അസ്യ ശ്രീനാരായണഹൃദയസ്തോത്രമന്ത്രസ്യ ഭാർഗവ ഋഷിഃ, അനുഷ്ടുപ്ഛന്ദഃ, ശ്രീലക്ഷ്മീനാരായണോ ദേവതാ, ഓം ബീജം, നമശ്ശക്തിഃ, നാരായണായേതി കീലകം, ശ്രീലക്ഷ്മീനാരായണ പ്രീത്യർഥേ ജപേ വിനിയോഗഃ । കരന്യാസഃ – ഓം നാരായണഃ പരം ജ്യോതിരിതി അംഗുഷ്ഠാഭ്യാം നമഃ । നാരായണഃ പരം ബ്രഹ്മേതി തർജനീഭ്യാം നമഃ । നാരായണഃ പരോ ദേവ ഇതി മധ്യമാഭ്യാം നമഃ । നാരായണഃ പരം ധാമേതി അനാമികാഭ്യാം നമഃ । നാരായണഃ പരോ ധർമ ഇതി കനിഷ്ഠികാഭ്യാം നമഃ । വിശ്വം നാരായണ ഇതി കരതലകരപൃഷ്ഠാഭ്യാം നമഃ । അംഗന്യാസഃ – നാരായണഃ പരം ജ്യോതിരിതി ഹൃദയായ നമഃ । നാരായണഃ പരം ബ്രഹ്മേതി ശിരസേ സ്വാഹാ । നാരായണഃ പരോ ദേവ ഇതി ശിഖായൈ വൗഷട് । നാരായണഃ പരം ധാമേതി കവചായ ഹും । നാരായണഃ പരോ ധർമ ഇതി നേത്രാഭ്യാം വൗഷട് । വിശ്വം നാരായണ ഇതി അസ്ത്രായ ഫട് । ദിഗ്ബന്ധഃ । ഓം ഐന്ദ്ര്യാദിദശദിശം ഓം നമഃ സുദർശനായ സഹസ്രാരായ ഹും ഫട് ബധ്നാമി നമശ്ചക്രായ സ്വാഹാ । ഇതി പ്രതിദിശം യോജ്യം । അഥ ധ്യാനം – ഉദ്യാദാദിത്യസങ്കാശം പീതവാസം ചതുർഭുജം । ശംഖചക്രഗദാപാണിം ധ്യായേല്ലക്ഷ്മീപതിം ഹരിം ॥ 1 ॥ ത്രൈലോക്യാധാരചക്രം തദുപരി കമഠം തത്ര ചാനന്തഭോഗീ തന്മധ്യേ ഭൂമിപദ്മാങ്കുശശിഖരദലം കർണികാഭൂതമേരും । തത്രസ്ഥം ശാന്തമൂർതിം മണിമയമകുടം കുണ്ഡലോദ്ഭാസിതാംഗം ലക്ഷ്മീനാരായണാഖ്യം സരസിജനയനം സന്തതം ചിന്തയാമി ॥ 2 ॥ അഥ മൂലാഷ്ടകം – ഓം ॥ നാരായണഃ പരം ജ്യോതിരാത്മാ നാരായണഃ പരഃ । നാരായണഃ പരം ബ്രഹ്മ നാരായണ നമോഽസ്തു തേ ॥ 1 ॥ നാരായണഃ പരോ ദേവോ ധാതാ നാരായണഃ പരഃ । നാരായണഃ പരോ ധാതാ നാരായണ നമോഽസ്തു തേ ॥ 2 ॥ നാരായണഃ പരം ധാമ ധ്യാനം നാരായണഃ പരഃ । നാരായണ പരോ ധർമോ നാരായണ നമോഽസ്തു തേ ॥ 3 ॥ നാരായണഃ പരോവേദ്യഃ വിദ്യാ നാരായണഃ പരഃ । വിശ്വം നാരായണഃ സാക്ഷാന്നാരായണ നമോഽസ്തു തേ ॥ 4 ॥ നാരായണാദ്വിധിർജാതോ ജാതോ നാരായണാദ്ഭവഃ । ജാതോ നാരായണാദിന്ദ്രോ നാരായണ നമോഽസ്തു തേ ॥ 5 ॥ രവിർനാരായണസ്തേജഃ ചന്ദ്രോ നാരായണോ മഹഃ । വഹ്നിർനാരായണഃ സാക്ഷാന്നാരായണ നമോഽസ്തു തേ ॥ 6 ॥ നാരായണ ഉപാസ്യഃ സ്യാദ്ഗുരുർനാരായണഃ പരഃ । നാരായണഃ പരോ ബോധോ നാരായണ നമോഽസ്തു തേ ॥ 7 ॥ നാരായണഃ ഫലം മുഖ്യം സിദ്ധിർനാരായണഃ സുഖം । സേവ്യോനാരായണഃ ശുദ്ധോ നാരായണ നമോഽസ്തു തേ ॥ 8 ॥ അഥ പ്രാർഥനാദശകം – നാരായണ ത്വമേവാസി ദഹരാഖ്യേ ഹൃദി സ്ഥിതഃ । പ്രേരകഃ പ്രേര്യമാണാനാം ത്വയാ പ്രേരിതമാനസഃ ॥ 9 ॥ ത്വദാജ്ഞാം ശിരസാ ധൃത്വാ ജപാമി ജനപാവനം । നാനോപാസനമാർഗാണാം ഭവകൃദ്ഭാവബോധകഃ ॥ 10 ॥ ഭാവാർഥകൃദ്ഭവാതീതോ ഭവ സൗഖ്യപ്രദോ മമ । ത്വന്മായാമോഹിതം വിശ്വം ത്വയൈവ പരികല്പിതം ॥ 11 ॥ ത്വദധിഷ്ഠാനമാത്രേണ സാ വൈ സർവാർഥകാരിണീ । ത്വമേതാം ച പുരസ്കൃത്യ സർവകാമാൻപ്രദർശയ ॥ 12 ॥ ന മേ ത്വദന്യസ്ത്രാതാസ്തി ത്വദന്യന്ന ഹി ദൈവതം । ത്വദന്യം ന ഹി ജാനാമി പാലകം പുണ്യവർധനം ॥ 13 ॥ യാവത്സാംസാരികോ ഭാവോ മനസ്സ്ഥോ ഭാവനാത്മകഃ । താവത്സിദ്ധിർഭവേത്സാധ്യാ സർവഥാ സർവദാ വിഭോ ॥ 14 ॥ പാപിനാമഹമേവാഗ്ര്യോ ദയാലൂനാം ത്വമഗ്രണീഃ । ദയനീയോ മദന്യോഽസ്തി തവ കോഽത്ര ജഗത്ത്രയേ ॥ 15 ॥ ത്വയാഹം നൈവ സൃഷ്ടശ്ചേന്ന സ്യാത്തവ ദയാലുതാ । ആമയോ വാ ന സൃഷ്ടശ്ചേദൗഷധസ്യ വൃഥോദയഃ ॥ 16 ॥ പാപസംഘപരിശ്രാന്തഃ പാപാത്മാ പാപരൂപധൃത് । ത്വദന്യഃ കോഽത്ര പാപേഭ്യസ്ത്രാതാസ്തി ജഗതീതലേ ॥ 17 ॥ ത്വമേവ മാതാ ച പിതാ ത്വമേവ ത്വമേവ ബന്ധുശ്ച സഖാ ത്വമേവ । ത്വമേവ സേവ്യശ്ച ഗുരുസ്ത്വമേവ ത്വമേവ സർവം മമ ദേവ ദേവ ॥ 18 ॥ പ്രാർഥനാദശകം ചൈവ മൂലാഷ്ടകമതഃ പരം । യഃ പഠേച്ഛൃണുയാന്നിത്യം തസ്യ ലക്ഷ്മീഃ സ്ഥിരാ ഭവേത് ॥ 19 ॥ നാരായണസ്യ ഹൃദയം സർവാഭീഷ്ടഫലപ്രദം । ലക്ഷ്മീഹൃദയകം സ്തോത്രം യദി ചേത്തദ്വിനാകൃതം ॥ 20 ॥ തത്സർവം നിഷ്ഫലം പ്രോക്തം ലക്ഷ്മീഃ ക്രുദ്ധ്യതി സർവദാ । ഏതത്സങ്കലിതം സ്തോത്രം സർവകാമഫലപ്രദം ॥ 21 ॥ ലക്ഷ്മീഹൃദയകം ചൈവ തഥാ നാരായണാത്മകം । ജപേദ്യഃ സങ്കലീകൃത്യ സർവാഭീഷ്ടമവാപ്നുയാത് ॥ 22 ॥ നാരായണസ്യ ഹൃദയമാദൗ ജപ്ത്വാ തതഃ പരം । ലക്ഷ്മീഹൃദയകം സ്തോത്രം ജപേന്നാരായണം പുനഃ ॥ 23 ॥ പുനർനാരായണം ജപ്ത്വാ പുനർലക്ഷ്മീനുതിം ജപേത് । പുനർനാരായണം ജാപ്യം സങ്കലീകരണം ഭവേത് ॥ 24 ॥ ഏവം മധ്യേ ദ്വിവാരേണ ജപേത്സങ്കലിതം തു തത് । ലക്ഷ്മീഹൃദയകം സ്തോത്രം സർവകാമപ്രകാശിതം ॥ 25 ॥ തദ്വജ്ജപാദികം കുര്യാദേതത്സങ്കലിതം ശുഭം । സർവാൻകാമാനവാപ്നോതി ആധിവ്യാധിഭയം ഹരേത് ॥ 26 ॥ ഗോപ്യമേതത്സദാ കുര്യാന്ന സർവത്ര പ്രകാശയേത് । ഇതി ഗുഹ്യതമം ശാസ്ത്രം പ്രാപ്തം ബ്രഹ്മാദികൈഃ പുരാ ॥ 27 ॥ തസ്മാത്സർവപ്രയത്നേന ഗോപയേത്സാധയേസുധീഃ । യത്രൈതത്പുസ്തകം തിഷ്ഠേല്ലക്ഷ്മീനാരായണാത്മകം ॥ 28 ॥ ഭൂതപൈശാചവേതാല ഭയം നൈവ തു സർവദാ । ലക്ഷ്മീഹൃദയകം പ്രോക്തം വിധിനാ സാധയേത്സുധീഃ ॥ 29 ॥ ഭൃഗുവാരേ ച രാത്രൗ ച പൂജയേത്പുസ്തകദ്വയം । സർവഥാ സർവദാ സത്യം ഗോപയേത്സാധയേത്സുധീഃ । ഗോപനാത്സാധനാല്ലോകേ ധന്യോ ഭവതി തത്ത്വതഃ ॥ 30 ॥ ഇത്യഥർവരഹസ്യേ ഉത്തരഭാഗേ നാരായണഹൃദയം സമ്പൂർണം ।