ശ്രീ വരാഹമുഖീ സ്തവഃ

കുവലയനിഭാ കൗശേയാർധോരുകാ മുകുടോജ്ജ്വലാ

ഹലമുസലിനീ സദ്ഭക്തേഭ്യോ വരാഭയദായിനീ ।

കപിലനയനാ മധ്യേ ക്ഷാമാ കഠോരഘനസ്തനീ

ജയതി ജഗതാം മാതഃ സാ തേ വരാഹമുഖീ തനുഃ ॥ 1 ॥

തരതി വിപദോ ഘോരാ ദൂരാത്പരിഹ്രിയതേ ഭയം

സ്ഖലിതമതിഭിർഭൂതപ്രേതൈഃ സ്വയം വ്രിയതേ ശ്രിയാ ।

ക്ഷപയതി രിപൂനീഷ്ടേ വാചാം രണേ ലഭതേ ജയം

വശയതി ജഗത്സർവം വാരാഹി യസ്ത്വയി ഭക്തിമാൻ ॥ 2 ॥

സ്തിമിതഗതയഃ സീദദ്വാചഃ പരിച്യുതഹേതയഃ

ക്ഷുഭിതഹൃദയാഃ സദ്യോ നശ്യദ്ദൃശോ ഗലിതൗജസഃ ।

ഭയപരവശാ ഭഗ്നോത്സാഹാഃ പരാഹതപൗരുഷാഃ

ഭഗവതി പുരസ്ത്വദ്ഭക്താനാം ഭവന്തി വിരോധിനഃ ॥ 3 ॥

കിസലയമൃദുർഹസ്തഃ ക്ലിശ്യേത കന്ദുകലീലയാ

ഭഗവതി മഹാഭാരഃ ക്രീഡാസരോരുഹമേവ തേ ।

തദപി മുസലം ധത്സേ ഹസ്തേ ഹലം സമയദ്രുഹാം

ഹരസി ച തദാഘാതൈഃ പ്രാണാനഹോ തവ സാഹസം ॥ 4 ॥

ജനനി നിയതസ്ഥാനേ ത്വദ്വാമദക്ഷിണപാർശ്വയോ-

-ര്മൃദുഭുജലതാമന്ദോക്ഷേപപ്രവാതിതചാമരേ ।

സതതമുദിതേ ഗുഹ്യാചാരദ്രുഹാം രുധിരാസവൈ-

-രുപശമയതാം ശത്രൂൻ സർവാനുഭേ മമ ദൈവതേ ॥ 5 ॥

ഹരതു ദുരിതം ക്ഷേത്രാധീശഃ സ്വശാസനവിദ്വിഷാം

രുധിരമദിരാമത്തഃ പ്രാണോപഹാരബലിപ്രിയഃ ।

അവിരതചടത്കുർവദ്ദംഷ്ട്രാസ്ഥികോടിരടന്മുഖോ

ഭഗവതി സ തേ ചണ്ഡോച്ചണ്ഡഃ സദാ പുരതഃ സ്ഥിതഃ ॥ 6 ॥

ക്ഷുഭിതമകരൈർവീചീഹസ്തോപരുദ്ധപരസ്പരൈ-

-ശ്ചതുരുദധിഭിഃ ക്രാന്താ കല്പാന്തദുർലലിതോദകൈഃ ।

ജനനി കഥമുത്തിഷ്ഠേത് പാതാലസർപബിലാദിലാ

തവ തു കുടിലേ ദംഷ്ട്രാകോടീ ന ചേദവലംബനം ॥ 7 ॥

തമസി ബഹുലേ ശൂന്യാടവ്യാം പിശാചനിശാചര-

-പ്രമഥകലഹേ ചോരവ്യാഘ്രോരഗദ്വിപസങ്കടേ ।

ക്ഷുഭിതമനസഃ ക്ഷുദ്രസ്യൈകാകിനോഽപി കുതോ ഭയം

സകൃദപി മുഖേ മാതസ്ത്വന്നാമ സന്നിഹിതം യദി ॥ 8 ॥

വിദിതവിഭവം ഹൃദ്യൈഃ പദ്യൈർവരാഹമുഖീസ്തവം

സകലഫലദം പൂർണം മന്ത്രാക്ഷരൈരിമമേവ യഃ ।

പഠതി സ പടുഃ പ്രാപ്നോത്യായുശ്ചിരം കവിതാം പ്രിയാം

സുതസുഖധനാരോഗ്യം കീർതിം ശ്രിയം ജയമുർവരാം ॥ 9 ॥

ഇതി ശ്രീ വരാഹമുഖീ സ്തവഃ ।

Recite with devotion and pure heart

Regular practice brings spiritual benefits