കേന ഉപനിഷദ് - തൃതീയഃ ഖണ്ഡഃ

ബ്രഹ്മ ഹ ദേവേഭ്യോ വിജിഗ്യേ തസ്യ ഹ ബ്രഹ്മണോ വിജയേ ദേവാ അമഹീയന്ത ॥ 1॥

ത ഐക്ഷന്താസ്മാകമേവായം-വിഁജയോഽസ്മാകമേവായം മഹിമേതി । തദ്ധൈഷാം-വിഁജജ്ഞൗ തേഭ്യോ ഹ പ്രാദുർബഭൂവ തന്ന വ്യജാനത കിമിദം-യഁക്ഷമിതി ॥ 2॥

തേഽഗ്നിമബ്രുവഞ്ജാതവേദ ഏതദ്വിജാനീഹി കിമിദം-യഁക്ഷമിതി തഥേതി ॥ 3॥

തദഭ്യദ്രവത്തമഭ്യവദത്കോഽസീത്യഗ്നിർവാ അഹമസ്മീത്യബ്രവീജ്ജാതവേദാ വാ അഹമസ്മീതി ॥ 4॥

തസ്മിൻസ്ത്വയി കിം-വീഁര്യമിത്യപീദꣳ സർവം ദഹേയം-യഁദിദം പൃഥിവ്യാമിതി ॥ 5॥

തസ്മൈ തൃണം നിദധാവേതദ്ദഹേതി । തദുപപ്രേയായ സർവജവേന തന്ന ശശാക ദഗ്ധും സ തത ഏവ നിവവൃതേ നൈതദശകം-വിഁജ്ഞാതും-യഁദേതദ്യക്ഷമിതി ॥ 6॥

അഥ വായുമബ്രുവന്വായവേതദ്വിജാനീഹി കിമേതദ്യക്ഷമിതി തഥേതി ॥ 7॥

തദഭ്യദ്രവത്തമഭ്യവദത്കോഽസീതി വായുർവാ അഹമസ്മീത്യബ്രവീന്മാതരിശ്വാ വാ അഹമസ്മീതി ॥ 8॥

തസ്മിൻസ്ത്വയി കിം-വീഁര്യമിത്യപീദം സർവമാദദീയ യദിദം പൃഥിവ്യാമിതി ॥ 9॥

തസ്മൈ തൃണം നിദധാവേതദാദത്സ്വേതി തദുപപ്രേയായ സർവജവേന തന്ന ശശാകാദാതും സ തത ഏവ നിവവൃതേ നൈതദശകം-വിഁജ്ഞാതും-യഁദേതദ്യക്ഷമിതി ॥ 10॥

അഥേന്ദ്രമബ്രുവന്മഘവന്നേതദ്വിജാനീഹി കിമേതദ്യക്ഷമിതി തഥേതി തദഭ്യദ്രവത്തസ്മാത്തിരോദധേ ॥ 11॥

സ തസ്മിന്നേവാകാശേ സ്ത്രിയമാജഗാമ ബഹുശോഭമാനാമുമാം ഹൈമവതീം താഗ്ംഹോവാച കിമേതദ്യക്ഷമിതി ॥ 12॥

॥ ഇതി കേനോപനിഷദി തൃതീയഃ ഖണ്ഡഃ ॥

Recite with devotion and pure heart

Regular practice brings spiritual benefits