आनंदरूपे निजबोधरूपे ब्रह्मस्वरूपे श्रुतिमूर्तिरूपे । शशांकरूपे रमणीयरूपे श्रीरंगरूपे रमतां मनो मे ॥ 1 ॥ कावेरितीरे करुणाविलोले मंदारमूले धृतचारुकेले । दैत्यांतकालेऽखिललोकलीले श्रीरंगलीले रमतां मनो मे ॥ 2 ॥ लक्ष्मीनिवासे जगतां निवासे हृत्पद्मवासे रविबिंबवासे । कृपानिवासे गुणबृंदवासे श्रीरंगवासे रमतां मनो मे ॥ 3 ॥ ब्रह्मादिवंद्ये जगदेकवंद्ये मुकुंदवंद्ये सुरनाथवंद्ये । व्यासादिवंद्ये सनकादिवंद्ये श्रीरंगवंद्ये रमतां मनो मे ॥ 4 ॥ ब्रह्माधिराजे गरुडाधिराजे वैकुंठराजे सुरराजराजे । त्रैलोक्यराजेऽखिललोकराजे श्रीरंगराजे रमतां मनो मे ॥ 5 ॥ अमोघमुद्रे परिपूर्णनिद्रे श्रीयोगनिद्रे ससमुद्रनिद्रे । श्रितैकभद्रे जगदेकनिद्रे श्रीरंगभद्रे रमतां मनो मे ॥ 6 ॥ सचित्रशायी भुजगेंद्रशायी नंदांकशायी कमलांकशायी । क्षीराब्धिशायी वटपत्रशायी श्रीरंगशायी रमतां मनो मे ॥ 7 ॥ इदं हि रंगं त्यजतामिहांगं पुनर्न चांगं यदि चांगमेति । पाणौ रथांगं चरणेऽंबु गांगं याने विहंगं शयने भुजंगम् ॥ 8 ॥ रंगनाथाष्टकं पुण्यं प्रातरुत्थाय यः पठेत् । सर्वान्कामानवाप्नोति रंगिसायुज्यमाप्नुयात् ॥ 9 ॥ इति श्री रंगनाथाष्टकम् ।