ವಾರಾಹೀ ನಿಗ್ರಹಾಷ್ಟಕಂ

ದೇವಿ ಕ್ರೋಡಮುಖಿ ತ್ವದಂಘ್ರಿಕಮಲದ್ವಂದ್ವಾನುರಕ್ತಾತ್ಮನೇ

ಮಹ್ಯಂ ದ್ರುಹ್ಯತಿ ಯೋ ಮಹೇಶಿ ಮನಸಾ ಕಾಯೇನ ವಾಚಾ ನರಃ ।

ತಸ್ಯಾಶು ತ್ವದಯೋಗ್ರನಿಷ್ಠುರಹಲಾಘಾತಪ್ರಭೂತವ್ಯಥಾ-

-ಪರ್ಯಸ್ಯನ್ಮನಸೋ ಭವಂತು ವಪುಷಃ ಪ್ರಾಣಾಃ ಪ್ರಯಾಣೋನ್ಮುಖಾಃ ॥ 1 ॥

ದೇವಿ ತ್ವತ್ಪದಪದ್ಮಭಕ್ತಿವಿಭವಪ್ರಕ್ಷೀಣದುಷ್ಕರ್ಮಣಿ

ಪ್ರಾದುರ್ಭೂತನೃಶಂಸಭಾವಮಲಿನಾಂ ವೃತ್ತಿಂ ವಿಧತ್ತೇ ಮಯಿ ।

ಯೋ ದೇಹೀ ಭುವನೇ ತದೀಯಹೃದಯಾನ್ನಿರ್ಗತ್ವರೈರ್ಲೋಹಿತೈಃ

ಸದ್ಯಃ ಪೂರಯಸೇ ಕರಾಬ್ಜಚಷಕಂ ವಾಂಛಾಫಲೈರ್ಮಾಮಪಿ ॥ 2 ॥

ಚಂಡೋತ್ತುಂಡವಿದೀರ್ಣದಂಷ್ಟ್ರಹೃದಯಪ್ರೋದ್ಭಿನ್ನರಕ್ತಚ್ಛಟಾ

ಹಾಲಾಪಾನಮದಾಟ್ಟಹಾಸನಿನದಾಟೋಪಪ್ರತಾಪೋತ್ಕಟಂ ।

ಮಾತರ್ಮತ್ಪರಿಪಂಥಿನಾಮಪಹೃತೈಃ ಪ್ರಾಣೈಸ್ತ್ವದಂಘ್ರಿದ್ವಯಂ

ಧ್ಯಾನೋದ್ದಾಮರವೈರ್ಭವೋದಯವಶಾತ್ಸಂತರ್ಪಯಾಮಿ ಕ್ಷಣಾತ್ ॥ 3 ॥

ಶ್ಯಾಮಾಂ ತಾಮರಸಾನನಾಂಘ್ರಿನಯನಾಂ ಸೋಮಾರ್ಧಚೂಡಾಂ ಜಗ-

-ತ್ತ್ರಾಣವ್ಯಗ್ರಹಲಾಯುಧಾಗ್ರಮುಸಲಾಂ ಸಂತ್ರಾಸಮುದ್ರಾವತೀಂ ।

ಯೇ ತ್ವಾಂ ರಕ್ತಕಪಾಲಿನೀಂ ಹರವರಾರೋಹೇ ವರಾಹಾನನಾಂ

ಭಾವೈಃ ಸಂದಧತೇ ಕಥಂ ಕ್ಷಣಮಪಿ ಪ್ರಾಣಂತಿ ತೇಷಾಂ ದ್ವಿಷಃ ॥ 4 ॥

ವಿಶ್ವಾಧೀಶ್ವರವಲ್ಲಭೇ ವಿಜಯಸೇ ಯಾ ತ್ವಂ ನಿಯಂತ್ರ್ಯಾತ್ಮಿಕಾ

ಭೂತಾಂತಾ ಪುರುಷಾಯುಷಾವಧಿಕರೀ ಪಾಕಪ್ರದಾಕರ್ಮಣಾಂ ।

ತ್ವಾಂ ಯಾಚೇ ಭವತೀಂ ಕಿಮಪ್ಯವಿತಥಂ ಯೋ ಮದ್ವಿರೋಧೀಜನ-

-ಸ್ತಸ್ಯಾಯುರ್ಮಮ ವಾಂಛಿತಾವಧಿಭವೇನ್ಮಾತಸ್ತವೈವಾಜ್ಞಯಾ ॥ 5 ॥

ಮಾತಃ ಸಮ್ಯಗುಪಾಸಿತುಂ ಜಡಮತಿಸ್ತ್ವಾಂ ನೈವ ಶಕ್ನೋಮ್ಯಹಂ

ಯದ್ಯಪ್ಯನ್ವಿತದೈಶಿಕಾಂಘ್ರಿಕಮಲಾನುಕ್ರೋಶಪಾತ್ರಸ್ಯ ಮೇ ।

ಜಂತುಃ ಕಶ್ಚನ ಚಿಂತಯತ್ಯಕುಶಲಂ ಯಸ್ತಸ್ಯ ತದ್ವೈಶಸಂ

ಭೂಯಾದ್ದೇವಿ ವಿರೋಧಿನೋ ಮಮ ಚ ತೇ ಶ್ರೇಯಃ ಪದಾಸಂಗಿನಃ ॥ 6 ॥

ವಾರಾಹೀ ವ್ಯಥಮಾನಮಾನಸಗಲತ್ಸೌಖ್ಯಂ ತದಾಶಾಬಲಿಂ

ಸೀದಂತಂ ಯಮಪಾಕೃತಾಧ್ಯವಸಿತಂ ಪ್ರಾಪ್ತಾಖಿಲೋತ್ಪಾದಿತಂ ।

ಕ್ರಂದದ್ಬಂಧುಜನೈಃ ಕಲಂಕಿತತುಲಂ ಕಂಠವ್ರಣೋದ್ಯತ್ಕೃಮಿ

ಪಶ್ಯಾಮಿ ಪ್ರತಿಪಕ್ಷಮಾಶು ಪತಿತಂ ಭ್ರಾಂತಂ ಲುಠಂತಂ ಮುಹುಃ ॥ 7 ॥

ವಾರಾಹೀ ತ್ವಮಶೇಷಜಂತುಷು ಪುನಃ ಪ್ರಾಣಾತ್ಮಿಕಾ ಸ್ಪಂದಸೇ

ಶಕ್ತಿವ್ಯಾಪ್ತಚರಾಚರಾ ಖಲು ಯತಸ್ತ್ವಾಮೇತದಭ್ಯರ್ಥಯೇ ।

ತ್ವತ್ಪಾದಾಂಬುಜಸಂಗಿನೋ ಮಮ ಸಕೃತ್ಪಾಪಂ ಚಿಕೀರ್ಷಂತಿ ಯೇ

ತೇಷಾಂ ಮಾ ಕುರು ಶಂಕರಪ್ರಿಯತಮೇ ದೇಹಾಂತರಾವಸ್ಥಿತಿಂ ॥ 8 ॥

ಇತಿ ಶ್ರೀವಾರಾಹೀನಿಗ್ರಹಾಷ್ಟಕಂ ।

Recite with devotion and pure heart

Regular practice brings spiritual benefits