ಷಾ-ಽಸ್ಮಾ॒ದ್ವಾತಃ॑ ಪವತೇ । ಭೀ॒ಷೋದೇ॑ತಿ॒ ಸೂರ್ಯಃ॑ । ಭೀಷಾ-ಽಸ್ಮಾದಗ್ನಿ॑ಶ್ಚೇಂದ್ರ॒ಶ್ಚ । ಮೃತ್ಯುರ್ಧಾವತಿ ಪಂಚ॑ಮ ಇ॒ತಿ । ಸೈಷಾ-ಽಽನಂದಸ್ಯ ಮೀಮಾಗ್ಂ॑ಸಾ ಭ॒ವತಿ । ಯುವಾ ಸ್ಯಾಥ್ಸಾಧುಯು॑ವಾ-ಽಧ್ಯಾ॒ಯಕಃ । ಆಶಿಷ್ಠೋ ದೃಢಿಷ್ಠೋ॑ ಬಲಿ॒ಷ್ಠಃ । ತಸ್ಯೇಯ-ಮ್ಪೃಥಿವೀ ಸರ್ವಾ ವಿತ್ತಸ್ಯ॑ ಪೂರ್ಣಾ॒ ಸ್ಯಾತ್ । ಸ ಏಕೋ ಮಾನುಷ॑ ಆನಂ॒ದಃ । ತೇ ಯೇ ಶತ-ಮ್ಮಾನುಷಾ॑ ಆನಂ॒ದಾಃ ॥ 1 ॥ ಸ ಏಕೋ ಮನುಷ್ಯಗಂಧರ್ವಾಣಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತ-ಮ್ಮನುಷ್ಯಗಂಧರ್ವಾಣಾ॑ಮಾನಂ॒ದಾಃ । ಸ ಏಕೋ ದೇವಗಂಧರ್ವಾಣಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತ-ನ್ದೇವಗಂಧರ್ವಾಣಾ॑ಮಾನಂ॒ದಾಃ । ಸ ಏಕಃ ಪಿತೃಣಾ-ಞ್ಚಿರಲೋಕಲೋಕಾನಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತ-ಮ್ಪಿತೃಣಾ-ಞ್ಚಿರಲೋಕಲೋಕಾನಾ॑ಮಾನಂ॒ದಾಃ । ಸ ಏಕ ಆಜಾನಜಾನಾ-ನ್ದೇವಾನಾ॑ಮಾನಂ॒ದಃ ॥ 2 ॥ ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಮಾಜಾನಜಾನಾ-ನ್ದೇವಾನಾ॑ಮಾನಂ॒ದಾಃ । ಸ ಏಕಃ ಕರ್ಮದೇವಾನಾ-ನ್ದೇವಾನಾ॑ಮಾನಂ॒ದಃ । ಯೇ ಕರ್ಮಣಾ ದೇವಾನ॑ಪಿಯಂ॒ತಿ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತ-ಙ್ಕರ್ಮದೇವಾನಾ-ನ್ದೇವಾನಾ॑ಮಾನಂ॒ದಾಃ । ಸ ಏಕೋ ದೇವಾನಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತ-ನ್ದೇವಾನಾ॑ಮಾನಂ॒ದಾಃ । ಸ ಏಕ ಇಂದ್ರ॑ಸ್ಯಾ-ಽಽನಂ॒ದಃ ॥ 3 ॥ ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಮಿಂದ್ರ॑ಸ್ಯಾ-ಽಽನಂ॒ದಾಃ । ಸ ಏಕೋ ಬೃಹಸ್ಪತೇ॑ರಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತ-ಮ್ಬೃಹಸ್ಪತೇ॑ರಾನಂ॒ದಾಃ । ಸ ಏಕಃ ಪ್ರಜಾಪತೇ॑ರಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತ-ಮ್ಪ್ರಜಾಪತೇ॑ರಾನಂ॒ದಾಃ । ಸ ಏಕೋ ಬ್ರಹ್ಮಣ॑ ಆನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥ 4 ॥ ಸ ಯಶ್ಚಾ॑ಯ-ಮ್ಪು॒ರುಷೇ । ಯಶ್ಚಾಸಾ॑ವಾದಿ॒ತ್ಯೇ । ಸ ಏಕಃ॑ । ಸ ಯ॑ ಏವಂ॒​ವಿಁತ್ । ಅಸ್ಮಾಲ್ಲೋ॑ಕಾತ್ಪ್ರೇ॒ತ್ಯ । ಏತಮನ್ನಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ಏತ-ಮ್ಪ್ರಾಣಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ಏತ-ಮ್ಮನೋಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ಏತಂ-ವಿಁಜ್ಞಾನಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ಏತಮಾನಂದಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 5 ॥ ಇತ್ಯಷ್ಟಮೋ-ಽನುವಾಕಃ ॥ ಯತೋ॒ ವಾಚೋ॒ ನಿವ॑ರ್ತಂತೇ । ಅಪ್ರಾ᳚ಪ್ಯ॒ ಮನ॑ಸಾ ಸ॒ಹ । ಆನಂದ-ಮ್ಬ್ರಹ್ಮ॑ಣೋ ವಿ॒ದ್ವಾನ್ । ನ ಬಿಭೇತಿ ಕುತ॑ಶ್ಚನೇ॒ತಿ । ಏತಗ್ಂ ಹ ವಾವ॑ ನ ತ॒ಪತಿ । ಕಿಮಹಗ್ಂ ಸಾಧು॑ ನಾಕ॒ರವಂ । ಕಿಮಹ-ಮ್ಪಾಪಮಕರ॑ವಮಿ॒ತಿ । ಸ ಯ ಏವಂ-ವಿಁದ್ವಾನೇತೇ ಆತ್ಮಾ॑ನಗ್ಗ್ ಸ್ಪೃ॒ಣುತೇ । ಉ॒ಭೇ ಹ್ಯೇ॑ವೈಷ॒ ಏತೇ ಆತ್ಮಾ॑ನಗ್ಗ್ ಸ್ಪೃ॒ಣುತೇ । ಯ ಏ॒ವಂ-ವೇಁದ॑ । ಇತ್ಯು॑ಪ॒ನಿಷ॑ತ್ ॥ 1 ॥ ಇತಿ ನವಮೋ-ಽನುವಾಕಃ ॥ ಓಂ ಸ॒ಹ ನಾ॑ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ । ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ । ಓಂ ಶಾಂತಿ॒-ಶ್ಶಾಂತಿ॒-ಶ್ಶಾಂತಿಃ॑ ॥ ॥ ಹರಿಃ॑ ಓಂ ॥ ॥ ಶ್ರೀ ಕೃಷ್ಣಾರ್ಪಣಮಸ್ತು ॥