അസ്യ ശ്രീരംഗനാഥാഷ്ടോത്തരശതനാമസ്തോത്രമഹാമന്ത്രസ്യ വേദവ്യാസോ ഭഗവാനൃഷിഃ അനുഷ്ടുപ്ഛന്ദഃ ഭഗവാൻ ശ്രീമഹാവിഷ്ണുർദേവതാ, ശ്രീരംഗശായീതി ബീജം ശ്രീകാന്ത ഇതി ശക്തിഃ ശ്രീപ്രദ ഇതി കീലകം മമ സമസ്തപാപനാശാർഥേ ശ്രീരംഗരാജപ്രസാദ സിദ്ധ്യർഥേ ജപേ വിനിയോഗഃ । ധൗമ്യ ഉവാച – ശ്രീരംഗശായീ ശ്രീകാന്തഃ ശ്രീപ്രദഃ ശ്രിതവത്സലഃ । അനന്തോ മാധവോ ജേതാ ജഗന്നാഥോ ജഗദ്ഗുരുഃ ॥ 1 ॥ സുരവര്യഃ സുരാരാധ്യഃ സുരരാജാനുജഃ പ്രഭുഃ । ഹരിർഹതാരിർവിശ്വേശഃ ശാശ്വതഃ ശംഭുരവ്യയഃ ॥ 2 ॥ ഭക്താർതിഭഞ്ജനോ വാഗ്മീ വീരോ വിഖ്യാതകീർതിമാൻ । ഭാസ്കരഃ ശാസ്ത്രതത്ത്വജ്ഞോ ദൈത്യശാസ്താഽമരേശ്വരഃ ॥ 3 ॥ നാരായണോ നരഹരിർനീരജാക്ഷോ നരപ്രിയഃ । ബ്രഹ്മണ്യോ ബ്രഹ്മകൃദ്ബ്രഹ്മാ ബ്രഹ്മാംഗോ ബ്രഹ്മപൂജിതഃ ॥ 4 ॥ കൃഷ്ണഃ കൃതജ്ഞോ ഗോവിന്ദോ ഹൃഷീകേശോഽഘനാശനഃ । വിഷ്ണുർജിഷ്ണുർജിതാരാതിഃ സജ്ജനപ്രിയ ഈശ്വരഃ ॥ 5 ॥ ത്രിവിക്രമസ്ത്രിലോകേശഃ ത്രയ്യർഥസ്ത്രിഗുണാത്മകഃ । കാകുത്സ്ഥഃ കമലാകാന്തഃ കാലീയോരഗമർദനഃ ॥ 6 ॥ കാലാംബുദശ്യാമലാംഗഃ കേശവഃ ക്ലേശനാശനഃ । കേശിപ്രഭഞ്ജനഃ കാന്തോ നന്ദസൂനുരരിന്ദമഃ ॥ 7 ॥ രുക്മിണീവല്ലഭഃ ശൗരിർബലഭദ്രോ ബലാനുജഃ । ദാമോദരോ ഹൃഷീകേശോ വാമനോ മധുസൂദനഃ ॥ 8 ॥ പൂതഃ പുണ്യജനധ്വംസീ പുണ്യശ്ലോകശിഖാമണിഃ । ആദിമൂർതിർദയാമൂർതിഃ ശാന്തമൂർതിരമൂർതിമാൻ ॥ 9 ॥ പരംബ്രഹ്മ പരന്ധാമ പാവനഃ പവനോ വിഭുഃ । ചന്ദ്രശ്ഛന്ദോമയോ രാമഃ സംസാരാംബുധിതാരകഃ ॥ 10 ॥ ആദിതേയോഽച്യുതോ ഭാനുഃ ശങ്കരശ്ശിവ ഊർജിതഃ । മഹേശ്വരോ മഹായോഗീ മഹാശക്തിർമഹത്പ്രിയഃ ॥ 11 ॥ ദുർജനധ്വംസകോഽശേഷസജ്ജനോപാസ്തസത്ഫലം । പക്ഷീന്ദ്രവാഹനോഽക്ഷോഭ്യഃ ക്ഷീരാബ്ധിശയനോ വിധുഃ ॥ 12 ॥ ജനാർദനോ ജഗദ്ധേതുർജിതമന്മഥവിഗ്രഹഃ । ചക്രപാണിഃ ശംഖധാരീ ശാരംഗീ ഖഡ്ഗീ ഗദാധരഃ ॥ 13 ॥ ഏവം വിഷ്ണോശ്ശതം നാമ്നാമഷ്ടോത്തരമിഹേരിതം । സ്തോത്രാണാമുത്തമം ഗുഹ്യം നാമരത്നസ്തവാഭിധം ॥ 14 ॥ സർവദാ സർവരോഗഘ്നം ചിന്തിതാർഥഫലപ്രദം । ത്വം തു ശീഘ്രം മഹാരാജ ഗച്ഛ രംഗസ്ഥലം ശുഭം ॥ 15 ॥ സ്നാത്വാ തുലാർകേ കാവേര്യാം മാഹാത്മ്യ ശ്രവണം കുരു । ഗവാശ്വവസ്ത്രധാന്യാന്നഭൂമികന്യാപ്രദോ ഭവ ॥ 16 ॥ ദ്വാദശ്യാം പായസാന്നേന സഹസ്രം ദശ ഭോജയ । നാമരത്നസ്തവാഖ്യേന വിഷ്ണോരഷ്ടശതേന ച । സ്തുത്വാ ശ്രീരംഗനാഥം ത്വമഭീഷ്ടഫലമാപ്നുഹി ॥ 17 ॥ ഇതി തുലാകാവേരീമാഹാത്മ്യേ ശന്തനും പ്രതി ധൗമ്യോപദിഷ്ട ശ്രീരംഗനാഥാഷ്ടോത്തരശതനാമ സ്തോത്രം ।