ಶ್ರೀ ರಾಮಚಂದ್ರಾಷ್ಟಕಂ

ಸುಗ್ರೀವಮಿತ್ರಂ ಪರಮಂ ಪವಿತ್ರಂ

ಸೀತಾಕಲತ್ರಂ ನವಮೇಘಗಾತ್ರಂ ।

ಕಾರುಣ್ಯಪಾತ್ರಂ ಶತಪತ್ರನೇತ್ರಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 1 ॥

ಸಂಸಾರಸಾರಂ ನಿಗಮಪ್ರಚಾರಂ

ಧರ್ಮಾವತಾರಂ ಹೃತಭೂಮಿಭಾರಂ ।

ಸದಾಽವಿಕಾರಂ ಸುಖಸಿಂಧುಸಾರಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 2 ॥

ಲಕ್ಷ್ಮೀವಿಲಾಸಂ ಜಗತಾಂ ನಿವಾಸಂ

ಲಂಕಾವಿನಾಶಂ ಭುವನಪ್ರಕಾಶಂ ।

ಭೂದೇವವಾಸಂ ಶರದಿಂದುಹಾಸಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 3 ॥

ಮಂದಾರಮಾಲಂ ವಚನೇ ರಸಾಲಂ

ಗುಣೈರ್ವಿಶಾಲಂ ಹತಸಪ್ತತಾಲಂ ।

ಕ್ರವ್ಯಾದಕಾಲಂ ಸುರಲೋಕಪಾಲಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 4 ॥

ವೇದಾಂತಗಾನಂ ಸಕಲೈಸ್ಸಮಾನಂ

ಹೃತಾರಿಮಾನಂ ತ್ರಿದಶಪ್ರಧಾನಂ ।

ಗಜೇಂದ್ರಯಾನಂ ವಿಗತಾವಸಾನಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 5 ॥

ಶ್ಯಾಮಾಭಿರಾಮಂ ನಯನಾಭಿರಾಮಂ

ಗುಣಾಭಿರಾಮಂ ವಚನಾಭಿರಾಮಂ ।

ವಿಶ್ವಪ್ರಣಾಮಂ ಕೃತಭಕ್ತಕಾಮಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 6 ॥

ಲೀಲಾಶರೀರಂ ರಣರಂಗಧೀರಂ

ವಿಶ್ವೈಕಸಾರಂ ರಘುವಂಶಹಾರಂ ।

ಗಂಭೀರವಾದಂ ಜಿತಸರ್ವವಾದಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 7 ॥

ಖಲೇ ಕೃತಾಂತಂ ಸ್ವಜನೇ ವಿನೀತಂ

ಸಾಮೋಪಗೀತಂ ಮನಸಾ ಪ್ರತೀತಂ ।

ರಾಗೇಣ ಗೀತಂ ವಚನಾದತೀತಂ

ಶ್ರೀರಾಮಚಂದ್ರಂ ಸತತಂ ನಮಾಮಿ ॥ 8 ॥

ಶ್ರೀರಾಮಚಂದ್ರಸ್ಯ ವರಾಷ್ಟಕಂ ತ್ವಾಂ

ಮಯೇರಿತಂ ದೇವಿ ಮನೋಹರಂ ಯೇ ।

ಪಠಂತಿ ಶೃಣ್ವಂತಿ ಗೃಣಂತಿ ಭಕ್ತ್ಯಾ

ತೇ ಸ್ವೀಯಕಾಮಾನ್ ಪ್ರಲಭಂತಿ ನಿತ್ಯಂ ॥ 9 ॥

ಇತಿ ಶ್ರೀರಾಮಚಂದ್ರಾಷ್ಟಕಂ ।

Recite with devotion and pure heart

Regular practice brings spiritual benefits