శ్రీ హరి స్తోత్రం - జగజ్జాలపాలం

జగజ్జాలపాలం కనత్కంఠమాలం

శరచ్చంద్రఫాలం మహాదైత్యకాలం ।

నభోనీలకాయం దురావారమాయం

సుపద్మాసహాయం భజేఽహం భజేఽహం ॥ 1 ॥

సదాంభోధివాసం గలత్పుష్పహాసం

జగత్సన్నివాసం శతాదిత్యభాసం ।

గదాచక్రశస్త్రం లసత్పీతవస్త్రం

హసచ్చారువక్త్రం భజేఽహం భజేఽహం ॥ 2 ॥

రమాకంఠహారం శ్రుతివ్రాతసారం

జలాంతర్విహారం ధరాభారహారం ।

చిదానందరూపం మనోజ్ఞస్వరూపం

ధృతానేకరూపం భజేఽహం భజేఽహం ॥ 3 ॥

జరాజన్మహీనం పరానందపీనం

సమాధానలీనం సదైవానవీనం ।

జగజ్జన్మహేతుం సురానీకకేతుం

త్రిలోకైకసేతుం భజేఽహం భజేఽహం ॥ 4 ॥

కృతామ్నాయగానం ఖగాధీశయానం

విముక్తేర్నిదానం హరారాతిమానం ।

స్వభక్తానుకూలం జగద్వృక్షమూలం

నిరస్తార్తశూలం భజేఽహం భజేఽహం ॥ 5 ॥

సమస్తామరేశం ద్విరేఫాభకేశం

జగద్బింబలేశం హృదాకాశవేశం ।

సదా దివ్యదేహం విముక్తాఖిలేహం

సువైకుంఠగేహం భజేఽహం భజేఽహం ॥ 6 ॥

సురాలీబలిష్ఠం త్రిలోకీవరిష్ఠం

గురూణాం గరిష్ఠం స్వరూపైకనిష్ఠం ।

సదా యుద్ధధీరం మహావీరవీరం

భవాంభోధితీరం భజేఽహం భజేఽహం ॥ 7 ॥

రమావామభాగం తలాలగ్ననాగం

కృతాధీనయాగం గతారాగరాగం ।

మునీంద్రైస్సుగీతం సురైస్సంపరీతం

గుణౌఘైరతీతం భజేఽహం భజేఽహం ॥ 8 ॥

ఫలశ్రుతి –

ఇదం యస్తు నిత్యం సమాధాయ చిత్తం

పఠేదష్టకం కంఠహారం మురారేః ।

స విష్ణోర్విశోకం ధ్రువం యాతి లోకం

జరాజన్మశోకం పునర్విందతే నో ॥ 9 ॥

ఇతి శ్రీ పరమహంసస్వామి బ్రహ్మానందవిరచితం శ్రీహరిస్తోత్రం ॥

Recite with devotion and pure heart

Regular practice brings spiritual benefits