॥ అథ కేనోపనిషత్ ॥ ఓం స॒హ నా॑వవతు । స॒హ నౌ॑ భునక్తు । స॒హ వీ॒ర్యం॑ కరవావహై । తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ । ఓం శాంతిః॒ శాంతిః॒ శాంతిః॑ ॥ ఓం ఆప్యాయంతు మమాంగాని వాక్ప్రాణశ్చక్షుః శ్రోత్రమథో బలమింద్రియాణి చ సర్వాణి । సర్వం బ్రహ్మౌపనిషదం మాఽహం బ్రహ్మ నిరాకుర్యాం మా మా బ్రహ్మ నిరాకరోదనిరాకరణమస్త్వనిరాకరణం మేఽస్తు । తదాత్మని నిరతే య ఉపనిషత్సు ధర్మాస్తే మయి సంతు తే మయి సంతు । ఓం శాంతిః॒ శాంతిః॒ శాంతిః॑ ॥ కేనేషితం పతతి ప్రేషితం మనః కేన ప్రాణః ప్రథమః ప్రైతి యుక్తః । కేనేషితాం-వాఀచమిమాం-వఀదంతి చక్షుః శ్రోత్రం క ఉ దేవో యునక్తి ॥ 1 ॥ శ్రోత్రస్య శ్రోత్రం మనసో మనో యద్ వాచో హ వాచం స ఉ ప్రాణస్య ప్రాణః । చక్షుషశ్చక్షురతిముచ్య ధీరాః ప్రేత్యాస్మాల్లోకాదమృతా భవంతి ॥ 2 ॥ న తత్ర చక్షుర్గచ్ఛతి న వాగ్గచ్ఛతి నో మనః । న విద్మో న విజానీమో యథైతదనుశిష్యాత్ ॥ 3 ॥ అన్యదేవ తద్విదితాదథో అవిదితాదధి । ఇతి శుశ్రుమ పూర్వేషాం-యేఀ నస్తద్వ్యాచచక్షిరే ॥ 4 ॥ యద్వాచాఽనభ్యుదితం-యేఀన వాగభ్యుద్యతే । తదేవ బ్రహ్మ త్వం-విఀద్ధి నేదం-యఀదిదముపాసతే ॥ 5 ॥ యన్మనసా న మనుతే యేనాహుర్మనో మతం । తదేవ బ్రహ్మ త్వం-విఀద్ధి నేదం-యఀదిదముపాసతే ॥ 6 ॥ యచ్చక్షుషా న పశ్యతి యేన చక్షూంషి పశ్యతి । తదేవ బ్రహ్మ త్వం-విఀద్ధి నేదం-యఀదిదముపాసతే ॥ 7 ॥ యచ్ఛ్రోత్రేణ న శఋణోతి యేన శ్రోత్రమిదం శ్రుతం । తదేవ బ్రహ్మ త్వం-విఀద్ధి నేదం-యఀదిదముపాసతే ॥ 8 ॥ యత్ప్రాణేన న ప్రాణితి యేన ప్రాణః ప్రణీయతే । తదేవ బ్రహ్మ త్వం-విఀద్ధి నేదం-యఀదిదముపాసతే ॥ 9 ॥ ॥ ఇతి కేనోపనిషది ప్రథమః ఖండః ॥