അംഗന്യാസഃ – ഓം ഓം പാദയോഃ നമഃ । ഓം നം ജാനുനോഃ നമഃ । ഓം മോം ഊർവോഃ നമഃ । ഓം നാം ഉദരേ നമഃ । ഓം രാം ഹൃദി നമഃ । ഓം യം ഉരസി നമഃ । ഓം ണാം മുഖേ നമഃ । ഓം യം ശിരസി നമഃ । കരന്യാസഃ – ഓം ഓം ദക്ഷിണതർജന്യാം നമഃ । ഓം നം ദക്ഷിണമധ്യമായാം നമഃ । ഓം മോം ദക്ഷിണാനാമികായാം നമഃ । ഓം ഭം ദക്ഷിണകനിഷ്ഠികായാം നമഃ । ഓം ഗം വാമകനിഷ്ഠികായാം നമഃ । ഓം വം വാമാനികായാം നമഃ । ഓം തേം വാമമധ്യമായാം നമഃ । ഓം വാം വാമതർജന്യാം നമഃ । ഓം സും ദക്ഷിണാംഗുഷ്ഠോർധ്വപർവണി നമഃ । ഓം ദേം ദക്ഷിണാംഗുഷ്ഠാധഃ പർവണി നമഃ । ഓം വാം വാമാംഗുഷ്ഠോർധ്വപർവണി നമഃ । ഓം യം വാമാംഗുഷ്ഠാധഃ പർവണി നമഃ । വിഷ്ണുഷഡക്ഷരന്യാസഃ – ഓം ഓം ഹൃദയേ നമഃ । ഓം വിം മൂർധ്നൈ നമഃ । ഓം ഷം ഭ്രുർവോർമധ്യേ നമഃ । ഓം ണം ശിഖായാം നമഃ । ഓം വേം നേത്രയോഃ നമഃ । ഓം നം സർവസന്ധിഷു നമഃ । ഓം മഃ പ്രാച്യാം അസ്ത്രായ ഫട് । ഓം മഃ ആഗ്നേയ്യാം അസ്ത്രായ ഫട് । ഓം മഃ ദക്ഷിണസ്യാം അസ്ത്രായ ഫട് । ഓം മഃ നൈഋത്യേ അസ്ത്രായ ഫട് । ഓം മഃ പ്രതീച്യാം അസ്ത്രായ ഫട് । ഓം മഃ വായവ്യേ അസ്ത്രായ ഫട് । ഓം മഃ ഉദീച്യാം അസ്ത്രായ ഫട് । ഓം മഃ ഐശാന്യാം അസ്ത്രായ ഫട് । ഓം മഃ ഊർധ്വായാം അസ്ത്രായ ഫട് । ഓം മഃ അധരായാം അസ്ത്രായ ഫട് । ശ്രീ ഹരിഃ അഥ ശ്രീനാരായണകവച രാജോവാച – യയാ ഗുപ്തഃ സഹസ്രാക്ഷഃ സവാഹാൻ രിപുസൈനികാൻ । ക്രീഡന്നിവ വിനിർജിത്യ ത്രിലോക്യാ ബുഭുജേ ശ്രിയം ॥ 1 ॥ ഭഗവംസ്തന്മമാഖ്യാഹി വർമ നാരായണാത്മകം । യഥാഽഽതതായിനഃ ശത്രൂൻ യേന ഗുപ്തോഽജയന്മൃധേ ॥ 2 ॥ ശ്രീ ശുക ഉവാച – വൃതഃ പുരോഹിതസ്ത്വാഷ്ട്രോ മഹേന്ദ്രായാനുപൃച്ഛതേ । നാരായണാഖ്യം വർമാഹ തദിഹൈകമനാഃ ശൃണു ॥ 3 ॥ ശ്രീവിശ്വരൂപ ഉവാച – ധൗതാംഘ്രിപാണിരാചമ്യ സപവിത്ര ഉദങ്മുഖഃ । കൃതസ്വാംഗകരന്യാസോ മന്ത്രാഭ്യാം വാഗ്യതഃ ശുചിഃ ॥ 4 ॥ നാരായണമയം വർമ സന്നഹ്യേദ്ഭയ ആഗതേ । ദൈവഭൂതാത്മകർമഭ്യോ നാരായണമയഃ പുമാൻ ॥ 5 ॥ പാദയോർജാനുനോരൂർവോരുദരേ ഹൃദ്യഥോരസി । മുഖേ ശിരസ്യാനുപൂർവ്യാദോങ്കാരാദീനി വിന്യസേത് ॥ 6 ॥ ഓം നമോ നാരായണായേതി വിപര്യയമഥാപി വാ । കരന്യാസം തതഃ കുര്യാദ്ദ്വാദശാക്ഷരവിദ്യയാ ॥ 7 ॥ പ്രണവാദിയകാരാന്തമംഗുല്യംഗുഷ്ഠപർവസു । ന്യസേദ്ധൃദയ ഓങ്കാരം വികാരമനു മൂർധനി ॥ 8 ॥ ഷകാരം തു ഭ്രുവോർമധ്യേ ണകാരം ശിഖയാ ന്യസേത് । വേകാരം നേത്രയോര്യുഞ്ജ്യാന്നകാരം സർവസന്ധിഷു ॥ 9 ॥ മകാരമസ്ത്രമുദ്ദിശ്യ മന്ത്രമൂർതിർഭവേദ്ബുധഃ । സവിസർഗം ഫഡന്തം തത്സർവദിക്ഷു വിനിർദിശേത് ॥ 10 ॥ ഓം വിഷ്ണവേ നമഃ ॥ ഇത്യാത്മാനം പരം ധ്യായേദ്ധ്യേയം ഷട്ഛക്തിഭിര്യുതം । വിദ്യാതേജസ്തപോമൂർതിമിമം മന്ത്രമുദാഹരേത് ॥ 11 ॥ ഓം ഹരിർവിദധ്യാന്മമ സർവരക്ഷാം ന്യസ്താംഘ്രിപദ്മഃ പതഗേന്ദ്ര പൃഷ്ഠേ । ദരാരിചർമാസിഗദേഷുചാപ- -പാശാന്ദധാനോഽഷ്ടഗുണോഽഷ്ടബാഹുഃ ॥ 12 ॥ ജലേഷു മാം രക്ഷതു മത്സ്യമൂർതി- -ര്യാദോഗണേഭ്യോ വരുണസ്യ പാശാത് । സ്ഥലേഷു മായാവടുവാമനോഽവ്യാ- -ത്ത്രിവിക്രമഃ ഖേഽവതു വിശ്വരൂപഃ ॥ 13 ॥ ദുർഗേഷ്വടവ്യാജിമുഖാദിഷു പ്രഭുഃ പായാന്നൃസിംഹോഽസുരയൂഥപാരിഃ । വിമുഞ്ചതോ യസ്യ മഹാട്ടഹാസം ദിശോ വിനേദുർന്യപതംശ്ച ഗർഭാഃ ॥ 14 ॥ രക്ഷത്വസൗ മാധ്വനി യജ്ഞകല്പഃ സ്വദംഷ്ട്രയോന്നീതധരോ വരാഹഃ । രാമോഽദ്രികൂടേഷ്വഥ വിപ്രവാസേ സലക്ഷ്മണോഽവ്യാദ്ഭരതാഗ്രജോഽസ്മാൻ ॥ 15 ॥ മാമുഗ്രധർമാദഖിലാത്പ്രമാദാ- -ന്നാരായണഃ പാതു നരശ്ച ഹാസാത് । ദത്തസ്ത്വയോഗാദഥ യോഗനാഥഃ പായാദ്ഗുണേശഃ കപിലഃ കർമബന്ധാത് ॥ 16 ॥ സനത്കുമാരോഽവതു കാമദേവാ- -ദ്ധയാനനോ മാം പഥി ദേവഹേലനാത് । ദേവർഷിവര്യഃ പുരുഷാർചനാന്തരാ- -ത്കൂർമോ ഹരിർമാം നിരയാദശേഷാത് ॥ 17 ॥ ധന്വന്തരിർഭഗവാൻപാത്വപഥ്യാ- -ദ്ദ്വന്ദ്വാദ്ഭയാദൃഷഭോ നിർജിതാത്മാ । യജ്ഞശ്ച ലോകാദവതാജ്ജനാന്താ- -ദ്ബലോ ഗണാത്ക്രോധവശാദഹീന്ദ്രഃ ॥ 18 ॥ ദ്വൈപായനോ ഭഗവാനപ്രബോധാ- -ദ്ബുദ്ധസ്തു പാഷണ്ഡഗണാത്പ്രമാദാത് । കൽകിഃ കലേഃ കാലമലാത്പ്രപാതു ധർമാവനായോരുകൃതാവതാരഃ ॥ 19 ॥ മാം കേശവോ ഗദയാ പ്രാതരവ്യാ- -ദ്ഗോവിന്ദ ആസംഗവമാത്തവേണുഃ । നാരായണഃ പ്രാഹ്ണ ഉദാത്തശക്തി- -ര്മധ്യന്ദിനേ വിഷ്ണുരരീന്ദ്രപാണിഃ ॥ 20 ॥ ദേവോഽപരാഹ്ണേ മധുഹോഗ്രധന്വാ സായം ത്രിധാമാവതു മാധവോ മാം । ദോഷേ ഹൃഷീകേശ ഉതാർധരാത്രേ നിശീഥ ഏകോഽവതു പദ്മനാഭഃ ॥ 21 ॥ ശ്രീവത്സധാമാഽപരരാത്ര ഈശഃ പ്രത്യുഷ ഈശോഽസിധരോ ജനാർദനഃ । ദാമോദരോഽവ്യാദനുസന്ധ്യം പ്രഭാതേ വിശ്വേശ്വരോ ഭഗവാൻകാലമൂർതിഃ ॥ 22 ॥ ചക്രം യുഗാന്താനലതിഗ്മനേമി ഭ്രമത്സമന്താദ്ഭഗവത്പ്രയുക്തം । ദന്ദഗ്ധി ദന്ദഗ്ധ്യരിസൈന്യമാശു കക്ഷം യഥാ വാതസഖോ ഹുതാശഃ ॥ 23 ॥ ഗദേഽശനിസ്പർശനവിസ്ഫുലിംഗേ നിഷ്പിണ്ഢി നിഷ്പിണ്ഢ്യജിതപ്രിയാസി । കൂഷ്മാണ്ഡവൈനായകയക്ഷരക്ഷോ ഭൂതഗ്രഹാംശ്ചൂർണയ ചൂർണയാരീൻ ॥ 24 ॥ ത്വം യാതുധാനപ്രമഥപ്രേതമാതൃ- -പിശാചവിപ്രഗ്രഹഘോരദൃഷ്ടീൻ । ദരേന്ദ്ര വിദ്രാവയ കൃഷ്ണപൂരിതോ ഭീമസ്വനോഽരേർഹൃദയാനി കമ്പയൻ ॥ 25 ॥ ത്വം തിഗ്മധാരാസിവരാരിസൈന്യ- -മീശപ്രയുക്തോ മമ ഛിന്ധി ഛിന്ധി । ചക്ഷൂംഷി ചർമൻ ശതചന്ദ്ര ഛാദയ ദ്വിഷാമഘോനാം ഹര പാപചക്ഷുഷാം ॥ 26 ॥ യന്നോ ഭയം ഗ്രഹേഭ്യോഽഭൂത്കേതുഭ്യോ നൃഭ്യ ഏവ ച । സരീസൃപേഭ്യോ ദംഷ്ട്രിഭ്യോ ഭൂതേഭ്യോഽഘേഭ്യ ഏവ ച ॥ 27 ॥ സർവാണ്യേതാനി ഭഗവന്നാമരൂപാസ്ത്രകീർതനാത് । പ്രയാന്തു സങ്ക്ഷയം സദ്യോ യേ നഃ ശ്രേയഃപ്രതീപകാഃ ॥ 28 ॥ ഗരുഡോ ഭഗവാൻ സ്തോത്രസ്തോമശ്ഛന്ദോമയഃ പ്രഭുഃ । രക്ഷത്വശേഷകൃച്ഛ്രേഭ്യോ വിഷ്വക്സേനഃ സ്വനാമഭിഃ ॥ 29 ॥ സർവാപദ്ഭ്യോ ഹരേർനാമരൂപയാനായുധാനി നഃ । ബുദ്ധീന്ദ്രിയമനഃപ്രാണാൻപാന്തു പാർഷദഭൂഷണാഃ ॥ 30 ॥ യഥാ ഹി ഭഗവാനേവ വസ്തുതഃ സദസച്ച യത് । സത്യേനാനേന നഃ സർവേ യാന്തു നാശമുപദ്രവാഃ ॥ 31 ॥ യഥൈകാത്മ്യാനുഭാവാനാം വികല്പരഹിതഃ സ്വയം । ഭൂഷണായുധലിംഗാഖ്യാ ധത്തേ ശക്തീഃ സ്വമായയാ ॥ 32 ॥ തേനൈവ സത്യമാനേന സർവജ്ഞോ ഭഗവാൻ ഹരിഃ । പാതു സർവൈഃ സ്വരൂപൈർനഃ സദാ സർവത്ര സർവഗഃ ॥ 33 ॥ വിദിക്ഷു ദിക്ഷൂർധ്വമധഃ സമന്താ- -ദന്തർബഹിർഭഗവാന്നാരസിംഹഃ । പ്രഹാപയഁല്ലോകഭയം സ്വനേന സ്വതേജസാ ഗ്രസ്തസമസ്തതേജാഃ ॥ 34 ॥ മഘവന്നിദമാഖ്യാതം വർമ നാരായണാത്മകം । വിജേഷ്യസ്യഞ്ജസാ യേന ദംശിതോഽസുരയൂഥപാൻ ॥ 35 ॥ ഏതദ്ധാരയമാണസ്തു യം യം പശ്യതി ചക്ഷുഷാ । പദാ വാ സംസ്പൃശേത്സദ്യഃ സാധ്വസാത്സ വിമുച്യതേ ॥ 36 ॥ ന കുതശ്ചിദ്ഭയം തസ്യ വിദ്യാം ധാരയതോ ഭവേത് । രാജദസ്യുഗ്രഹാദിഭ്യോ വ്യാധ്യാദിഭ്യശ്ച കർഹിചിത് ॥ 37 ॥ ഇമാം വിദ്യാം പുരാ കശ്ചിത്കൗശികോ ധാരയൻ ദ്വിജഃ । യോഗധാരണയാ സ്വാംഗം ജഹൗ സ മരുധന്വനി ॥ 38 ॥ തസ്യോപരി വിമാനേന ഗന്ധർവപതിരേകദാ । യയൗ ചിത്രരഥഃ സ്ത്രീഭിർവൃതോ യത്ര ദ്വിജക്ഷയഃ ॥ 39 ॥ ഗഗനാന്ന്യപതത്സദ്യഃ സവിമാനോ ഹ്യവാക്ഛിരാഃ । സ വാലഖില്യവചനാദസ്ഥീന്യാദായ വിസ്മിതഃ । പ്രാപ്യ പ്രാച്യാം സരസ്വത്യാം സ്നാത്വാ ധാമ സ്വമന്വഗാത് ॥ 40 ॥ ശ്രീ ശുക ഉവാച – യ ഇദം ശൃണുയാത്കാലേ യോ ധാരയതി ചാദൃതഃ । തം നമസ്യന്തി ഭൂതാനി മുച്യതേ സർവതോ ഭയാത് ॥ 41 ॥ ഏതാം വിദ്യാമധിഗതോ വിശ്വരൂപാച്ഛതക്രതുഃ । ത്രൈലോക്യലക്ഷ്മീം ബുഭുജേ വിനിർജിത്യ മൃധേഽസുരാൻ ॥ 42 ॥ ഇതി ശ്രീമദ്ഭാഗവതേ മഹാപുരാണേ ഷഷ്ഠസ്കന്ധേ നാരായണവർമോപദേശോ നാമാഷ്ടമോഽധ്യായഃ ।