हयग्रीव उवाच । शृणु द्वादशनामानि तस्या देव्या घटोद्भव । यदाकर्णनमात्रेण प्रसन्ना सा भविष्यति ॥ 1 ॥ पञ्चमी दण्डनाथा च सङ्केता समयेश्वरी । तथा समयसङ्केता वाराही पोत्रिणी शिवा ॥ 2 ॥ वार्ताली च महासेनाप्याज्ञाचक्रेश्वरी तथा । अरिघ्नी चेति सम्प्रोक्तं नामद्वादशकं मुने ॥ 3 ॥ नामद्वादशकाभिख्य वज्रपञ्जर मध्यगः । सङ्कटे दुःखमाप्नोति न कदाचन मानवः ॥ 4 ॥ एतैर्नामभिरभ्रस्थाः सङ्केतां बहु तुष्टुवुः । तेषामनुग्रहार्थाय प्रचचाल च सा पुनः ॥ 5 ॥ इति श्रीब्रह्माण्डपुराणे ललितोपाख्याने सप्तदशोध्याये श्री वाराही द्वादशनाम स्तोत्रम् ।