അഥ നഖസ്തുതിഃ – പാന്ത്വസ്മാൻ പുരുഹൂതവൈരിബലവന്മാതംഗമാദ്യദ്ഘടാ- -കുംഭോച്ചാദ്രിവിപാടനാധികപടു പ്രത്യേക വജ്രായിതാഃ । ശ്രീമത്കണ്ഠീരവാസ്യപ്രതതസുനഖരാ ദാരിതാരാതിദൂര- -പ്രധ്വസ്തധ്വാന്തശാന്തപ്രവിതതമനസാ ഭാവിതാ ഭൂരിഭാഗൈഃ ॥ 1 ॥ ലക്ഷ്മീകാന്ത സമന്തതോഽപി കലയൻ നൈവേശിതുസ്തേ സമം പശ്യാമ്യുത്തമവസ്തു ദൂരതരതോപാസ്തം രസോ യോഽഷ്ടമഃ । യദ്രോഷോത്കര ദക്ഷ നേത്ര കുടില പ്രാന്തോത്ഥിതാഗ്നി സ്ഫുരത് ഖദ്യോതോപമ വിസ്ഫുലിംഗഭസിതാ ബ്രഹ്മേശശക്രോത്കരാഃ ॥ 2 ॥ അഥ വായുസ്തുതിഃ – ശ്രീമദ്വിഷ്ണ്വംഘ്രിനിഷ്ഠാതിഗുണഗുരുതമശ്രീമദാനന്ദതീർഥ- -ത്രൈലോക്യാചാര്യപാദോജ്ജ്വലജലജലസത്പാംസവോഽസ്മാൻ പുനന്തു । വാചാം യത്ര പ്രണേത്രീ ത്രിഭുവനമഹിതാ ശാരദാ ശാരദേന്ദു- -ജ്യോത്സ്നാഭദ്രസ്മിതശ്രീധവലിതകകുഭാ പ്രേമഭാരം ബഭാര ॥ 1 ॥ ഉത്കണ്ഠാകുണ്ഠകോലാഹലജവവിജിതാജസ്രസേവാനുവൃദ്ധ- -പ്രാജ്ഞാത്മജ്ഞാനധൂതാന്ധതമസസുമനോമൗലിരത്നാവലീനാം । ഭക്ത്യുദ്രേകാവഗാഢപ്രഘടനസധടാത്കാരസംഘൃഷ്യമാണ- പ്രാന്തപ്രാഗ്ര്യാംഘ്രിപീഠോത്ഥിതകനകരജഃപിഞ്ജരാരഞ്ജിതാശാഃ ॥ 2 ॥ ജന്മാധിവ്യാധ്യുപാധിപ്രതിഹതിവിരഹപ്രാപകാണാം ഗുണാനാം അഗ്ര്യാണാമർപകാണാം ചിരമുദിതചിദാനന്ദസന്ദോഹദാനാം । ഏതേഷാമേഷ ദോഷപ്രമുഷിതമനസാം ദ്വേഷിണാം ദൂഷകാണാം ദൈത്യാനാമാർതിമന്ധേ തമസി വിദധതാം സംസ്തവേ നാസ്മി ശക്തഃ ॥ 3 ॥ അസ്യാവിഷ്കർതുകാമം കലിമലകലുഷേഽസ്മിൻ ജനേ ജ്ഞാനമാർഗം വന്ദ്യം ചന്ദ്രേന്ദ്രരുദ്രദ്യുമണിഫണിവയോനായകാദ്യൈരിഹാദ്യ । മധ്വാഖ്യം മന്ത്രസിദ്ധം കിമുത കൃതവതോ മാരുതസ്യാവതാരം പാതാരം പാരമേഷ്ട്യം പദമപവിപദഃ പ്രാപ്തുരാപന്നപുംസാം ॥ 4 ॥ ഉദ്യദ്വിദ്യുത്പ്രചണ്ഡാം നിജരുചിനികരവ്യാപ്തലോകാവകാശോ ബിഭ്രദ്ഭീമോ ഭുജേ യോഽഭ്യുദിതദിനകരാഭാംഗദാഢ്യ പ്രകാണ്ഡേ । വീര്യോദ്ധാര്യാം ഗദാഗ്ര്യാമയമിഹ സുമതിം വായുദേവോ വിദധ്യാത് അധ്യാത്മജ്ഞാനനേതാ യതിവരമഹിതോ ഭൂമിഭൂഷാമണിർമേ ॥ 5 ॥ സംസാരോത്താപനിത്യോപശമദസദയസ്നേഹഹാസാംബുപൂര- -പ്രോദ്യദ്വിദ്യാനവദ്യദ്യുതിമണികിരണശ്രേണിസമ്പൂരിതാശഃ । ശ്രീവത്സാങ്കാധിവാസോചിതതരസരലശ്രീമദാനന്ദതീർഥ- -ക്ഷീരാംഭോധിർവിഭിന്ദ്യാദ്ഭവദനഭിമതം ഭൂരി മേ ഭൂതിഹേതുഃ ॥ 6 ॥ മൂർധന്യേഷോഽഞ്ജലിർമേ ദൃഢതരമിഹ തേ ബധ്യതേ ബന്ധപാശ- -ച്ഛേത്രേ ദാത്രേ സുഖാനാം ഭജതി ഭുവി ഭവിഷ്യദ്വിധാത്രേ ദ്യുഭർത്രേ । അത്യന്തം സന്തതം ത്വം പ്രദിശ പദയുഗേ ഹന്ത സന്താപഭാജാ- -മസ്മാകം ഭക്തിമേകാം ഭഗവത ഉത തേ മാധവസ്യാഥ വായോഃ ॥ 7 ॥ സാഭ്രോഷ്ണാഭീശുശുഭ്രപ്രഭമഭയ നഭോ ഭൂരിഭൂഭൃദ്വിഭൂതി- -ഭ്രാജിഷ്ണുർഭൂരൃഭൂണാം ഭവനമപി വിഭോഽഭേദി ബഭ്രേ ബഭൂവേ । യേന ഭ്രൂവിഭ്രമസ്തേ ഭ്രമയതു സുഭൃശം ബഭ്രുവദ്ദുർഭൃതാശാൻ ഭ്രാന്തിർഭേദാവഭാസസ്ത്വിതി ഭയമഭിഭൂർഭോക്ഷ്യതോ മായിഭിക്ഷൂൻ ॥ 8 ॥ യേഽമും ഭാവം ഭജന്തേ സുരമുഖസുജനാരാധിതം തേ തൃതീയം ഭാസന്തേ ഭാസുരൈസ്തേ സഹചരചലിതൈശ്ചാമരൈശ്ചാരുവേഷാഃ । വൈകുണ്ഠേ കണ്ഠലഗ്നസ്ഥിരശുചിവിലസത്കാന്തിതാരുണ്യലീലാ- ലാവണ്യാപൂർണകാന്താകുചഭരസുലഭാശ്ലേഷസമ്മോദസാന്ദ്രാഃ ॥ 9 ॥ ആനന്ദാന്മന്ദമന്ദാ ദദതി ഹി മരുതഃ കുന്ദമന്ദാരനന്ദ്യാ- -വർതാമോദാൻ ദധാനാ മൃദുപദമുദിതോദ്ഗീതകൈഃ സുന്ദരീണാം । വൃന്ദൈരാവന്ദ്യമുക്തേന്ദ്വഹിമഗുമദനാഹീന്ദ്രദേവേന്ദ്രസേവ്യേ മൗകുന്ദേ മന്ദിരേഽസ്മിന്നവിരതമുദയന്മോദിനാം ദേവദേവ ॥ 10 ॥ ഉത്തപ്താഽത്യുത്കടത്വിട് പ്രകടകടകടധ്വാനസംഘട്ടനോദ്യ- -ദ്വിദ്യുദ്വ്യൂഢസ്ഫുലിംഗപ്രകരവികിരണോത്ക്വാഥിതേ ബാധിതാംഗാൻ । ഉദ്ഗാഢം പാത്യമാനാ തമസി തത ഇതഃ കിങ്കരൈഃ പങ്കിലേ തേ പങ്ക്തിർഗ്രാവ്ണാം ഗരിമ്ണാ ഗ്ലപയതി ഹി ഭവദ്വേഷിണോ വിദ്വദാദ്യ ॥ 11 ॥ അസ്മിന്നസ്മദ്ഗുരൂണാം ഹരിചരണചിരധ്യാനസന്മംഗലാനാം യുഷ്മാകം പാർശ്വഭൂമിം ധൃതരണരണികസ്വർഗിസേവ്യാം പ്രപന്നഃ । യസ്തൂദാസ്തേ സ ആസ്തേഽധിഭവമസുലഭക്ലേശനിർമൂകമസ്ത- -പ്രായാനന്ദം കഥഞ്ചിന്ന വസതി സതതം പഞ്ചകഷ്ടേഽതികഷ്ടേ ॥ 12 ॥ ക്ഷുത് ക്ഷാമാൻ രൂക്ഷരക്ഷോരദഖരനഖരക്ഷുണ്ണവിക്ഷോഭിതാക്ഷാ- -നാമഗ്നാനാന്ധകൂപേ ക്ഷുരമുഖമുഖരൈഃ പക്ഷിഭിർവിക്ഷതാംഗാൻ । പൂയാസൃങ്മൂത്രവിഷ്ഠാകൃമികുലകലിലേ തത്ക്ഷണക്ഷിപ്തശക്ത്യാ- -ദ്യസ്ത്രവ്രാതാർദിതാംസ്ത്വദ്ദ്വിഷ ഉപജിഹതേ വജ്രകല്പാ ജലൂകാഃ ॥ 13 ॥ മാതർമേ മാതരിശ്വൻ പിതരതുലഗുരോ ഭ്രാതരിഷ്ടാപ്തബന്ധോ സ്വാമിൻ സർവാന്തരാത്മന്നജര ജരയിതർജന്മമൃത്യാമയാനാം । ഗോവിന്ദേ ദേഹി ഭക്തിം ഭവതി ച ഭഗവന്നൂർജിതാം നിർനിമിത്താം നിർവ്യാജാം നിശ്ചലാം സദ്ഗുണഗണബൃഹതീം ശാശ്വതീമാശു ദേവ ॥ 14 ॥ വിഷ്ണോരത്ത്യുത്തമത്വാദഖിലഗുണഗണൈസ്തത്ര ഭക്തിം ഗരിഷ്ഠാം ആശ്ലിഷ്ടേ ശ്രീധരാഭ്യാമമുമഥ പരിവാരാത്മനാ സേവകേഷു । യഃ സന്ധത്തേ വിരിഞ്ചശ്വസനവിഹഗപാനന്തരുദ്രേന്ദ്രപൂർവേ- -ഷ്വാധ്യായംസ്താരതമ്യം സ്ഫുടമവതി സദാ വായുരസ്മദ്ഗുരുസ്തം ॥ 15 ॥ തത്ത്വജ്ഞാൻ മുക്തിഭാജഃ സുഖയിസി ഹി ഗുരോ യോഗ്യതാതാരതമ്യാ- -ദാധത്സേ മിശ്രബുദ്ധിംസ്ത്രിദിവനിരയഭൂഗോചരാൻ നിത്യബദ്ധാൻ । താമിസ്രാന്ധാദികാഖ്യേ തമസി സുബഹുലം ദുഃഖയസ്യന്യഥാജ്ഞാൻ വിഷ്ണോരാജ്ഞാഭിരിത്ഥം ശൃതിശതമിതിഹാസാദി ചാകർണയാമഃ ॥ 16 ॥ വന്ദേഽഹം തം ഹനൂമാനിതി മഹിതമഹാപൗരുഷോ ബാഹുശാലീ ഖ്യാതസ്തേഽഗ്ര്യോഽവതാരഃ സഹിത ഇഹ ബഹുബ്രഹ്മചര്യാദിധർമൈഃ । സസ്നേഹാനാം സഹസ്വാനഹരഹരഹിതം നിർദഹൻ ദേഹഭാജാം അംഹോമോഹാപഹോ യഃ സ്പൃഹയതി മഹതീം ഭക്തിമദ്യാപി രാമേ ॥ 17 ॥ പ്രാക്പഞ്ചാശത്സഹസ്രൈർവ്യവഹിതമഹിതം യോജനൈഃ പർവതം ത്വം യാവത്സഞ്ജീവനാദ്യൗഷധനിധിമധികപ്രാണ ലങ്കാമനൈഷിഃ । അദ്രാക്ഷീദുത്പതന്തം തത ഉത ഗിരിമുത്പാടയന്തം ഗൃഹീത്വാ യാന്തം ഖേ രാഘവാംഘ്രൗ പ്രണതമപി തദൈകക്ഷണേ ത്വാം ഹി ലോകഃ ॥ 18 ॥ ക്ഷിപ്തഃ പശ്ചാത്സത്സലീലം ശതമതുലമതേ യോജനാനാം സ ഉച്ച- -സ്താവദ്വിസ്താരവംശ്ചാപ്യുപലലവ ഇവ വ്യഗ്രബുദ്ധ്യാ ത്വയാഽതഃ । സ്വസ്വസ്ഥാനസ്ഥിതാതിസ്ഥിരശകലശിലാജാലസംശ്ലേഷനഷ്ട- -ഛ്ഛേദാങ്കഃ പ്രാഗിവാഭൂത് കപിവരവപുഷസ്തേ നമഃ കൗശലായ ॥ 19 ॥ ദൃഷ്ട്വാ ദുഷ്ടാധിപോരഃ സ്ഫുടിതകനകസദ്വർമ ഘൃഷ്ടാസ്ഥികൂടം നിഷ്പിഷ്ടം ഹാടകാദ്രിപ്രകടതടതടാകാതിശങ്കോ ജനോഽഭൂത് । യേനാഽജൗ രാവണാരിപ്രിയനടനപടുർമുഷ്ടിരിഷ്ടം പ്രദേഷ്ടും കിം നേഷ്ടേ മേ സ തേഽഷ്ടാപദകടകതടിത്കോടിഭാമൃഷ്ടകാഷ്ഠഃ ॥ 20 ॥ ദേവ്യാദേശപ്രണീതിദൃഹിണഹരവരാവധ്യരക്ഷോവിഘാതാ- -ദ്യാസേവോദ്യദ്ദയാർദ്രഃ സഹഭുജമകരോദ്രാമനാമാ മുകുന്ദഃ । ദുഷ്പ്രാപേ പാരമേഷ്ഠ്യേ കരതലമതുലം മൂർധിവിന്യസ്യ ധന്യം തന്വൻഭൂയഃ പ്രഭൂതപ്രണയവികസിതാബ്ജേക്ഷണസ്ത്വേക്ഷമാണഃ ॥ 21 ॥ ജഘ്നേ നിഘ്നേന വിഘ്നോ ബഹുലബലബകധ്വംസനാദ്യേന ശോച- -ദ്വിപ്രാനുക്രോശപാശൈരസുവിധൃതിസുഖസ്യൈകചക്രാജനാനാം । തസ്മൈ തേ ദേവ കുർമഃ കുരുകുലപതയേ കർമണാ ച പ്രണാമാൻ കിർമീരം ദുർമതീനാം പ്രഥമമഥ ച യോ നർമണാ നിർമമാഥ ॥ 22 ॥ നിർമൃദ്നന്നത്യയത്നം വിജരവര ജരാസന്ധകായാസ്ഥിസന്ധീൻ യുദ്ധേ ത്വം സ്വധ്വരേ വാ പശുമിവ ദമയൻ വിഷ്ണുപക്ഷദ്വിഡീശം । യാവത്പ്രത്യക്ഷഭൂതം നിഖിലമഖഭുജം തർപയാമാസിഥാസൗ താവത്യാഽയോജി തൃപ്ത്യാ കിമു വദ ഭഗവൻ രാജസൂയാശ്വമേധേ ॥ 23 ॥ ക്ഷ്വേലാക്ഷീണാട്ടഹാസം തവ രണമരിഹന്നുദ്ഗദോദ്ദാമബാഹോഃ ബഹ്വക്ഷൗഹിണ്യനീകക്ഷപണസുനിപുണം യസ്യ സർവോത്തമസ്യ । ശുശ്രൂഷാർഥം ചകർഥ സ്വയമയമഥ സംവക്തുമാനന്ദതീർഥ- -ശ്രീമന്നാമൻസമർഥസ്ത്വമപി ഹി യുവയോഃ പാദപദ്മം പ്രപദ്യേ ॥ 24 ॥ ദൃഹ്യന്തീം ഹൃദൃഹം മാം ദൃതമനില ബലാദ്ദ്രാവയന്തീമവിദ്യാ- -നിദ്രാം വിദ്രാവ്യ സദ്യോരചനപടുമഥാഽപാദ്യ വിദ്യാസമുദ്ര । വാഗ്ദേവീ സാ സുവിദ്യാദ്രവിണദ വിദിതാ ദ്രൗപദീ രുദ്രപത്ന്യാ- -ദുദ്രിക്താ ദ്രാഗഭദ്രാദ്രഹയതു ദയിതാ പൂർവഭീമാഽജ്ഞയാ തേ ॥ 25 ॥ യാഭ്യാം ശുശ്രൂഷുരാസീഃ കുരുകുലജനനേ ക്ഷത്രവിപ്രോദിതാഭ്യാം ബ്രഹ്മഭ്യാം ബൃംഹിതാഭ്യാം ചിതസുഖവപുഷാ കൃഷ്ണനാമാസ്പദാഭ്യാം । നിർഭേദാഭ്യാം വിശേഷാദ്വിവചനവിഷയാഭ്യാമമൂഭ്യാമുഭാഭ്യാം തുഭ്യം ച ക്ഷേമദേഭ്യഃ സരിസിജവിലസല്ലോചനേഭ്യോ നമോഽസ്തു ॥ 26 ॥ ഗച്ഛൻ സൗഗന്ധികാർഥം പഥി സ ഹനുമതഃ പുച്ഛമച്ഛസ്യ ഭീമഃ പ്രോദ്ധർതും നാശകത്സ ത്വമുമുരുവപുഷാ ഭീഷയാമാസ ചേതി । പൂർണജ്ഞാനൗജസോസ്തേ ഗുരുതമ വപുഷോഃ ശ്രീമദാനന്ദതീർഥ ക്രീഡാമാത്രം തദേതത് പ്രമദദ സുധിയാം മോഹക ദ്വേഷഭാജാം ॥ 27 ॥ ബഹ്വീഃ കോടീരടീകഃ കുടലകടുമതീനുത്കടാടോപകോപാൻ ദ്രാക്ച ത്വം സത്വരത്വാച്ചരണദ ഗദയാ പോഥയാമാസിഥാരീൻ । ഉന്മഥ്യാതഥ്യമിഥ്യാത്വവചനവചനാനുത്പഥസ്ഥാംസ്തഥാഽന്യാൻ പ്രായച്ഛഃ സ്വപ്രിയായൈ പ്രിയതമകുസുമം പ്രാണ തസ്മൈ നമസ്തേ ॥ 28 ॥ ദേഹാദുത്ക്രാമിതാനാമധിപതിരസതാമക്രമാദ്വക്രബുദ്ധിഃ ക്രുദ്ധഃ ക്രോധൈകവശ്യഃ ക്രിമിരിവ മണിമാൻ ദുഷ്കൃതീ നിഷ്ക്രിയാർഥം । ചക്രേ ഭൂചക്രമേത്യ ക്രകചമിവ സതാം ചേതസഃ കഷ്ടശാസ്ത്രം ദുസ്തർകം ചക്രപാണേർഗുണഗണവിരഹം ജീവതാം ചാധികൃത്യ ॥ 29 ॥ തദ്ദുഷ്പ്രേക്ഷാനുസാരാത്കതിപയകുനരൈരാദൃതോഽന്യൈർവിസൃഷ്ടോ ബ്രഹ്മാഽഹം നിർഗുണോഽഹം വിതഥമിദമിതി ഹ്യേഷ പാഷണ്ഡവാദഃ । തദ്യുക്ത്യാഭാസജാലപ്രസരവിഷതരൂദ്ദാഹദക്ഷപ്രമാണ- -ജ്വാലാമാലാധരാഗ്നിഃ പവന വിജയതേ തേഽവതാരസ്തൃതീയഃ ॥ 30 ॥ ആക്രോശന്തോ നിരാശാ ഭയഭരവിവശസ്വാശയാശ്ഛിന്നദർപാ വാശന്തോ ദേശനാശസ്വിതി ബത കുധിയാം നാശമാശാദശാഽശു । ധാവന്തോഽശ്ലീലശീലാ വിതഥശപഥശാപാശിവാഃ ശാന്തശൗര്യാ- -സ്ത്വദ്വ്യാഖ്യാസിംഹനാദേ സപദി ദദൃശിരേ മായിഗോമായവസ്തേ ॥ 31 ॥ ത്രിഷ്വപ്യേവാവതാരേഷ്വരിഭിരപഘൃണം ഹിംസിതോ നിർവികാരഃ സർവജ്ഞഃ സർവശക്തിഃ സകലഗുണഗണാപൂർണരൂപപ്രഗൽഭഃ । സ്വച്ഛഃ സ്വച്ഛന്ദമൃത്യുഃ സുഖയസി സുജനം ദേവ കിം ചിത്രമത്ര ത്രാതാ യസ്യ ത്രിധാമാ ജഗദുത വശഗം കിങ്കരാഃ ശങ്കരാദ്യാഃ ॥ 32 ॥ ഉദ്യന്മന്ദസ്മിതശ്രീമൃദു മധുമധുരാലാപപീയൂഷധാരാ- -പൂരാസേകോപശാന്താസുഖസുജനമനോലോചനാപീയമാനം । സന്ദ്രക്ഷ്യേ സുന്ദരം സന്ദുഹദിഹ മഹദാനന്ദമാനന്ദതീർഥ ശ്രീമദ്വക്ത്രേന്ദുബിംബം ദുരതനുദുദിതം നിത്യദാഽഹം കദാ നു ॥ 33 ॥ പ്രാചീനാചീർണപുണ്യോച്ചയചതുരതരാചാരതശ്ചാരുചിത്താ- -നത്യുച്ചാം രോചയന്തീം ശ്രുതിചിതവചനാം ശ്രാവകാംശ്ചോദ്യചുഞ്ചൂൻ । വ്യാഖ്യാമുത്ഖാതദുഃഖാം ചിരമുചിതമഹാചാര്യ ചിന്താരതാംസ്തേ ചിത്രാം സച്ഛാസ്ത്രകർതാശ്ചരണപരിചരാഞ്ഛ്രാവയാസ്മാംശ്ച കിഞ്ചിത് ॥ 34 ॥ പീഠേ രത്നോകപക്ലൃപ്തേ രുചിരരുചിമണിജ്യോതിഷാ സന്നിഷണ്ണം ബ്രഹ്മാണം ഭാവിനം ത്വാം ജ്വലതി നിജപദേ വൈദികാദ്യാ ഹി വിദ്യാഃ । സേവന്തേ മൂർതിമത്യഃ സുചരിത ചരിതം ഭാതി ഗന്ധർവ ഗീതം പ്രത്യേകം ദേവസംസത്സ്വപി തവ ഭഗവന്നർതിതദ്യോവധൂഷു ॥ 35 ॥ സാനുക്രോശൈരജസ്രം ജനിമൃതിനിരയാദ്യൂർമിമാലാവിലേഽസ്മിൻ സംസാരാബ്ധൗ നിമഗ്നാൻ ശരണമശരണാനിച്ഛതോ വീക്ഷ്യ ജന്തൂൻ । യുഷ്മാഭിഃ പ്രാർഥിതഃ സൻ ജലനിധിശയനഃ സത്യവത്യാം മഹർഷേ- -ര്വ്യക്തശ്ചിന്മാത്രമൂർതിർന ഖലു ഭഗവതഃ പ്രാകൃതോ ജാതു ദേഹഃ ॥ 36 ॥ അസ്തവ്യസ്തം സമസ്തശ്രുതിഗതമധമൈ രത്നപൂഗം യഥാഽന്ധൈ- -രർഥം ലോകോപകൃത്യൈ ഗുണഗണനിലയഃ സൂത്രയാമാസ കൃത്സ്നം । യോഽസൗ വ്യാസാഭിധാനസ്തമഹമഹരഹർഭക്തിതസ്ത്വത്പ്രസാദാത് സദ്യോ വിദ്യോപലബ്ധ്യൈ ഗുരുതമമഗുരും ദേവദേവം നമാമി ॥ 37 ॥ ആജ്ഞാമന്യൈരധാര്യാം ശിരസി പരിസരദ്രശ്മികോടീരകോടൗ കൃഷ്ണസ്യാക്ലിഷ്ടകർമാ ദധദനുസരാണാദർഥിതോ ദേവസംഘൈഃ । ഭൂമാവാഗത്യ ഭൂമന്നസുകരമകരോർബ്രഹ്മസൂത്രസ്യ ഭാഷ്യം ദുർഭാഷ്യം വ്യസ്യ ദസ്യോർമണിമത ഉദിതം വേദസദ്യുക്തിഭിസ്ത്വം ॥ 38 ॥ ഭൂത്വാ ക്ഷേത്രേ വിശുദ്ധേ ദ്വിജഗണനിലയേ രൗപ്യപീഠാഭിധാനേ തത്രാപി ബ്രഹ്മജാതിസ്ത്രിഭുവനവിശദേ മധ്യഗേഹാഖ്യഗേഹേ । പാരിവ്രാജ്യാധിരാജഃ പുനരപി ബദരീം പ്രാപ്യ കൃഷ്ണം ച നത്വാ കൃത്വാ ഭാഷ്യാണി സമ്യഗ് വ്യതനുത ച ഭവാൻ ഭാരതാർഥപ്രകാശം ॥ 39 ॥ വന്ദേ തം ത്വാം സുപൂർണപ്രമതിമനുദിനാസേവിതം ദേവവൃന്ദൈഃ വന്ദേ വന്ദാരുമീശേ ശ്രിയ ഉത നിയതം ശ്രീമദാനന്ദതീർഥം । വന്ദേ മന്ദാകിനീസത്സരിദമലജലാസേകസാധിക്യസംഗം വന്ദേഽഹം ദേവ ഭക്ത്യാ ഭവഭയദഹനം സജ്ജനാന്മോദയന്തം ॥ 40 ॥ സുബ്രഹ്മണ്യാഖ്യസൂരേഃ സുത ഇതി സുഭൃശം കേശവാനന്ദതീർഥ- ശ്രീമത്പാദാബ്ജഭക്തഃ സ്തുതിമകൃത ഹരേർവായുദേവസ്യ ചാസ്യ । തത്പാദാർചാദരേണ ഗ്രഥിതപദലസന്മാലയാ ത്വേതയാ യേ സംരാധ്യാമൂ നമന്തി പ്രതതമതിഗുണാ മുക്തിമേതേ വ്രജന്തി ॥ 41 ॥ അഥ ശ്രീനഖസ്തുതിഃ – പാന്ത്വസ്മാൻ പുരുഹൂതവൈരിബലവന്മാതംഗമാദ്യദ്ഘടാ കുംഭോച്ചാദ്രിവിപാടനാധികപടുപ്രത്യേകവജ്രായിതാഃ । ശ്രീമത്കണ്ഠീരവാസ്യ പ്രതത സുനഖരാ ദാരിതാരാതിദൂര- പ്രധ്വസ്തധ്വാന്തശാന്തപ്രവിതതമനസാ ഭാവിതാ നാകിവൃന്ദൈഃ ॥ 1 ॥ ലക്ഷ്മീകാന്ത സമന്തതോഽവികലയൻ നൈവേശിതുസ്തേ സമം പശ്യാമ്യുത്തമവസ്തു ദൂരതരതോഽപാസ്തം രസോ യോഽഷ്ടമഃ । യദ്രോഷോത്കരദക്ഷനേത്രകുടിലപ്രാന്തോത്ഥിതാഗ്നിസ്ഫുരത് ഖദ്യോതോപമവിസ്ഫുലിംഗഭസിതാ ബ്രഹ്മേശശക്രോത്കരാഃ ॥ 2 ॥ ഇതി ശ്രീത്രിവിക്രമപണ്ഡിതാചാര്യ വിരചിതാ വായുസ്തുതിഃ സമാപ്താ ॥